Ukọ-Odhiwu Jihova Ọ Thọ Hẹzikaya

Ahwo Asiria a fi erua ikpe Izrẹl kparobọ no. Yọ obọnana, ovie Asiria nọ a re se Senakẹrib, ọ be gwọlọ epanọ o re ro fi erua ivẹ Juda nọ i kiọkọ kparobọ. O te bi fi ikpewho Juda kparobọ unọjọ utọjọ. Rekọ ẹwho nọ ọ mae gwọlọ fi kparobọ họ Jerusalẹm. Rekọ Senakẹrib ọ riẹ nọ Jihova ọ be thọ Jerusalẹm hu.

Hẹzikaya ovie Juda ọ tẹ hwa igho buobu kẹ Senakẹrib re ọ nyasiọ Jerusalẹm ba. Dede nọ Senakẹrib o mi rie igho na, o vi egbaẹmo riẹ re a nyae họre Jerusalẹm ghele. Ozọ u je mu ahwo nọ a jọ Jerusalẹm gaga keme ahwo Asiria a kẹle rai oma no. Kẹsena Hẹzikaya ọ tẹ ta kẹ ai nọ: ‘Ozọ u mu owhai hi. Ahwo Asiria a ginẹ rrọ gaga, rekọ Jihova o ti fiobọhọ kẹ omai fi ai kparobọ.’

Senakẹrib o te vi ọgbaẹmo riẹ, nọ ọ rrọ ọkwa Rabshakẹ na kpobọ Jerusalẹm, re ọ nyae rehọ ahwo Jihova jijehwẹ. Rabshakẹ na o te dikihẹ otafe okpẹwho Jerusalẹm je bo nọ: ‘Jihova ọ te sai fiobọhọ kẹ owhai hi. Wha kuvẹ re Hẹzikaya ọ viẹ owhai họ họ. U wo ọghẹnẹ ọvuọvo nọ ọ rẹ sai siwi owhai no obọ mai hi.’

Hẹzikaya ọ tẹ lẹ se Jihova re o fiobọhọ kẹ ae riẹ oware nọ a re ru. Jihova o te yo kẹe nọ: ‘Jọ ozọ u mu owhẹ hẹ fiki eme nọ Rabshakẹ na ọ ta na. Senakẹrib ọ te sai fi Jerusalẹm kparobọ họ.’ Kẹsena Senakẹrib o te kere ileta jọ se Hẹzikaya. Enẹ o kere fihọ ileta na: ‘Wha gbẹ rẹroso Jihova ha, keme ọ te sai siwi owhai hi.’ Hẹzikaya ọ tẹ lẹ se Jihova nọ: ‘Ivie Jihova, siwi omai, re ahwo kpobi a riẹ nọ whẹ họ Ọghẹnẹ uzẹme na.’ Jihova ọ tẹ ta kẹe nọ: ‘Ovie Asiria ọ te sae rueva Jerusalẹm hu. Mẹ te thọ okpẹwho mẹ na.’

Senakẹrib o je roro nọ u ti kri hi re o te fi Jerusalẹm kparobọ. Rekọ evaọ aso ẹdẹ jọ, Jihova o te vi ukọ-odhiwu riẹ ziọ oria nọ isoja ahwo Asiria a jọ evaọ otafe Jerusalẹm. Ukọ-odhiwu na o te kpe isoja ahwo Asiria nọ i bu te idu udhuzii-gbisoi (185,000) soso! Isoja egaga Senakẹrib na kpobi a te whu. Senakẹrib ọ gbẹ sai ru oware ovo ho, o te kpo. Jihova ọ thọ Hẹzikaya gbe okpẹwho Jerusalẹm soso wọhọ epanọ ọ ya eyaa riẹ. Otẹrọnọ whọ jọ Jerusalẹm evaọ oke oyena, kọ whọ hai ti fievahọ Jihova?