Jihova Ọ Salọ Joshua

Mosis o su orẹwho Izrẹl ikpe buobu no, whaọ obọnana uwhu riẹ o kẹle no. Jihova ọ tẹ ta kẹe nọ: ‘Whẹ họ ohwo nọ o ti su ahwo Izrẹl ruọ Ẹkwotọ Eyaa na ha. Rekọ me ti dhesẹ otọ na kẹ owhẹ.’ Mosis ọ tẹ ta kẹ Jihova nọ ọ salọ osu ọkpokpọ nọ o ti su ahwo riẹ. Jihova ọ tẹ ta kẹe nọ: ‘Nyabru Joshua re whọ ta kẹe nọ ọye mẹ salọ.’

Mosis ọ tẹ ta kẹ ahwo Izrẹl nọ oke uwhu riẹ o kẹle no, yọ Jihova ọ salọ Joshua no re o su ai ruọ Ẹkwotọ Eyaa na. Mosis ọ tẹ ta kẹ Joshua nọ: ‘Jọ ozọ u mu owhẹ hẹ. Jihova o ti fiobọhọ kẹ owhẹ.’ U kri hi, Mosis o te kpobọ ehru ugbehru nọ a re se Nibo, oria nọ Jihova o jo dhesẹ otọ nọ ọ ya eyaa riẹ kẹ Abraham, Aiziki, gbe Jekọp na kẹe. Ikpe udhozeza (120) Mosis ọ jọ nọ o ro whu.

Jihova ọ tẹ ta kẹ Joshua nọ: ‘Wha fa Ethẹ Jọdan na vrẹ kpobọ Kenan. Me ti fiobọhọ kẹ owhẹ wọhọ epanọ me fiobọhọ kẹ Mosis na. Hai se Uzi mẹ kẹdẹ kẹdẹ. Ozọ u mu owhẹ hẹ, wo udu. Nyai ru epanọ mẹ ta kẹ owhẹ na.’

Joshua o te vi ekiotọ ivẹ kpobọ ẹwho nọ a re se Jeriko. Evaọ uwuhrẹ nọ o rrọ aro na, ma ti wuhrẹ kpahe oware nọ o via evaọ obọ Jeriko. Nọ ekiotọ na a zihe ze, a tẹ vuẹ Joshua nọ oke nọ a re ro kpobọ otọ Kenan u te no. Evaọ ẹdẹ nọ o lele i rie, Joshua ọ tẹ ta kẹ orẹwho Izrẹl soso nọ a kparoma re a ruọ edhere. Kẹsena Joshua o te vi izerẹ na karo ruọ Ethẹ Jọdan na, yọ izerẹ na a wọ etehe ọvọ na. Whaọ ame ethẹ na ọ jọ buobu. Rekọ nọ awọ izerẹ na ọ nwani te ame ethẹ na, ẹkẹre ethẹ na ọ tẹ fọ, kẹsena ame na o te su kpohọ oria ofa! Nọ izerẹ na a nyate udevie ethẹ na a te dikihẹ, bẹsenọ orẹwho Izrẹl soso o rọ fa ethẹ na vrẹ. Kọ who roro nọ iruo igbunu nana e kareghẹhọ ahwo Izrẹl oware nọ Jihova o ru kẹ ai evaọ Abade Ọwawae na?

Whaọ enẹna, ahwo Izrẹl a rrọ evaọ Ẹkwotọ Eyaa na no. Obọnana a rẹ sae bọ iwou gbe ikpewho. A rẹ sae kọ ekakọ, egbọ, gbe ibi-ire. O ginẹ jọ otọ nọ ọnyọ gbe ame-ivie i je jo su.