Ẹnyate Ọ Use-Abọ Uyoyou-Evifihọ
“Wha [whẹ] ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.”—AHWO ẸFẸSỌS 4:24.
1. Fikieme ma jẹ riọ Jihova Ọghẹnẹ osa uyoyou-evifihọ?
ẸNYATE use-abọ uyoyou-evifihọ u wo abọ buobu. Maero kọ ẹnyate use-abọ uyoyou-evifihọ kẹ Jihova Ọghẹnẹ. Eva uzẹme, fiki oghẹrẹ ohwo nọ Jihova ọ rọ gbe oware nọ o ru k’omai, gbe fiki oma mai nọ ma rọ kẹe no, ma riosa uyoyou-evifihọ kẹe. Ẹvẹ ma re ro dhesẹ uyoyou-evifihọ kẹ Jihova Ọghẹnẹ? Edhere ọsosuọ họ uyoyou-evifihọ kẹ izi ikiẹrẹe Jihova.
2, 3. Didi usu o rọ udevie uyoyou-evifihọ gbe ẹrẹreokie?
2 Re ma nyate uyoyou-evifihọ na, ma re yo eme nọ e rọ 1 Pita 1:15, 16: “Rekọ epanọ ohwo nọ o se owhai ọ rọ fuafo na, whai omarai wha jọ eva uruemu rai kpobi jọ fuafo re; keme a kere nọ, ‘Wha rẹte jọ ọrẹri, keme mẹ ọrẹri.’” Uyoyou-evifihọ kẹ Jihova Ọghẹnẹ u re ru omai yoẹme kẹe ẹsikpobi, jẹ rehọ iroro mai, eme mai, gbe owojẹ mai ziọ okugbe lele oreva ofuafo riẹ. U dhesẹ ewo iroro efuafo, wọhọ epanọ a juzi k’omai eva 1 Timoti 1:3-5: “Whaọ ọtẹruvio uzi mai na [orọnọ re a wuhrẹ iwuhrẹ sa hayo rẹriẹ aro dhe esia erue he] uyoyou nọ u no eva efuafo ze gbe emamọ iroro avọ uvi orọwọ.” Uzẹme, ohwo ọvuọvo nọ ọ gba ọ riẹ hẹ, rekọ ma be hae daoma ru utho ẹgba mai, ogbẹrọ ere?
3 Uyoyou-evifihọ kẹ Jihova u re si omai kpemu nọ ma gbẹ rọ rehọ oriobọ gbolo aro kẹ izi ikiẹrẹe he. Eva uzẹme, uyoyou-evifihọ u re kru omai kpemu nọ ma gbẹ rọ jọ eviẹwẹ hẹ. Uyoyou-evifihọ họ oware nọ ọnọ ọ so ilezi na o wo họ iroro okenọ ọ so nọ: “Wuhrẹ omẹ edhere ra, eyo ỌNOWO, re mẹ nya eva uzẹme ra; koko udu mẹ họ re mẹ dhẹozọ odẹ ra.” (Olezi 86:11) Uyoyou-evifihọ o gwọlọ oware nọ a dhesẹ wọhọ “ẹmeoyo kẹ izi nọ ohwo-akpọ ọ sae gbahọ omai hi.”
4, 5. Didi eware uyoyou-evifihọ u re ru omai whaha?
4 Uyoyou-evifihọ kẹ Jihova Ọghẹnẹ u re je ru omai whaha eruo oware nọ o rẹ wha afuẹwẹ se odẹ gbe Uvie riẹ re. Wọhọ oriruo, Ileleikristi ivẹ a wo ẹbẹbẹ kugbe omobọ rai te epanọ a ro siobe kẹ ohwohwo evaọ ekọto. Obruoziẹ na ọ tẹ nọ inọ, ‘Kọ whai imava na Isẹri Jihova?’ O rọ vevẹ inọ ọ riẹ oware nọ aimava a jẹ ziọ ekọto ho. Ẹvẹ oyena o rọ omovuọ te! Uyoyou-evifihọ kẹ Jihova Ọghẹnẹ u he ti ru inievo ivẹ eyena yo ẹme ohrẹ Pọl ukọ na: “Re whai ohwo o te siobe kẹ ohwo, yọ orọ ekie rọkẹ owhai. Keme wha gbẹ rọwo ruẹ uye oware nọ ukiẹrẹ he? Re wha gbẹsọ gbuye họ ae oma ha?” (1 Ahwo Kọrint 6:7) Eva uzẹme, edhere uyoyou-evifihọ kẹ Jihova Ọghẹnẹ o rọ re ma ruẹ-uye oware nọ uvru ku omai ukpenọ ma rẹ wha omovuọ se Jihova avọ ukoko riẹ.
5 Uyoyou-evifihọ kẹ Jihova Ọghẹnẹ u te je kugbe ozodhẹ ahwo nọ ma re kie kẹ hẹ. “Ozodhẹ ohwo okpahe ẹta, rekọ ọnọ o fievahọ ỌNOWO na oma o rẹ fọ e.” (Itẹ 29:25) Fikiere, ma re siobọ no ẹrọwọ mai hi nọ ma tẹ rẹriẹ ova ku ukpokpoma, rekọ ma re lele oriruo nọ Isẹri Jihova evaọ Soviet Union vẹre, evaọ Malawi, evaọ Ithiopia, gbe evaọ ekuotọ buobu efa a fihọ otọ k’omai.
6. Uyoyou-evifihọ o rẹ lẹliẹ omai whaha usu kugbe ono?
6 Ma tẹ be romakpotọ kẹ Jihova Ọghẹnẹ, ma rẹ nyusu kugbe ahwo nọ e rọ ewegrẹ riẹ hẹ. Oye jabọ nọ Jemis olele na o ro kere nọ: “Whai nọ a re fievahọ họ! Wha gbẹ riẹ nọ ohwo nọ ọrọ ogbẹnyusu akpọ na yọ avọ Ọghẹnẹ a rọ egrẹ? Fikiere kohwo kohwo nọ ọ guọlọ nọ o re mu akpọ na ogbẹnyusu, ọye ọvo o ru oma riẹ ọwegrẹ Ọghẹnẹ.” (Jemis 4:4) Ma gwọlọ wo uyoyou-evifihọ nọ Devidi Ovie na o dhesẹ nọ ọ ta nọ: “Me gbe mukpahe enọ i mukpahe owhẹ, O ỌNOWO? Enọ i mukpahe owhẹ kpobi, me gbe mukpahọ ae? Me re mukpahe ae gaga uvi emukpahọ; me re kele ai gbe ewegrẹ mẹ.” (Olezi 139:21, 22) Ma gwọlọ nyusu kugbe erahizi aro koko ọvuọvo ho, keme ma wo oware ovo kugbe ai hi. Kọ uyoyou-evifihọ kẹ Ọghẹnẹ u gbe si omai kpemu no usu kugbe ewegrẹ Jihova itieye na, o make rọ usu kugbe ohwo na hayo ẹkwoma etẹlivisiọne?
Ẹthọ Jihova
7. Uyoyou-evifihọ u re fiobọhọ k’omai ru eme kpahe Jihova, kọ ẹvẹ Elaihu o ro ru onana?
7 Uyoyou-evifihọ o rẹ w’omai re ma jọ abọ Jihova Ọghẹnẹ. Didi emamọ oriruo ma wo evaọ oma Elaihu! Job 32:2, 3 ọ ta k’omai nọ: “Koyehọ Elaihu . . . ofu o te mu ei kpahọ Job keme o ru omariẹ kiẹrẹe vi Ọghẹnẹ. O te je muofu kpahe egbẹnyusu esa Job, keme a ruẹ uyo ovo ho, dede na a kele Job fihọ abọ oruthọ.” Evaọ Job izou 32 rite 37, Elaihu ọ t’ẹme jẹ thọ Jihova. Wọhọ oriruo, ọ ta nọ: “Kiakọ kẹ omẹ omojọ, me re ti dhesẹ kẹ owhẹ, keme me wo ẹme jọ nọ mẹ te rehọ odẹ Ọghẹnẹ ta kẹ owhẹ . . . me ve ti dhesẹ ẹrẹreokie ọnọ ọ ma omẹ. . . . O re siẹrono ahwo okiẹrẹe he.”—Job 36:2-7.
8. Fikieme ma jẹ thọ Jihova?
8 Fikieme u je fo re ma thọ Jihova? Nẹnẹ, a be rọ idhere sa-sa la Ọghẹnẹ mai Jihova eka. A be ta nọ ọ rọ uzuazọ họ, inọ ọ rọ abọ Esanerọvo, inọ ọ rẹ lahiẹ ahwo bẹdẹ bẹdẹ evaọ oria ehẹle nọ o be to, inọ ọ be daoma rọ oyẹlẹ ku akpọ na soso rẹriẹ, inọ ọ be daezọ ohwo-akpọ họ, gbe eware efa. Ma re dhesẹ uyoyou-evifihọ mai kẹe ẹkwoma ẹthọ nọ ma rẹ thọe je dhesẹ nọ Jihova ọ be rria; inọ o wo areghẹ, kiẹrẹe, erumeru, jẹ rọ Ọghẹnẹ oyoyou; inọ o wo oke rọ kẹ eware kpobi; jegbe nọ oke riẹ nọ o ve fihọ u te te no, ọ te rọ eyoma kpobi te oba je ru otọakpọ na kpobi fihọ aparadase. (Okokahwohọ 3:1) Onana o gwọlọ nọ ma rẹ rehọ uvẹ oke kpobi se isẹi kẹ odẹ gbe Uvie Jihova.
Wo Uyoyou-Evifihọ kẹ Ukoko Jihova
9. Rọ kpahe avro ọ vẹ ahwo jọ a je dhesẹ ababọ uyoyou-evifihọ rai no?
9 Ma nya te ẹme uyoyou-evifihọ kẹ ukoko Jihova nọ a rẹ ruẹ no. Uzẹme, ma riosa oma nọ ma re ro kpotọ kẹe, kugbe ‘ọrigbo nọ o wo ẹrọwọ avọ areghẹ’ na, ọnọ a be rọ ẹkwoma riẹ rọ ko ukoko Oleleikristi na evaọ ẹzi. (Matiu 24:45-47) Dae rehiẹe nọ oware jọ o roma via evaọ ebe nọ ukoko Watch Tower a kere nọ ma wo otoriẹ rai hayo rọwo kugbe evaọ okioke oyena ha. Eme ma re ru? Ma rẹ dheva no ukoko na? Oyena họ oware nọ ahwo jọ a ru okenọ Uwou-Eroro Na evaọ ikpe buobu nọ i kpemu, ọ ta nọ ọvọ ọkpokpọ na o ti wo iruo evaọ etoke Odu-Ikpe na. Amọfa a dheva fiki oware nọ Uwou-Eroro Na ọ ta kpahe ẹme ọ mẹ-rọ abọvo ho. O hae rọnọ ahwo nọ i zoruẹ fiki eme enana a jẹ romakpotọ kẹ ukoko na jẹ rọ kẹ inievo rai, a hẹ te hẹrẹ Jihova re o ru eme na vẹ, nọ o ghine ru evaọ ẹruoke riẹ. Fikiere, uyoyou-evifihọ u kugbe odiri nọ ma rẹ rọ hẹrẹ bẹsenọ ọrigbo ẹrọwọ gbe areghẹ na o re kporo evuẹ efa ze.
10. Uyoyou-evifihọ o rẹ whaha omai isiuru eme ba ewo?
10 Uyoyou-evifihọ kẹ ukoko Jihova nọ a rẹ ruẹ u te je dhesẹ nọ ma re wo abọ ọvo kugbe ikọ erue he. Ileleikristi uyoyou-evifihọ a rẹ rehọ okpakpa gwọlọ riẹ kpahe oware nọ ahwo itieye a be ta ha. Uzẹme, ahwo nọ Jihova Ọghẹnẹ o bi ro ruiruo re a kpọ iruo riẹ evaọ otọakpọ a gba ha. Rekọ eme Ẹme Ọghẹnẹ ọ ta k’omai nọ ma ru? Inọ ma no ukoko Ọghẹnẹ no? Ijo. Uyoyou inievo u re ru omai romakpotọ kẹe, yọ ma rẹ gbẹ hae “rehọ uvi uyoyou you ohwo no eva ze.”—1 Pita 1:22.
Fievahọ Ekpako nọ I wo Uyoyou-Evifihọ
11. Uyoyou-evifihọ u re fiobọhọ k’omai yọrọ oma kpahe iroro ethọthọ e vẹ?
11 Nọ a tẹ jọ ukoko na ta hayo ru oware jọ nọ ma be kaki wo otoriẹ riẹ hẹ, uyoyou-evifihọ o rẹ whaha omai nọ ma gbe ro guẹdhọ epanọ oware utioye o be rọ via ha rekọ u re fiobọhọ k’omai rehọ edikihẹ inọ ẹsejọ họ ma bi rri ẹme na thọ. Kọ o gbẹ mae jọ wowoma re who roro kpahe ekwakwa iwoma ekpako nọ a ro mu na gbe erọ ahwo nọ wha gbe wo ẹrọwọ ọvo ukpenọ ma he roro kpahe iruthọ rai? Ẹhẹ, ma gwọlọ yọrọ oma kpahe iroro ethọthọ itieye kpobi, keme u wo obọ kpahe sioma ba erokpotọ! Uyoyou-evifihọ u re je fiobọhọ k’omai re ma yoẹme kẹ ohrẹ Pọl re ma “siọ ẹme oyoma ohwọvo ba ẹta.”—Taitọs 3:1, 2.
12, 13. Uzedhe use-abọ ovẹ ekpako na a rẹriẹ ova ku?
12 Uyoyou-evifihọ o rẹ mae wha use-abọ ulogbo se ekpako na. Use-abọ onana jọ họ epanọ a rẹ ko ẹme dhere. O sae jọ nọ ohwo jọ evaọ ukoko na ọ t’ẹme idhere jọ kẹ ọkpako. Uyoyou-evifihọ kẹ ohwo ọyena u re ru ọkpako na nọ o gbe ro zue uzi ẹme nọ a ko dhere he. O re yo ohrẹ Itẹ 25:9: “Who dhesẹ eware idhere amọfa ha.” Oyena u dhesẹ nọ makọ rọ kẹ aye riẹ dede o re dhesẹ eware idhere amọfa ha!
13 Ekpako na a wo edawọ uyoyou-evifihọ efa nọ a rẹ nya te. Kọ ahwo a gwọlọ rọ ujiro kẹ, manikọ a te rọ aruọwha gbe ẹwolẹ fiobọhọ kẹ ahwo nọ a gwọlọ ẹkpọhọ, a tẹ make rọ inievo eva rai hayo egbẹnyusu ekpekpe dede? Uyoyou-evifihọ kẹ ukoko Jihova u re ru omai nọ e rọ ekpako daoma fiobọhọ kẹ ohwo kpobi nọ ọ gwọlọ obufihọ ẹzi. (Ahwo Galesha 6:1, 2) Dede nọ ma rẹ jọ wowolẹ, uyoyou-evifihọ u re ru omai t’uzẹme kẹ ibe ekpako mai dede, nwane wọhọ epanọ Pọl ukọ na ọ t’uzẹme kẹ Pita ukọ na. (Ahwo Galesha 2:11-14) Evaọ abọdekọ riẹ, esẹro a rẹ yọrọ oma, ogbẹrọ ere he, nọ a tẹ jowọ ugheghẹ hayo dhesẹ ọriẹwẹ hayo evaọ edhere jọ a tẹ be rọ udu-esuo rai ruiruo thọthọ, a re ru ei bẹbẹ kẹ amọfa nọ e rọ otọ rai re a romakpotọ kẹ ukoko Ọghẹnẹ.—Ahwo Filipai 4:5.
14, 15. Didi ekwakwa e rẹ dawo uyoyou-evifihọ ahwo nọ e rọ ukoko na?
14 Abọfa ọ riẹ kpahe ẹnyate use-abọ uyoyou-evifihọ kẹ ukoko na gbe ekpako riẹ. Otẹrọnọ ẹbẹbẹ ọ rẹ jọ ukoko na evaọ ẹsejọ, onana o rẹ k’omai uvẹ nọ ma re ro dhesẹ uyoyou-evifihọ kẹ Jihova jẹ rọ kẹ ahwo nọ i dikihẹ kẹe. (Rri Uwou-Eroro Na [ọrọ Oyibo] June 15, 1987, ewẹ-obe 15-17.) Otẹrọnọ a si ohwo jọ no ukoko, uyoyou-evifihọ o rẹ gwọlọ nọ ma rẹ tha ekpako na uke, orọnikọ ma rẹ jọ obemu go sọ oware nọ ohwo na o ru u te onọ a re ro si ohwo no ukoko ho.
15 Uyoyou-evifihọ kẹ ukoko na o rẹ gwọlọ re nọ ma tha iwuhrẹ isoi ẹkpoka na uke wọhọ epanọ ẹgba mai o te. Uyoyou-evifihọ o gwọlọ nọ orọnikọ ma re kpohọ iwuhrẹ na ẹsikpobi ọvo ho rekọ ma rẹ jẹ ruẹrẹ oma kpahe kẹ ai jẹ k’iyo ọbọga nọ uvẹ na o tẹ riẹ.—Ahwo Hibru 10:24, 25.
Uyoyou-Evifihọ Evaọ Orọo
16, 17. Didi use-abọ uyoyou-evifihọ Ileleikristi nọ e rọo no a rẹriẹ ova ku?
16 Ono ọfa ma riosa uyoyou-evifihọ? Ma tẹ rọ ahwo nọ e rọo no, fiki eyaa orọo mai, ma rẹ nyate use-abọ uyoyou-evifihọ kẹ ọrivẹ orọo mai. Uyoyou-evifihọ kẹ ọrivẹ-orọo mai u re ru omai nọ ma gbe ro ru eyae gbe ezae efa woma viọ aye hayo ọzae mai hi. Uyoyou-evifihọ kẹ ọrivẹ-orọo mai o tẹ jẹ gwọlọ nọ ma rẹ fere oyẹlẹ gbe iruthọ ọrivẹ orọo mai via kẹ ahwo obọ otafe he. O re lọlọhọ re a gu iguẹgu kẹ amọfa vi iruo egaga nọ ma re ru re ma sae t’ẹme kugbe ọrivẹ mai, onọ u fo nọ ma re ru nya lele Uzi Oro na. (Matiu 7:12) Eva uzẹme, eyero orọo o wha use-abọ ulogbo se uyoyou-evifihọ Oleleikristi mai.
17 Re ma sae nyate use-abọ uyoyou-evifihọ ọnana, orọnikọ ma rẹ whaha abe-ọriọ uruemu ọfariẹ ọvo ho rekọ ma rẹ jẹ sẹro iroro gbe ọwhọ-oma mai re. (Olezi 19:14) Wọhọ oriruo, otẹrọnọ idu eviẹhọ mai i bi wo isiuru ethọthọ gbe omawere, o re lọlọhọ k’omai re ma rọ oriobọ no eriwo kpohọ epanọ ma ro woi te obọ. Jẹ t’ẹme kpahe ẹfuọ orọo, Solomọn Ovie na ọ tẹ hrẹ ezae re a rọ edhere itẹ ‘da ame no ozaa obọ rai ze.’ (Itẹ 5:15) Jesu ọ ta re nọ: “Kohwo kohwo nọ o re ri aye rite ẹguọlọ riẹ, ọ jọ eva lele ie bruẹnwae no.” (Matiu 5:28) Ezae nọ i fioma rai họ eriwo iwoho ẹbẹba a rọ enwoma ekie ruọ ẹnwae-obro, be rọ ere wha eyae rae ria je bi dhesẹ nọ a you rai hi. Epavo na re, aye nọ o re rri ighe nọ i bi dhesẹ ẹnwae-obro ọ rẹ sai kie ruọ odawọ siọ oma ba erokpotọ kẹ ọzae riẹ. Ma te ghine wo uyoyou kẹ ọrivẹ-orọo mai, ma re ru ọgbakugbe orọo na ga, ma vẹ rọ ere rehọ omodawọ mai fiobọhọ kẹ amọfa ru Jihova Ọghẹnẹ eva were.
Eware nọ I re Fiobọhọ k’Omai Yọrọ Uyoyou-Evifihọ
18. Ovuhumuo eme u re fiobọhọ k’omai romakpotọ?
18 Eme u re fiobọhọ k’omai re ma nyate use-abọ uyoyou-evifihọ evaọ eria ene enana: uyoyou-evifihọ kẹ Jihova, kẹ ọruẹrẹfihọ riẹ, kẹ ukoko na, jẹ rọ kẹ ọrivẹ-orọo mai? Obufihọ ọvo jọ họ ewo ovuhumuo na inọ ẹnyate use-abọ uyoyou-evifihọ o rọ ẹrẹrẹe kugbe ekru kpehru esuo Jihova. Ẹhẹ, ẹkwoma uyoyou-evifihọ nọ ma re wo, ma sai ro dhesẹ nọ ma riwi Jihova wọhọ Osu Ehrugbakpọ na. Fikiere ma sai je wo adhẹẹ kẹ omobọ mai gbe ẹruore uzuazọ ebẹdẹ bẹdẹ evaọ akpọ ọkpokpọ Jihova. Ma sai fiobọhọ kẹ omobọ mai re ma gbe wo uyoyou-evifihọ ẹkwoma eroro kpahe iriruo uyoyou-evifihọ, no umuo Jihova rite erọ enọ a fodẹ evaọ Ebaibol gbe erọ ebe Watch Tower mai, kugbe enọ a niyẹrẹ kpahe evaọ Yearbook na.
19. Didi abọ ẹrọwọ o wo evaọ oma nọ ma re ro kpotọ?
19 Ẹrọwọ ọgaga fihọ Jihova Ọghẹnẹ gbe ozọdhẹ re ma siẹ e ba eruthọ u re fiobọhọ k’omai nyate use-abọ uyoyou-evifihọ. Ma re ru ẹrọwọ gbe ozodhẹ Jihova mai ga ẹkwoma Ẹme Ọghẹnẹ nọ ma rẹ romatotọ wuhrẹ gbe odibọgba Oleleikristi nọ ma re dhomahọ. Onana u re fiobọhọ k’omai nya lele ohrẹ Pọl nọ a kere eva Ahwo Ẹfẹsọs 4:23, 24: “Re a ru ẹzi iroro rai zihe ruọ ọkpokpọ, re wha wha ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe [uyoyou-evifihọ, NW ].”
20. Maero, didi okwakwa o rẹ lẹliẹ omai romakpotọ kẹ Jihova jẹrọ kẹ amọfa kpobi nọ ma riosa uyoyou-evifihọ?
20 Ovuhumuo ekwakwa Jihova i re fiobọhọ k’omai romakpotọ. Maero, uyoyou ababọ oriobọ kẹ Ọsẹ obọ odhiwu mai gbe uyere kẹ eware nọ o ru k’omai no kpobi, re ma rọ udu gbe ẹwẹ gbe iroro gbe ẹgba mai kpobi you rie u re fiobọhọ k’omai re ma romakpotọ kẹe. Ofariẹ, ewo uyoyou nọ Jesu ọ ta nọ a ti ro vuhu ilele riẹ u re fiobọhọ k’omai romakpotọ kẹ Ileleikristi kpobi evaọ ukoko na gbe evaọ uviuwou mai. Re a rọ edhere ọfa tae, o rọ ẹme oriobọ hayo ababọ oriobọ. Ababọ uyoyou-evifihọ họ oriobọ. Uyoyou-evifihọ họ ababọ oriobọ.—Mak 12:30, 31; Jọn 13:34, 35.
21. Ẹvẹ ẹme ẹnyate use-abọ uyoyou-evifihọ a sai ro ru ei kpẹre?
21 Re a ru ẹme na kpẹre: Uyoyou-evifihọ yọ okwakwa igbunu nọ Jihova Ọghẹnẹ o dhesẹ, nọ Jesu Kristi o dhesẹ, gbe idibo uzẹme Jihova kpobi. Re ma wo emamọ usu kugbe Jihova Ọghẹnẹ, ma rẹ nyate use-abọ uyoyou-evifihọ kẹe hrọ ẹkwoma ẹria lele ẹgwọlọ kiẹrẹe riẹ, oma nọ ma re sino ewegrẹ riẹ riẹriẹriẹ, gbe ẹthọ Jihova evaọ isẹrise nọ ma ruẹrẹ oma họ kẹ gbe orọ ọnyakuo. Ma rẹ jẹ nyate use-abọ uyoyou-evifihọ kẹ ukoko Jihova nọ a rẹ ruẹ. Ma rẹ romakpotọ kẹ ikoko mai jẹ rọ kẹ erivẹ orọo mai. Ẹkwoma ẹnyate use-abọ uyoyou-evifihọ avọ obokparọ, yọ ma bi wo abọ evaọ ẹkpare kpehru esuo Jihova, bi dhesẹ nọ abọ riẹ ma rọ evaọ avro na. Ma ve ti no ere wo aruoriwo riẹ je wo osohwa uzuazọ ebẹdẹ bẹdẹ. Ẹme nọ Pọl ukọ na ọ ta kpahe omarọkẹ Ọghẹnẹ a sae jẹ tae re kpahe ẹnyate use-abọ uyoyou-evifihọ mai. U wo erere evaọ uzuazọ enẹna gbe onọ o be tha.—Olezi 18:25; 1 Timoti 4:8.
Ẹvẹ Whọ te k’Uyo?
◻ Evaọ idhere e vẹ ma sae rọ nyate use-abọ uyoyou-evifihọ kẹ Ọghẹnẹ?
◻ Eme uyoyou-evifihọ kẹ ukoko Jihova o gwọlọ mi omai?
◻ Ẹvẹ ekpako a sae rọ nyate use-abọ uyoyou-evifihọ?
◻ Didi use-abọ kpahe uyoyou-evifihọ Ileleikristi nọ e rọo no a rẹ nyate?
◻ Didi ekwakwa i re fiobọhọ k’omai nyate use-abọ uyoyou-evifihọ?
[Picture on page 15]
Uyoyou-evifihọ kẹ ahwo nọ e rọ ukoko na u re fiobọhọ kẹ ekpako na whaha eme idhere e ta via
[Pictures on page 16]
Uyoyou-evifihọ kẹ ọrivẹ orọo ohwo u re ru ọgbakugbe orọo na ga