‘Kọ Me Muẹme eva Aro Ọghẹnẹ?’

“KỌ ME Muẹme? Kọ Ọghẹnẹ Ọ be Daezọ?” Ere uzoẹme jọ nọ o roma via evaọ Christianity Today o se. Philip Yancey, ọnọ o kere eme eyena, ọ ta nọ: “Iruo mẹ buobu wọhọ okere e dhẹ wariẹ ẹbẹbẹ edada. Me re dhe onọ ovo oyena ẹwẹwariẹ ẹsikpobi, epaọ ẹsenọ a rẹ kariẹ omola nọ u bi kpo obọ. Me bi yo mi ahwo nọ i bi se ebe mẹ, yọ ikuigbe akọriọ rai e tẹ kẹ imuẹro avro mẹ.”

Ẹsejọhọ whẹ omara who roro no re kpahe isiuru Ọghẹnẹ evaọ uzuazọ ra. O, ẹsejọhọ whọ riẹ kpahe Jọn 3:16, nọ o ta nọ “Ọghẹnẹ o you akpọ na hrọ, ọ jẹ rehọ Ọmọvo riẹ kẹ.” Hayo ẹsejọ who se Matiu 20:28 no, onọ o ta nọ Jesu ọ nyaze re ọ “rọ uzuazọ riẹ ta ibuobu.” Ghele whọ rẹ sae nọ n’ikọ, ‘Kọ Ọghẹnẹ o bi fiẹrohọ omẹ? Kọ ọ be daezọ mẹ?’ Uvi ẹjiroro ọ riẹ nọ ma jẹ rọwo inọ o bi ru ere, wọhọ epanọ ma te ruẹ na.