UWUHRẸ AVỌ 34

Ẹvẹ Ma Sai ro Dhesẹ nọ Ma You Jihova?

Onọ A Printi

Anwẹnọ who ro mu Ebaibol na họ ewuhrẹ na, kọ who roro nọ whọ kẹle Ọghẹnẹ vi epaọ anwẹdẹ no? Kọ whọ gwọlọ nọ usu ra kugbe Ọghẹnẹ o rẹ gbẹ jọ gaga? O tẹ rrọ ere, kareghẹhọ nọ epanọ who you Jihova te, ere o ti you owhẹ jẹ rẹrote owhẹ te. Ẹvẹ whọ sai ro dhesẹ kẹe nọ who you rie?

1. Ẹvẹ ma re ro dhesẹ kẹ Jihova nọ ma you rie?

Ẹme nọ ma re yo kẹ Jihova ma re ro dhesẹ nọ ma you rie. (Se 1 Jọn 5:3.) Ọ rẹ gba ohwo ọvo họ re o yoẹme kẹe he. Ukpoye, ọ kẹ omai omomọvo uvẹ nọ ma rẹ rọ salọ sọ ma re yoẹme kẹe hayo ma re yoẹme kẹe he. Fikieme? Jihova ọ gwọlọ nọ ma “yoẹme no udu ze.” (Ahwo Rom 6:17) Koyehọ, ọ gwọlọ nọ who yoẹme kẹe fikinọ who you rie, orọnikọ fiki ọgbahọ họ. A ruẹrẹ abọ avọ 3 gbe abọ avọ 4 obe nana họ re i fiobọhọ kẹ owhẹ dhesẹ nọ who you Jihova. Yọ who re ru ere nọ who te bi ru oware nọ o rẹ were iẹe jẹ kẹnoma kẹ oware nọ o rẹ dhae eva.

2. Eme ọ rẹ sai ru ei jọ bẹbẹ re ma dhesẹ nọ ma you Jihova?

“Ebẹbẹ ohwo okiẹrẹe e rrọ buobu.” (Olezi 34:19) Mai kpobi ma gba ha, eware e sae thọ omai obọ. Eware e sae jọ gaga ẹsejọ, amọfa a sai kienyẹ omai, gbe ebẹbẹ efa nọ ma be hai wo. Ma tẹ be ruẹ uye, o sae bẹ re ma ru oware nọ Jihova ọ gwọlọ. O rrọ ere keme o sae wọhọ nọ o mae lọhọ re a ru oware nọ u kiehọ họ. Rekọ nọ who te bi ru oware nọ Jihova ọ ta nọ who ru, yọ who bi dhesẹ nọ who you rie vi oware ofa kpobi. U te je dhesẹ nọ whọ talamu ei. Fikiere ọ te jọ kugbe owhẹ. Ọ te nyasiọ owhẹ ba vievie he.—Se Olezi 4:3.

GBE WUHRẸ EWARE EFA

Wuhrẹ kpahe oware nọ u ro wuzou re who yoẹme kẹ Jihova, gbe oware nọ o sai fiobọhọ kẹ owhẹ ru ere ẹsikpobi.

3. Ẹme jọ nọ ọ rrọ otọ nọ o te owhẹ re

Wọhọ epanọ obe Job o ta, Setan ọ bọwo Job ota, yọ orọnikọ Job ọvo ọ bọwo ota nana ha, rekọ ahwo kpobi nọ a gwọlọ gọ Jihova. Se Job 1:1, 6–2:10, kẹsena wha vẹ ta ẹme kpahe enọ nana:

Eme Setan ọ ta nọ o jẹ lẹliẹ Job yoẹme kẹ Jihova?—Rri Job 1:9-11.
Eme Setan ọ ta kpahe ahwo-akpọ kpobi, nọ u te owhẹ re?—Rri Job 2:4.

Se Job 27:5b, kẹsena wha vẹ ta ẹme kpahe onọ nana:

Ẹvẹ Job o ro dhesẹ nọ o gine you Jihova?

Setan nọ ọ be wharo nọ Jihova enọ. Ọ be ta nọ Job, ọnọ eruẹso e vọ oma ọ be gọ Jihova fikinọ ọ be thọe, yọ ere ọvona ọ be ta kpahe oniọvo-ọmọtẹ jọ nọ ọ be gọ Jihova oke nana. — Job o dhesẹ nọ o you Jihova okenọ ọ talamu Jihova ghelọ ebẹbẹ

Ma re dhesẹ nọ ma you Jihova nọ ma tẹ talamu ei ghelọ ebẹbẹ

4. Ru udu Jihova ghọghọ

Se Itẹ 27:11, kẹsena wha vẹ ta ẹme kpahe enọ nana:

Kọ o rẹ were Jihova nọ who te wo areghẹ je bi yoẹme kẹe? Fikieme?

5. Whọ sae talamu Jihova

Uyoyou nọ ma wo kẹ Jihova o rẹ wọ omai vuẹ amọfa kpahe iẹe. Yọ evaọ okenọ o tẹ make rrọ bẹbẹ dede, ma re gbe ru ere ghele. Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.

IVIDIO: Thọ Ẹrọwọ Ra Ghele Ọwọsuọ (5:09)

Kọ o rẹ jọ gaga kẹ owhẹ ẹsejọ re whọ vuẹ amọfa kpahe Jihova?
Evaọ ividio na, eme o fiobọhọ kẹ Grayson siọ ozọ ba ẹdhẹ?

O rẹ mae lọhọ re ma yoẹme kẹ Jihova nọ ma te you oware nọ o you je mukpahe oware nọ o mukpahe. Se Olezi 97:10, kẹsena wha vẹ ta ẹme kpahe enọ nana:

Wọhọ epanọ who wuhrẹ no, eware jọ vẹ Jihova o you? Kọ eware jọ vẹ o mukpahe?
Ẹvẹ whọ sai ro you oware uwoma je mukpahe oware uyoma?

6. Ma re wo erere nọ ma te bi yoẹme kẹ Jihova

Re a yoẹme kẹ Jihova họ oware nọ o mai woma. Se Aizaya 48:17, 18, kẹsena wha vẹ ta ẹme kpahe enọ nana:

Kọ who roro nọ Jihova họ Ọnọ ọ ginẹ riẹ oware nọ o mai woma kẹ omai? Fikieme whọ rọ ta ere?
Didi irere who wo no anwẹnọ who bi ro wuhrẹ Ebaibol na je bi wuhrẹ kpahe Jihova Ọghẹnẹ uzẹme na?

AHWO JỌ A RẸ TA NỌ: “Ọghẹnẹ ọ be daezọ eware nọ me bi ru hu.”