Joma Ruẹrẹ Oria Egagọ Mai Ziezi
1 Wariẹ akpọ na họ ikoko Isẹri Jihova i bu vrẹ 94,000. Ikoko buobu i re kokohọ kẹ uwuhrẹ Ebaibol gbe omakugbe Ileleikristi eva Ọgwa Uvie, onọ o rrọ oria egagọ efuafo evaọ ẹwho na.
2 Omaa Orufuọ Ikẹse Kẹse: Iruo ẹruorote Ọgwa Uvie na yọ abọ ologbo ọrọ egagọ efuafo mai. Obe ọ Our Ministry na o ta evaọ ẹwẹ-obe avọ 61-62 inọ: “Inievo na e rẹ rehọ iẹe wọhọ uvẹ-ọghọ, orọnọ re a kẹ Ọgwa Uvie na uketha abọ-ugho ọvo ho rekọ re a jẹ fialoma via kẹ erufuọ riẹ, ruẹrẹ iẹe họ kpatiẹ ziezi. Te eva gbe otafe Ọgwa Uvie na u re dhesẹ emamọ odẹ kpahe ukoko Jihova.” Nọ a re kpohọ Ọgwa Uvie na unuẹse buobu k’oka k’oka na, ẹgwọlọ ọ riẹ rọkẹ erufuọ gbe ẹruorote ikẹse kẹse. Wọhọ epanọ o rẹ jọ, ahwo a rẹ fialoma no ukoko hayo ikoko nọ e be jọ Ọgwa Uvie na ru iwuhrẹ ze kẹ ẹruorote ọnana. Wọhọ epanọ o jọ evaọ etoke Ebaibol, u fo re idibo Jihova nẹnẹ a dhesẹ osegboja evaọ ‘ẹruẹrẹ gbe ẹruorote’ oria egagọ mai.—2 Irv. 34:10.
3 A re fi omaa orufuọ k’oka k’oka orọ Ọgwa Uvie na họ ebọdo ovuẹ na. Itu ọ uwuhrẹ obe ukoko kpobi i re ru orufuọ Ọgwa na, duọ utu duọ oka riẹ, nya lele eware nọ a kere fihọ otọ nnọ a re ru. U fo re ahwo kpobi nọ a rẹ sai ru iruo a w’obọ evaọ uvẹ ọ k’oka k’oka orọ Ọgwa Uvie na nọ a re ru fuafo kpatiẹ. Avọ ẹromuhọ esẹgbini, emọ e rẹ sai w’obọ evaọ iruo na, a vẹ rehọ ere wuhrẹ ai re a dhesẹ ovuhumuo kẹ uvẹ-ọghọ nana. Maero okenọ ikoko nọ e be jọ Ọgwa Uvie na ru ewuhrẹ i te bu vrẹ ọvo, emamọ ọrọwokugbe ọ r’oja re owha ẹruorote abọ egagọ mai nana o siọ umutho ahwo jọ ọvo ba ẹbẹ.
4 A re kere eware nọ o gwọlọ nnọ a re ru fihọ otọ, o tẹ lọhọ evaọ oria nọ ekwakwa iruo na e rrọ na. Obe nana u re dhesẹ iruo nọ a re ru k’oka k’oka, wọhọ ehwere uwou na, eririe inwido, eririe ehru emẹjẹ, ekufiẹ eware nọ a gbolo fihọ ekete-erara, ẹwozẹ otọ-uwou na, eririe ighẹgbe. O sae gwọlọ nọ a re vo iruo jọ ẹsejọ, wọhọ epọlishi nọ a re ro ririe ekwakwa irre kpobi; egbara, ekpala gbe efane nọ a rẹ rọ oma totọ ririe, ẹfọrọ ekọtini, gbe ẹruorote ekwakwa ikpẹ; jegbe ehẹhẹ, ekọkroshu, edhokpa gbe itieye efa nọ a re kpe no. A re fi ekẹmika kpobi nọ a re ro ru orufuọ na fihọ oria nọ obọ emaha na u re te he, a ve je kpe oka nọ a re ro vuhu ai vevẹ fihọ ai. A re kere oruvẹ ọkpẹkpẹe fihọ ai kpahe oghẹrẹ nọ a rẹ rọ rehọ ekẹmika kpobi ruiruo.
5 Re a whaha eware nọ e rẹ wha omonwa ze evaọ Ọgwa Uvie yọ oware nọ u w’uzou gaga. (Izie. 22:8) Eva abọ nana, ẹkpẹti nọ ọ rrọ ẹwẹ-obe avọ 4 na o dhesẹ ekwakwa jọ nọ o gwọlọ nnọ a rẹ kiẹ riwi n’oke ruoke re a ruẹse whaha omonwa idudhe.
6 Ẹruorote Ọgwa Uvie Na: Ugboma ekpako na u wo owha-iruo nọ o rẹ rọ sẹro ẹruorote Ọgwa Uvie na. Wọhọ epanọ o rẹ jọ, a rẹ rehọ ọkpako hayo odibo oruiruo mu re ọ rọ ẹro te iruo na. O re ru ọruẹrẹfihotọ iruẹru ikẹdẹ kẹdẹ Ọgwa Uvie na, be ruẹ nnọ a ru rie fuafo jẹ ruẹrẹ iẹe ziezi gbe nnọ ekwakwa nọ a re ro ruiruo e riẹ ziezi. O r’oja gaga inọ uvumọ oware nọ o rẹ wha omonwa ze o rẹ jọ ọgwa na hayo ighẹ na ha. Okenọ ikoko ivẹ hayo bu viere e tẹ be jọ ọgwa ọvo ru iwuhrẹ, igboma ekpako na a rẹ rehọ ogbẹgwae ẹruorote mu nọ u re ru ọruẹrẹfihọ kẹ ẹruorote uwou na gbe ighẹ na. Ogbẹgwae nana u re ruiruo evaọ otọ ọkpọvio igboma ekpako na.
7 A rẹ roma totọ kiẹ Ọgwa Uvie na riwi k’ukpe k’ukpe. Ekpako na i re ru lele oyena ẹkwoma eruẹrẹfihotọ nọ a re ru re a nabe rọ ẹro te eware kpobi nọ e gwọlọ nọ a rẹ rẹriẹ aro ku. A rẹ sai zizie iwhowho-uvie na re a fi obọ họ evaọ aruẹrẹ gbe ẹruorote. Ahwo kpobi a re mu ẹro h’otọ re a rọ ẹro te makọ eware esese a vẹ jẹ rẹriẹ ovao ku eware nọ e roma via ababọ oke oraha.
8 Otẹrọnọ ekpako na e gwọlọ ohrẹ evaọ ẹruorote Ọgwa Uvie na, a rẹ sae nya bru Ẹko-Iruo Ebabọ Ọgwa Uvie na.
9 Igho Ukoko nọ A re ro Ruiruo avọ Areghẹ: Ahwo nọ a fialoma via họ enọ i re ru abọ buobu ọrọ iruo Ọgwa Uvie gbe otọ ighẹ na. Omodawọ unevaze rai yọ obọdẹ odhesẹvia uyoyou yọ u re fi obọ họ ru araha kpotọ gaga. O tẹ gwọlọ re a rehọ iruo kẹ ohwo jọ ru, ekpako na e rẹ daoma tho unuigho na ziezi kugbe ahwo sa-sa re araha na o kpotọ. A re ru onana ẹkwoma iruo nọ a gwọlọ ru na gbe eware kpobi nọ a gwọlọ dẹẹ na nọ a re dhesẹ fihọ obe. A rẹ rọ ẹwẹ-obe nana jọ kẹ ahwo sa-sa nọ a gwọlọ iruo na re a fodẹ unuigho nọ a rẹ sai mi fihọ iruo na. Nọ ahwo buobu nọ a gwọlọ iruo na a tẹ fodẹ unu nọ a gwọlọ mi no, ekpako na e vẹ jọ usu ahwo na salọ ọnọ ọ mae kiehọ. Edhere nana a re lele o tẹ make rrọ nnọ oniọvo jọ ọ ta nnọ o ti ru iruo hayo dẹ eware nọ a gwọlọ na evaọ unuigho jọ nọ a rẹ kẹe.
10 Ugboma ekpako na o rẹ jẹ j’owọ nọ u fo re a wo elasisi gbe ebe otọ na kpobi t’obọ. Nọ ikoko ivẹ hayo bu viere e tẹ be jọ Ọgwa Uvie ọvona ru iwuhrẹ, ogbẹgwae ẹruorote nọ a ro mu na u re wo ẹkpa-ugho ebanke kẹ oma riẹ, u ve je kere iyẹrẹ epanọ igho e nya ọrọ k’amara k’amara vi se igboma ekpako ikoko na, a vẹ rehọ ere jọ ekpako na riẹ kpahe epanọ a be raha igho na. Ekpako na i wo owha-iruo ẹruọsa araha igho ukoko na.
11 Ẹruorote gbe Aruẹrẹ Ologbo: Okenọ ogbẹgwae ẹruorote na u te muẹrohọ nnọ ẹruorote Ọgwa Uvie ọ gwọlọ aruẹrẹ ologbo gaga jọ, ogbẹgwae na o rẹ rọ ẹme na bru igboma ekpako na re a jiroro oware nọ a re ru. Otẹrọnọ a jẹ iroro nnọ u fo re a ru aruẹrẹ ologbo hayo a tẹ gwọlọ obufihọ mi ahwo nọ a rrọ ukoko hayo ikoko efa nọ e be jọ Ọgwa Uvie na ru iwuhrẹ hẹ, ugboma ekpako na o rẹ nya bru Ẹko-Iruo Ebabọ Ọgwa Uvie na rọkẹ iroro-ejẹ nọ i re fi obọ họ gbe ẹruọsa evaọ ẹkpọ iruo na. Otẹrọnọ o gwọlọ araha ologbo jọ, u re fo re a riẹ unuigho nọ o te rehọ dẹẹ a vẹ ruẹrẹ ọtamuo fihọ nọ ukoko na u re ku enu kẹ.—Rri Ẹkpẹti Onọ Odibọgba Uvie Mai ọrọ May 1994 (ọrọ Oyibo).
12 Ẹvẹ ma wo ovuhumuo te kẹ uvẹ-ọghọ nọ ma wo nọ ma re ro kokohọ eva Ọgwa Uvie mai! Ma re rri iwuhrẹ mai vo vievie he. Ahwo kpobi a rẹ sae zọhọ fihọ obokparọ ọruẹrẹfihotọ kẹ uduotahawọ mai nana ẹkwoma obọ nọ ma re wo vọvọ evaọ ẹruorote Ọgwa Uvie mai. Onana o rẹ kpare egagọ efuafo kpehru jẹ wha orro se odẹ Jihova. Joma gbae mu re ma ruẹrẹ oria egagọ mai ziezi.
[Study Questions]
1. Eme a rẹ jọ Ọgwa Uvie ru?
2. Fikieme u je w’uzou re a ruẹrẹ Ọgwa Uvie fuafo je ru ei kpatiẹ ziezi?
3. Ẹvẹ a rẹ m’omaa erufuọ Ọgwa Uvie na, kọ ono ọ rẹ sai w’obọ evaọ uvẹ-ọghọ nana?
4. Eme u fo nnọ a re ru re ahwo ukoko na a riẹ oware nọ a re ru evaọ okenọ a te bi ru orufuọ Ọgwa Uvie na?
5. Ẹvẹ u w’uzou te re a whaha eware nọ e rẹ wha omonwa ze, kọ ekwakwa vẹ e gwọlọ nọ a rẹ kiẹ riwi n’oke ruoke? (Rri ẹkpẹti nọ ọ rrọ ẹwẹ-obe avọ 4 na.)
6. Ẹvẹ a rẹ rọ sẹro iruo ẹruorote Ọgwa Uvie na?
7. (a) Eme a re ru k’ukpe k’ukpe re a ruẹ nnọ a ruẹrẹ Ọgwa na ziezi? (b) Eware vẹ e gwọlọ ẹromuhọ n’oke ruoke (Rri ẹkpẹti nọ ọ rrọ ẹwẹ-obe avọ 5.)
8. Oke vẹ ekpako na e sae rọ nya bru Ẹko-Iruo Ebabọ Ọgwa Uvie na kpahe eme ẹruorote?
9. Edhere vẹ a re lele nọ o tẹ gwọlọ nnọ a rehọ iruo kẹ ohwo jọ ru?
10. Eme a re ru re a ruẹ nnọ a rehọ igho ukoko ru iruo evaọ edhere nọ o fo?
11. Eme a re ru otẹrọnọ u fo re a ru aruẹrẹ ologbo jọ?
12. Ẹvẹ ma sai ro dhesẹ ovuhumuo mai kẹ uvẹ-ọghọ orọ iwuhrẹ nọ ma rẹ nya eva Ọgwa Uvie na?
[Box on page 4]
Eware nọ A rẹ Kiẹ Riwi Re A Whaha Omonwa
◻ Eware nọ a re ro furie erae e rẹ jọ eria nọ a jẹ sae tọlọ ae vẹrẹ, a vẹ jẹ hae ruẹrẹ ae k’ukpe k’ukpe.
◻ A re kpoka họ ethẹ gbe istẹpo uwou-ehru vevẹ, avọ ikpe nọ a re fihọ ai, e vẹ jẹ jọ vevẹ ziezi, yọ ekpọ nọ a re kru na e rẹ jọ gaga.
◻ Ibrikpẹ nọ a jẹ rawo eware gbe eria ame-okuo e rẹ jọ fuafo, jẹ jọ kpatiẹ, e vẹ jẹ kare ekwakwa nọ e rẹ sai fru-erae, eware nọ e rrọ erọ ukoko ho, gbe ikpehre eware.
◻ A re rri ehru idhe gbe ikroro na jẹ wozẹ ae kẹse kẹse.
◻ A re ru idhere nọ a rẹ nya gbe eria nọ a rẹ dhẹ imoto fihọ na ziezi re e seba ẹwhrae hayo re ahwo a seba ekie.
◻ A rẹ kiẹ ekwakwa ẹlẹtriki gbe efane riwi, a vẹ jẹ ruẹrẹ ae ziezi.
◻ A rẹ ruẹrẹ oria nọ u bi fi kpobi ababọ oke oraha re o siọ ekagba ba emu.
◻ A rẹ kare ighẹ na evaọ okenọ uvumọ ohwo ọ rrọ ighẹ na ha.
[Box on page 5]
Ẹruorote Uwou gbe Ighẹ Na
◻ Otafe riẹ: Kọ a be rọ ẹro te idhe na, igbẹhẹ na, ọbia, inwido, gbe esabọdo Ọgwa Uvie na ziezi?
◻ Otọ ighẹ na: Kọ a be rẹro te otọ ighẹ na ziezi? Kọ eria nọ a rẹ nya, ogba, gbe oria nọ a rẹ dhẹ imoto fihọ na e rrọ ziezi?
◻ Obeva riẹ: Kọ egbara hayo ekpala, ekọtini, eware nọ a whẹhọ uwou na, ovao igbẹhẹ na, orawo-ebe gbe ekọbọdo ebe na e rrọ kpatiẹ?
◻ Ekwakwa: Kọ ikpe na, ekwakwa ikporakporo, gbe efane na e rrọ ziezi?
◻ Eria ame-okuo: Kọ enana e rrọ fuafo je bi ruiruo ziezi?
◻ Ebe okerefihotọ ukoko na: Kọ ebe eware uzi e rrọ ekpokpọ jẹ rrọ gbagba ẹsikpobi?