Idibo Iruiruo A bi Ru Iruo Eghaghae
1 “A dhesẹ oma via wọhọ ezae nọ e ghinẹ roma mudhe nọ ẹrọwọ rai o dhesẹ oma via no evaọ iruẹru Uvie ọwhọ gbe evaọ obufihọ kẹ amọfa re a jọ gaga evaọ ẹrọwọ na.” Ere Organized to Accomplish Our Ministry ọ tae, evaọ ẹwẹ-obe avọ 57, kpahe idibo iruiruo. Uzẹme, oriruo abọ-ẹzi nọ idibo iruiruo mai a fihotọ no o ghine fo aruorokele. Re a lele ai gbe ekpako na ruiruo ‘o rọ kẹ orro ugboma na gbe ọbọga riẹ evaọ uyoyou.’—Ẹf. 4:16.
2 Idibo iruiruo a bi ru obọdẹ iruo evaọ ukoko na. Roro kpahe iruo eghaghae rai na kpobi! A rẹ rẹrote igho, ebe, emagazini, evi ọ emagazini, gbe ẹkwotọ; a re ruiruo wọhọ eruẹrẹahwohọ, rẹrote ekwakwa ikporakporo, je fiobọhọ sẹro Ọgwa Uvie na. A re w’obọ evaọ Isukulu Odibọgba Ọghẹnẹ na gbe Ewuhrẹ Odibọgba. Ejọ rai e rẹ sae tubẹ kẹ evuẹ ogbotu hayo sẹro iwuhrẹ ukoko na jọ dede. Wọhọ ekwakwa ugboma na, idibo iruiruo i bi ruiruo nọ ma gwọlọ.—1 Kọr. 12:12-26.
3 Nọ a tẹ ruẹ idibo iruiruo nọ i bi yoẹme kẹ ekpako na wọhọ abọ jọ ọrọ ugboma odibo ọvo avọ adhẹẹ gbe otoriẹ o rẹ tudu họ amọfa awọ re a ru epọvo na. (Kọl. 2:19) Ẹkwoma erugba ewha-iruo rai avọ ẹrọwọ ẹsikpobi gbe ẹkwoma isiuru omobọ ohwo kẹ amọfa, a rẹ zọhọ fihọ ukoko nọ o rẹ nyaharo evaọ abọ-ẹzi.
4 Kọ eme ma sai ru ro dhesẹ ovuhumuo mai kẹ iruo egaga ọ idibo iruiruo na? O gwọlọ nọ ma rẹ riẹ kpahe ẹkẹ-iruo nọ a rọ kẹ ae je dhesẹ omaruẹrẹhọ kẹ ẹmeoyo evaọ okenọ a tẹ gwọlọ uketha mai. Ẹkwoma ẹme-unu gbe uruemu, ma rẹ sae jae riẹ nnọ ma wo ovuhumuo kẹ iruo rai. (Itẹ 15:23) Ahwo nọ a bi ruiruo gaga k’omai na a gwọlọ ovuhumuo mai nọ o n’evaze.—1 Tẹs. 5:12, 13.
5 Ẹme Ọghẹnẹ o dhesẹ owha-iruo gbe ete ọ idibo iruiruo. (1 Tim. 3:8-10, 12, 13) Iruo efuafo eghaghae rai e r’oja kẹ ẹnyaharo ukoko na. Ezae itieye na a te kẹ uduotahawọ ikẹse kẹse mai, nọ aikpobi a rrọ “owhreze iruo Ọnowo na.”—1 Kọr. 15:58.