Adamu avọ Ivi A Yoẹme kẹ Ọghẹnẹ Hẹ

Ẹdẹ jọ nọ Ivi ọvo ọ jọ oria, araomuomu ọ tẹ ta ẹme kẹe. Araomuomu na ọ ta kẹe nọ: ‘Kọ ginọ uzẹme nọ Ọghẹnẹ ọ kẹ owhai uvẹ nọ wha re ibi-ire nọ e rrọ ogba na kpobi hi?’ Ivi ọ tẹ ta nọ: ‘Ma rẹ sae re ibi-ire na kpobi, rekọ ma rẹ re ovo jọ họ. Anọ ma tẹ re ubi-ure yena, ma ti whu.’ Araomuomu na ọ tẹ ta nọ: ‘Wha ti whu hu. Wha tẹ re ubi-ure na, wha te jọ wọhọ Ọghẹnẹ.’ Kọ uzẹme ọ ta na? Ijo, ọrue ọ ta na. Rekọ Ivi ọ rọwo ẹme riẹ na. Fikinọ Ivi o je rri ubi-ure na ọvo, u te si ei urru gaga. Ivi ọ tẹ re ubi-ure na, jẹ jariẹ kẹ Adamu. Adamu ọ riẹ nọ a gbe yoẹme kẹ Ọghẹnẹ hẹ, a ti whu. Rekọ ọ re ubi-ure na ghele.

Nọ omoke jọ o vrẹ no evaọ ẹdẹ yena, Jihova ọ tẹ ta ẹme kẹ Adamu avọ Ivi. Jihova ọ nọ rai oware nọ a gbe ro yoẹme kẹe he. Ivi ọ ta nọ araomuomu ọ lẹlẹ e riẹ họ, Adamu ọ tẹ ta nọ Ivi ọ kẹ riẹ ubi-ure na. Fikinọ Adamu avọ Ivi a yoẹme he, Ọghẹnẹ o te le ai no ogba na. Jihova o te fi ọgbọdọ nọ ọ be ware erae họ unu ogba na, re Adamu avọ Ivi a gbe zihe kpohọ ogba na ha.

Jihova ọ tẹ ta nọ ọ te rọ uye kẹ ohwo nọ o gu ọrue kẹ Ivi na. Orọnikọ araomuomu na ọ ginẹ ta ẹme kẹ Ivi na ha. Jihova ọ ma araomuomu re ọ ta ẹme he. Ukọ-odhiwu oyoma jọ o ru nọ araomuomu na ọ rọ ta ẹme. Ukọ-odhiwu na o ru ere re ọ sae lẹlẹ Ivi họ. A se ukọ-odhiwu yena Setan Ẹdhọ na. Evaọ obaro, Jihova ọ te raha Setan no, re ọ gbẹ lẹliẹ ahwo ru eware iyoma ha.