Epanọ Ahwo Uviuwou A Sae rọ Rọwokugbe re A w’Obọ Vọvọ—Evaọ Iwuhrẹ Ukoko
1 Iviuwou Ileleikristi e rẹ kezọ kẹ ujaje na hrọ re a kokohọ eva iwuhrẹ ukoko. (Hib. 10:24, 25) Ẹkwoma emamọ ọrọwokugbe, aikpobi a sae ruẹrẹ oma kpahe kẹ, re a kpohọ, je w’obọ evaọ iwuhrẹ na. Iyero iviuwou e rrọ oghoghẹrẹ, rekọ eware jọ e riẹ nọ ọzae uwou-orọo Oleleikristi, aye nọ ọ rrọ ukoko, hayo ọyewọ ọvo ọ rẹ sai ru re o wha okugbe uviuwou ze evaọ eme ọ abọ-ẹzi, makọ unu emọ gbe ikpe emọ nọ e rrọ uwou na.—Itẹ 1:8.
2 Romatotọ Ruẹrẹ Oma Kpahe: Ahwo uviuwou na a rẹ rọwokugbe re a ruẹ nnọ ohwo kpobi ọ ruẹrẹ oma kpahe kẹ iwuhrẹ ukoko. Ibuobu i re wuhrẹ uzoẹme ọ Uwuhrẹ ọ Uwou-Eroro Na orọ ẹkpoka na kugbe. Ejọ e rẹ ruẹrẹ oma kpahe kẹ Uwuhrẹ Obe Ukoko na hayo se isase Ebaibol ẹkpoka na wọhọ uviuwou. Ẹjiroro na họ re a wo ugogo eme na fihọ iroro taure a te ti kpohọ iwuhrẹ na. Evaọ edhere ọyena, aikpobi a re wo erere no ẹme nọ a yo na ze viere jẹ thoma vẹre re a w’obọ evaọ okenọ uvẹ na o tẹ riẹ.—1 Tim. 4:15.
3 M’Omaa re Who w’Obọ: Ohwo kpobi nọ ọ rrọ uviuwou na o re wo ute ọ ewhowho ẹruore riẹ via evaọ aro amọfa ẹkwoma iyo nọ ọ rẹ kẹ eva iwuhrẹ. (Hib. 10:23) Kọ ohwo uviuwou na jọ ọ gwọlọ obufihọ hayo uduotahawọ re ọ sai ru onana? Kọ uketha vẹ omomọvo ọ gwọlọ evaọ omaruẹrẹhọ kẹ eme ọ Isukulu Odibọgba Ọghẹnẹ na? O rẹ were eyae uwou-orọo okenọ ezae rai a te fiobọhọ jẹ kẹ ẹjiroro ọ ọtadhesẹ jọ nọ o fo ziezi hayo oghẹrẹ ẹkeria nọ o w’iruo. U du fo ho re esẹ gbe ini a roro nọ ae rẹ ruẹrẹ eme iwuhrẹ na kẹ emaha rai. Ere oruo o sae raha ẹnyaharo emọ na. Rekọ esẹ gbe ini e rẹ sai fiobọhọ kẹ emọ esese rai jẹ kezọ kẹ ae evaọ okenọ a tẹ be wariẹ ẹme rai na dovia.—Ẹf. 6:4.
4 Ruẹrẹ Eware họ re Whọ Nya: A rẹ sai wuhrẹ emọ evaọ oke emaha re a whẹ ẹgọ họ jẹ ruẹrẹ oma họ kpohọ ewuhrẹ na eva oke nọ a fihọ. O gwọlọ re ahwo uviuwou a rọwokugbe evaọ ẹruorote ọ iruẹru iviuwou nọ ulehie o gbẹ jọ họ.—Rri iroro-ejẹ evaọ obe ọ Evawere Uviuwou na, ẹwẹ-obe avọ 112.
5 Esẹ gbe ini avọ emọ a rẹ sai roro kpahe eme ọ Joshua ọrọ oke anwae na, ọnọ ọ ta nọ: “Rọ kẹ omẹ avọ uwou mẹ ỌNOWO na ma rẹ gọ.” Wha vẹ gbae mu re wha rọwokugbe re wha w’obọ vọvọ evaọ iwuhrẹ ukoko na.—Jos. 24:15.