Usi Uvie Avọ 37

Ovuẹ Rọkẹ Akpọ-soso

Ekuhọ Egagọ Erue Ọ Kẹlino!

▪ Eme họ egagọ erue?

▪ Ẹvẹ i ti ro kuhọ?

▪ Ẹvẹ u ti kpomahọ owhẹ?

Eme họ egagọ erue?

Kọ eyoma nọ a be rọ odẹ egagọ ru o be kẹ owhẹ uye? Kọ ẹmo-ofio, ozighi ọkparesuọ, gbe eyoma nọ ahwo nọ a se oma rai nọ eg’Ọghẹnẹ a bi ru e be k’owhẹ idhọvẹ? Fikieme o jẹ wọhọ nọ egagọ e be wha ebẹbẹ buobu nọ e riẹ na ze?

Egagọ erue ọvo a rẹ fo kẹ ebẹbẹ nana, orọnikọ egagọ kpobi hi. Ohwo egagọ nọ a riẹ gaga na, Jesu Kristi, ọ ta inọ egagọ erue e rẹ lẹliẹ ahwo ru eware iyoma, nwane wọhọ epanọ “ure umuomu o rẹ mọ ibi iyoma” na. (Matiu 7:15-17) Didi ibi egagọ erue e be mọ?

Egagọ Erue . . .

◼ I BI DHOMAHỌ ẸMO GBE ESUO-OHROWO: Obe-usi nọ a re se Asiaweek o ta nọ: “Evaọ Esia gbe eria efa, isu nọ i bi tho-ukpuru esuo a be rehọ ẹghẹ rọ odẹ egagọ tẹzẹ ahwo re a sai le ẹgwọlọ omobọ rai te obọ.” Fikiere, obe-usi na o vẹvẹ unu nọ: “O wọhọ nọ akpọ na ọ be te mọ oruẹ kẹle.” Olorida egagọ jọ evaọ obọ United States ọ ta nọ: “Re a sae whaha otu ugbarugba ahwo-okpe, a re kpe ai no.” Ẹvẹ ọ ta nọ a re ro ru ei? “Kpe ai kpobi kufiẹ evaọ odẹ Ọghẹnẹ.” Wo ohẹriẹ, Ebaibol na e ta nọ: “Re ohwo jọ ọtẹta nọ, ‘Me you Ọghẹnẹ,’ o te mukpahe omoni riẹ, ọyena họ ọterue.” (1 Jọn 4:20) Jesu ọ tubẹ ta dede nọ: ‘You ewegrẹ ra.’ (Matiu 5:44) Bro egagọ whọ rẹ sai roro ku nọ ahwo riẹ a bi wo abọ evaọ ẹmo-ofio?

◼ I BI WUHRẸ AHWO IWUHRẸ ERUE: Egagọ buobu i re wuhrẹ inọ ẹwẹ hayo ẹzi na yọ oware jọ nọ o rrọ ohwo-akpọ oma nọ a rẹ ruẹ hẹ nọ o rẹ gbẹ jọ uzuazọ nọ ugboma na u te whu no. Ẹkwoma uwuhrẹ nana, egagọ enana buobu a be rọ ahwo rai rọ thueki, mi ai igho re a ruẹse lẹ kẹ ahwo nọ i whu no. Rekọ, oware nọ Ebaibol na i wuhrẹ u wo ohẹriẹ no oyena. ‘Enọ e rọ uzuazọ a riẹ nọ a reti whuẹ, rekọ iwhuowhu e riẹ oware ovo ho.’ (Ọtausiwoma Na 9:5) Jesu o wuhrẹ inọ a te kpare iwhuowhu na tha—rekọ otẹrọnọ ahwo-akpọ a wo ẹwẹ hayo ẹzi jọ nọ o re whuẹ hẹ koyehọ ẹkparomatha na o gbe wo iruo ho. (Jọn 11:11-25) Kọ egagọ ra i wuhrẹ nnọ ohwo o wo ẹwẹ hayo ẹzi jọ nọ o re whuẹ hẹ?

◼ E KUVẸ KẸ ỌFARIẸ-OGBE: Evaọ erẹwho jọ, ichọche sa-sa e be rehọ ahwo nọ e rọo orọo ezae-avọ-ezae gbe eyae-avọ-eyae ro mu izerẹ ichọche jẹ tudu họ egọmeti awọ re o kuenu kẹ orọo ahwo ẹba-ọvo na. Makọ ichọche nọ e ta nọ ọfariẹ-ogbe ọ thọ dede a re ru isu egagọ nọ e gba emaha du oware ovo ho. Rekọ, eme Ebaibol na e ta kpahe ọfariẹ-ogbe? E ta vevẹ nọ: “Wha viẹ oma obọ rai họ họ; hayo eva egbegbe, hayo e nọ e rọ edhọ ẹgọ, hayo ibruẹnwae, hayo igberedha . . . e rẹ sae reuku uvie Ọghẹnẹ hẹ.” (1 Ahwo Kọrint 6:9, 10) Kọ whọ riẹ egagọ nọ i bi rri ọfariẹ-ogbe vo?

Eme ọ rrọ obaro kẹ egagọ nọ e be mọ ibi iyoma? Jesu ọ vẹvẹ unu nọ: “Kure kure nọ o mọ ubi uwoma ha a re kie i fihọ otọ a ve fi ei họ erae.” (Matiu 7:19) Ẹhẹ, a te whọlọ egagọ erue fihọ otọ, raha ai no! Rekọ oke gbe oghẹrẹ vẹ onana o te rọ via? Eruẹaruẹ jọ nọ a kere fihọ obe Eviavia, uzou 17 gbe 18, o kẹ uyo na.

Ẹvẹ egagọ erue i ti ro kuhọ?

Jọ iroro ra ruẹ oware nọ o be via na. Ogberẹ jọ ọ keria ehru arao idudu jọ. Arao na o wo izou ihrẹ gbe izei ikpe. (Eviavia 17:1-4) Ono ogberẹ na o dikihẹ kẹ? O wo ẹgba nọ ọ be rọ ta họ ‘ivie akpọ na’ obọ. Ọ rehọ iwu ewawae rọ gẹgọ, ọ rẹ mahe insẹnse, o te je fe gaga. U te no ere no, ọ rehọ ẹkwoma iruẹru imizi riẹ rọ ‘lẹliẹ erẹwho akpọ na kpobi họ no.’ (Eviavia 17:18; 18:12, 13, 23) Ebaibol na i fi obọ họ k’omai ruẹ inọ ogberẹ nana yọ okugbe egagọ ọrọ akpọ-soso. Orọnikọ egagọ evo jọ o dikihẹ kẹ hẹ, rekọ egagọ kpobi nọ e be mọ ibi iyoma.

Arao idudu nọ ogberẹ na ọ keria ehru be dhẹ na o dikihẹ kẹ egaga esuo akpọ na.a (Eviavia 17:10-13) Egagọ erue e be dhẹ arao nana nọ o dikihẹ kẹ esuo na, be daoma kpọ iroro-ejẹ riẹ gbe epanọ ọ rẹ nya riwi.

Rekọ, oware igbunu jọ o te via kẹle. “Izei ikpe nọ whọ ruerẹ na, ae gbe arao na, a re ti mukpahe ogberẹ na; a re ti fi ei họ ababọ avọ ẹbẹba, a rẹ te raha oma riẹ no, a vẹ rehọ erae mahe iẹ.” (Eviavia 17:16) Kpregede, avọ ofu, egaga esuo akpọ na e te wọso egagọ erue a vẹ te raha ae no riẹriẹriẹ! Eme ọ te wọ ai ru onana? Obe Eviavia evaọ Ebaibol na o kẹ uyo na: ‘Ọghẹnẹ o fi ẹzi na họ ae eva re a ruẹse ru orọ eva riẹ.’ (Eviavia 17:17) Ẹhẹ, Ọghẹnẹ o ti gu egagọ erue ẹdhọ fiki eware etọtọ nọ a rọ odẹ riẹ ru no. Ẹkwoma ẹdhoguo-okiẹrẹe nọ o ti ro brukpei, ọ te rehọ isu egọmeti nọ e rrọ egbẹnyusu ọfariẹ-ogbe riẹ na ruiruo wọhọ okwakwa riẹ nọ ọ te rọ raha ọraha.

Eme who re ru hrọ otẹrọnọ whọ gwọlọ nọ uye nọ u ti te egagọ erue u te owhẹ hẹ? Ọwhovuẹ Ọghẹnẹ ọ vẹvẹ unu nọ: “Ahwo mẹ, wha nya siẹ e ba.” (Eviavia 18:4) Ẹhẹ, enẹna họ oke nọ a rẹ rọ dhẹ no egagọ erue! Rekọ diẹse whọ rẹ sae dhẹ kpohọ? Orọnikọ obọ ahwo nọ a rọwo Ọghẹnẹ hẹ hẹ, keme ẹruore ọ rrọ kẹ ai gbe he. (2 Ahwo Tẹsalonika 1:6-9) Egagọ uzẹme ọvo họ oria adhẹzọ na. Kọ ẹvẹ whọ sai ro vuhu egagọ uzẹme?

Epanọ a re ro vuhu egagọ uzẹme

Ubi uwoma vẹ egagọ uzẹme e rẹ mọ?—Matiu 7:17.

Egagọ Uzẹme . . .

◼ I WO UYOYOU: Egegagọ uzẹme a “rọ e rọ akpọ na ha,” ohẹriẹ o rrọ udevie rai fiki ovioma hayo uruemu-ẹwho ho, yọ a re dhesẹ ‘uyoyou eva udevie rai.’ (Jọn 13:35; 17:16; Iruẹru 10:34, 35) A re kpe ohwohwo ho, ukpoye a you ohwohwo ziezi te epanọ u re ro no ai eva ze nnọ a re whu kẹ ohwohwo nọ o tẹ gwọlọ ere.—1 Jọn 3:16.

◼ A FI EVA HỌ ẸME ỌGHẸNẸ: Egagọ uzẹme a re wuhrẹ ahwo “uruemu anwae” gbe ‘uwuhrẹ epa orọ ijaje ahwo’ ho, iwuhrẹ rai i re no Ẹme Ọghẹnẹ, Ebaibol na ze. (Matiu 15:6-9) Fikieme? Keme “Ọghẹnẹ o gie ẹwolo ku ikereakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio.”—2 Timoti 3:16.

◼ E RẸ BỌ IVIUWOU GA, JẸ YỌRỌ ITEE IKPEHRU URUEMU-EZI: Egagọ uzẹme i re wuhrẹ ezae re a “you eyae rai wọhọ oma obọrai,” fi obọ họ kẹ eyae re a wo ‘adhẹẹ odidi kẹ ezae rai,’ je wuhrẹ emọ re ‘a yo ẹme kẹ esẹgbini rai.’ (Ahwo Ẹfẹsọs 5:28, 33; 6:1) Ofariẹ re, enọ a kẹ ọkwa iruo a re wo uruemu-ezi nọ o rẹ jọ oriruo kẹ amọfa.—1 Timoti 3:1-10.

Kọ egagọ jọ i bi lele itee nana? Obe na Holocaust Politics nọ a kere evaọ 2001, o ta nọ: “Otẹrọnọ amọfa buobu a re yeri uzuazọ lele eware nọ Isẹri Jihova a bi wuhrẹ je bi ru, ọraha etoke Okpemuotọ na ọ hae romavia ha yọ ahwo buobu nọ a bi kpe nọ o be wha uweri se akpọ na o gbẹ hae te jọ họ.”

Ẹhẹ, Isẹri Jihova nọ e rrọ ekwotọ 235 na, orọnikọ a bi wuhrẹ amọfa itee uruemu-ezi Ebaibol na ọvo ho, rekọ a bi fi eware nọ a bi wuhrẹ amọfa na họ iruo evaọ uzuazọ rai. Ma tudu họ owhẹ awọ re whọ ta kẹ Isẹri Jihova re a fi obọ họ wuhrẹ owhẹ oware nọ Ọghẹnẹ ọ gwọlọ mi owhẹ re whọ sae gọe evaọ edhere nọ ọ jẹrehọ. Enẹna họ oke nọ who re ro ru ere. Whọ raha oke he. Ekuhọ egagọ erue ọ kẹlino!—Zefanaya 2:2, 3.

Otẹrọnọ whọ gwọlọ evuẹ efa kpahe ovuẹ nọ u no Ebaibol ze nọ Isẹri Jihova a bi whowho, nọ mi ai evaọ okegbe ra.

Whọ tẹ gwọlọ nọ ohwo jọ o weze bru owhẹ ze, iviena kere eme fihọ ẹmẹwẹ-obe ayare nana, re whọ biẹe vi kpohọ adrẹse nọ a kere fihọ iẹe na.

□ Ivie mẹ gwọlọ uwuhrẹ Ebaibol ọvọvẹ.

[Oruvẹ-obotọ]

[Ẹme nọ a fi ẹgba họ nọ ọ rrọ ẹwẹ-obe avọ 3]

Egagọ erue i wo ẹgba nọ a be rọ ta họ ‘ivie akpọ na’ obọ

[Ẹme nọ a fi ẹgba họ nọ ọ rrọ ẹwẹ-obe avọ 3]

“Ahwo mẹ, wha nya siẹ e ba”