Ọmọzae Aye-Uku Jọ O Zihe Ziọ Uzuazọ

Evaọ ikpe esa gbe ubro nọ oso ọ jẹ rọ rrọ họ na, Jihova ọ tẹ ta kẹ Elaejah nọ: ‘Kpobọ Zarefat. Aye-uku jọ nọ ọ rrọ obei ọ te kẹ owhẹ emu.’ Nọ Elaejah ọ be nwane nya ruọ okpẹwho na, ọ tẹ ruẹ aye-uku jọ nọ o bi hwe ire. Elaejah ọ tẹ ta kẹ aye na nọ ọ jẹ ame fihọ egho sei re ọ da. Nọ aye na ọ be nyae jẹ ame ze na, Elaejah ọ tẹ jẹ ta kẹe nọ: ‘Ivie rehọ ẹwẹ ebrẹdi jọ kugbe ze re mẹ re.’ Rekọ aye-uku na ọ tẹ ta kẹe nọ: ‘Me wo ebrẹdi ọvuọvo nọ mẹ sae kẹ owhẹ hẹ. Umutho eka nọ a wuhu gbe emewhri nọ o kiọkọ mẹ gwọlọ ro ru ememu re mẹ avọ ọmọzae mẹ ma re.’ Elaejah ọ tẹ ta kẹe nọ: ‘Jihova ọ ya eyaa nọ whọ tẹ kẹ omẹ emu re, ewhri ra avọ eka nọ a wuhu na i ti re he bẹsenọ oso ọ te rọ wariẹ rrọ.’

Fikiere aye-uku na o te kpo, o te ru ebrẹdi kẹ Elaejah, ọruẹaro Jihova na. Aye-uku na avọ ọmọzae riẹ a ruẹ emu re bẹsenọ oso ọ rọ wariẹ rrọ nwane wọhọ epanọ Jihova ọ ya eyaa riẹ. Othẹ eka nọ a wuhu avọ ewhri na i re he.

Rekọ oware uyoma jọ o tẹ via. Ọmọzae aye-uku na ọ tẹ jẹ mọ, te epanọ o ro whu. Aye-uku na ọ tẹ lẹ Elaejah re o fiobọhọ kẹe. Elaejah ọ tẹ wọ ọmọ na mi aye na, ọ tẹ wọe kpohọ ubruwou obehru jọ evaọ uwou aye-uku na. Elaejah ọ tẹ rọ ọmọ na kiẹzẹ ehwa, ọ tẹ lẹ inọ: ‘Jihova, ivie ru re ọmọ nana o zihe ziọ uzuazọ.’ Kọ whọ riẹ oware nọ o rọ rrọ oware igbunu inọ Jihova o zihe ọmọ na ziọ uzuazọ? Keme rite oke yena, a re kpare ohwo ọvo no uwhu ze he. Yọ aye-uku nana avọ ọmọ riẹ a rrọ ahwo Izrẹl dede he.

Rekọ ọmọ na ọ wariẹ zihe ziọ uzuazọ, o te muhọ ẹwẹ! Elaejah ọ tẹ ta kẹ aye-uku na nọ: ‘Rri! Ọmọzae ra ọ rrọ uzuazọ.’ Eva e were aye na gaga, fikiere ọ tẹ ta kẹ Elaejah nọ: ‘Whẹ ginọ ohwo Ọghẹnẹ. Mẹ riẹ ere keme ẹme nọ Jihova ọ ta kẹ owhẹ ọvo whọ be ta.’