Ẹkodhere Evaọ Odẹ Olori Na

EGASE nọ a rọ nua edhere itreni ọ Tokyo, Japan, evaọ March 1995 u kpe ahwo 12, jẹ wha ẹyao họ ahwo idu efa oma, yọ u fiobọhọ rovie oware idhere jọ via. Ẹko egagọ idhere jọ nọ a re se Aum Shinrikyo (Uzẹme Ukpehru) ae jọ idhere ku egase enwoma na nọ a bi ro le ute idudu rai jọ haro.

Amara ọvo nọ u lele i rie ebọmbo e tẹ raha uwou egọmeti evaọ Okpẹwho Oklahoma, U.S.A., onọ u kpe ahwo 167. Imuẹro i dhesẹ via nọ a gbolo ebọmbo na fiki awhaha nọ egọmeti o fihọ Ogha Egagọ Davidian evaọ Waco, Texas, nwanọ ikpe ivẹ n’evrẹ. Evaọ okioye ahwo 80 nọ e rọ ikoko idhere na a ro whu. Ebọmbo na u te je rovie oware nọ ahwo buobu a riẹ hẹ via: Ahwo buobu nọ e rọ utu isoja obufihọ na a be jọ idhere wuhrẹ epanọ a rẹ rọ wọso egọmeti evaọ orẹwho United States na.

Uwhremu na, nọ ukpe 1995 u te ekuhọ no, a te duku ahwo 16 nọ a mahe evaọ owhawho jọ kẹle Grenoble, France. A jọ ahwo Ogbẹguae Etẹmpol Ọre, ẹko egagọ idhere ọsese jọ nọ o jẹ jọ Switzerland gbe Canada do evaọ October 1994 okenọ ahwo 53 nọ e jariẹ eva a thuwhu hayo a kpe ai. Rekọ nọ okpẹtu nana o via vrẹ no, ẹko egagọ yena o serihọ họ. Rite inẹnẹ na ẹjiroro gbe ute riẹ e gbẹ rọ idhere.

Enwoma ọ Ẹkodhere Egagọ

Fiki eware itieye nọ e via vrẹ no, kọ o rọ oware igbunu inọ ahwo buobu a bi viẹro ku ẹko egagọ? Evaọ uzẹme ohwo ọvo ọ rẹ gwọlọ jọ usu ukoko idhere he—o make rọ ọrọ egagọ hayo ọrọ egagọ họ—onọ o rẹ nya liọliọ họ gbe onọ u re fiobọhọ kẹe le ute nọ o rọwo kugbe ẹwẹ riẹ hẹ. Kọ eme ahwo a rẹ sai ru re a sioma ba edhehọ ikoko idhere nọ e thọ?

O rọ vevẹ, o rẹ jọ oware areghẹ re ohwo nọ ọ gwọlọ ro ẹko idhere ọ riẹ oware nọ a be jọ eva riẹ ru. Ma rẹ yọrọ oma kpahe ọgbahọ no obọ egbẹnyusu gbe egbẹrioma ze, ma vẹ jẹ riẹ uzẹme na. Kareghẹhọ, o wọhọ nọ ohwo na ọvo—orọnikọ amọfa ha—họ ọnọ ọ te ruẹ uye riẹ otẹrọnọ oware jọ o via.

Ẹnya lele izi Ebaibol họ edhere nọ o mai muẹro nọ a rẹ rọ kẹnoma no ẹko ahwo nọ ẹjiroro rai e thọ. (Aizaya 30:21) Onana u kugbe oma nọ a re sino esuo-hrowo, edhesẹ uyoyou kẹ amọfa, makọ rọ kẹ ewegrẹ dede, ẹwhaha “iruo uwo,” gbe ẹkọ ibi ẹzi Ọghẹnẹ. Maero, Ileleikristi uzẹme a rẹ jọ abọ akpọ ọnana ha, nwane wọhọ epanọ Jesu ọ jọ abọ riẹ hẹ na, yọ owojẹ onana u kugbe ẹwhaha abọ nọ a re wo evaọ ikoko idhere akpọ na re.—Ahwo Galesha 5:19-23; Jọn 17:14, 16; 18:36; Ahwo Rom 12:17-21; Jemis 4:4.

Isẹri Jihova yọ ahwo nọ i bi wuhrẹ Ebaibol na muotọ enọ i se ẹrọwọ rai gboja jẹ be daoma rria lele oyena vevẹ. Evaọ akpọ na soso, a riẹ rai ziezi wọhọ ẹko egagọ enọ e be ‘gwọlọ udhedhẹ je bi lei.’ (1 Pita 3:11) Obe rai na Jehovah’s Witnesses—Proclaimers of God’s Kingdom o ta gbagba nọ: “Isẹri Jihova a rọ ukoko idhere vievie he. Eware nọ a rọwo no Ebaibol na ze e rọ ebe nọ ohwo kpobi ọ rẹ sae ruẹ se. Ofariẹ, a be daoma gaga re a zizie ahwo ziọ iwuhrẹ rai re a ruẹ je yo oware nọ o r’obei via.”

Egagọ uzẹme o rẹ kuoma dhere vievie he. A hrẹ egegagọ Ọghẹnẹ uzẹme na nọ a rẹ ko oma rai hayo ẹjiroro rai dhere he wọhọ Isẹri Jihova. Ilele ọsosuọ Jesu a rehọ ewuhrẹ rai vọ Jerusalẹm kpobi. A jẹ hẹ ta orọwọ gbe iruẹru rai via. Epọvo na o rọ kẹ Isẹri Jihova nẹnẹ re. Avọ otoriẹ, okenọ isu egeva a tẹ whaha uvẹ egagọ rai, Ileleikristi a rẹ rehọ ẹghẹ gbe aruọwha wha iruẹru rai haro, bi “yo ẹme Ọghẹnẹ vi o rọ ahwo,” nọ u te ku bae no fiki isẹri ise ẹgbede ududu rai.—Iruẹru 5:27-29; 8:1; 12:1-14; Matiu 10:16, 26, 27.

Otẹrọnọ who roro no ẹdẹjọ inọ ẹsejọhọ Isẹri Jihova a rọ ẹko ahwo idhere jọ, koyehọ whọ riẹ kpahe ai vievie he. Yọ oware nọ o via kẹ ibuobu evaọ ikpe-udhusoi ọsosuọ na.

Obe Iruẹru uzou 28 o ta k’omai kpahe ẹgwae jọ nọ Pọl ukọ na ọ jọ Rom gba kugbe “ikpahwo Ju.” A ta kẹe nọ: “Rekọ ma guọlọ re ma yo o rọ unu ra; epanọ iroro ra e rọ, keme orọ otu ọnana, ma riẹ nọ koria koria a jẹ rọ ẹme oyoma riẹ ẹta.” (Iruẹru 28:16-22) Evaọ uyo, Pọl “ọ tẹ ta otọ ẹme na kẹ ae no ohiohiẹ te owọwọ, yọ o se [isẹri] uvie [Ọghẹnẹ],” fikiere ‘ejọ e tẹ rọwo.’ (Iruẹru 28:23, 24) O ghinẹ ro ai erere re a riẹ uzẹme na kpahe Egagọ-Ahwo-Kristi uzẹme.

Epanọ a roma kẹ iruẹru Ọghẹnẹ evaọ ẹgbede te, ere eva e rẹ were Isẹri Jihova te re a ta uzẹme uvevẹ iruẹru gbe orọwọ rai kẹ ahwo nọ a gwọlọ riẹ uzẹme na kpobi. Fikieme whọ gbẹ kiẹ kẹ oma ra ha, re whọ riẹ kpahe ai ziezi hi?

[Picture on page 6]

Eva e rẹ were Isẹri Jihova re a ta oghẹrẹ ahwo nọ a rọ gbe oware nọ a bi ru k’owhẹ