Uvie nọ O Wọhọ Ure Ulogbo

Evaọ ẹdẹ jọ, Nebukadneza ọ tẹ wezẹ ewezẹ jọ nọ i mu rie ozọ gaga. O te se ezae iwareghẹ riẹ kpobi kokohọ re a fa otọ ewezẹ na kẹe. Rekọ ohwo ọvo ọ sae fa otọ ewezẹ na kẹe he. Kẹsena ovie na ọ tẹ nọ Daniẹl sọ ọ sae fa otọ ewezẹ na.

Nebukadneza ọ tẹ ta kẹ Daniẹl nọ: ‘Nọ mẹ jọ ewezẹ, mẹ tẹ ruẹ ure jọ. Ure na o rro fihọ, obọ ehru riẹ u te obọ idhiwu na. A jẹ jọ oria kpobi evaọ akpọ na soso ruẹ e riẹ. Ebe riẹ i wo erru, yọ ibi riẹ e jọ buobu. Erao e rẹ jọ otọ edhedhẹ riẹ, yọ evra obọ ehru na i re kiemu egha riẹ. Kẹsena ukọ-odhiwu jọ o te no obọ odhiwu ze, o te bo nọ: “Ko ure na fihọ otọ, re who ko egha riẹ no. Rekọ nyasiọ ehri riẹ avọ awọ riẹ ba otọ, avọ ẹwẹ-odhe ayọno gbe ekọpa nọ a rọ gbae. Jọ a nwene udu riẹ no orọ ohwo-akpọ re a rehọ udu arao kẹe, re ọ jọ ere bẹsenọ eke ihrẹ e rẹ vrẹ. Ahwo kpobi nọ a rrọ uzuazọ a vẹ ruẹse riẹ nọ Ọnọ Ọ Mai Kpehru na họ Osu uvie ahwo-akpọ, gbe nọ ọ rẹ rehọ iẹe kẹ ohwo kpobi nọ u je rie.”’

Jihova o dhesẹ otọ ewezẹ na kẹ Daniẹl. Nọ Daniẹl o wo otoriẹ ewezẹ na no, ozọ u te mu ei gaga. Ọ tẹ ta kẹ ovie na nọ: ‘O ovie, dodokọ ewezẹ nana i kiekpahe ewegrẹ ra, rekọ whẹ i kiekpahe. Whẹ họ ure ulogbo nọ a ko fihọ otọ na. A ti mi owhẹ uvie ra na, a vẹ te kẹ owhẹ ẹbe re wọhọ erao obọ ẹwọ. Rekọ fikinọ ukọ-odhiwu na ọ ta nọ a nyasiọ ehri ure na avọ awọ riẹ ba na, whọ te wariẹ jọ ovie.’

Nọ ukpe ovo o vrẹ no, ẹdẹ jọ Nebukadneza ọ tẹ jẹ nya ehru uwou riẹ wariẹ, yọ o bi rri epanọ Babilọn o wo erru te. Ọ tẹ ta avọ omorro nọ: ‘Rri epanọ okpẹwho nana nọ mẹ bọ na o wo erru te. Rri epanọ me kpehru te!’ Epanọ ọ be rọ ta ẹme na, urru jọ u te no obọ odhiwu ze ta nọ: ‘Nebukadneza! Uvie ra u no owhẹ obọ no.’

Ẹsiẹvo na, iroro Nebukadneza i te zihe ruọ erọ arao ẹwọ. A te lei no uvie riẹ, ọ tẹ jẹ rria kugbe erao evaọ obọ ẹwọ. Eto Nebukadneza e jọ thethei wọhọ ibekpe ugo, yọ ikpituabọ riẹ e wọhọ erọ ọmọvra.

Nọ ikpe ihrẹ e vrẹ no, iroro Nebukadneza i te zihe ze, Jihova ọ tẹ wariẹ rehọ iẹe mu ovie Babilọn. Nebukadneza ọ tẹ ta nọ: ‘Me jiri Jihova, Ovie idhiwu na. Enẹna mẹ riẹ no nọ Jihova họ Osu nọ ọ mai kpehru. O re hrẹ ahwo nọ a wo omorro kpotọ, yọ ọ rẹ rehọ isuẹsu kẹ ohwo nọ u je rie.’