Ẹkpẹti Onọ

◼ Ono o wo owha ọ erufuọ Ọgwa Uvie na?

Ọgwa Uvie nọ ọ rrọ fuafo je siuru o re kpomahọ ovuẹ nọ ma bi whowho na evaọ edhere owoma. (Wawo 1 Pita 2:12.) O r’oja re a ru ọgwa na fuafo kpatiẹ, yọ ohwo kpobi ọ sai w’obọ evaọ ẹruọsa riẹ. Ma re rẹro mi umutho ahwo jọ ọvo re a wha owha na kpobi hi. Epanọ o rẹ jọ vẹre, a rẹ ghale erufuọ na fihọ itu ọ Uwuhrẹ Obe Ukoko, owuhrẹ na hayo ethabọ riẹ ọ vẹ k’obaro. Evaọ egwa nọ ikoko buobu e be jọ ru iwuhrẹ, ekpako ikoko na a rẹ m’omaa na re ahwo kpobi evaọ ikoko na a w’obọ evaọ ẹruọsa na.

Edhere vẹ ọ mai woma nọ a rẹ rọ rẹrote owha-iruo onana? A re ru Ọgwa Uvie na fo lele omaa ẹsikpobi. Ekwakwa nọ a re ro ru erufuọ na e rẹ jariẹ. A re kere uhie eware nọ u fo nọ a re ru fihọ oria nọ iruiruo na a jẹ rue riẹ rọkẹ ọkpọvio. Ihie eware ivẹ e rẹ sae jariẹ, ọjọ rọkẹ erufuọ ovovori evaọ okenọ a te ku ewuhrẹ kpobi họ no, ọfa rọkẹ erufuọ ologbo evaọ k’oka k’oka. Owuhrẹ ọ uwuhrẹ obe ukoko na ọ rẹ m’omaa ẹdẹ gbe oke erufuọ ologbo na nọ o re ro kiehọ ahwo kpobi nọ a kẹ iruo na oma. A rẹ jẹ rẹrote ẹbe na, eflawa, gbe irre. A re si eware kpobi no idhere owotọ gbe oria nọ a rẹ dhẹ imoto fihọ. K’ukpe k’ukpe a re ru obọdẹ erufuọ ologbo, ẹsejọhọ taure Ekareghẹhọ na o te te. Onana o sai kugbe ẹwozẹ inwido gbe igbẹhẹ na, ẹwozẹ ekapẹte, gbe eririe ọ ekọtini na.

Uzẹme, mai kpobi ma rẹ sai ru owha iruo na vori ẹkwoma ẹwhaha egbolo ebe, athethe, hayo eware efa fihọ eva hayo otafe ọgwa na. Ma rẹ sae rẹrote oria ame-okuo evaọ oke kpobi nọ ma tẹ jariẹ kuame no, o vẹ jọ fuafo kẹ omọfa nọ ọ te jariẹ kuame. Yọrọ oma re whọ se ekwakwa ba ekpe hayo ewiri no. Muẹrohotọ kẹ eware nọ i wholo ekapẹte, egbara nọ e raha, ebẹbẹ ọ ekwakwa nọ ame ọ rẹ dhẹ, ikpẹ ẹlẹtriki nọ e to no, gbe efa, jẹ n’iyẹrẹ eware enana kẹ oniọvo nọ o w’uzou ẹruorote Ọgwa Uvie na.

Jọ u no omai kpobi eva ze re ma ru ẹkẹ abọ mai. Onana o rẹ wha uwou egagọ nọ u re siuru ze je kpoka h’omai wọhọ ahwo ọfuafo nọ e be kẹ Jihova Ọghẹnẹ orro.—1 Pita 1:16.