Okenọ Omohẹriẹ O Gbẹ Te Jọ Họ!

NỌ A niyẹrẹ riẹ, Albert Einstein ọkiotọ-eriariẹ na ọ ta okejọ nọ evaọ akpọ ọkora ọnana, o mae rọ bẹbẹ re a fi omohẹriẹ kparobọ vi ogẹgẹ-emama nọ a rẹ bẹre ekekẹ. Epọvo na re, Edward R. Murrow, ọniyẹrẹ nọ o viodẹ evaọ Ẹmo Akpọ II gbe ọnọ o zihe ruọ osu Oria Evuẹ United States, ọ ta nọ “ohwo ọvo ọ rẹ sai si omohẹriẹ no ho—a rẹ sae rueriẹ ọvo.”

Kọ eme enana uzẹme? A rẹ sai ghine si omohẹriẹ gbe ohẹriẹ-ovioma no? Ẹvẹ Ọghẹnẹ o roro kpahe omohẹriẹ?

Ọghẹnẹ Ọ rọ Ọriẹwẹ Hẹ

Ebaibol na ọ t’ẹme mukpahe ọriẹwẹ. (Itẹ 24:23; 28:21) Ọ ta nọ “areghẹ nọ o nehru ze o re muhọ avọ ẹfuọ, kẹsena udhedhẹ, omaurokpotọ, o re roro didi, ọrẹ vọ avọ ohrọ gbe emamọ ibi, o re fiabọ ọriẹwẹ gbe eviẹhọ.” (Jemis 3:17) Ibruoziẹ evaọ Izrẹl anwae a fi ẹgba họ areghẹ ọyena. A hrẹ rai nọ: “Who broziẹ ikienyẹ hẹ; who broziẹ ọriẹwẹ kẹ oyogbere he hayo who ri ovao okpohwo ho.”—Iruo-Izerẹ 19:15.

Jesu Kristi gbe Pita avọ Pọl ikọ riẹ a fi ẹgba họ eriwo Ebaibol na nọ u mukpahe ọriẹwẹ gbe omohẹriẹ. Jesu ọ kare ọriẹwẹ kpahe ahwo nọ “a rọ oyoya, a tẹ jẹ vaha wọhọ igodẹ nọ i wo othuru hu.” (Matiu 9:36) O wuhrẹ nọ: “Wha bruoziẹ afe he rekọ wha bruoziẹ nọ o kiẹrẹe.”—Jọn 7:24.

Pita avọ Pọl a k’omai imuẹro inọ Jihova Ọghẹnẹ ọ rọ ọriẹwẹ hẹ. Pita ọ ta nọ: “Uzẹme umuomẹ ẹro no nọ Ọghẹnẹ ọ [rọ ọriẹwẹ hẹ] rekọ evao korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” (Iruẹru 10:34, 35) Pọl ukọ na ọ ta k’omai nọ: “Keme ọriẹwẹ ọ rọ obọ Ọghẹnẹ hẹ.”—Ahwo Rom 2:11.

Ogaga Enwene Ebaibol Na

Ebaibol na o wo ogaga nọ o re ro nwene uruemu ahwo nọ ọ be kpọ. Ahwo Hibru 4:12 ọ ta nọ: ‘Ẹme Ọghẹnẹ ọ rẹ jọ bẹdẹ avọ ogaga.’ Avọ obufihọ Jihova ohwo ọriẹwẹ ọ rẹ sai nwene edhere iroro riẹ dede, re ọ ruẹse jọ ohwo nọ ọ kare ọriẹwẹ evaọ iruẹru riẹ kugbe amọfa.

Wọhọ oriruo, roro kpahe oware nọ o via kẹ Sọl ọ Tasọs. Epanọ okerefihotọ Ebaibol na o ta, okejọ ọ wọso ukoko Oleleikristi na gaga fikinọ o je lele iruemu ethọthọ egagọ. (Iruẹru 8:1-3) Uruemu ahwo Ju o kẹ riẹ imuẹro ọgaga inọ Ileleikristi kpobi yọ ikọ-erue gbe ewegrẹ egagọ uzẹme. Omohẹriẹ riẹ o tẹ lẹliẹe wo obọ kugbe ikpakpe Ileleikristi. Ebaibol na ọ ta nọ “ọ gbẹ ruabọhọ bi guegue ilele Ọnowo na.” (Iruẹru 9:1) Nọ o je ru ere, o roro nọ Ọghẹnẹ ọ be gọ na.—Wawo Jọn 16:2.

Ghele, Sọl ọ Tasọs ọ sai fi omohẹriẹ riẹ kparobọ. Ọye omariẹ o te ti zihe ruọ Oleleikristi dede! Uwhremu na, Pọl wọhọ, ukọ Jesu Kristi, o te kere nọ: “Oke ọsosuọ me zu eme họ, kpokpo, jẹ ta emeẹsọ kẹe; rekọ me wo ohrọoriọ, keme eva ababọ orọwọ mẹ rọ rehọ ogbori ru oyena.”—1 Timoti 1:13.

Pọl ọvo họ ohwo nọ o ru enwene ologbo otiọye evaọ edhere iroro riẹ hẹ. Evaọ ileta riẹ se Taitọs, ibe ọtausiuwoma, Pọl ọ hrẹ Ileleikristi nọ a “siọ ẹme oyoma ohwọvo ba ẹta, jẹ siọ ẹwhọ ba, a vẹ jọ wowou, a ve he dhesẹ uvi evaidhedhẹ kẹ ahwo kpobi. Keme ukpuzou-oma mai na ma jọ gheghẹ okejọ, je he wo-udu, enọ a su thọ, erigbo kẹ egheghẹrẹ imuomu avọ omawere, jẹ hẹ raha edẹ mai esoso kẹ iroro iyoma avọ ihrieriọ, ahwo a mukpahe omai, mai ohwo o te je mukpahe ohwo.”—Taitọs 3:2, 3.

Efikparobọ Ẹzi Ọ Omohẹriẹ

Nẹnẹ, uvi Ileleikristi a rẹ daoma nya lele ohrẹ oyena. A re gu amọfa ẹdhọ họ fiki iroro ekpakpafua nọ a wo kpahe ai. Onana o rẹ whaha ai nọ a gbẹ rọ ‘ta eme ẹsọ’ kpahe amọfa ha. A be reawere okugbe-inievo nọ o vrẹ iwhru erẹwho, uyẹ, gbe ovioma nọ o rọ akpọ ọnana.

Dai roro kpahe oriruo Henrique, ohwo ovioma ubiebi obọ Brazil. Fikinọ a mukpahe ovioma riẹ, o te wo omukpahe ọgaga kẹ ahwo iyibo. Ọ ta nọ: “Isẹri ivẹ nọ i wo ovioma iyibo a tẹ ziọ uwou mẹ te ta kpahe odẹ Ọghẹnẹ. Evaọ oke ọsosuọ mẹ gwọlọ gaviezọ họ keme me fievahọ ahwo ovioma iyibo ho. Rekọ u kri hi mẹ tẹ ruẹ nọ ovuẹ rai o rọ uzẹme. Whaọ, mẹ tẹ rọwo nọ a wuhrẹ Ebaibol kugbe omẹ. Onọ ọsosuọ nọ mẹ nọ họ, ‘Kọ ahwo ibiebi buobu a rọ ichọche rai?’ A tẹ kuyo nọ, ‘E.’ A te dhesẹ ifoto urere nọ o rọ Obe Ikuigbe Ebaibol Mẹa k’omẹ, nọ u wo ahwo ovioma sa-sa. Usu rai họ ọmọzae obiebi jọ, fikiere onana o tẹ tudu họ omẹ awọ. Okiofa me te kpohọ Ọgwa Uvie Isẹri Jihova, oria nọ mẹ jẹ ruẹ ahwo ovioma sa-sa nọ a wo adhẹẹ kẹ ohwohwo. Onana u muomẹ urirẹ gaga.”

Enẹna, wọhọ omọvo Isẹri Jihova, eva e be were Henrique inọ ọ rọ udevie Ileleikristi okugbe-inievo. Ọ riẹ nọ orro na u re bru ohwo ọvo ho. Ọ ta nọ: “Nẹnẹ me bi yere Jihova gbe Jesu rọ kẹ eware kpobi nọ a ru k’omẹ no. Me bi ruiruo kugbe ima idibo omarokpotọ Jihova buobu nọ i wo ovioma sa-sa, ekọlọ, gbe oghoghẹrẹ eyoro, nọ i wo okugbe evaọ ẹjiroro ọvo.”

Nọ ọ jẹ rro te ohwo, Dario yọ omọfa nọ ọ rioja omohẹriẹ. Nọ o te ikpe 16 no, o te mu Ebaibol họ ewuhrẹ kugbe Isẹri Jihova. O te muẹrohọ nọ: “Evaọ udevie Isẹri na, mẹ ruẹ nọ ẹzi ọ omorro ovioma o riẹ hẹ.” Uvi uyoyou nọ o jọ etẹe u gbe rie unu. Ọ tẹ mae muẹrohọ nọ ahwo ovioma sa-sa a rọ ọkwa akiruo sa-sa evaọ ukoko na. Okenọ ọ tẹ ruẹ okienyẹ omohẹriẹ hayo ohẹriẹ-ovioma no obọ ahwo nọ e rọ otafe ukoko na ze, Dario ọ vẹ kareghẹhọ nọ Jihova o you ahwo erẹwho kpobi, uyẹ, gbe ẹrọunu.

Epanọ A re ro Thihakọ

Ma gwọlọ nọ ahwo kpobi a rọ ọghọ gbe adhẹẹ yeri kugbe omai. Fikioye jabọ nọ o jẹ jọ bẹbẹ re a thihakọ ẹdawọ olahiẹ omohẹriẹ na. Ukoko Ileleikristi na ọ nwane thọ omai riẹriẹriẹ no uruemu omohẹriẹ kpobi akpọ omuemu ọnana ha. Nọ Setan Ẹdhọ o gbe bi su akpọ na, okienyẹ ọ rẹ jariẹ. (1 Jọn 5:19) Eviavia 12:12 o vẹvẹ omai unu nọ: “[Uye u te] owhai, o akpọ gbe abade, keme ukumuomu na ọ rehọ ofu ọgaga bru owhai ze, keme ọ riẹ nọ oke riẹ o re kpẹkpẹre.” Ẹjiroro riẹ orọnikọ re ọ wha ozighi ze ọvo ho. A rehe riẹ dhesẹ arao ojihẹ. Pita ukọ na ọ ta k’omai nọ: “Ọwegrẹ ra, Ẹdhọ, ọ be nya wọhọ okpohrokpo nọ o bi do enu, be gwọlọ ọjọ nọ ọ rẹ ria.”—1 Pita 5:8, NW.

Ebaibol na ọ tẹ jẹ ta nọ: “Fikiere wha rọ omarai kẹ Ọghẹnẹ. Mudhe kẹ ẹzi ukumuomu ọ rẹ te dhẹ se owhẹ ba.” (Jemis 4:7) Obufihọ obọdẹ nọ a re ro thihakọ omohẹriẹ họ Ọghẹnẹ nọ ma re rri bru kẹ uketha, wọhọ epanọ Devidi Ovie na o ru: “Si omẹ, no abọ ewegrẹ mẹ, O Ọghẹnẹ mẹ, je no obọ ohwo omuomu nọ o kiẹrẹe he na.” (Olezi 71:4) Ma sai tubẹ lẹ wọhọ ọnọ ọ so ilezi na: “E Ọghẹnẹ, re ohrọ mẹ, keme ahwo a bi thihi omẹ yawo otọ; ewegrẹ mẹ e be hẹ nwẹ omẹ oke-ukpo.”—Olezi 56:1.

Ẹvẹ Ọghẹnẹ ọ te kuyo kẹ elẹ itieye na? Ebaibol na ọ kuyo nọ: “O re siwi oyogbere gbe ọnọ o wo ọthuke he. Ọ be re ohrọ eyẹlẹ gbe iruori, o te bi siwi uzuazọ iruori.” (Olezi 72:12, 13) Ẹvẹ u woma te re a riẹ nọ evaọ obaro Jihova ọ rẹ te rọ ufuoma kẹ ahwo nọ a be ruẹ uye omohẹriẹ kpobi!

‘A ti Ru Enwoma Ọvo Ho’

Egọmeti akpọ ọnana a te gbẹ rọ izi gbe iruẹru rai họre omohẹriẹ. A te gbẹ hae yeyaa ababọ okienyẹ gbe ewoma. Rekọ a te sae kparobọ họ. (Olezi 146:3) Ọghẹnẹ ọvo họ ọnọ o te gbe ọnọ o ti si omohẹriẹ kpobi no. O ti nwene ohwo-akpọ fihọ uviuwou okugbe ọvo. “Otu obuobu jọ, nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu” a te zọ no urere eyero omuomu ọnana jẹ reawere ẹria evaọ udhedhẹ.—Eviavia 7:9, 10.

Jihova ọ te ruẹrẹ enwoma nọ omohẹriẹ uyẹ gbe uyerakpọ e wha ze kpobi. Dai roro kpahiẹe, a gbe ti kienyẹ ohwo ọvo ho! “Ohwo kpobi ọ rẹ te keria otọ ekakọ gbe otọ ure fig riẹ, ozọ ohwo ọvo u gbe ti mu ai hi.” (Maeka 4:4) Yọ Aizaya 11:9 ọ ta nọ: ‘A ti ru enwoma ọvo ho.’

Otẹrọnọ whọ be ruẹ uye omohẹriẹ enẹna, ẹruore igbunu ọnana kpahe obaro u re ru usu ra kugbe Jihova ga. O re ti fiobọhọ k’owhẹ thihakọ okienyẹ eyero omuomu ọnana. Nọ who bi thihakọ omohẹriẹ je bi rri kpohọ obaro na, nya lele ohrẹ areghẹ Ebaibol na: “Wha kru oma ga, wha thihakọ, whai enọ e be hẹrẹ ỌNOWO na kpobi.”—Olezi 31:24.

[Footnotes]

[Picture Credit Line on page 4]

Ifoto U.S. National Archives