Kọ Who Kiẹta Omohẹriẹ No?

EME ozighi uyẹ, ohẹriẹ-ovioma, ohẹriẹ-orua, oma-kodhere, gbe ikpakpe-uyẹ u wo kugbe? Enana kpobi yọ eware nọ i re no iroro ohwo-akpọ nọ e vaha thabọ no ze—omohẹriẹ!

Eme họ omohẹriẹ? Obe ofeme jọ o fa riẹ wọhọ “iroro nọ ohwo o wo ababọ oma nọ o ro totọ re ọ kiẹ ẹme na riwi ziezi.” Wọhọ ahwo-akpọ nọ e gba ha, oma o rẹ w’omai re ma hẹrioma oghẹrẹ jọ. Ẹsejọhọ whọ sai roro kpahe ẹdẹjọ nọ who bruoziẹ jọ ababọ uzẹme ẹme na kpobi nọ whọ riẹ kpahe tao. Ebaibol na o fi ohẹriẹ họ udevie iroro omohẹriẹ itieye na kugbe epanọ Jihova Ọghẹnẹ o re bruoziẹ. O ta nọ: “Keme ỌNOWO na o re riwẹ epaọ ohwo ho; eru oma ọye ohwo o re riwẹ, rekọ ỌNOWO na kọ obọ eva.”—1 Samuẹle 16:7.

Omohẹriẹ O rẹ Sae Wha Edada Ze

Ababọ avro a bruoziẹ ọthọthọ kp’omai kpobi no evaọ okejọ. (Wawo Okokahwohọ 7:21, 22.) Evaọ oghẹrẹ buobu, mai kpobi ma kie ruọ ẹta omohẹriẹ no. Ghele, nọ a tẹ kaki si ẹzi ọnana no, iroro omohẹriẹ e gbẹ wha edada ze tere he. Ewo h’eva iroro ẹgo itieye na e rẹ wha enwoma tha. O rẹ sae viẹ omai họ rọwo erue. Wọhọ oriruo, evaọ otọ ọwhẹruọ omohẹriẹ, ahwo jọ a rẹ ghinẹ rọwo inọ ohwo ọ rẹ sai thei uvou, jọ ọyẹlẹ, jọ gheghẹ, hayo wo omoya fikinọ ọ rọ oghẹrẹ egagọ jọ, uyẹ, hayo o no orẹwho jọ ze.

Eva ẹsibuobu, oziẹobro othọthọ oyena o rẹ whae ze nọ a je ru amọfa avọ eva-egaga, avọ eme iyoma eta, hayo wha ozighi fihọ amọfa. Ima ahwo buobu a ku izuazọ rai fiẹ no evaọ ikpakpe, ikpakpe-uyẹ, ikpakpe ovioma, gbe omohẹriẹ efa nọ e vrẹta.

Evaọ akpọ na soso, egọmeti a họre omohẹriẹ no ẹkwoma izi nọ a fihọ re a rọ adhẹẹ kẹ ufuoma ohwo, omofọwẹ, gbe ute-ẹrẹrẹ. Who te se ehri-izi nọ a fihọ hayo ugboma izi orẹwho ra, ababọ avro whọ te ruẹ ibieme hayo eme nọ a ta re e ruẹse thọ ẹkẹ-uvẹ nọ ohwo o wo, makọ uyẹ, sọ ọzae hayo aye, hayo egagọ riẹ. Ghele, omohẹriẹ gbe oma-kodhere e rọ odode evaọ akpọ na soso.

Kọ whẹ yọ ohwo nọ o kiẹta omohẹriẹ no? Kọ a kpoka họ owhẹ aruezo no wọhọ ohwo otheuvou, ọyẹlẹ, ogheghẹ, hayo ọnọ ọ rẹ yoma, fikiọ uyẹ nọ who no ze, unuikpe ra, fikinọ whẹ yọ ọzae hayo aye, orẹwho ra, hayo ẹrọwọ egagọ ra? Kọ a whaha owhẹ emamọ isukulu, iruo, uwou, gbe eware uyerakpọ fiki omohẹriẹ? Otẹrọ ere, ẹvẹ whọ sai ro thihakọ?

[Picture on page 3]

Omohẹriẹ nọ a rẹ kọ họ eva o rẹ wha egrẹ uyẹ haro

[Credit Line]

Nina Berman/Sipa Press