Rri Bru Jihova Kẹ Omosasọ

“Jọ Ọghẹnẹ odiri gbe [omosasọ] o ru owhai re wha jọ eva okugbe ọvo, wọhọ epa Jesu Kristi.”—AHWO ROM 15:5.

1. Fikieme ẹdẹ kpobi ọ jẹ be wha ẹgwọlọ ologbo omosasọ ze?

ẸDẸ nọ ọ vrẹ kpobi ọ rẹ wha evihọ ẹgwọlọ omosasọ ze. Wọhọ epanọ okere Ebaibol jọ o muẹrohọ evaọ ikpe nọ i bu vi 1,900 nọ i kpemu no, “enama na soso i bi dimẹ eva ọyawo usuovo na rifi enẹna.” (Ahwo Rom 8:22) Eva oke mai na ‘imẹ-idio’ gbe ‘edada’ na e rro vi epaọ anwọ ẹdẹ no. No anwọ Ẹmo Akpọ I ze, ohwo-akpọ ọ be ruẹ-uye ozighi un’ọjọ u t’ọjọ fiki emo, ugbarugba, gbe okpẹtu fikinọ ohwo ọ be raha akpọ na no.—Eviavia 11:18.

2. (a) Ono a rẹ mae fo kẹ ebẹbẹ ohwo-akpọ inẹnẹ na? (b) Didi uzẹme u re ru omai wo omosasọ?

² Fikieme uye-oruẹ u je bu tere evaọ oke mai na? Nọ o je dhesẹ egbolo Setan no idhiwu ze nọ a yẹ Uvie na no evaọ 1914, Ebaibol na ọ tẹ kuyo nọ: “[Uye u te] akpọ gbe abade, keme ukumuomu na ọ rehọ ofu ọgaga bru owhai ze, keme ọ riẹ nọ oke riẹ o re kpẹkpẹre.” (Eviavia 12:12) Imuẹro orugba eruẹaruẹ yena u dhesẹ nọ ma whoma te ekuhọ esuo omuemu Setan kpobi no. Ẹvẹ o rọ omosasọ te re a riẹ nọ uzuazọ eva otọakpọ u ti zihe kpohọ eyero udhedhẹ nọ o jọ vẹre taure Setan o te su ọsẹ gbe oni ọsosuọ mai kpohọ ọkparesuọ!

3. Oke vẹ ahwo-akpọ a jo wo ẹgwọlọ omosasọ họ?

³ Evaọ emuhọ, Ọnọma ohwo ọ tẹ ruẹrẹ ogege owoma họ wọhọ uwou kẹ ọzae avọ aye ọsosuọ na. O jọ oria nọ a je se Idẹn, nọ otofa riẹ o rọ “Awere” hayo “Isiuru.” (Emuhọ 2:8) Ofariẹ, Adamu avọ Ivi a jẹ reawere omokpokpọ ọgbagba, avọ ẹruore ababọ uwhu. Dai roro kpahe eria buobu nọ a hae jọ fi ẹgba rai họ iruo—ekakọ, ona, ebabọ, ikporakporo. Je roro re, kpahe iruo emama kpobi nọ a hai wuhrẹ nọ a bi ru iruo rai gba na re a su otọakpọ na je ru ei họ aparadase. (Emuhọ 1:28) Uzẹme, izuazọ Adamu avọ Ivi e hae vọ avọ isiuru gbe awere, orọnikọ avọ imẹ-idio gbe edada ha. Vevẹ, a he du wo ẹgwọlọ omosasọ họ.

4, 5. (a) Fikieme Adamu avọ Ivi a je kie evaọ ẹdawọ ẹmeoyo? (b) Ẹvẹ ohwo-akpọ ọ rọ ziọ otọ ẹgwọlọ omosasọ?

⁴ Oware nọ Adamu avọ Ivi a ghinẹ gwọlọ họ re a wo uyoyou odidi gbe ovuhumuo kẹ Ọsẹ obọ odhiwu owowou rai. Uyoyou otiọye na o hae te wọ ai re a yoẹme kẹ Ọghẹnẹ evaọ otọ eyero kpobi. (Wawọ Jọn 14:31.) Avọ oma uweri, te ọsẹ gbe oni ọsosuọ mai a te kie evaọ ẹmeoyo kẹ Osu ọgbagba rai, Jihova. Ikpoye, a tẹ kẹ oma rai uvẹ re a ziọ otọ esuo omuemu enjẹle oyoma na, Setan Ẹdhọ na. Setan họ ohwo nọ ọ dawo Ivi re ọ raha uzi jẹ re ubi-ure aghọ na. Adamu ọ tẹ thuzi nọ ọye omariẹ ọ re ubi-ure nọ Ọghẹnẹ ọ vẹvẹ unu vevẹ nọ: “Eva ẹdẹ nọ whọ re riẹ, who re ti whuẹ.”—Emuhọ 2:17.

⁵ Evaọ edhere ọnana, ọzae avọ aye ọ uzioraha na a te muhọ ewhuo. Nọ o je bruoziẹ uwhu kpe ai, Ọghẹnẹ ọ tẹ ta kẹ Adamu nọ: “Eka i re te otọ na fiki ra. Eva uye-oruẹ whọ jẹ re emu ra bẹdẹ nọ who re whuẹ. Enwẹnwẹ avọ idhigbo e rẹ te dhẹ nọ otọ na tha fiki ra, ebe-ẹwọ whọ rẹ te ria.” (Emuhọ 3:17, 18) Fikiere Adamu avọ Ivi a te ku uvẹ nọ a re ro ru otọakpọ ofofe na fihọ aparadase fiẹ. Nọ a le ai no Idẹn no, a tẹ ta ẹgba rai kpobi mu iruo egaga eruo re a ruẹse wo emuore no otọ nọ a leka no na ze. Emọ rai, fikinọ a reuku uzioraha ọnana, eyero uwhu ọnana no, a te ti wo ẹgwọlọ ologbo ọrọ omosasọ.—Ahwo Rom 5:12.

Eyaa Omosasọ U Rugba

6. (a) Didi eyaa omosasọ Ọghẹnẹ ọ yaa nọ ohwo-akpọ o kie ruọ uzioraha no? (b) Didi aruọruẹ kpahe omosasọ Lemẹk ọ ruẹ?

⁶ Okenọ o je bruoziẹ kpe ọnọ ọ wha ọkparesuọ ohwo ze, Jihova o te dhesẹ oma riẹ wọhọ ‘Ọghẹnẹ nọ ọ rẹ kẹ omosasọ.’ (Ahwo Rom 15:5) O ru ere ẹkwoma eyaa inọ o re ti vi ‘ubi’ jọ ze nọ o re ti siwi emọ Adamu no okpomahọ ọraha ọrọ ọkparesuọ Adamu. (Emuhọ 3:15) Eva obaro, Ọghẹnẹ ọ tẹ kẹ imuẹro esiwo ọnana. Wọhọ oriruo, ọ kẹ Lemẹk, ọmọruọmọ Adamu ẹkwoma ọmọ riẹ Sẹt ẹgba, re ọ ruẹaro kpahe oware nọ ọmọ Lemẹk o re ti ru anọ: “Keme eva otọ onana nọ ỌNOWO ọ bọwo ehao na, ọ rẹ te thọ omai no uye gbe iruo abọ mai.” (Emuhọ 5:29) Nya lele eyaa nana, a te se odẹ ọmọzae na Noa, nọ otofa riẹ o rọ “Eriosehọ” hayo “Omosasọ.”

7, 8. (a) Didi eyero ọ da Jihova fikinọ ọ ma ohwo-akpọ, kọ eme ọ jiroro nọ O re ti ruẹ? (b) Ẹvẹ Noa ọ rọ rria te otofa odẹ riẹ?

⁷ Oke na kpobi, Setan o bi koko ilele riẹ họ evaọ udevie usu enjẹle jọ evaọ obọ odhiwu. Enana i te nwene oma wọhọ ahwo a tẹ rehọ emetẹ iwowoma emọ Adamu wọhọ eyae. Okuomagbe ọthọthọ otiọye na o te gbe ukoko ohwo-akpọ ku viere ọ tẹ jẹ rehọ uyẹ Nẹfilim nọ e riẹ Ọghẹnẹ hẹ via, “egwara,” enọ e rehọ ozighi vọ otọakpọ na. (Emuhọ 6:1, 2, 4, 11; Jud 6) “Ọghẹnẹ ọ [tẹ] ruẹ nọ umuomu ohwo o ro thesiwa evaọ akpọ na . . . O tẹ da Ọghẹnẹ gaga fiki epanọ ọ rọ ma ohwo fihọ evaọ akpọ na, eva e tẹ dha ae gaga.”—Emuhọ 6:5, 6.

⁸ Jihova ọ tẹ jiroro nọ ọ rẹ rehọ ẹvo raha akpọ omuemu ọyena no, rekọ ọ tẹ kaki ru re Noa o ku okọ ro siwi uzuazọ. Fikiere, a te siwi te uyẹ ohwo gbe oghoghẹrẹ erao. Ẹvẹ udu u ghine kie Noa avọ ekru riẹ vi te nọ Ẹvo na o ku no nọ a no okọ na ziọ otọakpọ nọ a ru fo no! Ẹvẹ o rẹ jọ omosasọ te re a ruẹ nọ a kpare iroro vrẹ eka nọ a la otọ na no, nọ u re ru iruo ọwhẹrẹ lọhọ vi epaọ ọsosuọ! Uzẹme, eruẹaruẹ Lemẹk o rugba, keme Noa ọ ghinẹ rria te otofa odẹ riẹ. (Emuhọ 8:21) Wọhọ odibo ẹrọwọ Ọghẹnẹ, Noa o wo obọ logbo evaọ ẹwhaze umutho ‘omosasọ’ se ohwo-akpọ. Dede, okpomahọ omuemu Setan avọ enjẹle idhivẹri riẹ u kuhọ evaọ Ẹvo na ha, fikiere ohwo-akpọ o te gbe bi dimẹ evaọ otọ owha emuemu, ẹyao, gbe uwhu.

Ohwo nọ Ọ Rro Vi Noa

9. Ẹvẹ Jesu Kristi o ro dhesẹ oma riẹ wọhọ amiunugu gbe ọnọ ọ rẹ sasa kẹ ahwo-akpọ nọ i kurẹriẹ?

⁹ Uwhremu na, evaọ ekuhọ ole ikpe 4,000 ọrọ ikuigbe ohwo-akpọ, Ubi eyaa na ọ tẹ ze. Fiki uyoyou odidi riẹ kẹ ohwo-akpọ, Jihova Ọghẹnẹ o te vi Ọmọ ọvo riẹ ziọ otọakpọ re o whu wọhọ ẹtanigbo kẹ ohwo-akpọ omuemu. (Jọn 3:16) Jesu Kristi ọ tẹ rehọ ufuoma ulogbo se erahaizi nọ i kurẹriẹ enọ i fi ẹrọwọ họ uwhu idhe riẹ. Ahwo kpobi nọ a rehọ izuazọ rai mudhe kẹ Jihova no jẹ họ-ame no wọhọ ilele Ọmọ riẹ a rẹ ruẹ ufuoma gbe omofọwẹ nọ o rẹ tọ. (Matiu 11:28-30; 16:24) Makọ sebaẹgba rai, a be ruẹ oghọghọ didi evaọ ẹgọ Ọghẹnẹ avọ iroro efuafo. Ẹvẹ o rọ omosasọ kẹ ai te re a riẹ nọ a te gbe bi dhesẹ ẹrọwọ fihọ Jesu, a te rehọ osohwa uzuazọ ebẹdẹ bẹdẹ kẹ ae! (Jọn 3:36; Ahwo Hibru 5:9) Otẹrọnọ a thọ uzi ulogbo jọ fiki oyẹlẹ, whaọ a wo amiunugu, hayo ọnọ ọ rẹ sasa, evaọ oma Olori nọ a kpare ze na, Jesu Kristi. (1 Jọn 2:1, 2) Ẹkwoma ẹtavia emuemu otiọye jẹ j’owọ Ikereakere na re a siọ ohwo nọ emuemu ọ reria obọ ba ẹjọ, a re wo ufuoma, riẹ nọ ‘Ọghẹnẹ o wo ẹrọwọ je kiẹrẹe evaọ ẹrọvrẹ uzioraha rai.’—1 Jọn 1:9; 3:6; Itẹ 28:13.

10. Eme ma wuhrẹ no eware igbunu nọ Jesu o ru okenọ ọ jọ otọakpọ ze?

¹⁰ Okenọ ọ jọ otọakpọ, Jesu ọ wha omosasọ ze re ẹkwoma ufuoma nọ ọ kẹ ahwo nọ izi igbegbe e jọ oma, ẹkwoma esiwi eyao kpobi, gbe ẹkwoma ẹkpare iwhuowhu ziọ uzuazọ. Uzẹme, eware igbunu itieye na e jọ rọ kẹ erere ubroke ọvo, keme ahwo nọ a ru eyena kpobi kẹ na a wariẹ kpako je whu. Ghele, Jesu ọ rehọ ere riobọhọ eghale ebẹdẹ bẹdẹ obaro nọ o ti ku kuọ ahwo-akpọ kpobi. Enẹna nọ ọ rọ Ovie ologbo obọ odhiwu no na, o ti ru vi eleno-oma idhivẹri na ọvo. O ti fi ai họ ọgọdọ-odidi kugbe osu rai, Setan, evaọ eyero iruo-eseba. Okioye Esuo Odu Ikpe oruaro Kristi na o ve ti muhọ.—Luk 8:30, 31; Eviavia 20:1, 2, 6.

11. Fikieme Jesu o ro se oma riẹ “olori ẹdẹ ẹdijala”?

¹¹ Jesu ọ ta nọ ọye họ “olori ẹdẹ ẹdijala,” yọ o siwi ahwo buobu evaọ ẹdẹ Ẹdijala. (Matiu 12:8-13; Luk 13:14-17; Jọn 5:15, 16; 9:14) Fikieme o je siwi ahwo ẹdẹ ọyena? Whaọ, Ẹdijala na o jọ abọ Uzi Ọghẹnẹ kẹ Izrẹl yọ onana o tẹ jọ “uwoho eware iwoma nọ e be tha.” (Ahwo Hibru 10:1) Edẹ ezeza ẹkpoka nọ a re ro ruiruo na e kareghẹhọ omai ikpe 6,000 nọ ohwo-akpọ ọrọ rọ igbo evaọ otọ esuo okienyẹ Setan. Ẹdẹ Ẹdijala evaọ urere ẹkpoka na ọ tẹ jẹ kareghẹhọ omai kpahe eriosehọ omosasọ nọ ohwo-akpọ ọ te reawere riẹ evaọ Esuo Odu Ikpe ọrọ Noa Ologbo na, Jesu Kristi.—Wawo 2 Pita 3:8.

12. Eviavia omosasọ vẹ ma bi rẹro riẹ?

¹² Ẹvẹ ufuoma riẹ o te rro te kẹ ahwo nọ e te jọ otọ esuo Kristi evaọ otọakpọ eva okenọ a ti no otọ okpomahọ omuemu Setan no riẹriẹriẹ! Omosasọ ofa o te ze nọ a te ruẹ esiwo ẹyao ugboma, idu, gbe iroro. (Aizaya 65:17) Whaọ, dai roro kpahe oghọghọ rai nọ a ti mu iyoyou rai nọ i whu no họ edede ze! Enẹ Ọghẹnẹ o ti ro “ririe irui kpobi no aro rai.” (Eviavia 21:4) Nọ a gbe bi fi irere idhe ẹtanigbo Jesu họ iruo na, ahwo ẹmeoyo nọ e rọ otọ Uvie Ọghẹnẹ a vẹ te rro te ẹgbagba, a ve ti wo ufuoma riẹriẹriẹ no okpomahọ oyoma uzioraha Adamu. (Eviavia 22:1-5) A ve ti siobọno Setan evaọ “umutho oke.” (Eviavia 20:3, 7) A vẹ te rọ uzuazọ ebẹdẹ bẹdẹ hwosa kẹ ahwo-akpọ kpobi nọ e rọ ẹrọwọ kru esuo ọgbagba Jihova kpehru. Dai roro kpahe oghọghọ nọ a rẹ sae gbiku riẹ hẹ gbe ufuoma nọ ma ti wo nọ a te ‘si omai no igbo egbogbo’ no! Fikiere ahwo-akpọ ẹmeoyo a vẹ te reawere ‘oruaro ufuoma emọ Ọghẹnẹ.’—Ahwo Rom 8:21.

13. Fikieme Ileleikristi uzẹme kpobi a jẹ gwọlọ omosasọ nọ Ọghẹnẹ ọ rẹ kẹ?

¹³ Enẹna ma gbe bi dimẹ jẹ be rria otọ ọyawọ nọ e rọ odode kẹ ahwo kpobi nọ e rọ otọ eyero omuemu Setan. Evihọ eyao ugboma gbe ẹvohẹ idu i bi kpomahọ oghẹrẹ ahwo kpobi, kugbe Ileleikristi ẹrọwọ dede. (Ahwo Filipai 2:25-27; 1 Ahwo Tẹsalonika 5:14) Fiba oyena, wọhọ Ileleikristi ma be ruẹ-uye ekpere ẹkoko gbe ukpokpoma nọ Setan o bi koko h’omai uzou fikinọ ‘ma bi yoẹme Ọghẹnẹ wọhọ osu vi ọrọ ahwo.’ (Iruẹru 5:29) Fikiere, otẹrọnọ ma re thihakọ evaọ eruo oreva Ọghẹnẹ rite urere akpọ Setan, ma gwọlọ omosasọ, obufihọ, gbe ogaga nọ Ọ rẹ kẹ.

Oria nọ A re Jo Duku Omosasọ

14. (a) Didi eyaa Jesu ọ yaa evaọ aso taure o te ti whu? (b) Eme o rọ oja otẹrọnọ ma re wo erere vọvọ no omosasọ ẹzi ọfuafo Ọghẹnẹ ze?

¹⁴ Evaọ aso taure o te ti whu, Jesu o ru rie vevẹ kẹ ikọ ẹrọwọ riẹ inọ ọ te nya se ai ba je ti zihe bru Ọsẹ riẹ. Onana u kpokpo i rai jẹ wha ọkora họ ai oma. (Jọn 13:33, 36; 14:27-31) Nọ a vuhu ẹgwọlọ rai kẹ omosasọ mu no, Jesu ọ tẹ yeyaa nọ: “Mẹ rẹ te lẹ Ọsẹ na, ọ rẹ te kẹ owhai Ọthuke ọfa, re avọ owhai a gbẹ jọ bẹdẹ bẹdẹ.” (Jọn 14:16) Jesu ọ be jọ etenẹ t’ẹme kpahe ẹzi ọfuafo Ọghẹnẹ, ọnọ a ku kuọ ilele riẹ edẹ 50 nọ ọ kparoma ze no.a Evaọ idhere efa, ẹzi Ọghẹnẹ ọ sasa e rai oma evaọ etoke uye rai jẹ kẹ ai ogaga re a gbe ru oreva Ọghẹnẹ haro. (Iruẹru 4:31) Ghele, a re rri obufihọ otiọye na wọhọ oware nọ a rẹ kpọ họ họ. Re a wo erere noize vọvọ, Oleleikristi kpobi ọ rẹ gbẹ hẹ lẹ kẹ obufihọ omosasọ nọ Ọghẹnẹ ọ rẹ kẹ ẹkwoma ẹzi ọfuafo riẹ.—Luk 11:13.

15. Idhere jọ vẹ Jihova ọ be rọ k’omai omosasọ?

¹⁵ Edhere ọfa nọ Ọghẹnẹ ọ be rọ sasa ahwo oma họ ẹkwoma Ẹme riẹ, Ebaibol na. Pọl o kere nọ: “Keme eware kpobi nọ a kere oke anwae, a kere ai rọ kẹ omai ohrẹ, re ma rehọ fiki odiri gbe [omosasọ] ikereakere na, wo ẹruore.” (Ahwo Rom 15:4) Onana u te dhesẹ ẹgwọlọ nọ ma re ro wuhrẹ kẹse kẹse je roro didi kpahe eware nọ a kere fihọ Ebaibol na gbe ebe nọ a kere no Ebaibol ze. U te je fo re ma kpohọ iwuhrẹ Ileleikristi oke kpobi re, oria nọ a rẹ jọ jiroro omosasọ no Ẹme Ọghẹnẹ ze. Ẹjiroro omakokohọ itieye na jọ họ re ma tudu họ ohwohwo awọ.—Ahwo Hibru 10:25.

16. Eme ekwakwa omosasọ Ọghẹnẹ e rẹ w’omai nya i ru?

¹⁶ Ileta Pọl rose ahwo Rom ọ tẹ gbẹ nyaharo dhesẹ iyẹrẹ iwoma nọ ma re wo ẹkwoma ero ruiruo ekwakwa omosasọ Ọghẹnẹ. Pọl o kere nọ: “Jọ Ọghẹnẹ odiri gbe [omosasọ] o ru owhai re wha jọ eva okugbe ọvo, wọhọ epa Jesu Kristi. Re whai kpobi a rehọ uru ovo jiri Ọghẹnẹ gbe Ọsẹ Ọnowo mai Jesu Kristi.” (Ahwo Rom 15:5, 6) Ẹhẹ, ẹkwoma ero ruiruo uvẹ ekwakwa omosasọ Ọghẹnẹ vọvọ, ma sae rọ raro kele Osu aruọwha mai, Jesu Kristi. Onana o rẹ wọ omai re ma gbẹ hẹ rehọ enu mai jiri Ọghẹnẹ evaọ iruo isẹri-ise mai, evaọ iwuhrẹ mai, evaọ ẹmeọta mai kugbe ibe enọ e rọwo, gbe evaọ elẹ mai.

Evaọ Oke Odawọ Ulogbo

17. Ẹvẹ Jihova ọ rọ sasa Ọmọ riẹ oma, kọ eme u no rie ze?

¹⁷ Jesu ọ jọ “ọkora” avọ ‘akọriọ’ evaọ aso taure o te ti whu uwhu oja riẹ. (Matiu 26:37, 38) Ọ tẹ dina kẹnoma no ilele riẹ nya e lẹ se Ọsẹ riẹ kẹ obufihọ. “A te yo kẹe fiki ozọ-odhẹ Ọghẹnẹ riẹ.” (Ahwo Hibru 5:7) Ebaibol na ọ niyẹrẹ nọ “ukọ jọ o te no odhiwu ze via kẹ [Jesu], re o ruei oma ga.” (Luk 22:43) Aruọwha gbe udu nọ Jesu ọ rọ nyae rẹriẹ ova dhe ewegrẹ riẹ o kẹ imuẹro nọ edhere nọ Ọghẹnẹ ọ rọ sasa Ọmọ riẹ oma o mai ruiruo.—Jọn 18:3-8, 33-38.

18. (a) Oke vẹ evaọ uzuazọ Pọl ukọ na o mae jọ ẹdawọ kẹe? (b) Ẹvẹ ma sae rọ jọ omosasọ kẹ ekpako nọ i bi ruiruo gaga, avọ ọdawẹ?

¹⁸ Pọl ukọ na ọ ruẹ edawọ ilogbo buobu re. Wọhọ oriruo, odibọgba riẹ evaọ Ẹfẹsọs o jọ avọ ‘irui gbe edawọ nọ i te rie fiki egua-iyoma ahwo Ju.’ (Iruẹru 20:17-20) Uwhremu na, Pọl o te no Ẹfẹsọs no nọ ethuke ọghẹnẹ-aye na Atẹmis a wha ozighi fihọ okpẹwho na kpobi fiki ọ iruo usiuwoma ota riẹ. (Iruẹru 19:23-29; 20:1) Nọ Pọl ọ wọ je kpohọ ofẹ ẹkpẹlobọ-ọre okpẹwho Troas, oware uduama ọfa jọ o jariẹ nọ o jẹ kẹe idhọvẹ iroro. Ẹsejọhọ taure ọkparesuọ na evaọ Ẹfẹsọs ọ tẹ te bẹre lahwe, iyẹrẹ uduama jọ u te rie obọ no. Ukoko ọboba na evaọ Kọrint o wo ẹbẹbẹ ohẹriẹ, a tẹ be jẹ kuvẹ kẹ igberedha. Fikiere no Ẹfẹsọs ze, Pọl o te kere ileta ọwhọkuo ọgaga avọ irẹro nọ ọ te kpọ eyero na vi. Onana o jọ oware olọlọhọ kẹe eruo ho. Uwhremu na ọ tẹ feva evaọ ileta avivẹ riẹ nọ: “Eva uye oruẹ gbe evadha me ro kere obe onana se owhai avọ oviẹ.” (2 Ahwo Kọrint 2:4) Wọhọ Pọl, o rẹ jọ lọlọhọ họ re ekpako ohrọ a kẹ ohrẹ ẹkpọhọ gbe ọwhọkuo, ẹsejọhọ fikinọ a riẹ vevẹ kpahe oyẹlẹ omobọ rai. (Ahwo Galesha 6:1) Fikiere joma jọ uvi omosasọ kẹ ahwo nọ e be k’obaro evaọ udevie mai na ẹkwoma ẹme nọ ma re yo vẹrẹ vẹrẹ kẹ ohrẹ uyoyou, nọ u no Ebaibol ze.—Ahwo Hibru 13:17.

19. Fikieme Pọl ọ rọ nya no Troas kpohọ Masẹdonia, kọ ẹvẹ o ro wo ufuoma uwhremu na?

¹⁹ Okenọ ọ jọ Ẹfẹsọs, orọnikọ Pọl o kere se inievo nọ e jọ Kọrint ọvo ho rekọ o vi Taitọs re o fiobọhọ kẹ ai, jẹ vuẹe re ọ niyẹrẹ kpahe oghẹrẹ nọ a dede ileta riẹ rehọ. Pọl o wo ẹruore nọ tei avọ Taitọs a te jọ Troas zere oma. Evaọ obei Pọl o je wo oghale emamọ uvẹ ilele nọ o ru. Rekọ onana o wha ufuoma se awaọruọ riẹ hẹ keme Taitọs ọ re nyaze he. (2 Ahwo Kọrint 2:12, 13) Fikiere ọ tẹ wọ kpohọ Masẹdonia, bi rẹro nọ ọ te jọ obei zere Taitọs. Awaọruọ Pọl ọ tẹ rro viere nọ a wọso odibọgba riẹ gaga. O ru rie vevẹ nọ: “Dede nọ oma zite Masẹdonia, ma gbe wo eriosehọ họ rekọ a jẹ kẹ omai uye eva kabọ kabọ—obọ afe, ohọre; obọ eva, ozọ. Rekọ Ọghẹnẹ, nọ o re fiobọhọ kẹ erọ ọjẹfiẹ o fiobọhọ kẹ omai fiki ẹtha Taitọs na.” (2 Ahwo Kọrint 7:5, 6) Didi ufuoma o ti wo nọ Taitọs ọ nyaze uwhremu na jẹ ta kẹ Pọl kpahe emamọ odederehọ nọ ahwo Kọrint a dede ileta riẹ rehọ!

20. (a) Wọhọ epanọ o jọ kẹ Pọl, eme họ edhere ologbo ọfa nọ Jihova ọ be rọ kẹ omosasọ? (b) Eme ma te ta kpahe evaọ uwuhrẹ notha na?

²⁰ Eware nọ Pọl ọ rẹro ruẹ e rọ omosasọ kẹ idibo Ọghẹnẹ nẹnẹ, ibuobu rai e be rẹriẹ ova ku edawọ nọ i bi fi ai họ “ọkora” hayo ‘akọriọ.’ Ẹhẹ, ‘Ọghẹnẹ nọ ọ rẹ kẹ omosasọ’ ọ riẹ ẹgwọlọ mai omomọvo yọ ọ rẹ sae rehọ omai kẹ ohwohwo omosasọ, wọhọ epanọ Pọl o wo omosasọ na ẹkwoma iyẹrẹ Taitọs kpahe uruemu ahwo Kọrint. (2 Ahwo Kọrint 7:11-13) Evaọ uwuhrẹ mai notha, ma te t’ẹme kpahe uyo osasa nọ Pọl ọ kẹ ahwo Kọrint gbe epanọ o rẹ sai ro fiobọhọ k’omai vaha omosasọ Ọghẹnẹ ziezi nẹnẹ.

[Footnotes]

Whọ Sae k’Iyo Enana?

◻ Ẹvẹ ohwo-akpọ ọ rọ ziọ ẹgwọlọ omosasọ?

◻ Ẹvẹ Jesu o ro dhesẹ nọ ọ rro vi Noa?

◻ Fikieme Jesu o je se oma riẹ “olori ẹdẹ ẹdijala”?

◻ Ẹvẹ Ọghẹnẹ ọ be rọ kẹ omosasọ nẹnẹ?

[Map/Picture on page 22]

Pọl ọ ruẹ omosasọ ologbo ẹkwoma iyẹrẹ Taitọs kpahe ahwo Kọrint na

MASẸDONIA

GRIS

Filipai

Kọrint

Troas

ESIA

Ẹfẹsọs