Epanọ Egagọ Erue A be rọ Raha Odẹ Ọghẹnẹ

Otẹrọnọ Ọghẹnẹ họ uyoyou, fikieme egagọ nọ i bi se omarai ahwo Ọghẹnẹ a ro ru eware iyoma buobu no? Uzẹme riẹ họ, egagọ eyena yọ egagọ erue; a be raha odẹ Ọghẹnẹ. Oghẹrẹ vẹ a ro ru ere no? Ẹvẹ Ọghẹnẹ o rri oware nọ a bi ru na? Kọ eme o ti ru kpahe iẹe?

1. Oghẹrẹ vẹ egagọ erue a be rọ rehọ iwuhrẹ rai raha odẹ Ọghẹnẹ?

Egagọ erue a “rehọ ọrue nwene uzẹme Ọghẹnẹ” no. (Ahwo Rom 1:25) Wọhọ oriruo, egagọ buobu a re wuhrẹ ahwo rai odẹ Ọghẹnẹ hẹ. Rekọ Ebaibol na ọ ta nọ ma re se odẹ Ọghẹnẹ hrọ. (Ahwo Rom 10:13, 14) Isu egagọ jọ a rẹ ta nọ eware iyoma e tẹ via yọ oreva Ọghẹnẹ. Rekọ yọ ọrue dẹẹ. Ọghẹnẹ họ ọnọ ọ be wha eware iyoma ze vievie he. (Se Jemis 1:13.) Erue nọ egagọ e be ta i ru ahwo jọ kpairoro vrẹ Ọghẹnẹ no.

2. Oghẹrẹ vẹ egagọ erue a be rọ rehọ eware nọ a bi ru raha odẹ Ọghẹnẹ?

Egagọ erue i bi ru ahwo epanọ Jihova o re ru ahwo ho. Ebaibol na ọ ta kpahe egagọ erue nọ “izieraha riẹ i kpehru te obọ odhiwu no.” (Eviavia 18:5) U kri akpọ no nọ egagọ a bi ro dhomahọ esuo akpọ, ẹmo, a te je ru nọ ima ahwo buobu gbidi gbidi a ro whu no. Isu egagọ jọ a bi yeri uzuazọ okpohwo, fikiere a re mi ahwo egagọ rai igho. Eware nana nọ a bi ru na u dhesẹ nọ a riẹ Ọghẹnẹ hẹ yọ a te ahwo nọ a rẹ jọ ahwo riẹ hẹ.​—Se 1 Jọn 4:8.

3. Ẹvẹ Ọghẹnẹ o bi rri egagọ erue?

Otẹrọnọ eware nọ egagọ erue a bi ru e be dha owhẹ eva, ẹvẹ who roro nọ e be dha Jihova eva te? Jihova o you ahwo, rekọ eva isu egagọ e be dhae keme a be raha odẹ riẹ je bi ru ahwo nọ a rrọ egagọ rai yoyoma. Ọ ya eyaa nọ ọ te raha egagọ erue no yọ “a gbẹ te ruẹ e riẹ ofa ha.” (Eviavia 18:21) Uviemenẹ, Ọghẹnẹ o ti si egagọ erue kpobi notọ.​—Eviavia 18:8.

GBE WUHRẸ EWARE EFA

4. Orọnikọ egagọ kpobi e rẹ were Ọghẹnẹ hẹ

Ahwo buobu a rọwo nọ egagọ e wọhọ idhere sa-sa, yọ aikpobi a sai ro te Ọghẹnẹ oma. Kọ ẹme yena uzẹme? Se Matiu 7:13, 14, kẹsena wha vẹ ta ẹme kpahe onọ nana:

• Ẹvẹ Ebaibol na o dhesẹ edhere nọ o bi su kpohọ uzuazọ na?

Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

IVIDIO: Kọ Egagọ Kpobi E rẹ Were Ọghẹnẹ?​—Amabọ Jọ Riẹ (3:22)

• Kọ Ebaibol na ọ ta nọ egagọ nọ e were Ọghẹnẹ e rrọ buobu?

5. Egagọ erue a be rọ aro kele uyoyou Ọghẹnẹ hẹ

Egagọ erue a raha odẹ Ọghẹnẹ no evaọ idhere buobu. Edhere oyoma jọ họ, a bi dhomahọ ẹmo. Re whọ ruẹ oriruo jọ, kporo IVIDIO na. Kẹsena wha vẹ ta ẹme kpahe enọ nọ e rrọ obotọ na.

IVIDIO: Eware nọ Ahwo Ichọche A Ru Evaọ Ẹmo Akpọ Avivẹ (2:22)

• Eme ichọche buobu a ru evaọ etoke Ẹmo Akpọ Avivẹ?

• Ẹvẹ who rri oware nọ a ru na?

Se Jọn 13:34, 35 gbe 17:16. Kẹsena wha vẹ ta ẹme kpahe enọ nana:

• Ẹvẹ who roro nọ Jihova o re rri rie nọ egagọ i te dhomahọ ẹmo?

• Egagọ erue i bi ru eware iyoma buobu. Eware vẹ whọ ruẹ nọ egagọ a bi ru nọ a be jọ rọ aro kele uyoyou Ọghẹnẹ hẹ?

6. Ọghẹnẹ ọ gwọlọ si ahwo no igbo egagọ erue

Se Eviavia 18:4,a kẹsena wha vẹ ta ẹme kpahe onọ nana:

• Kọ eva e were owhẹ nọ whọ rọ riẹ nọ Ọghẹnẹ ọ gwọlọ fiobọhọ kẹ ahwo nọ egagọ erue i su thọ no? Fikieme whọ rọ ta ere?

7. Hai gbe wuhrẹ kpahe Ọghẹnẹ uzẹme na

Kọ u fo re eware nọ egagọ erue i bi ru i ru owhẹ rri Ọghẹnẹ fihọ ohwo oyoma? Ma rehọ iẹe nọ u wo ọmọzae jọ nọ ọ rọwo lele emamọ ohrẹ ọsẹ riẹ hẹ, ọ tẹ kwa no uwou je mu ekpehre uzuazọ họ eyeri. Eware nọ ọmọ na o bi ru na e were ọsẹ riẹ vievie he. Kọ u fo re a fo ọsẹ na fiki ekpehre uzuazọ nọ ọmọ ọwọsuọ riẹ o bi yeri na?

• Kọ u fo re ohwo ọ fo Jihova jẹ se iẹe ba ewuhrẹ kpahe fiki eware nọ egagọ erue i bi ru?

EME WHO WUHRẸ NO?

Egagọ erue e be rọ iwuhrẹ rai gbe eware iyoma nọ a bi ru rọ raha odẹ Ọghẹnẹ. Ọghẹnẹ ọ te raha egagọ erue no.

Ọkiẹkpemu

• Ẹvẹ who rri eware nọ egagọ erue i bi wuhrẹ ahwo gbe oghẹrẹ nọ a bi ru?

• Ẹvẹ Jihova o rri egagọ erue?

• Eme Ọghẹnẹ o ti ru egagọ erue?

KIẸ KPAHE EFA

Wuhrẹ kpahe idhere ivẹ nọ egagọ buobu a bi ro ru eva dha Ọghẹnẹ.

“Kọ Oghẹrẹ Ovona Egagọ Kpobi E Rrọ? Ọghẹnẹ Aikpobi A Be Ginẹ Gọ?” (Uzoẹme nọ o rrọ itanẹte)

Fikieme Jihova ọ rọ gwọlọ nọ ma hai kuomagbe amọfa gọe?

“Kọ U Wuzou re Ohwo Ọ jọ Egagọ?” (Uzoẹme nọ o rrọ itanẹte)

Eva e jẹ dha ozerẹ jọ fiki eware nọ a be jọ ichọche riẹ ru. Rekọ oyena o whaha e riẹ nọ o gbe ro wuhrẹ kpahe Ọghẹnẹ hẹ hẹ.

“Oware nọ Ozerẹ Ichọche jọ O ro No Ichọche nọ Ọ Jọ” (Awake!, Ava 2015)

U kri no nọ egagọ i bi ro wuhrẹ ahwo erue nọ o be lẹliẹ ai rri Ọghẹnẹ nọ o thabọ no ahwo jẹ rrọ eva gaga. Se oware nọ Ebaibol ọ ta kpahe erue esa jọ nọ a bi wuhrẹ ahwo.

“Erue nọ E be Lẹliẹ Ahwo Roro nọ A Sai You Ọghẹnẹ Hẹ” (Uwou-Eroro Na, Akpegbọvo 1, (2013)