Ẹkpẹti Onọ

◼ Eme ma rẹ sai ru ro fiobọhọ ru iwuhrẹ mai woma viere?

Ahwo jọ a rẹ sai roro nọ ekpako gbe idibo iruiruo na ọvo a wo owha-iruo ọ obokparọ iwuhrẹ ukoko na keme ae a bi ru iwuhrẹ na jẹ be rẹro te abọ rai buobu. Uzẹme, mai kpobi ma rẹ sae zọhọ fihọ iwuhrẹ nọ i re siuru jẹ kẹ erere. Ma rẹ sai fiobọhọ ru iwuhrẹ na woma evaọ idhere ikpe enana:

Ruẹrẹ oma kpahe. Nọ ma tẹ ruẹrẹ oma kpahe ziezi, iwuhrẹ na i re duobọ te iroro mai. Nọ mai kpobi a te ru enẹ, iwuhrẹ na e rẹ mae sasa oma jẹ mai wo ọbọga. Nya ẹsikpobi. Otẹrọnọ enọ e nyaze a rọ buobu gaga ẹsiẹ o rẹ mae jọ uduotahawọ kẹ enọ e nyaze, bọ ovuhumuo gaga kẹ epanọ ẹnyaze o wuzou te. Kake nya. Ma tẹ keria no taure uwuhrẹ na u te ti muhọ, ma rẹ sai kuomagbe evaọ ile gbe olẹ emuhọ, jẹ rọ ere wo erere vọvọ no ewuhrẹ na ze. Thomavẹrẹ ziezi ze. Ẹkwoma ẹwhaze Ebaibol gbe ebe mai nọ a ti wuhrẹ na, ma rẹ sae nya lele eme nọ a be ta ziezi je wo otoriẹ rai. Whaha ekpokpo ezọgaviẹ ahwo. Ma rẹ mae gaviezọ nọ ma tẹ keria kpoma vi. Ẹme imimẹ gbe ekpohọ inuwou o rẹ sae rehọ iroro mai gbe erọ amọfa. Wo abọ. Okenọ ibuobu mai a tẹ kparobọ jẹ kuyo, uvi eme mai e rẹ bọ amọfa ga. K’iyo ekpẹkpẹe. Onana o rẹ kẹ amọfa buobu uvẹ re a kpahe ẹme. Ma rẹ kpọ iyo ekpẹkpẹe mai kpohọ oware nọ ma bi wuhrẹ na. Ru ẹme ra. Wọhọ emọ-uwuhrẹ evaọ Isukulu Odibọgba Ọghẹnẹ hayo enọ i bi wo abọ evaọ Ewuhrẹ Odibọgba na, ruẹrẹ oma kpahe ziezi, ruẹrẹ idhesẹvia họ, jẹ daoma re ẹme ra ọ se owhẹ ba evo. Jiri enọ i wo abọ. Ta kẹ amọfa epanọ who wo ovuhumuo kẹ omodawọ rai te. Onana o rẹ bọ ai ga jẹ kẹ ai ajọwha re a ru woma viere evaọ obaro. Tudu họ ohwohwo awọ. Eme uyere ẹwo gbe ọbọga taure iwuhrẹ na i te ti muhọ gbe okenọ i kuhọ no i re fiba isiuru gbe erere nọ ma re wo no ekpohọ iwuhrẹ ze.