Siọ Egagọ Erue!

Setan avọ idhivẹri riẹ a gwọlọ nọ whọ rẹ gọ Ọghẹnẹ hẹ. A gwọlọ nọ, o tẹ lọhọ kẹ ae, a re ku ohwo kpobi rẹriẹ siọ Ọghẹnẹ ba. Ẹvẹ a be rọ daoma ru onana? Edhere jọ họ ẹkwoma egagọ erue. (2 Ahwo Kọrint 11:13-15) Egagọ e rẹ jọ erọ ọrue otẹrọnọ o bi wuhrẹ uzẹme nọ u no Ebaibol ze na ha. Egagọ ọrue e wọhọ ugho ọrue—o sae jọ wọhọ omamọ ugho na, rekọ u w’iruo ho. O rẹ sae wha ebẹbẹ buobu s’owhẹ.

Erue ọ Egagọ e rẹ sae were Jihova, Ọghẹnẹ ọtẹruo na vievie he. Okenọ Jesu ọ jọ otọakpọ, utu egagọ jọ o jariẹ nọ o jẹ gwọlọ kpei. A roro nnọ edhere egagọ rai họ ọgbagba na. A ta nọ: “Ma wo Ọsẹ ọvo, Ọghẹnẹ.” Kọ Jesu ọ rọwo? Ijo! Ọ ta kẹ ae nọ: “Whai e rọ ọsẹ rai ukumuomu na.” (Jọn 8:41, 44) Nẹnẹ na ahwo buobu a roro nọ a be gọ Ọghẹnẹ, rekọ Setan gbe idhivẹri riẹ họ enọ a be ghinẹ gọ!​—1 Ahwo Kọrint 10:20.

Nwanọ epanọ ure ugbogbo o rẹ mọ ibi iyoma na, ere egagọ erue e rẹ mọ ahwo nọ a re ru eware iyoma re. Akpọ na ọ vọ avọ ebẹbẹ fiki eware iyoma nọ ahwo a bi ru. Ọfariẹ-ogbe ọ riẹ, ohọre, uji-utho, okienyẹ, ohwo-okpe, gbe ọgbaduo. Ibuobu nọ i bi ru eware iyoma enana a rrọ egagọ, rekọ egagọ rai e be wọ ae re a ru oware uwoma ha. A sae jọ egbẹnyusu Ọghẹnẹ hẹ ajokpanọ a siọ eware iyoma ba eruo.​—Matiu 7:17, 18.

Egagọ erue i bi wuhrẹ ahwo re a lẹ se emedhọ. Ọghẹnẹ ọ ta nọ a rẹ lẹ se emedhọ họ. Onana o rrọ ẹme iroro. Kọ o sae were owhẹ otẹrọnọ uwoho ra ọvo ohwo jọ ọ rẹ t’ẹme kẹ rekọ ọ rẹ t’ẹme kẹ owhẹ hẹ? Kọ ohwo ọyena ọ sae jọ ogbẹnyusu uzẹme ra? Ijo. Jihova ọ gwọlọ nọ ahwo a t’ẹme kẹe, orọnikọ ẹmema hayo uwoho jọ họ, onọ u wo uzuazọ họ​—Ọnyano 20:4, 5.

Egagọ erue i bi wuhrẹ nnọ u woma re a kpe amọfa evaọ oke ẹmo. Jesu ọ ta nnọ egbẹnyusu Ọghẹnẹ a re wo uyoyou evaọ udevie rai. Ma re kpe ahwo nọ ma you hu. (Jọn 13:35) O thọ re ma kpe ahwo yoma dede. Okenọ ewegrẹ Jesu a nyaze ti mu ei, ọ kuvẹ re ilele riẹ a họre thothọ riẹ hẹ.​—Matiu 26:51, 52.

Egagọ erue i bi wuhrẹ nnọ ahwo omuomu a te ruẹ uye evaọ erae ehẹle. Rekọ Ebaibol na o wuhrẹ nnọ umuomu u re su kpohọ uwhu. (Ahwo Rom 6:23) Jihova yọ Ọghẹnẹ uyoyou. Kọ Ọghẹnẹ oyoyou ọ rẹ lahiẹ ahwo bẹdẹ bẹdẹ? Ijo! Evaọ Aparadase, egagọ ọvuọvo ọ te jariẹ, onọ Jihova ọ jẹrehọ. (Eviavia 15:4) Egagọ kpobi nọ i no erue Setan ze i ti noi no.