Jihova Ọ Bọ Elaejah Ga

Nọ Jezibẹl o yo nọ a kpe eruẹaro Bale na kpobi no, eva e tẹ dhae gaga. O te vi uwou se Elaejah inọ: ‘Odẹnotha, me ti kpe owhẹ no wọhọ epanọ who kpe eruẹaro Bale na.’ Ozọ u te mu Elaejah gaga, ọ tẹ dhẹ nyai dhere obọ udhude. Ọ tẹ lẹ nọ: ‘Jihova, o bẹ omẹ no, me te whu oye o mai woma.’ Fikinọ oma o rrọ Elaejah no, ọ tẹ wezẹ fihọ otọ ure jọ.

Ukọ-odhiwu Ọghẹnẹ ọ tẹ rọwo iẹe jẹ rọ uvou uwowolẹ ta kẹe nọ: ‘Kpama whọ re emu.’ Elaejah ọ tẹ ruẹ ebrẹdi ogheghelie evaọ ehru itho errorro gbe ukoko-ame. Nọ ọ re no, ọ tẹ da ame, ọ tẹ wariẹ kiẹzẹ. Ukọ-odhiwu na ọ tẹ wariẹ rọwo iẹe, ọ tẹ ta kẹe nọ: ‘Re emu, re whọ sai wo ẹgba nọ whọ te rọ nya onya na.’ Fikiere Elaejah ọ tẹ wariẹ re emu. Kẹsena ọ tẹ nya edẹ udhuvẹ (40) gbe aso udhuvẹ (40) bẹsenọ o ro te Ugbehru Horẹb. Elaejah ọ tẹ nyaruọ eghogho utho jọ, ọ tẹ wezẹ fihọ etẹe. Rekọ Jihova ọ tẹ ta ẹme kẹe. Jihova ọ ta kẹe nọ: ‘Eme who bi ru evaọ etenẹ, Elaejah?’ Elaejah o te yo nọ: ‘Ahwo Izrẹl a raha eyaa nọ a ya kẹ owhẹ no. A raha egbada-idhe ra no, a te je kpe eruẹaro ra no. Whaọ obọnana a gwọlọ kpe omẹ re.’

Jihova ọ tẹ ta kẹe nọ: ‘Nyai dikihẹ ehru ugbehru na.’ Orọ ọsosuọ, ofou ọgaga o te fou nya eghogho utho na vrẹ. Orọ avivẹ, otọ u te nuhu, kẹsena erae i te muhọ ẹware. U kuhọ riẹ, Elaejah o te yo uvou nọ o rehọ urru ukpokpotọ ta ẹme. Ọ tẹ rọ ewu riẹ ruru ovao riẹ, ọ tẹ nya no evaọ eghogho utho na ze, o te dikihẹ aro eghogho na. Jihova ọ tẹ nọe oware nọ o soriẹ ze nọ ọ rọ dhẹ. Elaejah ọ tẹ ta nọ: ‘Mẹ ọvo me kiọkọ.’ Rekọ Jihova ọ tẹ ta kẹe nọ: ‘Whẹ ọvo o kiọkọ họ. Ahwo nọ a bu te idu ihrẹ (7,000) soso a gbe kiọkọ evaọ Izrẹl nọ a gbẹ be gọ omẹ. Zihe kpo re whọ rọ Elaesha mu ọruẹaro nọ ọ te rehọ ẹta ra.’ Elaejah ọ tẹ nwane nyai ru oware nọ Jihova ọ ta kẹe nọ o ru na. Kọ who roro nọ Jihova o ti fiobọhọ kẹ owhẹ re, otẹrọnọ who ru oware nọ ọ ta kẹ owhẹ nọ who ru? Ee, o ti ru ere. Joma wuhrẹ kpahe oware jọ nọ o via evaọ okenọ oso ọ jẹ rọ rrọ họ na.