Fievahọ Jihova Avọ Ẹme Riẹ
“Enọ e riẹ odẹ ra e rọ ẹroso owhẹ.”—OLEZI 9:10.
1. Fikieme ma je gbe fievahọ Jihova avọ Ẹme riẹ evaọ edẹ mai na?
EVAỌ akpọ oke mai ọnana, uzizie re ma fievahọ Ọghẹnẹ avọ Ẹme riẹ, Ebaibol na, o rẹ wọhọ oware nọ u wo iruo ho jẹ kare iroro. Ghele, ereghẹ Ọghẹnẹ i dhesẹ uzẹme riẹ je wo iruo kri no. Ọnọma ọzae gbe aye họ Ọnọ O Muọ orọo gbe uviuwou na họ, yọ ọ riẹ ẹgwọlọ mai vi amọfa kpobi. Nwane wọhọ epanọ igogo ẹgwọlọ ahwo i ri nwene he na, ere idhere ilogbo nọ a rẹ rọ nyate ẹgwọlọ eyena e rọ re. Ohrẹ areghẹ Ebaibol na, dede nọ a kere i rie ikpe-udhusoi buobu nọ i kpemu no, e gbẹ be kẹ ọkpọvio nọ e mai woma kpahe ẹria obokparọ jegbe ifue ebẹbẹ. Eyo ohrẹ riẹ o rẹ wha evawere buobu ze—makọ evaọ akpọ ọkpakpakre, ọrọ otokiẹ-eriariẹ nọ ma be rria na dede.
2. (a) Emamọ ibi evẹ ẹmeoyo kẹ ijaje Ọghẹnẹ e mọ no evaọ izuazọ ahwo Jihova? (b) Eme ọfa Jihova ọ yaa kẹ enọ i yoẹme kẹe gbe Ẹme riẹ?
2 Evaifihọ Jihova gbe efihiruo ehri-izi Ebaibol na o rẹ wha irere iwoma ze kẹdẹ kẹdẹ. Uzẹme onana u dhesẹ oma via evaọ izuazọ ima Isẹri Jihova nya akpọ na wariẹ enọ i wo imuẹro gbe aruọwha nọ a bi ro fi ohrẹ Ebaibol na họ iruo. Rọ kẹ ai, evaifihọ Ọnọma na avọ Ẹme riẹ u dhesẹ oware areghẹ. (Olezi 9:9, 10) Ẹmeoyo kẹ ijaje Ọghẹnẹ u ru rai fihọ emamọ ahwo nọ a tẹ t’ẹme kpahe ẹfuọ, oruọzewọ, ogaga-iruo, adhẹẹ kẹ uzuazọ gbe ekwakwa amọfa, jegbe owowa evaọ emuore gbe idieda. Onana u ru nọ a je wo uvi uyoyou gbe uwuhrẹ no evaọ udevie uviuwou na—uruemu ọghọ oruo, odiri, ohrọ, gbe erọvrẹ—jegbe eware efa buobu. A jọ idhere buobu whaha ibi iyoma evadha, omukpahọ, ohwo-okpe, ẹro-oyoma, ozodhẹ, oyẹlẹ, omoya, erueta, ọtaraha, uruemu odode, gbe ọfariẹ-ogbe. (Olezi 32:10) Rekọ Ọghẹnẹ o ru viọ eyaa ewoma kẹ ahwo nọ i bi koko izi riẹ. Jesu ọ ta nọ ahwo nọ i bi lele edhere Oleleikristi a re ti wo “ekpahọ udheusoi enẹna, . . . ini, gbe emọ, gbe etọ, gbe ẹlahiẹ; gbe uzuazọ ebẹdẹ bẹdẹ eva akpọ nọ ọ be tha.”—Mak 10:29, 30.
Whaha Evaifihọ Ereghẹ Akpọ Na
3. Ma tẹ be hae fievahọ Jihova gbe Ẹme riẹ, didi ebẹbẹ Ileleikristi a rẹ rẹriẹ ova ku ẹsejọ?
3 Ẹbẹbẹ rọ kẹ ahwo-akpọ nọ a gba ha họ a rẹ gwọlọ riwi oware nọ Ọghẹnẹ ọ gwọlọ kakao hayo o rẹ thọrọ ai ẹro. A rẹ nwani muhọ eroro nọ ae a mae riẹ hayo inọ ereghẹ egba-eriariẹ akpọ ọnana eye e mae woma vi erọ Ọghẹnẹ, inọ eye e mae kpokpọ. Idibo Ọghẹnẹ a sai mu uruemu onana họ ewo re, nọ a be rria udevie akpọ ọnana. Fikiere, nọ ọ jẹ rọ uyoyou zizie omai re ma gaviezọ kẹ ohrẹ riẹ, Ọsẹ obọ odhiwu mai o te fi unuovẹvẹ nọ u fo kugbei re: “Ọmọ mẹ, uwuhrẹ mẹ o thọrọ owhẹ ẹro ho, jọ eva ra koko izi mẹ; keme e rẹte kẹ owhẹ edẹ ithethei gbe ukriakpọ avọ evawere. Rehọ ẹroọrọsuọ ra kpobi kpahe ỌNOWO na, whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi. Who roro nọ who wo areghẹ hrọ họ; dhẹ ozọ ỌNOWO na re who si oma no umuomu.”—Itẹ 3:1, 2, 5-7.
4. Ẹvẹ “areghẹ akpọ ọnana” ọ kẹre te no, kọ fikieme o jẹ rọ “ugheghẹ evaọ obọ Ọghẹnẹ”?
4 Ereghẹ akpọ ọnana e vọ oria kpobi je no ehri sa-sa ze. Eria iwuhrẹ buobu e riẹ, yọ ‘kpahe ekere ebe buobu i wo urere he.’ (Okokahwohọ 12:12) Enẹna onọ a re se edhere ologbo ọrọ akpọ kọmputa a yaa nọ a rẹ kẹ ehrẹ nọ i wo umuo ho kpahe unwenọ uzoeme kpobi. Rekọ eriariẹ enana kpobi nọ a wo na u ru akpọ na wo areghẹ viere no hayo ku ebẹbẹ riẹ họ họ. Ukpoye, eyero akpọ na o bi yoma gaga kẹdẹ kẹdẹ. Avọ otoriẹ, Ebaibol na e ta k’omai nọ “areghẹ akpọ ọnana ugheghẹ obọ Ọghẹnẹ.”—1 Ahwo Kọrint 3:19, 20.
5. Didi inuevẹvẹ Ebaibol na e kẹ kpahe “areghẹ akpọ ọnana”?
5 Evaọ abọ ukuhọ edẹ urere na, a re rẹro riẹ nọ ọviahwohọ ologbo na, Setan Ẹdhọ na, o ti whowho erue ilogbo buobu re a ruẹse gbolo aro kẹ udufihọ uzẹme Ebaibol na. Egbavro ilogbo i kporo ebe buobu nọ i wo otọ họ nọ e wọso ẹgbagba gbe evaifihọ Ebaibol na. Pọl ọ vẹvẹ ibe Ileleikristi riẹ unu nọ: “O Timoti, sẹro oware nọ a rọ kẹ owhẹ na. Si oma no eme ogbẹta nọ e kare erọ Ọghẹnẹ, jegbe avro ogbẹvrọ nọ a re se ugbese nọ eriariẹ; keme ahwo jọ nọ a rehọ oma rai kẹ oyena a nya edhere orọwọ na thọ no.” (1 Timoti 6:20, 21) Ebaibol na e tẹ gbẹ vẹvẹ unu nọ: “Wha yọrọ oma re ohwo ọvo ọ siọ eriariẹ ifofe gbe ẹghẹ rai ba ẹ rọ viẹ owhai họ, enọ erọ uwuhrẹ ahwo akpọ avọ izi akpọ na, enọ e rọ erọ Kristi hi.”—Ahwo Kọlọsi 2:8.
Họre Iroro Avro
6. Fikieme ẹro omuhotọ u je wuzou re ma whaha avro nọ o re wo owọ evaọ udu mai?
6 Ẹghẹ eviẹhọ Ẹdhọ ọfa họ avro ọ kọ fihọ iroro na. Ọ rẹ tẹro viotọ ẹsikpobi re ọ ruẹ ewhrehe jọ evaọ ẹrọwọ ohwo re o duobọ hiẹe. Ohwo nọ o bi wo avro kpobi jọ ọ kareghẹhọ nọ ohwo nọ ọ rọ emu avro na họ ọnọ ọ ta kẹ Ivi nọ: “Kọ Ọghẹnẹ ọ ghinẹ ta nọ wha re ubi-ure ovuovo eva ogba na ha?” Nọ Ọdahwo na ọ kọ avro hiẹe iroro no, owojẹ nọ o kẹle riẹ họ ọ t’ọrue kẹe, yọ ọrue na ọ rọwo. (Emuhọ 3:1, 4, 5) Re ma whaha avro nọ ọ rẹ raha ẹrọwọ mai wọhọ epanọ ọrọ Ivi ọ raha, u fo re ma muẹro hotọ ziezi. Otẹrọnọ amavro ọkakao jọ kpahe Jihova, Ẹme riẹ, hayo ukoko riẹ u muhọ eghoro evaọ udu ra no, j’owọ vẹrẹ vẹrẹ re who si ei no taure ọ tẹ te rro ruọ oware nọ o rẹ raha ẹrọwọ ra.—Wawo 1 Ahwo Kọrint 10:12.
7. Eme a rẹ sai ru ro si avro no?
7 Eme a rẹ sai ru? Ma be wariẹ ta nọ, uyo na họ re a fievahọ Jihova avọ Ẹme riẹ. “Otẹrọnọ areghẹ ọkare owhai ọjọ, jọ ọ yare Ọghẹnẹ nọ ọ rẹ kẹ ọvọvẹ nọ rẹ gboke he, a rẹ te rehiẹe kẹe. Rekọ jọ ọ rehọ ẹruọrọsuọ yare, ababọ iroroivẹ, keme ohwo nọ iroro riẹ e dọmu hu ọ wọhọ ẹkporo abade nọ ofou o re kpokpo, ọ wọ fi.” (Jemis 1:5, 6; 2 Pita 3:17, 18) Fikiere olẹ nọ u no udu ze kẹ Jihova họ owojẹ ọsosuọ na. (Olezi 62:8) U je no ere no, whọ raha oke ẹnọ mi obufihọ no obọ esẹro iyoyou ukoko na ze he. (Iruẹru 20:28; Jemis 5:14, 15; Jud 22) A ti fiobọhọ k’owhẹ kiẹ otọ avro ra na via, nọ o rẹ sae jọ nọ omoya hayo iroro ethọthọ e whaze.
8. Ẹvẹ iroro ekieno-ẹrọwọ i re ro muhọ, kọ eme họ ifue riẹ?
8 Kọ isase hayo ezọgaviẹ kẹ iroro ikọ-erue hayo ereghẹ akpọ na e wha avro enua ze no? Avọ areghẹ, Ebaibol na e hrẹ nọ: “Dawo oma re whọ sae ru oma ra wọhọ ọ nọ a jẹrehọ no, obọ aro Ọghẹnẹ hẹ wọhọ oruiruo ọnọ ọ kare omaovuọ, nọ rẹ yọrọ ẹme uzẹme na ziezi. Si oma no ogbẹta utioyena, keme u re ti ru ahwo nọ a jẹ te kare erọ Ọghẹnẹ viere. Jegbe ẹmeunu rai ọ vẹ te [vaha] ruaro wọhọ ola-ikpo.” (2 Timoti 2:15-17) O rọ oware isiuru inọ ahwo buobu nọ i kie no ẹrọwọ no a muọ edhere ọthọthọ na họ evaọ inoma nọ a kaki muhọ eguo kpahe oghẹrẹ nọ a roro nọ a bi ru ai evaọ ukoko Jihova. (Jud 16) Ẹruẹ ẹthọthọ evaọ eware nọ ma rọwo u te lele iei uwhremu na. Wọhọ epanọ ọbẹre-ahwo ọ rẹ j’owọ vẹrẹ vẹrẹ re o bru oria ola-ikpo no na, jowọ vẹrẹ re wo si uruemu inoma iguo no iroro, uruemu ababọ edẹro kpahe oghẹrẹ nọ a bi ru eware evaọ ukoko Ileleikristi na. (Ahwo Kọlọsi 3:13, 14) Si oware kpobi nọ o rẹ yọrọ avro itieye na no.—Mak 9:43.
9. Ẹvẹ ẹnya lele iruẹru uvie evaọ ẹsikpobi i re ro fiobọhọ k’omai jọ gaga evaọ ẹrọwọ na?
9 Dadamu Jihova avọ ukoko riẹ gaga. Rọ omarokpotọ rehọ aro kele Pita, ọnọ ọ dada awọ muotọ ta nọ: “Olori, ono ma rẹ nya brẹ? Who wo ẹme uzuazọ ebẹdẹ bẹdẹ.” (Jọn 6:52, 60, 66-68) Wo emamọ ọruẹrẹfihotọ ọrọ ewuhrẹ Ẹme Jihova re whọ ruẹse ru ẹrọwọ ra ga, wọhọ epanọ ojese ologbo ọ rẹ sai “furie esagba erae imuomu na.” (Ahwo Ẹfẹsọs 6:16) Jọ gaga evaọ odibọgba Ileleikristi, rọ uyoyou wo abọ evaọ ovuẹ Uvie na kugbe amọfa. Kẹdẹ kẹdẹ, roro avọ ovuhumuo kpahe epanọ Jihova ọ rọ ghale owhẹ. Ghọghọ nọ who wo eriariẹ uzẹme na. Eruo enana kpobi evaọ emamọ edhere Oleleikristi o re fiobọhọ k’owhẹ wereva, thihakọ, jẹ kare avro.—Olezi 40:4; Ahwo Filipai 3:15, 16; Ahwo Hibru 6:10-12.
Ẹnya Lele Ọkpọvio Jihova Evaọ Orọo
10. Fikieme o jẹ mae wuzou re ma ri bru Jihova rọ kẹ ọkpọvio evaọ orọo Oleleikristi?
10 Evaọ ọruẹrẹhọ kẹ ọzae avọ aye re a rria kugbe wọhọ imava orọo, orọnikọ Jihova ọ jiroro re o ru akpọ na vọ krẹkrẹrẹ ọvo ho rekọ re o fiba evawere rai. Ghele, emuemu gbe sebaẹgba e wha ebẹbẹ ilogbo ziọ usu orọo na no. Ileleikristi a dhẹ va enana abọ họ, keme ae omarai a gba ha jẹ be ruẹ eyawọ uzuazọ oke onana. Ghele, epanọ a sai fievahọ Jihova gbe Ẹme riẹ te, Ileleikristi a rẹ sai wo emamọ obokparọ evaọ orọo gbe evaọ ẹyọrọ emọ rai. Oria ovo o riẹ kẹ iruẹru hayo uruemu akpọ evaọ orọo Oleleikristi hi. Ẹme Ọghẹnẹ ọ hrẹ omai nọ: “Wha jọ orọo o jọ oware adhẹwẹ eva udevie rai kpobi, wha zue ehwa orọo rai hi; keme Ọghẹnẹ o re ti guẹdhọ ibruẹhwae gbe igberedia.”—Ahwo Hibru 13:4.
11. Evaọ efurie ebẹbẹ orọo, eme imava-orọo na a re vuhumu?
11 Orọo nọ a rọo nya lele ohrẹ Ebaibol na o re wo uyoyou, omarọkẹ, gbe ufuoma. Te ọzae gbe aye a wo otoriẹ jẹ rọ adhẹẹ kẹ uzi uzou-uwo na. Nọ ebẹbẹ e tẹ roma via, oware nọ o rẹ mae whae ze họ abọgbekẹ efihiruo ohrẹ Ebaibol jọ. Evaọ ekuhọ ẹbẹbẹ nọ o siotọ kri no, u wuzou re imava-orọo na a ghinẹ rẹriẹ ova ku oware nọ ẹbẹbẹ na ọ ghinẹ rọ re a rri oware nọ o wha ẹbẹbẹ na ze viukpọ oware nọ u mu riei họ. Otẹrọnọ iroro nọ a jẹ kugbe kẹle na a jarai rọwokugbe ohwohwo ho, imava-orọo na a rẹ yare obufihọ ababọ ọriẹwẹ mi ọsẹro oyoyou jọ.
12. (a) Didi ebẹbẹ nọ e rọ odode evaọ orọo Ebaibol na e k’ohrẹ kpahe? (b) Fikieme ẹgwọlọ ọ jẹ riẹ evaọ abọ imava-orọo na re a ru eware evaọ edhere Jihova?
12 Kọ ẹbẹbẹ na o kpomahọ ẹmeọta-kugbe, adhẹẹ kẹ eriwo ohwohwo, adhẹẹ kẹ uzou-uwo, manikọ epanọ a rẹ jiroro? Kọ u wobọ kpahe ẹyọrọ emọ, manikọ owowa evaọ ẹgwọlọ owezẹ? Manikọ o rọ araha ugho uviuwou na, arozaha, usu, sọ aye na o re ruiruo, hayo oria nọ wha rẹ rria? Oghẹrẹ kpobi nọ ẹbẹbẹ na ọ rọ, Ebaibol na e kẹ ohrẹ nọ u ruiruo, te onọ orọ viọviọ ẹkwoma izi hayo edhere ọfa ẹkwoma ehri-izi. (Matiu 19:4, 5, 9; 1 Ahwo Kọrint 7:1-40; Ahwo Ẹfẹsọs 5:21-23, 28-33; 6:1-4; Ahwo Kọlọsi 3:18-21; Taitọs 2:4, 5; 1 Pita 3:1-7) Nọ imava-orọo na a tẹ whaha ayare oriobọ jẹ kuvẹ re uyoyou u dhesẹ oma via vọvọ evaọ orọo rai, orẹ wha evawere ilogbo ze. Imava-orọo na a re wo isiuru nọ e rẹ lẹlia i ru inwene nọ i fo, re a ru eware evaọ edhere Jihova. “Ọnọ ọ kezọ ẹme na u re woma kẹ e, ọnọ o fievahọ ỌNOWO na o re wo evawere.”—Itẹ 16:20.
Izoge—Gaviezọ kẹ Ẹme Ọghẹnẹ
13. Fikieme o gbẹ lọhọ họ re izoge Ileleikristi a rro avọ ẹrọwọ ọgaga o fihọ Jihova avọ Ẹme riẹ?
13 O lọhọ kẹ izoge Ileleikristi re a rro evaọ ẹrọwọ na ha fiki akpọ omuemu na nọ ọ wariẹ e rai họ. Oware jọ nọ o soriẹ ze họ “akpọ na ọsoso ọ rọ obọ ogaga oyoma na,” Setan Ẹdhọ na. (1 Jọn 5:19) Izoge a rọ otọ ohọre no obọ ọwegrẹ oyoma ọnana ze ọnọ ọ sai ru oware uyoma zihe ruọ uwoma. Iruemu ọ mẹ-rẹ-karo, isiuru-ọkwa-kpehru oriobọ, isiuru kẹ uruemu nọ okare ẹfuọ gbe onọ o rọ eva gaga, gbe ilale omawere nọ o vrẹ ẹta—enana kpobi i te kuomagbe dhesẹ uruemu jọ, ọrọ oghẹrẹ iroro nọ a dhesẹ evaọ Ebaibol na wọhọ ‘ẹzi nọ o bi ruiruo eva udu emọ aghẹmeeyo.’ (Ahwo Ẹfẹsọs 2:1-3) Setan ọ rọ ẹghẹ wha “ẹzi” ọnana haro no evaọ ebe isukulu, evaọ ikporakporo nọ e rọ, evaọ arozaha-ọjaja, gbe evaọ abọ oma-osasa efa. O gwọlọ re esẹ gbe ini a jaja aro vi re a whaha iruẹru eyena ẹkwoma emọ rai nọ a re fiobọhọ kẹ fievahọ Jihova gbe Ẹme riẹ.
14. Ẹvẹ emaha a sai ro “si omano urusio ogena”?
14 Pọl ọ rọ ohrẹ ọsẹ kẹ ogbẹnyusu ọmoha riẹ Timoti: “Si omano urusio ogena re whọ jẹ iroro ẹrẹreokie, orọwọ, uyoyou, gbe udhedhẹ, ro kugbe otu nọ ọ be rehọ eva efuafo se odẹ Ọnowo na.” (2 Timoti 2:22) Nọ o rọ nọ “urusio ogena” kpobi e thọ họ na, izoge a re “si omano” ai evaọ uvẹ nọ a rẹ kẹ ae hi re u mi ai oke kpobi no, nọ a gbe ro wo emamọ oke rọ kẹ ilale eware Ọghẹnẹ hẹ. Oma-uru kpokpọ, arozaha-ọjaja, ikporakporo, oma-osasa, eriosehọ, gbe erẹ-nya nọ e nwane thọ họ na, e rẹ sae jọ egbefẹ otẹrọnọ i zihe ruọ ikpeware evaọ uzuazọ. Sioma riẹriẹriẹ no eme nọ i wotọ họ, no eghoro, no isiuru nọ e vrẹ ẹta kẹ owezẹ ezaveyae, no ugbe roro, je no inoma iguo nnọ ọsẹ gbe oni ra a be riẹ eva ra ha.
15. Didi eware e rẹ sae via evaọ uwou na nọ o rẹ sai ru nọ izoge i je yeri uzuazọ agbava?
15 Makọ evaọ uwou na dede, enwoma e rẹ sae bẹbẹ izoge. A te bi riwi ughe ọfariẹ ogbe hayo ozighi TV gbe ividio, enana e rẹ sae kọ isiuru nọ a re ro ru eyoma fihọ ae eva. (Jemis 1:14, 15) Ebaibol na e kẹ ohrẹ nọ: “O whai enọ i you Jihova, mukpahe oware uyoma.” (Olezi 97:10, NW; 115:11) Jihova ọ rẹ riẹ otẹrọnọ ohwo jọ ọ be gwọlọ yeri uzuazọ agbava. (Itẹ 15:3) Izoge Ileleikristi, riwi ubrukpẹ ra wariẹ. Kọ who fi iwoho ahwo ilogbo ọfariẹ ogbe arozaha-ọjaja hayo erọ ikporakporo akpọ na họ igbẹhẹ ra, hayo kọ who fi eware nọ e rọ kpatiẹ nọ e rẹ k’owhẹ emamọ ekareghẹhọ họ igbẹhẹ na? (Olezi 101:3) Evaọ etehe ra, who wo iwu nọ e rọ kpatiẹ, hayo kọ iwu ra jọ i tho erọ akpọ ọnana? Evaọ idhere ẹghẹ Ẹdhọ ọ rẹ sae kpahe ẹta k’owhẹ whọ tẹ roma kẹ ẹdawọ re who ru oware nọ o thọ. Avọ areghẹ Ebaibol na e kẹ ehrẹ nọ: “Jaja aro vi, he roro. Ọwegrẹ ra ukumuomu na, ọ wọhọ okpohrokpo nọ o bi do enu, be guọlọ ọjọ nọ ọ rẹ ria.”—1 Pita 5:8.
16. Ẹvẹ ohrẹ Ebaibol na o sai ro fiobọhọ kẹ uzoge re ahwo kpobi nọ a muẹro hiẹe a rehiẹe seha?
16 Ebaibol na e ta k’owhẹ nọ who muẹrohọ usu ra. (1 Ahwo Kọrint 15:33) U fo re egbẹnyusu ra e jọ ahwo nọ e be dhozọ Jihova. Whọ rehọ aro kele iruemu ethọthọ otu ra ha. (Olezi 56:11; Itẹ 29:25) Yoẹme kẹ ọsẹ gbe oni ra enọ e be dhozọ Ọghẹnẹ. (Itẹ 6:20-22; Ahwo Ẹfẹsọs 6:1-3) Riwi bru ekpako na kẹ ọkpọvio gbe uduotahawọ. (Aizaya 32:1, 2) Fi iroro gbe ibiaro ra họ ewoma gbe ute ẹzi. Gwọlọ uvẹ nọ who re ro ru ẹnyaharo ẹzi je wo abọ evaọ iruẹru ukoko na. Wuhrẹ epanọ whọ rẹ rọ rehọ abọ ra ru eware. Jọ gaga jẹ jọ whawha evaọ ẹrọwọ na, whọ vẹ rọ ere dhesẹ nọ ohwo whọ ghinẹ rọ—ohwo nọ o te kẹ uzuazọ evaọ akpọ ọkpokpọ Jihova! Ọsẹ mai obọ odhiwu ọ rẹ te rọ owhẹ seha, ọsẹ gbe oni ra a rẹ te wereva kugbe owhẹ, yọ whọ rẹ te jọ uduotahawọ kẹ inievo emetẹ gbe emezae Ileleikristi ra. Oyena họ oware nọ u wuzou!—Itẹ 4:1, 2, 7, 8.
17. Didi irere i re bru enọ i fievahọ Jihova avọ Ẹme riẹ ze?
17 Evaọ ekere iroro riẹ, a kẹ ọ so ilezi na ẹgba ro kere nọ: “Oware uwoma ovo nọ [Jihova, NW ] o re sino dhere ikiẹrẹe o rọ họ. O ỌNOWO Ogbaẹmo, oghale u te ọnọ o fievahọ owhẹ!” (Olezi 84:11, 12) Ẹhẹ, evawere gbe obokparọ, orọnikọ omovuọ gbe ekie he, eye i re te ahwo nọ i fievahọ Jihova avọ Ẹme riẹ, Ebaibol na.—2 Timoti 3:14, 16, 17.
Ẹvẹ Whọ Te k’Uyo?
◻ Fikieme Ileleikristi a gbe fieva rai họ “areghẹ akpọ ọnana” ha?
◻ Eme a re ru otẹrọnọ ohwo o bi wo avro?
◻ Ẹvẹ eware i ruo evaọ edhere Jihova o jẹ wha obokparọ avọ evawere ze evaọ orọo?
◻ Ẹvẹ Ebaibol na i re ro fiobọhọ kẹ izoge re a “si omano urusio ogena”?
[Picture on page 27]
Ileleikristi a rẹ rẹriẹ aro bru Jihova avọ Ẹme riẹ, evaọ okiovo na a vẹ se wọhọ ugheghẹ “areghẹ akpọ ọnana”
[Picture on page 29]
Iviuwou no i fievahọ Jihova avọ Ẹme riẹ a wo emamọ obokparọ gbe evawere