Epanọ A re ro Wo Oghọghọ No Iwuhrẹ Ze Viere
1 Iwuhrẹ na e r’oja kẹ omakpokpọ abọ-ẹzi mai. Oghọghọ nọ ma re wo no ai ze u w’obọ kugbe oware nọ ma re ru taure oke iwuhrẹ na u te ti te, etoke iwuhrẹ na, gbe oke nọ iwuhrẹ na e tẹ fa no. Ẹvẹ ma sai ro fiobọhọ kẹ omobọ mai gbe amọfa re a yọrọ oghọghọ nọ o rrọ iwuhrẹ enya na ghaghae?
2 Taure Oke Iwuhrẹ U te ti Te: Omaruẹrẹhọ u w’obọ kpahe omawere nọ ma re wo no iwuhrẹ na ze. Ma tẹ ruẹrẹ oma kpahe ziezi, o rẹ mae j’omai oja re ma kezọ je w’obọ. Fibae, u fo re ma ruẹrẹ ẹme nọ a k’omai kpobi ziezi, avọ ẹjiroro ọ ovuẹ na nọ ma rẹ ta gbagba nya lele ithubro jẹ kpare isiuru ogbotu na. U fo re ma wuhrẹ ẹme na ziezi. Okenọ ma tẹ zọhọ fihọ iwuhrẹ nọ e rẹ jọ jajaja avọ ọbọga, nọ e rẹ kẹ ahwo kpobi erere, ẹnyaharo omobọ mai o re dhesẹ oma via yọ ma re wo oghọghọ ulogbo.—1 Tim. 4:15, 16.
3 Evaọ Etoke Iwuhrẹ: Eme nọ ma rẹ kpahe fihọ evaọ iwuhrẹ o rẹ sai fiobọhọ k’omai reawere rai viere. U fo re a rri abọ iwuhrẹ nọ e gwọlọ ẹkpahefihọ ogbotu na wọhọ iruo nọ i te ohwo kpobi evaọ ukoko na. Iyo ekpẹkpẹe nọ i re dhesẹ ẹme na dẹẹ e rẹ mai woma. Eware ọbọga nọ a rọ ẹro ruẹ nọ a re gbiku rai kpẹkpẹe e rẹ sae kẹ uduotahawọ jẹ kẹ ẹgba, yọ ma rẹ thomavẹre re ma ku enana kugbe iyo oke kpobi nọ omaa na o tẹ gwọlọ ae. (Itẹ 15:23: Iruẹru 15:3) Okenọ ma te bi ru ẹme evaọ ewuhrẹ, u fo re ma t’ẹme avọ ajọwha gbe imuẹro, re u ru ei siuru, jọ vevẹ, gbe onọ u w’iruo.
4 Nọ Iwuhrẹ E tẹ fa No: Re a t’ẹme ẹwo kugbe amọfa, uyere ọ oma ogbẹnyusu, gbe umutho ehri eme jọ nọ a ta kpahe evaọ iwuhrẹ na e rẹ k’omai kpobi erere. Edhesẹvia oghọghọ mai eva okenọ ma tẹ ruẹ emaha na, ekpako na, gbe ahwo ọkpokpọ na nọ a bi w’obọ u re ru uyoyou inievo na diwi viere. Ukpenọ ma rẹ fo ahwo jọ nọ a ziọ iwuhrẹ hẹ, u fo re ma ghale oghọghọ nọ ma wo no iwuhrẹ na ze kugbe ai, ma vẹ rehọ ere tuduhọ ae awọ re a nya.—Hib. 10:24, 25.
5 Joma ru re ọruẹrẹfihotọ ọnana nọ ọ r’oja nọ a rẹ rọ tuduhọ ohwohwo awọ na o vrẹ omai hi. (Rom 1:11, 12) Ẹkwoma omodawọ osegboja nọ ma re ru n’evaze, mai kpobi ma rẹ sae ghọghọ evaọ ekpohọ iwuhrẹ Ileleikristi.