Tha Iruo Uvie na Uke Evaọ Oborai gbe Akpọ-Soso

ISẸRI Jihova a ta usi uwoma na te “oria nọ o mai thabọ evaọ otọakpọ na” no, yọ onana u bi ru eruẹaruẹ Jesu kpahe edẹ urere na gba. (Iruẹru 1:8; Mat. 24:14) A be sai ru onana ẹkwoma unevaze nọ a be rọ rehọ oke gbe ẹgba rai ro wuhrẹ ahwo ẹme Ọghẹnẹ. Fikinọ a fievahọ Jihova inọ o ti ru ẹgwọlọ ibe iruiruo riẹ kẹ ae, a be rehọ Uvie Ọghẹnẹ karo evaọ uzuazọ rai. (Mat. 6:25-34; 1 Kọr. 3:5-9) Iyẹrẹ nọ i bi no onana ze e kẹ imuẹro inọ Jihova ọ jẹ iruo rai rehọ jẹ be ghale ae.

EPANỌ MA BI RO WO UGHO RU IRUO UVIE NA EVAỌ AKPỌ-SOSO

² Nọ ahwo jọ a tẹ ruẹ idhere sa-sa nọ ma bi ro whowho usi uwoma na jẹ ruẹ nọ ma be rehọ Ebaibol gbe ebe mai kẹ ahwo ababọ unuigho jọ nọ ma bi mi fihọ ai, a rẹ nọ inọ: “Ẹvẹ wha be sai ro ru eware nana kpobi?” Uzẹme, ugho ma be raha ro kere je printi Ebaibol gbe ebe nọ a re ro wuhrẹ Ebaibol na. Ma tẹ jẹ be raha ugho rọ bọ jẹ rẹrote iwou Ebẹtẹle nọ ahwo nọ a be rehọ ijini printi ebe na a rrọ, gbe ahwo nọ a be rẹrote iruo usi uwoma ota na, gbe enọ i bi ru iruo efa sa-sa evaọ Ebẹtẹle rọ wha iruo ewhowho usi uwoma na haro. U te no ere no, a rẹ rehọ umutho ugho jọ kẹ esẹro okogho, imishọnare usi uwoma ota, ekobaro obọdẹ gbe amọfa nọ a rrọ iruo odibọgba oke-kpobi obọdẹ na ro fiobọhọ kẹ ae ruabọhọ iruo na. O rrọ vevẹ inọ ma be raha igho buobu fihọ iruo usi uwoma ota na evaọ oke mai na, makọ evaọ oria nọ ma rrọ hayo evaọ akpọ-soso. Diẹse igho na kpobi i bi no ze?

³ Iruo nọ Isẹri Jihova a bi ru rọ rehọ Ebaibol wuhrẹ ahwo o be were ahwo buobu yọ a be rọ evawere kẹ okẹ unevaze rọkẹ iruo akpọ-soso mai na. O make rrọ ere na, inievo na họ ahwo nọ a be mae tha iruo na uke, ejọ rai i re vi okẹ unevaze kpohọ uwou ogha Isẹri Jihova nọ o rrọ orẹwho rai. A bi dhesẹ ẹzi unevaze wọhọ idibo Ọghẹnẹ oke anwae, enọ e rehọ eva rai kpobi kẹ okẹ unevaze nọ a rọ bọ uwou egagọ Jihova. (Ọny. 35:20-29; 1 Irv. 29:9) Ahwo jọ a re kere obe fihọ otọ inọ a gwọlọ nọ a te whu no, ukoko na o rehọ eware rai hayo ugho nọ u bi no ai ze, yọ omomọvo, ikoko, gbe ikogho a re vi okẹ unevaze kpobọ uwou ogha, yọ ẹsibuobu umutho ugho e rẹ jọ. Ekẹ unevaze nana kpobi ma bi kugbe ro wo ugho ru iruo na.

⁴ Isẹri Jihova a rehọ e riẹ nọ uvẹ-ọghọ o rrọ re a rehọ ugho rai gbe eware efa nọ a wo ro ru iruo usi uwoma ota na. Jesu avọ ilele riẹ a wo ẹkpẹti ugho nọ a jẹ hae jọ rehọ ugho ro ru eware. (Jọn 13:29) Ebaibol na ọ vuẹ omai kpahe eyae nọ e gbodibo kẹ Jesu avọ ilele riẹ. (Mak 15:40, 41; Luk 8:3) Nọ ahwo nọ a gwọlọ nọ a re wobọ evaọ ẹwhaharo usi uwoma na jẹ gwọlọ nọ a re fiobọhọ kẹ Pọl evaọ iruo na a kẹe eware obufihọ, ọ rọ evawere mi ai. (Fil. 4:14-16; 1 Tẹs. 2:9) Isẹri Jihova a gbe bi lele iriruo oke anwae nana nọ ahwo a jẹ rọ rehọ ọwhọ gbodibo jẹ kẹ okẹ unevaze na. Fikiere, o be lọhọ re a kẹ ahwo nọ a wo emamọ udu evaọ oria kpobi “ame uzuazọ ọvọvẹ.”​—Evia. 22:17.

EPANỌ A BI RO WO UGHO RẸROTE ẸGWỌLỌ UKOKO RAI

⁵ Okẹ unevaze a bi ro wo ugho nọ a be raha ro ru eware evaọ ikoko sa-sa nọ e riẹ na. A re ghoro umudo ho, a re bru azọhọ kẹ ohwo ọvo ho, yọ a rẹ yare igho ho. A fi itehe unevaze họ eria iwuhrẹ mai re omomọvo ọ sae kẹ okẹ “wọhọ epanọ ọ gba riẹ mu evaọ udu riẹ.”​—2 Kọr. 9:7.

⁶ Eware nọ a be jọ Ọgwa Uvie na ru gbe ẹruorote Ọgwa Uvie na họ eware ọsosuọ nọ a rẹ raha igho unevaze fihọ. Ugboma ekpako na o sae jiroro nọ a re vi ugho jọ kpobọ uwou ogha Isẹri Jihova nọ o rrọ orẹwho rai re a ro kugbe ru iruo akpọ-soso na. Ukoko na u re ru ọtamuo ọrọ unuigho nọ a re vi. Ikoko buobu a be rọ enẹ ru unevaze kẹ iruo akpọ-soso na ẹsikpobi. Nọ mai kpobi ma tẹ be hae kẹ okẹ unevaze roro eware nọ e rẹ sae romavia no oke te oke, u ti ru nọ a ti gbe ro ru owhowhovia kẹse kẹse kpahe eruo unevaze he.

EPANỌ A RE RU IGHO UNEVAZE NA

⁷ Nọ ewuhrẹ kpobi ọ tẹ fa no, inievo-emezae ivẹ a rẹ tọlọ igho nọ a fihọ itehe unevaze na a ve kere ai fihotọ. (2 Iv. 12:9, 10; 2 Kọr. 8:20) Ugboma ekpako na u re ru emamọ ọruẹrẹfihotọ nọ a rẹ rọ sẹro igho na bẹsenọ a re vi ai kpobọ uwou ogha hayo rehọ ai ru eware evaọ ukoko na. Kamara kamara oniọvo nọ ọ be rẹrote igho ukoko na o re kere igho nọ a wo gbe epanọ a raha e rai riwi fihọ obe re a ro ru ukoko na riẹ epanọ a raha igho na, yọ evaọ emerae esa kpobi, ọnọ o re koko iruẹru ugboma ekpako na họ o re ru re a kiẹ ebe nọ a kere igho gbe araha na fihọ riwi.

IGHO NỌ OKOGHO Ọ RAHA

⁸ Unevaze nọ inievo nọ e rrọ okogho na a ru a rẹ rọ hwa igho nọ a raha evaọ ikokohọ gbe eware efa nọ okogho na ọ jọ raha ugho. A re fi itehe unevaze họ oria okokohọ na re ahwo a sai ru unevaze rọkẹ okogho na. U te no ere no, ikoko e sai ru unevaze evaọ oke ofa sa-sa re a ruẹ ugho rẹrote eware jọ.

⁹ Wọhọ epanọ o rẹ mae jọ, u fo nọ ikogho a rẹ sae ruẹ ugho rọ rẹrote araha kpobi nọ u fo, a vẹ rehọ ugho nọ u kiọkọ ro ru unevaze fihọ iruo akpọ-soso na. Otẹrọnọ a jọ ẹkpa-ugho okogho na wo ugho bu te epanọ u ti ro te hwa araha okokohọ na ha hayo u ti te ruẹrẹ eware kpahe kẹ okokohọ ọfa nọ ọ be tha ha, wọhọ oriruo, ugho nọ a rẹ rọ haya oria nọ a te jọ ru okokohọ, ọsẹro okogho na ọ sae ta nọ a vuẹ ikoko na inọ a ru unevaze fiki ẹjiroro nana. Ugboma ekpako kpobi o rẹ rehọ ẹme na gba ẹgwae a vẹ jiroro unuigho nọ ukoko rai o sai ro ru unevaze fihọ ẹkpa-ugho okogho na. A tẹ jiroro na no, ukoko na soso u ve ru ọtamuo.

¹⁰ Nọ ẹme ugho o tẹ romavia nọ o gwọlọ nọ ekpako okogho na a rẹ ta ẹme kpahe, ekpako okogho na a rẹ gba ẹgwae evaọ ẹdẹ okokohọ. U te no igho nọ a rẹ raha fihọ eware jọ evaọ okogho na no, nọ a tẹ gwọlọ raha ugho fihọ oware ofa jọ kpobi, ekpako okogho na a re ru ọtamuo. Oke kpobi nọ a tẹ gwọlọ raha ugho okogho na, a re kere unuigho na dẹẹ fihọ obe ọtamuo na a ve sei kẹ ekpako na re a ta sọ a rọwo fihọ iẹe.

¹¹ A re ru ọruẹrẹfihotọ nọ a rẹ rọ kiẹ igho okogho na riwi noke ruọ oke.

ẸRUOROTE IYOGBE

¹² Ẹjiroro jọ nọ Jesu avọ ilele riẹ a ro wo ẹkpẹti ugho họ re a fiobọhọ kẹ iyogbe. (Mak 14:3-5; Jọn 13:29) Owha-iruo yena nọ Ileleikristi i wo na o gbẹ rrọ otọ, keme Jesu ọ ta nọ: “Iyogbe na e rrọ kugbe owhai ẹsikpobi.” (Mak 14:7) Ẹvẹ Isẹri Jihova a bi ro ru onana nẹnẹ?

¹³ Ẹsejọ, inievo nọ i kru ukoko na ga ziezi a sae gwọlọ obufihọ fiki owho, ẹyao, hayo ebẹbẹ jọ nọ e rro vi ai oma. Ahwo uviuwou, imoni gbe amọfa nọ e riẹ kpahe ẹbẹbẹ na a sae gwọlọ fiobọhọ. Onana o rọwokugbe eme Jọn ukọ na: “Ohwo jọ o te wo eyero akpọ nana, ọ jẹ ruẹ oniọvo riẹ nọ akpọ ọ be bẹ rekọ ọ rọwo dhesẹ ọdawẹ kẹe he, ẹvẹ ma sae rọ ta nọ o you Ọghẹnẹ? Emọ esese, uyoyou mai o rẹ jọ orọ ẹmeunu hayo igbenu hu, rekọ ma rẹ rọ iruo dhesẹ iẹe via, yọ u re no omai eva ze.” (1 Jọn 3:17, 18; 2 Tẹs. 3:6-12) Obufihọ kẹ inievo nọ i kru ga nọ akpọ ọ be bẹ yọ abọjọ egagọ uzẹme.​—Jem. 1:27; 2:14-17.

¹⁴ Evaọ ileta ọsosuọ riẹ se Timoti, Pọl ukọ na o dhesẹ epanọ a sai ro fiobọhọ kẹ enọ i te kẹ obufihọ otiọye. Whọ rẹ sai se ohrẹ riẹ na evaọ 1 Timoti 5:3-21. Oleleikristi kpobi o wo owha-iruo nọ o re ro ru ẹgwọlọ ahwo uwou riẹ kẹ ae. Emọ, emọ-iruọmọ, hayo imoni ekpekpe i re fiobọhọ kẹ enọ e kpako no hayo enọ oma rai o ga ha. Ẹsejọ, egọmeti hayo utu-ahwo jọ a re wo ọruẹrẹfihotọ nọ a re ro fiobọhọ kẹ ahwo, fikiere imoni hayo amọfa a sai fiobọhọ kẹ ohwo nọ ọ gwọlọ obufihọ na yare obufihọ otiọye na. Oware jọ o sae via nọ o jẹ gwọlọ nọ ukoko na soso o rẹ jiroro kpahe epanọ a re ro fiobọhọ kẹ inievo-emezae gbe inievo-emetẹ jọ nọ e gwọlọ obufihọ, enọ e gọ Ọghẹnẹ avọ ẹrọwọ ikpe buobu no. Otẹrọnọ ahwo uviuwou hayo imoni e riẹ nọ e rẹ rẹrote ahwo otiọye na ha, yọ egọmeti o bi ru emamọ oware ovo ro fiobọhọ họ, ugboma ekpako na o sai ru ọruẹrẹfihotọ nọ ukoko na u re ro fiobọhọ. Ileleikristi a rri rie fihọ uvẹ-ọghọ re a rehọ eware rai fiobọhọ kẹ ahwo nọ eware e rrọ gaga kẹ.

¹⁵ Eware e sae jọ gaga kẹ inievo-emezae gbe inievo-emetẹ mai buobu fiki ukpokpoma, ẹmo, etọ nọ i nuhu, owhe nọ o ku, ohọo nọ u bi mu, hayo eware okpẹtu efa nọ e be via evaọ oke obẹbẹ nana. (Mat. 24:7-9) Yọ o sae via nọ ukoko soso u wo uvumọ oware nọ a re ro fiobọhọ kẹ ohwohwo ho, fikiere Utu Ẹruorote na u re ru ọruẹrẹfihotọ re inievo nọ e rrọ eria efa a fiobọhọ. Onana o wọhọ epanọ Ileleikristi obọ Esia Minor a ro vi emuore se inievo na evaọ Judia okenọ ohọo u je mu. (1 Kọr. 16:1-4; 2 Kọr. 9:1-5) Ma te bi lele oriruo rai, yọ ma bi dhesẹ nọ ma you inievo mai je dhesẹ nọ mai yọ uvi ilele Jesu Kristi.​—Jọn 13:35.

EPANỌ A RE RO WO EBE

¹⁶ Ebaibol gbe ebe nọ a kere no Ebaibol ze i bi fiobọhọ gaga evaọ ẹvaha ovuẹ Uvie na. Wọhọ epanọ o rẹ mae jọ, ugboma ekpako na o rẹ rehọ odibo oruiruo jọ mu nọ ọ rẹ rẹrote ebe evaọ ukoko na. Inievo nọ a ro mu nọ a rẹrote ebe nana a re se iruo rai gboja. A re wo emamọ okerefihotọ ọrọ ebe nọ e rrọ ukoko na re a ruẹ ẹsikpobi inọ ukoko rai u wo ebe nọ a gwọlọ.

¹⁷ Mai Ileleikristi nọ e roma mudhe no ma riẹ nọ oke mai, ẹgba mai, onaa nọ ma wo gbe eyero mai, makọ uzuazọ mai dede yọ ekẹ nọ i no obọ Ọghẹnẹ ze nọ ọ kẹ omai re ma ro ru iruo riẹ. (Luk 17:10; 1 Kọr. 4:7) Ma tẹ be rehọ eware kpobi nọ ma wo ro ru iruo evaọ emamọ edhere, yọ ma bi dhesẹ epanọ ma you Jihova te. O rrọ isiuru mai re ma rehọ eware eghaghae mai kẹ Jihova orro keme ma riẹ nọ okẹ kpobi nọ ma kẹ riẹ no udu kpobi ze evaọ egagọ riẹ o rẹ were iẹe. (Itẹ 3:9; Mak 14:3-9; Luk 21:1-4; Kọl. 3:23, 24) Jesu ọ ta nọ: “Ọvọvẹ a kẹ owhai, wha kẹ ọvọvẹ.” (Mat. 10:8) Nọ ma be rehọ oma mai gbe eware nọ ma wo ru iruo Jihova na, ma bi wo oghọghọ ulogbo.​—Iruẹru 20:35.