Jihova Ọ Thọ Jehoshafat

Jehoshafat ovie Juda o kporo egbada-idhe Bale gbe emedhọ nọ e jọ ẹkwotọ na kpobi no. Ọ gwọlọ nọ ahwo na kpobi a riẹ izi Jihova. Fikiere o te vi ikpahwo-esuo gbe ahwo Livae nyai wuhrẹ ahwo Juda kpobi izi Jihova.

Ozọ u je mu erẹwho nọ e kẹle rai gaga re a wọ ẹmo bru ahwo Juda ze, keme a riẹ nọ Jihova ọ rrọ kugbe ai. Erẹwho na a jẹ tubẹ rehọ ekẹ se Jehoshafat ovie na dede. Rekọ ahwo Moab, ahwo Ammọn, gbe ahwo ubrotọ Siya a tẹ wọ ẹmo bru ahwo Juda ze. Jehoshafat ọ riẹ inọ Jihova họ ohwo nọ ọ rẹ sai fiobọhọ kẹe. O te koko ezae, eyae, gbe emaha na kpobi họ evaọ Jerusalẹm. Evaọ iraro ahwo na kpobi, ọ tẹ lẹ se Jihova nọ: ‘Ababọ ra Jihova, ma sai fi kparobọ họ. Ivie vuẹ omai oware nọ ma re ru.’

Jihova ọ tẹ kuyo olẹ na inọ: ‘Ozọ u mu owhai hi. Me ti fiobọhọ kẹ owhai. Wha dikihẹ ẹta rai, wha mudhe oria ovo, wha te ruẹ oghẹrẹ nọ me ti ro siwi owhai.’ Kọ oghẹrẹ vẹ Jihova o ro siwi ai?

Nọ oke o ke, Jehoshafat ọ tẹ salọ ahwo nọ a rẹ so ile, ọ tẹ ta kẹ ai nọ a kobaro kẹ egbaẹmo na. A tẹ rọ owotọ nya no Jerusalẹm rite oria nọ a ti jo fi ẹmo na nọ a re se Tẹkoa.

Nọ ahwo na a be rọ evawere so ile jiri Jihova na, Jihova ọ tẹ họre kẹ ae. Jihova o ru nọ ahwo Ammọn gbe ahwo Moab a jẹ rọ họre ohwohwo, aikpobi a te whu, ọvuọvo rai ọ zọ họ. Rekọ Jihova ọ thọ ahwo Juda kpobi, te isoja na gbe izerẹ na. Ahwo erẹwho nọ e kẹle rai kpobi a yo kpahe oware nọ Jihova o ru, a tẹ riẹ nọ Jihova ọ be thothọ ahwo riẹ. Oghẹrẹ vẹ Jihova o re ro siwi ahwo riẹ? Ọ rẹ rọ oghoghẹrẹ idhere siwi ahwo riẹ. Yọ u du gwọlọ nọ ahwo-akpọ a re fiobọhọ kẹe he nọ o te bi ru ere.