Ẹvẹ Whọ Sae Rọ Jọ Ogbẹnyusu Ọghẹnẹ?

1, 2. Amono a jọ egbẹnyusu Jihova?

OGHẸRẸ ohwo vẹ whọ gwọlọ nọ ọ rẹ jọ ogbẹnyusu ra? Ohwo nọ ọ were owhẹ. Ohwo nọ whẹ avọ iẹe wha re ru eware kugbe ababọ ẹwhọ. Ohwo nọ ọ rrọ wowou nọ o wo iruemu nọ e were owhẹ.

² Jihova Ọghẹnẹ ọ salọ ahwo jọ re a jọ egbẹnyusu riẹ. Wọhọ oriruo, Abraham ọ jọ ogbẹnyusu Jihova. (Aizaya 41:8; Jemis 2:23) Devidi ọ were Jihova re. Jihova ọ ta nọ Devidi ọ jọ ‘ọzae nọ o kiehọ udu riẹ.’ (Iruẹru Ikọ 13:22) Yọ Daniẹl ọruẹaro na ọ jọ “ghaghae gaga” kẹ Jihova.​—Daniẹl 9:23.

3. Eme ọ lẹliẹ Abraham, Devidi, gbe Daniẹl jọ egbẹnyusu Jihova?

³ Ẹvẹ Abraham, Devidi, gbe Daniẹl a ro zihe ruọ egbẹnyusu Jihova? Jihova ọ ta kẹ Abraham nọ: “Whọ gaviezọ kẹ urru mẹ.” (Emuhọ 22:18) Jihova o re mu ogbẹnyusu kugbe ahwo nọ a re yoẹme riẹ. Ahwo orẹwho soso dede a rẹ sai zihe ruọ egbẹnyusu riẹ. Jihova ọ ta kẹ orẹwho Izrẹl nọ: “Wha yoẹme kẹ urru mẹ, mẹ vẹ te jọ Ọghẹnẹ rai, wha vẹ te jọ ahwo mẹ.” (Jerimaya 7:23) Fikiere whọ tẹ gwọlọ jọ ogbẹnyusu Jihova who re yoẹme kẹe.

JIHOVA Ọ RẸ THỌ EGBẸNYUSU RIẸ

4, 5. Ẹvẹ Jihova ọ be rọ thọ egbẹnyusu riẹ?

⁴ Ebaibol na ọ ta nọ Jihova ọ be gwọlọ idhere nọ o re ro “dhesẹ ẹgba riẹ fiki ahwo nọ a rehọ udu rai kpobi kẹe.” (2 Iruẹru-Ivie 16:9) Evaọ obe Olezi 32:8, Jihova ọ ya eyaa kẹ ohwo kpobi nọ ọ rrọ ogbẹnyusu riẹ nọ: “Me ti ru owhẹ wo otoriẹ udidi je wuhrẹ owhẹ edhere nọ u fo nọ whọ rẹ nya. Mẹ te kẹ owhẹ ohrẹ yọ me bi rri owhẹ.”

⁵ Ọwegrẹ ọgaga jọ ọ gwọlọ nọ ma jọ ogbẹnyusu Ọghẹnẹ hẹ. Rekọ Jihova ọ gwọlọ thọ omai no obọ riẹ. (Se Olezi 55:22.) Nọ ma rrọ egbẹnyusu Jihova na ma rẹ rehọ eva mai kpobi gọe. Ma rẹ talamu ei nọ eware e tẹ make ga. Yọ ma fievahọ iẹe inọ ọ te siọ omai ba ha. Ere ọso-ilezi na o fievahọ Jihova re, o kere nọ: “Fikinọ [Jihova] ọ rrọ obọze mẹ, oware ovo u re nuhu omẹ vievie he.” (Olezi 16:8; 63:8) Eme Setan o bi ru re ma siọ egbẹnyusu Ọghẹnẹ ba ẹjọ?

SETAN O GU ỌRUE

6. Eme Setan ọ ta kpahe ahwo-akpọ?

⁶ Evaọ Uzou avọ 11, ma wuhrẹ nọ Setan o dhesẹ nọ Jihova yọ ọtọrue. Ọ ta nọ oware uyoma Jihova o ru nọ ọ gbẹ rọ kẹ Adamu avọ Ivi uvẹ re a jiroro oware nọ u woma gbe onọ u yoma kẹ omobọ rai hi. Ma jọ obe Job ruẹ nọ Setan o gu ọrue fihọ ahwo-akpọ nọ e gwọlọ jọ egbẹnyusu Ọghẹnẹ uzou re. Setan o dhesẹ nọ orọnikọ fikinọ a you Ọghẹnẹ jabọ nọ a be rọ gọe he rekọ fiki eware nọ Ọghẹnẹ ọ be kẹ ae. Setan ọ tubẹ ta nọ ọ rẹ sai ru ohwo kpobi wọso Ọghẹnẹ. Ma be te ta kpahe oware nọ ma wuhrẹ mi Job gbe epanọ Jihova ọ rọ thọe.

7, 8. (a) Ẹvẹ Jihova o rri Job? (b) Eme Setan ọ ta kpahe Job?

⁷ Ono họ Job? Job ọ jọ emamọ ohwo nọ ọ jọ akpọ na ikpe idu esa gbe egba ezeza (3,600) nọ i kpemu. Jihova ọ ta nọ evaọ oke yena ohwo ọvo ọ jọ wọhọ Job evaọ otọakpọ na ha. Job o wo adhẹẹ kẹ Ọghẹnẹ gaga, o mukpahe oware uyoma. (Job 1:8) Job ọ ginẹ jọ ogbẹnyusu Jihova.

⁸ Setan ọ ta nọ Job ọ be gọ Ọghẹnẹ fiki eware nọ Ọghẹnẹ ọ be kẹe. Setan ọ tẹ ta kẹ Jihova nọ: “Kọ who di ogba [hayo, ma ugbẹhẹ] wariẹe họ avọ uwou riẹ gbe oware kpobi nọ o wo? Whọ ghale iruo abọ riẹ, yọ erao riẹ i bu gaga no evaọ ẹkwotọ na. Rekọ, re onana u nwene, rriẹ obọ ra re whọ raha oware kpobi nọ o wo, ọ te la owhẹ eka evaọ iraro ra.”​—Job 1:10, 11.

9. Eme Jihova ọ kẹ Setan uvẹ nọ o ru?

⁹ Setan ọ ta nọ Job ọ be gọ Jihova fiki eware nọ Jihova o bi ru kẹe. Setan ọ tẹ jẹ ta nọ ọ sai ru Job siọ Ọghẹnẹ ba ẹgọ. Jihova ọ rọwo fihọ ẹme Setan na ha, rekọ ọ kẹ Setan uvẹ re ọ dawo Job re a riẹ sọ uyoyou nọ Job o wo kẹ Ọghẹnẹ oye o be lẹliẹe gọe.

SETAN Ọ DAWO JOB

10. Ẹvẹ Setan ọ rọ dawo Job, kọ eme Job o ru hu?

¹⁰ Orọ ọsosuọ, Setan o kpe erao Job kpobi muotọ. Kẹsena o te kpe enwenọ idibo Job kpobi. Job o gbe wo oware ovo ho. Mai yoma na, Setan ọ tẹ rọ ọwhibo kpe emọ ikpe Job no. Rekọ Job ọ siọ Jihova ba ẹgọ họ. “Evaọ eware nana kpobi, Job ọ raha uzi hi, yọ ọ fuọ Ọghẹnẹ nọ o ru oware jọ thọ họ.”​—Job 1:12-19, 22.

11. (a) Eme ọfa Setan o ru Job? (b) Kọ eme Job o ru hu?

¹¹ Setan ọ jọ etẹe serihọ họ. Ọ tẹ wariẹ ta kẹ Ọghẹnẹ nọ: “Tehe ugbonwa riẹ avọ uwo-oma riẹ, ọ te la owhẹ eka evaọ iraro ra.” Fikiere Setan ọ tẹ rọ ẹyao ọgaga tehe Job. (Job 2:5, 7) Onana o lẹliẹ Job kiukeku Jihova gbe he. Ọ ta nọ: “Bẹsenọ me re whu, me re siobọno ẹgbakiete mẹ hẹ!”​—Job 27:5.

12. Ẹvẹ Job o ro dhesẹ nọ Setan yọ ọtọrue?

¹² Job ọ riẹ sọ Setan họ ohwo nọ ọ be wha ebẹbẹ riẹ ze vievie he. O je tube roro nọ Jihova họ ọnọ ọ be wha ebẹbẹ riẹ ze. (Job 6:4; 16:11-14) Rekọ Job ọ talamu Jihova ghele. Onana u dhesẹ vevẹ nọ orọnikọ fiki eware nọ Jihova ọ be kẹ Job ọ be rọ gọe he. Ọ jọ ogbẹnyusu Ọghẹnẹ fikinọ o you rie. Erue ọvo Setan o gu!

13. Eme Jihova o ru kẹ Job fikinọ ọ talamu ei?

¹³ Dede nọ Job ọ riẹ oware nọ o jẹ via evaọ obọ odhiwu hu, ọ talamu Ọghẹnẹ je dhesẹ Setan fihọ ohwo omuomu. Jihova ọ ghale Job keme ọ talamu ei evaọ oke ogaga.​—Job 42:12-17.

SETAN O GU ỌRUE FIHỌ OWHẸ UZOU

14, 15. Ọrue vẹ Setan o gu fihọ ahwo kpobi uzou, te ezae te eyae?

¹⁴ Whọ sai wuhrẹ obọdẹ oware jọ no oware nọ o via kẹ Job na ze. Nẹnẹ, Setan ọ be ta nọ ma be gọ Jihova fiki eware nọ Ọ te kẹ omai. Evaọ obe Job 2:4, Setan ọ ta nọ: “Ohwo o re siobọno eware nọ o wo kpobi fiki uzuazọ riẹ.” Fikiere Setan ọ ta nọ ohwo kpobi, te ezae te eyae a be gọ Ọghẹnẹ fiki eware nọ Ọghẹnẹ o ti ru kẹ ae. Nọ Job ọ maki whu vrẹ ikpe buobu no, yọ Setan ọ gbẹ be poviẹ Ọghẹnẹ je bi gu ọrue kpahe idibo riẹ. Wọhọ oriruo, Jihova ọ jọ obe Itẹ 27:11 ta nọ: “Wo areghẹ, ọmọzae mẹ, re who ru udu mẹ ghọghọ, re mẹ sae kẹ ọnọ ọ be poviẹ omẹ na uyo.”

¹⁵ Whọ sae salọ nọ who re yoẹme kẹ Jihova ẹsikpobi re whọ jọ ogbẹnyusu riẹ, re whọ rọ enẹ dhesẹ Setan fihọ ọtọrue. O tẹ make rọnọ onana o gwọlọ nọ whọ rẹ whaha iruemu jọ nọ who je ru vẹre re whọ sae jọ ogbẹnyusu Ọghẹnẹ, yọ emamọ oware whọ gwọlọ ru na! U wuzou gaga re who ru onana. Setan ọ ta nọ whọ sai yoẹme kẹ Ọghẹnẹ hẹ nọ ebẹbẹ i te te owhẹ oma. Ọ rẹ gwọlọ viẹ omai họ re ma ru oware nọ o rẹ dha Ọghẹnẹ eva. Ẹvẹ o re ro ru ei?

16. (a) Idhere vẹ Setan ọ be rọ dawo omai re ma siọ ogbẹnyusu Jihova ba ẹjọ? (b) Ẹvẹ Setan ọ be rọ gwọlọ whaha owhẹ re whọ siọ Jihova ba ẹgọ?

¹⁶ Setan ọ be rọ idhere sa-sa dawo omai re ma siọ egbẹnyusu Ọghẹnẹ ba ẹjọ. Ọ be họre omai “wọhọ okpohrokpo nọ o bi do enu, be gwọlọ ohwo nọ ọ rẹ re no.” (1 Pita 5:8) Jọ u gbe owhẹ unu hu nọ egbẹnyusu, ahwo uviuwou, gbe amọfa a tẹ be gwọlọ whaha owhẹ re whọ siọ Ebaibol ba ewuhrẹ, jẹ siọ oware nọ u fo ba eruo. O sae jọ owhẹ oma wọhọ ẹsenọ a be họre owhẹ.a (Jọn 15:19, 20) Setan o re je “ru omariẹ wọhọ ukọ-odhiwu elo” re ọ sae viẹ ahwo họ. Ọ gwọlọ viẹ omai họ ru oware nọ o rẹ dha Jihova eva. (2 Ahwo Kọrint 11:14) Edhere ọfa nọ Setan ọ be rọ dawo omai họ, o re ru omai roro nọ ma woma te ahwo nọ a rẹ gọ Ọghẹnẹ hẹ.​—Itẹ 24:10.

KOKO IZI JIHOVA

17. Fikieme ma re ro yoẹme kẹ Jihova?

¹⁷ Ma te bi yoẹme kẹ Jihova yọ ma bi dhesẹ nọ Setan yọ ọtọrue. Eme o ti fiobọhọ kẹ omai yoẹme? Ebaibol na ọ ta nọ: “Whọ rẹ rehọ udu ra kpobi gbe uzuazọ ra kpobi gbe ẹgba ra kpobi you Jihova Ọghẹnẹ ra hrọ.” (Iziewariẹ 6:5) Ma re yoẹme kẹ Jihova fikinọ ma you rie. Nọ uyoyou nọ ma wo kẹ Jihova u bi dhe ẹgẹga na, u ti no omai eva ze inọ ma re ru oware kpobi nọ ọ ta kẹ omai. Jọn ukọ na o kere nọ: “Enẹ ma re ro dhesẹ nọ ma you Ọghẹnẹ, ma re koko ijaje riẹ; yọ ijaje riẹ e rrọ owha ogbẹgbẹdẹ hẹ.”​—1 Jọn 5:3.

18, 19. (a) Eware jọ vẹ Jihova ọ ta inọ e thọ? (b) Ẹvẹ ma rọ riẹ nọ Jihova ọ rẹ sae vuẹ omai nọ ma ru oware nọ o ga vi omai hi?

¹⁸ Rekọ eware jọ vẹ Jihova ọ ta inọ e thọ? A fodẹ ejọ evaọ ẹkpẹti na “Mukpahe Eware nọ Jihova O Mukpahe.” Ẹsejọ whọ sai roro nọ eware nana jọ e nwani yoma tere he. Rekọ nọ who te se eria Ebaibol nọ e rrọ otọ rai na jẹ romatotọ roro kpahe ae, whọ te ruẹ oware nọ u ro woma re ma koko izi Jihova. Ẹsejọhọ whọ te ruẹ nọ u fo nọ who re siobọno eware jọ nọ who je ru vẹre. Dede nọ o te lọhọ kẹ owhẹ hẹ, whọ tẹ sai siobọno ai, who ti wo udhedhẹ nọ Ọghẹnẹ ọ rẹ kẹ egbẹnyusu riẹ. (Aizaya 48:17, 18) Ẹvẹ ma rọ riẹ nọ o lọhọ re ma siobọno uruemu uyoma?

¹⁹ Jihova ọ sae ta kẹ omai nọ ma ru oware nọ ma rẹ sai ru hu hu. (Iziewariẹ 30:11-14) Emamọ ogbẹnyusu mai ọ rrọ, ọnọ ọ riẹ omai vi epanọ ma riẹ omamai. Ọ riẹ eware nọ ma rẹ sai ru lọlọhọ gbe enọ e rẹ bẹ omai eruo. (Olezi 103:14) Pọl ukọ na ọ tuduhọ omai awọ nọ: “Ọghẹnẹ o re ru ẹme riẹ gba, yọ ọ rẹ kuvẹ hẹ re odawọ nọ wha rẹ sai thihakọ riẹ hẹ u te owhai, rekọ nọ odawọ u te te owhai ọ te gbẹ edhere kẹ owhai re wha sai thihakọ riẹ.” (1 Ahwo Kọrint 10:13) U mu omai ẹro nọ Jihova ọ te kẹ omai ẹgba nọ ma re ro ru oware nọ u fo ẹsikpobi. Ọ te kẹ owhẹ “ogaga nọ u vi ogaga” re whọ sai thihakọ ebẹbẹ. (2 Ahwo Kọrint 4:7) Nọ Jihova ọ kẹ Pọl ẹgba ro thihakọ ebẹbẹ sa-sa no, ọ tẹ ta ududu nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.”​—Ahwo Filipai 4:13.

DAOMA YOU EWARE NỌ JIHOVA O YOU

20. Iruemu vẹ u fo nọ who re dhesẹ, kọ fikieme?

²⁰ Ma tẹ gwọlọ jọ ogbẹnyusu Ọghẹnẹ, ma rẹ whaha eware nọ Jihova ọ ta inọ e thọ, rekọ ma rẹ jọ etẹe serihọ họ. (Ahwo Rom 12:9) Egbẹnyusu Ọghẹnẹ a re you eware nọ o you. A fodẹ eware na evaọ obe Olezi 15:1-5. (Sei.) Egbẹnyusu Jihova a rẹ rọ aro kele iei dhesẹ “uyoyou, oghọghọ, udhedhẹ, odiri, uwowou, ewoma, ẹrọwọ, ẹwolẹ, oma-onyẹ.”​—Ahwo Galesha 5:22, 23.

21. Ẹvẹ whọ sae rọ riẹ epanọ a re dhesẹ iruemu iwoma nọ Ọghẹnẹ o you?

²¹ Ẹvẹ whọ sae rọ riẹ epanọ a re dhesẹ iruemu iwoma yena? O gwọlọ nọ who re wuhrẹ Ebaibol na ẹsikpobi re whọ riẹ eware nọ Jihova o you. (Aizaya 30:20, 21) Nọ who bi ru ere na, uyoyou nọ who wo kẹ Jihova o te jọ gaga, yọ uyoyou yena o te lẹliẹ owhẹ koko izi riẹ.

22. Eme who ti wo otẹrọnọ who yoẹme kẹ Jihova?

²² A rẹ sae rehọ inwene nọ who re ru evaọ uzuazọ ra dhesẹ oghẹrẹ nọ ohwo ọ rẹ ba ewu anwae no oma o ve ku ewu ọkpokpọ họ oma. Ebaibol na ọ ta nọ u fo re whọ “ba uruemu anwae na . . . no oma no” re whọ “whẹ uruemu okpokpọ na họ oma.” (Ahwo Kọlọsi 3:9, 10) Dede nọ onana o rẹ sae jọ bẹbẹ, ma te siobọno uruemu nọ u fo ho je bi ru eware nọ i woma, Jihova ọ ya eyaa nọ ọ te kẹ omai “osohwa ulogbo.” (Olezi 19:11) Fikiere, salọ inọ who re yoẹme kẹ Jihova re who dhesẹ Setan fihọ ọtọrue. Gọ Jihova, orọnikọ fiki osa nọ ọ te hwa owhẹ hẹ, rekọ fikinọ who you rie no eva ze. Kẹsena whọ vẹ te jọ ogbẹnyusu Ọghẹnẹ!