Jihova Ọ Kẹ Samsin Ogaga

Ahwo Izrẹl a tẹ wariẹ mu emedhọ họ ẹgọ, fikiere Jihova ọ tẹ kuvẹ re ahwo Filistia a kienyẹ ai. Rekọ ahwo Izrẹl jọ a jariẹ nọ a you Jihova. Ohwo otiọye jọ họ ọzae nọ a re se Manoa. Manoa avọ aye riẹ a yẹ ọmọ họ. Ẹdẹ jọ Jihova o te vi ukọ-odhiwu riẹ bru aye Manoa. Ukọ-odhiwu na ọ tẹ ta kẹe nọ: ‘Who ti yẹ ọmọzae. Ọye o ti siwi ahwo Izrẹl no obọ ahwo Filistia. Ọ te jọ Nazaraet.’ Kọ whọ riẹ ahwo nọ a re se Nazaraet? Nazaraet yọ idibo nọ e rrọ ghaghae kẹ Jihova. Ahwo nọ a rọ Nazaraet a re bru eto rai hi.

Nọ oke o be nyaharo na, Manoa o te yẹ ọmọzae, o te se odẹ riẹ Samsin. Nọ Samsin ọ kpako no, Jihova ọ tẹ kẹe ogaga. Samsin ọ rọ abọ gheghe kpe okpohrokpo. Evaọ ẹdẹ jọ dede, Samsin ọvo o kpe ahwo Filistia nọ a bu te ọgba (30). Ahwo Filistia a mukpahe Samsin gaga, fikiere a tẹ jẹ gwọlọ epanọ a re ro kpei no. Aso ẹdẹ jọ nọ Samsin ọ wezẹ ẹwho jọ nọ a re se Gaza, ahwo Filistia a te kpobọ igeti ẹwho na nyae hẹrẹ iẹe re a kpei no evaọ ohiohiẹ. Rekọ Samsin ọ tẹ kpama evaọ udevie aso, ọ tẹ nya kpobọ igeti ẹwho na, o te wolo igeti na no otọ. Ọ tẹ wọ igeti na fihọ ẹkoko kpobọ ehru ugbehru jọ nọ o kẹle ẹwho nọ a re se Hebrọn!

Evaọ ẹdẹ jọ, ahwo Filistia a tẹ nyabru ogbẹnyusu ọmọtẹ Samsin nọ a re se Dilaela, a tẹ ta kẹe nọ: ‘Ma te hwa igho isiliva idu buobu kẹ owhẹ otẹrọnọ who dhesẹ oria nọ ogaga Samsin o rrọ kẹ omai. Ma gwọlọ mu ei re ma fi ei họ uwou-odi.’ Fikinọ Dilaela ọ gwọlọ ugho na, ọ tẹ ginẹ rọwo. Evaọ oke ọsosuọ Samsin ọ rọwo vuẹe oria nọ ogaga riẹ o rrọ họ. Rekọ Dilaela ọ tẹ jẹ tẹzẹ Samsin bẹsenọ ọ rọ vuẹe oria nọ ogaga riẹ o rrọ. Samsin ọ tẹ ta kẹe nọ: ‘A ri bru eto mẹ ẹdẹvo ho keme mẹ yọ Nazaraet. A te bru eto mẹ, me re gbe wo ogaga ha.’ Kọ Samsin ọ riẹ ru nọ o ro dhesẹ oria nọ ogaga riẹ o rrọ kẹe?

Dilaela ọ tẹ nwane ta kẹ ahwo Filistia nọ: ‘Mẹ riẹ oria nọ ogaga riẹ o rrọ!’ O te ru Samsin wezẹ fihọ awọ riẹ, o te se ohwo jọ ze ti bru eto riẹ no. Dilaela o te bo nọ: ‘Samsin, ahwo Filistia a be tha!’ Samsin ọ tẹ kpama, rekọ o gbe wo ogaga ha. Ahwo Filistia a tẹ gbae ifi, tu ibiaro riẹ, kẹsena a te fi ei họ uwou-odi.

Ẹdẹ jọ idu ahwo Filistia buobu a te kokohọ uwou ẹdhọ rai nọ a re se Degọn, yọ a bi bo nọ: ‘Ọghẹnẹ mai o fiobọhọ kẹ omai mu Samsin tobọ no! Wha rọ Samsin lahwe, re o ru eware ehwẹ kẹ omai.’ A tẹ rehọ iẹe dikihẹ udevie ipila ivẹ uwou nọ a kokohọ na, yọ a bi sei ẹkoko. Samsin o te bo se Jihova nọ: ‘O Jihova, ivie wariẹ kẹ omẹ ogaga ẹsiẹvo jọ.’ Evaọ oke nana, yọ eto Samsin e wariẹ di ze no. Samsin ọ tẹ rọ ogaga riẹ kpobi tunye ipila ivẹ nọ i kru uwou na. Uwou na u te kporo fihọ otọ, ahwo nọ a kokohọ eva uwou na kpobi a te whu, yọ Samsin o whu re.