Eruẹrẹfihotọ kẹ Eria Egagọ

A JIE uzi kẹ idibo Jihova inọ a hae kokomahọ re a wuhrẹ ai, re a jẹ tuduhọ ohwohwo awọ. (Hib. 10:23-25) Oria ọsosuọ nọ ahwo nọ Ọghẹnẹ ọ salọ, koyehọ ahwo Izrẹl, a je kokohọ kẹ egagọ họ “uwou-udhu omakugbe na.” (Ọny. 39:32, 40) Uwhremu na, Solomọn ọmọ Devidi ọ tẹ bọ uwou hayo etẹmpol, onọ o wha oruaro se Ọghẹnẹ. (1 Iv. 9:3) Nọ a raha etẹmpol na no evaọ 607 B.C.E., ahwo Ju a jẹ hai kokohọ iwou nọ a je se isinagọgo re a gọ Ọghẹnẹ. Kẹsena a tẹ te wariẹ bọ etẹmpol na, o tẹ wariẹ zihe ruọ oria egagọ uzẹme. Jesu o wuhrẹ ahwo evaọ isinagọgo gbe evaọ etẹmpol na. (Luk 4:16; Jọn 18:20) Jesu o tube wuhrẹ ahwo evaọ ehru ugbehru.​—Mat. 5:1–7:29.

² Nọ Jesu o whu no, Ileleikristi a jẹ hai kokohọ eria ẹgbede gbe iwou ahwo re a wuhrẹ ahwo Ikereakere na jẹ reawere omakugbe ibe Ileleikristi rai. (Iruẹru 19:8, 9; Rom 16:3, 5; Kọl. 4:15; Filim. 2) Ẹsejọ o jẹ gwọlọ nọ Ileleikristi ọsosuọ na a re kokohọ eria nọ i siomano re enọ i je kpokpo ae a siọ ae ba ẹruẹ. Evaọ uzẹme, o jọ uvi idibo Ọghẹnẹ oke anwae oja re a kokohọ evaọ eria egagọ re ‘Jihova o wuhrẹ ai.’​—Aiz. 54:13.

³ Epọvo na re nẹnẹ, a rẹ jọ eria ẹgbede gbe iwou ahwo ru iwuhrẹ Ileleikristi. Ẹsibuobu a rẹ jọ iwou ahwo ru ewuhrẹ omakugbe kẹ usi uwoma ota. Enọ i siobọno iwou rai kẹ iwuhrẹ itieye na a rri rie nọ uvẹ-ọghọ o rrọ. Ibuobu nọ i siobọno iwou rai kẹ ẹjiroro nana a ta nọ a wo irere buobu no.

ỌGWA UVIE

⁴ Ọgwa Uvie họ ugogo oria nọ Isẹri Jihova a re kokohọ. Epanọ o rẹ mae jọ họ, a rẹ dẹ otọ, a vẹ bọ Ọgwa Uvie ọkpokpọ hayo a vẹ ruẹrẹ uwou nọ a bọ no anwẹdẹ. Evaọ oria nọ o jọ lọhọ, ikoko sa-sa e sae jọ Ọgwa Uvie ọvo ru iwuhrẹ re u ru araha ugho kpotọ, jẹ ruẹ nọ a be jọ Ọgwa Uvie na ru iwuhrẹ ẹsikpobi. Evaọ eria jọ, o rẹ mai kiehọ re a haya ọgwa nọ a rẹ jọ ru ewuhrẹ. Nọ a tẹ bọ Ọgwa Uvie ọkpokpọ hayo nọ a tẹ jọ Ọgwa Uvie ru aruẹrẹ ologbo nọ o wọhọ ọwariẹbọ, u re woma re a rehọ iẹe mudhe kẹ Ọghẹnẹ. Rekọ, otẹrọnọ aruẹrẹ ọsese ọvo a ru evaọ Ọgwa Uvie nọ a bọ anwẹdẹ, u du gwọlọ nọ a rẹ wariẹ rehọ iẹe mudhe he.

⁵ A re ru onaa ga hrọ fihọ Ọgwa Uvie he re a rehọ iẹe dhesẹ oma kẹ amọfa. Dede nọ oghẹrẹ nọ a rẹ bọ iwou na o sai wo ohẹriẹ no oria ruọ oria, ugogo ẹjiroro nọ a be rọ bọ ae họ, re a jarai gọ Ọghẹnẹ. (Iruẹru 17:24) A re rri epanọ okegbe na ọ rrọ rọ bọe kpatiẹ je kiehọ oghẹrẹ nọ a sae rọ jariẹ ru iwuhrẹ Ileleikristi.

⁶ Ikoko Isẹri Jihova kpobi nọ e be jọ Ọgwa Uvie jọ ru ewuhrẹ a re ru unevaze rọkẹ epanọ a be rọ jariẹ ru ewuhrẹ, gbe onọ a rẹ rọ rẹrote Ọgwa Uvie na. A re mi ahwo nọ a ziọ iwuhrẹ ugho ho hayo ghoro umudo ho, yọ a rẹ yare igho ho. Etehe unevaze o rẹ jariẹ nọ ahwo nọ a kpohọ iwuhrẹ na a sai fi ugho họ rọkẹ araha nọ a be jọ ọgwa na ru. Udu obọrai a re ro ru ei orọnikọ ọgbahọ họ.​—2 Kọr. 9:7.

⁷ Ahwo kpobi nọ a rrọ ukoko na a rẹ rehọ iẹe nọ uvẹ-ọghọ o rrọ re a rehọ ugho ru unevaze rọkẹ ẹruorote Ọgwa Uvie na je fiobọhọ ru ei fo, jẹ rẹrotei ziezi. Ọkpako hayo odibo oruiruo a rẹ mai ro mu re o ru omaa orufuọ gbe ẹruorote na. Wọhọ epanọ o rẹ mae jọ, itu usi uwoma ota a re ru orufuọ na unọjọ utọjọ, yọ ọsẹro utu hayo ethabọ riẹ ọ rẹ kobaro evaọ onana. Te obọ eva te obọ otafe Ọgwa Uvie na o rẹ jọ oghẹrẹ nọ o rẹ rọ wha ajiri se Jihova gbe ukoko riẹ.

⁸ Otẹrọnọ ikoko nọ e be jọ ọgwa jọ ru iwuhrẹ e vrẹ ọvo, ekpako ikoko na a rẹ rehọ Ogbẹgwae Ẹruorote Ọgwa Uvie mu nọ o rẹ kpọ iruẹru nọ i wobọ kugbe uwou gbe otọ na. Igboma ekpako na a rẹ salọ oniọvo nọ ọ rẹ jọ ọnọ o re koko iruẹru ogbẹgwae ẹruorote na họ. Ogbẹgwae ẹruorote na o re muẹrohọ erufuọ ọgwa na, ru epanọ a rẹ rọ rẹrote ọgwa na ziezi, jẹ ruẹ nọ eware orufuọ gbe eware itieye efa e riẹ, yọ a re ru onana lele ọruẹrẹfihotọ nọ ugboma ekpako ikoko na a ru. Onana o gwọlọ nọ ikoko na kpobi a rẹ nya lele ọruẹrẹfihotọ kpobi nọ a ru.

⁹ Nọ ikoko buobu e tẹ be jọ Ọgwa Uvie ọvo ru iwuhrẹ, a sae hai nwene oke iwuhrẹ na re o sae nya wariẹ họ. Ekpako na a rẹ rehọ ẹzi ororokẹ gbe uyoyou-inievo ru omaa oke iwuhrẹ nọ a re nwene na. (Fil. 2:2-4; 1 Pita 3:8) Uvumọ ukoko u wo udu nọ o rẹ rọ jọ emu ikoko efa jiroro kẹ ae he. Nọ ọsẹro okogho o te weze bru ukoko jọ nọ o be jọ Ọgwa Uvie na ru ewuhrẹ, ikoko edekọ na i re nwene oke ewuhrẹ rai evaọ oka yena nọ o tẹ gwọlọ ere.

¹⁰ A rẹ sae jọ Ọgwa Uvie na kẹ ovuẹ ehaa-orọo hayo ovuẹ uwhori nọ a te mi Ogbẹgwae Iruo Ukoko na uvẹ no. Ekpako nana a rẹ romatotọ roro kpahe ayare na, a vẹ jiroro rai lele oware nọ uwou ogha o ta.

¹¹ Ahwo nọ a kẹ uvẹ nọ a jọ Ọgwa Uvie na ru eware itieye na, a rẹro mi ai nọ a re ru eware oghẹrẹ nọ u fo Ileleikristi uzẹme. A rẹ jọ Ọgwa Uvie na ru oware ovo nọ o rẹ wha evedha se ahwo ukoko na ha, hayo nọ o rẹ wha ẹpoviẹ se Jihova gbe emamọ odẹ ukoko na ha. (Fil. 2:14, 15) Ẹsejọ, uwou ogha o rẹ ta nọ a jọ Ọgwa Uvie ru eware efa nọ i wobọ kugbe egagọ Jihova, wọhọ Isukulu Odibọgba Uvie na gbe Isukulu Ekobaro.

¹² Ukoko kpobi u re wo adhẹẹ kẹ oria ewuhrẹ rai. Ma rẹ rehọ ẹgọ, osẹ gbe uruemu mai dhesẹ nọ ma wo ọghọ kẹ egagọ Jihova. (Ọtausi. 5:1; 1 Tim. 2:9, 10) Ma te bi lele ohrẹ nọ a kẹ omai evaọ abọ nana yọ ma bi dhesẹ nọ ma wo adhẹẹ kẹ iwuhrẹ Ileleikristi mai.

¹³ U wuzou re ahwo kpobi a keria tou evaọ etoke iwuhrẹ. U re woma re emọ e keria kugbe esẹgbini rai. A sae tuduhọ esẹgbini nọ i wo emọboba awọ re a keria oria nọ a gbe jo kpokpo amọfa ha nọ o tẹ gwọlọ nọ a rẹ wọ emọ rai ruọ otafe re a whọku ai hayo re a ru eware efa.

¹⁴ A rẹ rehọ inievo-emezae nọ i te mu re a jọ eruẹrẹahwohọ evaọ iwuhrẹ nọ a bi ru evaọ Ọgwa Uvie na. A re muẹrohọ otọ, jọ whẹtiẹ whẹtiẹ je wo orimuo. Iruo rai jọ họ, a re yere ahwo ọkpokpọ je dede ai rehọ ziezi, fiobọhọ kẹ ahwo nọ a nyaze whremu gwọlọ oria nọ a rẹ keria, kere unu ahwo nọ a ziọ ewuhrẹ, jẹ ruẹ nọ a rovie eria kpobi re ofou o fou ruọ ọgwa na. Eruẹrẹahwohọ a rẹ sae kareghẹhọ esẹgbini re a rẹrote emọ rai ziezi nọ o tẹ gwọlọ ere, re emọ na a gbẹ dhẹ ugbẹdhẹ evaọ Ọgwa Uvie na ha taure a te ti mu ewuhrẹ họ hayo nọ a te kuhọ no, hayo zaharo evaọ eplatfọmo ho. Ọmọ jọ o te bi kpokpo gaga, ọruẹrẹahwohọ ọ rẹ sae rehọ edhere owowou avọ areghẹ ta kẹ ọsẹ hayo oni ọmọ na nọ ọ wọe ruọ otafe re ọ siọ ahwo ba ekpokpo. Iruo eruẹrẹahwohọ i re fiobọhọ nọ ohwo kpobi ọ rẹ rọ reawere iwuhrẹ na. O mai woma re eruẹrẹahwohọ a jọ ekpako gbe idibo iruiruo.

EBABỌ ỌGWA UVIE

¹⁵ Evaọ ikpe-udhusoi ọsosuọ, Ileleikristi jọ e jariẹ nọ eware e lọhọ kẹ vi efa, fikiere Pọl ukọ na o kere nọ: “Re a ru eware kpobi fihọ ẹrẹrẹe, wha rọ onọ wha wo buobu enẹna rọ vọ kẹ ae evaọ onọ o kare rae, re a sae jẹ rehọ onọ a wo buobu rọ vọ kẹ owhai re evaọ onọ o kare owhai, re eware kpobi e sae jọ ẹrẹrẹe.” (2 Kọr. 8:14) Nẹnẹ, a bi ru re eware e jọ “ẹrẹrẹe” re. A bi ku igho nọ a bi ro ru unevaze evaọ ikoko nọ e rrọ akpọ na soso kugbe ro fiobọhọ bọ jẹ ruẹrẹ Egwa Uvie. Unevaze nọ inievo akpọ na soso a bi ru o da ukoko Ọghẹnẹ gbe ikoko nọ i bi wo erere no unevaze itieye na ze ẹro fia.

¹⁶ Uwou ogha u re rri oghẹrẹ nọ okegbe ọ rrọ, a vẹ rọ ere ghale ikoko fihọ Egwa Uvie. Uwou ogha o rẹ jẹ fodẹ oke gbe oria nọ a rẹ bọ Egwa Uvie ekpokpọ fihọ gbe oke nọ a rẹ rọ ruẹrẹ egwa nọ e rrọ ẹkwotọ uwou ogha na anwẹdẹ. Nọ okpẹtu o tẹ via, a re ru ọruẹrẹfihotọ nọ a rẹ rọ ruẹrẹ Egwa Uvie nọ e raha, yọ evaọ ẹsejọ te iwou inievo na.

¹⁷ Uwou ogha o rẹ rehọ inievo nọ e fialoma via ro fiobọhọ dẹ otọ, drọ omaa Ọgwa Uvie, mi ebe-udu ebabọ, bọ uwou na, jẹ rẹrotei. Fikinọ a jọ erẹwho buobu gwọlọ Egwa Uvie buobu, ma gwọlọ ahwo buobu nọ a rẹ fialoma via. Iwhowho-uvie kpobi nọ e họ-ame no nọ i te, yọ a wo isiuru inọ a re fiobọhọ evaọ iruo nana, ma be tuduhọ ae awọ re a kere eme fihọ efọmo, a vẹ rehọ iẹe kẹ Ogbẹgwae Iruo Ukoko rai. Makọ iwhowho-uvie nọ e re họ-ame he dede a sai fiobọhọ nọ a tẹ be bọ hayo ruẹrẹ Ọgwa Uvie rai.

EGWA OKOKOHỌ

¹⁸ Ileleikristi ikpe-udhusoi ọsosuọ a jẹ hai kokohọ evaọ itu esese. Rekọ, ẹsejọ “ogbotu ahwo buobu” a jẹ hai kokohọ. (Iruẹru 11:26) Epọvo na re, ahwo Jihova nẹnẹ a re kokohọ buobu evaọ ikokohọ okogho gbe ikokohọ ubrotọ. Ẹsibuobu a rẹ haya eria nọ a re jo ru ikokohọ, rekọ eria itieye nọ e riẹ i gbe kiehọ họ hayo e gbẹ riẹ hẹ, a rẹ bọ oria egagọ nọ a re se Ọgwa Okokohọ.

¹⁹ Ẹsejọ, a rẹ dẹ uwou nọ a bọ no, nọ a jẹ ruẹrẹ iẹe no, a vẹ rehọ iẹe ru Ọgwa Okokohọ. Rekọ onọ a be hae mai ru họ, a rẹ dẹ otọ a vẹ bọ ọgwa ọkpokpọ. Egwa Ikokohọ jọ e rẹ jọ ruaro, efa e rẹ jọ kakao, wọhọ epanọ ẹgwọlọ na ọ rrọ. Nọ uwou ogha o tẹ romatotọ roro unuigho na jẹ riẹ epanọ a te rehọ ọgwa na ruiruo te no, a vẹ tẹ te jiroro inọ a dẹ hayo bọ ọgwa okokohọ.

²⁰ Uwou ogha o rẹ rehọ inievo-emezae mu re a rẹrote iruẹru gbe ẹruorote Ọgwa Okokohọ na. A re ru ọruẹrẹfihotọ nọ ikogho na a rẹ rọ nyai ru orufuọ kẹse kẹse, orufuọ isiava ẹgbukpe, jegbe ẹruorote eware re e gbẹ kake raha ha. O rẹ kẹ erere nọ inievo na e tẹ fialoma ze kẹ iruo nana. Fikiere, a tuduhọ ikoko awọ re a rehọ udu rai kpobi lele eruẹrẹfihotọ nana.​—Ol. 110:3; Mal. 1:10.

²¹ Ẹsejọ, a rẹ sae jẹ jọ Ọgwa Okokohọ na ru iruẹru ukoko na efa, wọhọ isukulu ukoko na sa-sa gbe oghẹrẹ egwae jọ nọ esẹro okogho e rẹ gba. Wọhọ Ọgwa Uvie, Ọgwa Okokohọ yọ oria egagọ nọ a ro mudhe kẹ Ọghẹnẹ. Ma te bi kpohọ Ọgwa Okokohọ, ma re dhesẹ emamọ uruemu, gọ ẹgọ jẹ sẹ osẹ nọ u wo ọghọ, wọhọ epanọ o rẹ jọ nọ ma te kpohọ Ọgwa Uvie kẹ egagọ na.

²² Ahwo ọkpokpọ buobu a bi ru epanọ a re ro kuomagbe ukoko Ọghẹnẹ vẹrẹ vẹrẹ evaọ abọ ekuhọ edẹ urere nana. Onana u dhesẹ nọ Jihova ọ be ghale omai. (Aiz. 60:8, 10, 11, 22) Fikiere, ma rẹ nya lele ọruẹrẹfihotọ kpobi nọ a ru nọ ma re ro wo eria egagọ, rẹrote ai je ru ai jọ fuafo. Ma te bi ru ere, yọ ma bi dhesẹ nọ ma rri eria itieye na ghaghae wọhọ eria nọ ma re kokohọ jọ tuduhọ ohwohwo awọ maero enẹna nọ ma be ruẹ nọ ẹdẹ Jihova o bi si kẹle na.