Omarọkẹ Gbe Ufuoma Ẹsalọ
“Rọkẹ ọmuyẹ [otiọye] Kristi ọ rọ ra omai no igbo.”—AHWO GALESHA 5:1.
1. Eme a rẹ mae rehọ ibieme Hibru gbe Griki nọ a fa “omarọkẹ,” “eromu,” hayo “erufo” ro dhesẹ?
IKERE-EBE Ebaibol na a rehọ eme Hibru gbe Griki buobu ruiruo ro dhesẹ ẹjiroro ẹhẹriẹ no, hayo onọ a hẹriẹ, kẹ iruo efuafo. Evaọ Ebaibol Oyibo a fa eme enana wọhọ “omarọkẹ,” “eromu,” hayo “erufo.” Ẹsejọ a rẹ rehọ eme enana ta kpahe iwou—maero etẹmpol Ọghẹnẹ evaọ Jerusalẹm anwae gbe egagọ nọ a rẹ ja riẹ gọ. Ọthobọ gheghe a rẹ rọ rehọ eme enana ta kpahe eware gheghe.
Omarọkẹ “Ọghẹnẹ Izrẹl”
2. Fikieme a je se Jihova gbagba nọ “Ọghẹnẹ Izrẹl”?
2 Evaọ 1513 B.C.E., Ọghẹnẹ o siwi emọ Izrẹl no igbo Ijipti. U kri hi, ọ tẹ hẹriẹ ai wọhọ obọdẹ ahwo riẹ, ọ tẹ riọvọ kugbe ai. A ta kẹ ai nọ: “Whaọ enẹna otẹrọnọ wha re ghine yo uru mẹ je koko ọvọ mẹ, wha rẹ te jọ efe-agheghọ rọ kẹ omẹ eva udevie erẹwho na kpobi; keme akpọ na kpobi ọ mẹ.” (Ọnyano 19:5; Olezi 135:4) Nọ o ru emọ Izrẹl họ obọdẹ okwakwa riẹ no, a rẹ sai se Jihova gbagba wọhọ “Ọghẹnẹ Izrẹl.”—Joshua 24:23.
3. Fikieme o gbẹ jọ nọ Jihova o dhesẹ ọriẹwẹ hẹ evaọ ẹsalọ Izrẹl wọhọ ahwo riẹ?
3 Fikinọ o ru emọ Izrẹl họ ahwo omarọkẹ riẹ, orọnikọ Jihova o bi dhesẹ ọriẹwẹ hẹ, keme o wo uyoyou ọdawẹ kẹ enọ e rọ emọ Izrẹl he. O j’uzi kẹ ahwo riẹ nọ: “Re ọrara ọ tẹ kpahe owhẹ evaọ otọ ra, who ruei yoyoma ha. Ọrara nọ o kpo bru owhẹ ze na ọ rẹ jọ wọhọ ohwo ẹwho evaọ udevie rai, who ve yowu iei wọhọ epanọ who you oma ra; keme ere wha jọ erara re evaọ otọ Ijipti: Keme Mẹ họ ỌNOWO na Ọghẹnẹ rai.” (Iruo-Izerẹ 19:33, 34) Ikpe-udhusoi buobu evaọ obaro, edikihẹ Ọghẹnẹ o te vẹ Pita ukọ na ẹro ziezi, ọnọ o vuhumu nọ: “Evaọ uzẹme u muomẹ ẹro nọ Ọghẹnẹ ọ rọ ọriẹwẹ hẹ, rekọ evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.”—Iruẹru 10:34, 35, NW.
4. Eme o gwọlọ re usu nọ o jọ udevie Ọghẹnẹ gbe Izrẹl o nyaharo, kọ emọ Izrẹl a rria te ai?
4 Je muẹrohọ inọ orọnikọ ugbunu gheghe a rẹ rọ jọ ahwo omarọkẹ Ọghẹnẹ hẹ. Ajokpanọ a re yoẹme kẹ urru Ọghẹnẹ ziezi je koko ọvọ riẹ ọvo a sae rọ jọ “efe-agheghọ” riẹ. U yoma gaga, emọ Izrẹl a sae nyate ute enana ha. Okenọ a siọ Mesaya nọ Ọghẹnẹ o vi ze na no evaọ ikpe-udhusoi ọsosuọ C.E., a te ku edikihẹ ọghaghae rai na fiẹ. Jihova ọ tẹ siọ “Ọghẹnẹ Izrẹl” ba ẹjọ. Emọ Izrẹl iwo na a gbẹ jọ ahwo omarọkẹ Ọghẹnẹ hẹ.—Wawo Matiu 23:23.
Omarọkẹ ‘Izrẹl Ọghẹnẹ’
5, 6. (a) Eme họ otofa eme eruẹaruẹ Jesu nọ a kere fihọ Matiu 21:42, 43? (b) Okevẹ gbe ẹvẹ ‘Izrẹl Ọghẹnẹ’ o ro muhọ?
5 Kọ onana u dhesẹ nọ Jihova o gbe ti wo ahwo omarọkẹ hẹ? Ijo. Nọ ọ jẹ fodẹ eme ọso-ilezi na, Jesu Kristi ọ tẹ ruẹaro nọ: “Kọ wha ri se eva ikere nọ: ‘Utho nọ ebọ-uwou e se oyena a ro ruẹ o rọ uzou ubienẹ; o bọ Ọnowo na onana u nọ ze, u te mu urirẹ evaọ aro mai’? Fikiere mẹ ta kẹ owhai nọ, a re ti mi owhai uvie Ọghẹnẹ a vẹ te rehọ iẹ kẹ orẹwho nọ o rẹ mọ ibi riẹ.”—Matiu 21:42, 43.
6 ‘Orẹwho nọ o be mọ ibi riẹ’ na u te dhesẹ oma via wọhọ ukoko Ileleikristi na. Okenọ ọ ziọ ukane otọakpọ, Jesu ọ salọ ahwo ọsosuọ riẹ. Rekọ evaọ ẹdẹ Pẹntikọst 33 C.E., Jihova Ọghẹnẹ omariẹ họ ọnọ ọ rehọ ukoko Ileleikristi na mu ẹkwoma ẹzi ọfuafo riẹ nọ o ku ku ahwo ọsosuọ riẹ, nọ i bu te 120. (Iruẹru 1:15; 2:1-4) Wọhọ epanọ Pita ukọ na o kere uwhremu na, ukoko okpokpọ onana nọ a ro mu na u te zihe ruọ “otie-ahwo nọ a sanọ rehọ, ọkwa-ozerẹ orua-uvie, orẹwho ọrẹri, ahwo obọ Ọghẹnẹ.” Eme a salọ e rai kẹ? Re a ‘woro iruo urirẹ ọnọ o se rai via no ebi e ruọ elo ọnwranwra riẹ.’ (1 Pita 2:9) Ilele Kristi, enọ a rọ ẹzi Ọghẹnẹ wholo, a zihe ruọ orẹwho nọ o roma kẹ no, ‘Izrẹl Ọghẹnẹ.’—Ahwo Galesha 6:16.
7. Eme ahwo Izrẹl Ọghẹnẹ na a te reawere riẹ, kọ eme a ta kẹ ai nọ a whaha?
7 Dede nọ ahwo orẹwho ọrẹri na a jọ “ahwo obọ Ọghẹnẹ,” orọnikọ a jọ igbo ho. Ukpoye, a rẹ reawere ufuoma ulogbo vi onọ orẹwho Izrẹl iwo nọ o roma kẹ na o wo. Jesu ọ y’eyaa kẹ ahwo orẹwho okpokpọ onana nọ: “Wha rẹ te riẹ uzẹme na, uzẹme na u re ti ru owhai emuyẹ.” (Jọn 8:32) Pọl ukọ na ọ riobọhọ nnọ a kẹ Ileleikristi ufuoma ro no ẹgwọlọ ọvọ Uzi na. Kpahe onana ọ hrẹ ibe enọ e rọwo evaọ Galesha nọ: ‘Rọkẹ ọmuyẹ otiọye Kristi ọ rọ ra omai no igbo: fikiere wha dikihẹ re wha si oma no ẹwariẹ ruọ ufi igbo.’—Ahwo Galesha 5:1.
8. Edhere vẹ ọruẹrẹfihotọ Ileleikristi na o jẹ kẹ omomọvo ufuoma nọ o rro vi onọ o jọ otọ ọvọ Uzi na?
8 Wo ohẹriẹ no Izrẹl iwo anwae na, rite ẹdẹ inẹnẹ na Izrẹl Ọghẹnẹ o bi yoẹme kẹ ẹgwọlọ omarọkẹ riẹ. Onana u re gbunu hu keme unevaze a bi ro yoẹme. Nọ o rọ nọ ahwo Izrẹl iwo a rẹ roma kẹ ẹkwoma eyẹ na, ahwo Izrẹl Ọghẹnẹ a rẹ rọ udu obọ rai salọ. Fikiere ọruẹrẹfihotọ Ileleikristi na o wo ẹhẹriẹ no ọvọ Uzi ahwo Ju, onọ o gba omarọkẹ họ ahwo ababọ uvẹ nọ o kẹ rai re ae ọvo a rọ udu obọ rai salọ.
9, 10. (a) Ẹvẹ Jerimaya o ro dhesẹ nọ enwene ọ te jariẹ kpahe omarọkẹ? (b) Fikieme whọ jẹ sae ta nọ orọnikọ Ileleikristi omarọkẹ kpobi nẹnẹ a rọ usu Izrẹl Ọghẹnẹ hẹ?
9 Jerimaya ọruẹaro na ọ ruẹaro enwene nọ ọ te roma via kpahe omarọkẹ evaọ oke nọ o kere nọ: “Ri edẹ e be tha, ere ỌNOWO na ọ tae, nọ me re ti lele [uwou] Izrẹl gbe uwou Juda reọvọ ọkpokpọ, O rẹ te jọ wọhọ ọvọ nọ me lele esẹ rai re okenọ me kru ai obọ no obọ Ijipti ze [he], ọvọ mẹ nọ a raha, dede nọ mẹ jọ wọhọ ọzae-orọwo kẹ ae na, ere ỌNOWO na ọ tae. Rekọ ọnana họ ọvọ nọ me re ti lele uwou Izrẹl re nọ edẹ eyena evrẹ no, ere ỌNOWO na ọ tae: Me re ti fi uzi mẹ họ eva rai, me ve kere ie fihọ udu rai; mẹ vẹ te jọ Ọghẹnẹ rai, a vẹ te jọ ahwo mẹ.”—Jerimaya 31:31-33.
10 Nọ uzi Ọghẹnẹ o rọ “eva rai,” epaọ ẹsenọ a kere ei “fihọ udu rai” na, oma o be wọ ahwo Izrẹl Ọghẹnẹ re a rria te omarọkẹ rai. Ọwhọ rai ọ ga vi ọrọ Izrẹl iwo, enọ e roma kẹ no eyẹ ze, orọnikọ ẹsalọ họ. Nẹnẹ, ọwhọ ọgaga re a ru oreva Ọghẹnẹ, wọhọ epanọ Izrẹl Ọghẹnẹ o dhesẹ na, o rọ oma ibe egegagọ rai nọ i bu vi ima isoi nya akpọ na duwu. A rehọ izuazọ rai mudhe kẹ Jihova Ọghẹnẹ no re re a ru oreva riẹ. Dede nọ ahwo nana a wo ẹruore uzuazọ obọ odhiwu wọhọ enọ i ru Izrẹl Ọghẹnẹ via na ha, a be ghọghọ evaọ ẹruore ẹrria ebẹdẹ bẹdẹ evaọ otọakpọ evaọ otọ esuo Uvie odhiwu Ọghẹnẹ. A bi dhesẹ ovuhumuo kẹ Izrẹl ẹzi ẹkwoma uketha nọ a be rọ kẹ umutho ahwo riẹ nọ i kiọkọ evaọ erugba iruo rai re a ‘woro iruo urirẹ ọnọ o se rai no ebi ze ruọ elo ọnwranwra riẹ.’
Efihiruo Ufuoma Ọghẹnẹ avọ Areghẹ
11. Ẹgba vẹ a kugbe rọ ma ohwo, kọ ẹvẹ a rẹ rehọ iẹe ruiruo?
11 Ọghẹnẹ ọ ma ahwo re a riwi ufuoma ghaghae. Ọ kẹ rai ẹgba ufuoma ẹsalọ. Ọzae gbe aye ọsosuọ na a fi ufuoma ẹsalọ rai h’iruo. Dede na, a rehọ ugheghẹ gbe ababọ uyoyou ru ẹsalọ nọ o wha okpẹtu se ai gbe emọ rai. Ghele na, onana u te dhesẹ vevẹ inọ Jihova ọ rẹ gba emama nọ i wo areghẹ họ re a ru oware nọ o wọso iroro hayo isiuru rai hi. Yọ nọ o rọnọ “Ọghẹnẹ o re you ohwo nọ ọ rẹ kẹ okẹ-evawere” na, omarọkẹ nọ ọ rẹ jẹrehọ kpobi u re no uyoyou ze, onọ a ru n’evaze avọ evawere, onọ u no ufuoma ẹsalọ ze. (2 Ahwo Kọrint 9:7) Oghẹrẹ ofa kpobi ọ rẹ jẹe rehọ họ.
12, 13. Ẹvẹ Timoti ọ rọ rrọ oriruo ọ uvi ewuhrẹ ọmọ, kọ eme oriruo riẹ u su emoha buobu kpohọ no?
12 Avọ ovuhumuo ọvọvọ kẹ ute onana, Isẹri Jihova a rẹ ta ewoma ọ oma nọ ohwo o re ro mudhe kẹ Ọghẹnẹ, rekọ a rẹ gba ohwo ọvo họ re ọ roma mudhe he, makọ emọ obọ rai dede. Wo ohẹriẹ no ichọche buobu, Isẹri na a rẹ họ emọfofa rai ame he, epaọ ẹsenọ a rẹ sae gbae họ fihọ omarọkẹ ababọ erere ẹsalọ obọ rai. Oriruo Ikereakere nọ a re lele họ onọ Timoti ọmoha na o lele. Okenọ o t’ohwo no, Pọl ukọ na ọ ta kẹe nọ: “Ruẹabọhọ umutho nọ who wuhrẹ jẹ rọwo na, whọ vẹ jẹ riẹ ọnọ whọ jọ obọ riẹ wuhrẹ iẹe. Jegbe epanọ whọ riẹ ikere ẹri na nọ anwọ oke emaha ze, enọ i te epanọ i re ru owhẹ wha ẹro te usiwo eva ẹruọrọsuọ Jesu Kristi.”—2 Timoti 3:14, 15.
13 O rọ oware isiuru inọ Timoti ọ riẹ ikere efuafo na fikinọ a wuhrẹ i rie no emaha ze. Oni gbe oni-ologbo riẹ a tẹzẹ e riẹ—orọnikọ a gbae họ họ—re ọ rọwo iwuhrẹ Ileleikristi na. (2 Timoti 1:5) Fikiere, Timoti ọ tẹ ruẹ areghẹ ezihero olele Kristi ọ tẹ rọ udu obọ riẹ salọ omarọkẹ Ileleikristi. Evaọ oke mai nana, idu emoha buobu nọ esẹ gbe ini rai e rọ Isẹri Jihova a lele oriruo ọnana no. (Olezi 110:3) Ejọ i ti ru ere no ho. Yọ ẹme obọ ohwo.
Ẹsalọ re A Jọ Ọrigbo Ono?
14. Eme Ahwo Rom 6:16 o vuẹ omai kpahe ufuoma ovọvọ?
14 Ohwo-akpọ ọvuọvo nọ o wo ufuoma riẹriẹriẹ ọ rọ họ. Ohwo kpobi ọ rọ otọ awhaha izi emama, wọhọ uzi ẹgbẹdẹ, onọ a rẹ sae gbolo aro kẹ hẹ. Ofariẹ evaọ abọ ẹzi, ohwo ọvo o wo ufuoma riẹriẹriẹ hẹ. Pọl ọ j’iroro nọ: “Kọ wha gbẹ riẹ nọ wha tẹ rehọ oma rai ru erigbo kẹ ohwo jọ, yọ erigbo ọnọ wha bi yo ẹme riẹ na wha rọ; otiẹsejọ ọ vẹ jọ orọ umuomu, onọ u re su ohwo kpo uwhu, hayo ọrọ ẹmeoyo, onọ u re su ohwo kpo ẹrẹreokie?”—Ahwo Rom 6:16.
15. (a) Ẹvẹ o rẹ jọ ahwo oma kpahe erigbo nọ a rẹ jọ, rekọ ukuhọ riẹ eme ibuobu a bi ru? (b) Emamọ enọ vẹ i fo nọ ma nọ oma mai?
15 Re a jọ ọrigbo kẹ omọfa o rẹ dha ahwo buobu eva. Ghele na, evaọ akpọ inẹnẹ na, uzẹme riẹ họ ẹsibuobu ahwo a rẹ kẹ oma rai uvẹ re idhere eviẹhọ jọ i kpomahọ ai, a vẹ rọ aro tuẹtu ru oware nọ amọfa a gwọlọ. Wọhọ oriruo, eware nọ a re ghoro gbe akpọ aruọzaha na e be daoma si iroro ahwo kugbe ovo, bi fi ute nọ a re lele họ kẹ ai. Isu gbe ikoko egagọ a bi ru ahwo tha iroro gbe ute rai uke, orọnikọ ẹsikpobi a rẹ bẹbẹ ai họ họ, rekọ ẹsibuobu a rẹ ta kẹ ai re a jọ ovo jẹ roma kpotọ ọvo. Nọ Pọl o muẹrohọ nọ ‘mai yọ erigbo enọ ma bi yoẹme kẹ na,’ u fo re omomọvo mai ọ nọ oma riẹ, ‘Ono mẹ rọ ọrigbo kẹ? Ono ọ be mai kpomahọ ẹjiroro gbe edhere uzuazọ mẹ? Kọ isu egagọ, isu egọmeti, ehreki, hayo egba aruọzaha? Ono me bi yoẹme kẹ—Ọghẹnẹ manikọ ahwo?
16. Edhere vẹ Ileleikristi a rọ rrọ erigbo kẹ Ọghẹnẹ, eme họ uvi eriwo kpahe igbo otiọye na?
16 Ileleikristi a re rri ẹmeoyo kẹ Ọghẹnẹ wọhọ ẹsenọ a bi mi ai ufuoma rai hi. A rẹ rọ unevaze dhesẹ ufuoma rai wọhọ Oriwiruo rai, Jesu Kristi, rehọ isiuru gbe ẹgwọlọ omobọ ohwo nya lele oreva Ọghẹnẹ. (Jọn 5:30; 6:38) A re wo “iroro Kristi,” rehọ oma rai kpotọ kẹe wọhọ ọnọ o Wuzou ukoko na. (1 Ahwo Kọrint 2:14-16; Ahwo Kọlọsi 1:15-18) Onana o wọhọ aye nọ ọ rọo je bi yoẹme n’evaze kẹ ọzae nọ o you na. Evaọ uzẹme, a dhesẹ ugboma Ileleikristi nọ a kẹ ẹzi na wọhọ ọmọtẹ kọkọ nọ Kristi ọ sahotọ.—2 Ahwo Kọrint 11:2; Ahwo Ẹfẹsọs 5:23, 24; Eviavia 19:7, 8.
17. Eme Isẹri Jihova kpobi a salọ nọ a rẹ jọ?
17 Osẹri Jihova kpobi, makọ o wo ẹruore odhiwu hayo ọrọ otọakpọ, ọ rọ udu obọ riẹ roma mudhe kẹ Ọghẹnẹ no re o ru oreva riẹ je yoẹme kẹe wọhọ Osu. Rọ kẹ Osẹri kpobi, omarọkẹ o rọ ẹsalọ udu obọ riẹ re ọ jọ ọrigbo Ọghẹnẹ, ukpenọ ọ rẹ jọ ọrigbo ahwo. Onana o rọwo kugbe ohrẹ Pọl ukọ na: “Keme a dẹ owhai, fikiere wha ru wọhọ erigbo ahwo ho.”—1 Ahwo Kọrint 7:23.
Ewuhrẹ re Ma Wo Erere kẹ Oma Mai
18. Okevẹ ohwo nọ ọ be te jọ Osẹri o re ro te kẹ ame-ọhọ?
18 Taure ohwo ọ tẹ te jọ omọvo Isẹri Jihova, ọ rẹ nyate ẹgwọlọ Ikereakere na. Ekpako a rẹ yọrọ oma re a ruẹ sọ ohwo nọ ọ gwọlọ jọ Osẹri o ghine wo otoriẹ oware nọ omarọkẹ Ileleikristi o rọ. Kọ ọ ghinẹ gwọlọ jọ omọvo Isẹri Jihova? Kọ u no rie eva ze re ọ rria lele oware nọ onana o gwọlọ? O gbẹrọ ere he, koyehọ o te kẹ ame-ọhọ họ.
19. Fikieme u gbe fo nọ a rẹ fo ohwo nọ ọ j’iroro nnọ ọ gwọlọ jọ odibo omarọkẹ Ọghẹnẹ hẹ?
19 Dede na, otẹrọnọ ohwo jọ ọ nyate ẹgwọlọ na kpobi, fikieme a jẹ fuẹe otẹrọnọ ọ rehọ udu obọ riẹ j’iroro nnọ ọ gwọlọ re Ọghẹnẹ gbe Ẹme Riẹ nọ ọ kẹ ẹgba o nwene iei? Kọ o rẹ mai woma re ohwo ọ kẹ oma riẹ uvẹ re amọfa a nwene iei vi Ọghẹnẹ? Hayo kọ erere ọ omarọkẹ Ọghẹnẹ o mae kawo? Isẹri Jihova a roro ere he. A rọ udu kpobi rọwo kugbe eme Ọghẹnẹ nọ Aizaya o kere: “Mẹ họ ỌNOWO na Ọghẹnẹ ra, ọnọ o wuhrẹ owhẹ wo erere, ọnọ o su owhẹ nya edhere nọ o fo ẹnya.”—Aizaya 48:17.
20. Ẹvẹ uzẹme Ebaibol o rẹ rọ k’ahwo ufuoma?
20 Uzẹme Ebaibol u re ru ahwo emuyẹ no iwuhrẹ erue egagọ, wọhọ olahiẹ ibẹdẹ evaọ erae ehẹle. (Ọtausiuwoma Na 9:5, 10) Ukpoye, uyere o vọ idu rai kẹ uvi ẹruore kẹ iwhuowhu na—ẹkparomatha nọ idhe ẹtanigbo Jesu Kristi u ru lọhọ. (Matiu 20:28; Iruẹru 24:15; Ahwo Rom 6:23) Uzẹme Ebaibol o rẹ kẹ ahwo ufuoma no idhọvẹ ẹrorọsuọ eyaa isu nọ i re rugba ha. Ukpoye, o rẹ lẹliẹ oghọghọ vọ idu rai re a riẹ nọ Uvie Jihova u muhọ esu no evaọ idhiwu yọ kẹle na u ti su otọakpọ na kpobi. Uzẹme Ebaibol na o rẹ kẹ ahwo ufuoma no iruemu nọ, dede nọ e rẹ were ugboma na, e rẹ dha Ọghẹnẹ eva jẹ wha enwoma ze evaọ ẹraha usu, ẹyao, gbe uwhu ọkpuakpua. Koyehọ, re a jọ ọrigbo Ọghẹnẹ u wo erere gaga vi ọrigbo ahwo nọ a rẹ jọ. Evaọ uzẹme, omarọkẹ Ọghẹnẹ o y’eyaa irere “enẹna . . . gbe uzuazọ ebẹdẹ bẹdẹ eva akpọ nọ ọ be tha.”—Mak 10:29, 30.
21. Ẹvẹ Isẹri Jihova a rri omarọkẹ Ọghẹnẹ, kọ eme họ isiuru rai?
21 Isẹri Jihova nẹnẹ a rọ abọ orẹwho nọ a yẹ fihọ omarọkẹ hẹ wọhọ epanọ emọ Izrẹl anwae a jọ. Isẹri na a rọ abọ ukoko Ileleikristi omarọkẹ. Osẹri kpobi nọ ọ họ-ame no o re zihe ruọ ere ẹkwoma edhesẹ ufuoma ẹsalọ riẹ re ọ roma mudhe. Evaọ uzẹme, rọ kẹ Isẹri Jihova, omarọkẹ o rẹ wha usu oruọruọ omobọ ohwo kugbe Ọghẹnẹ ze nọ o gwọlọ unevaze nọ a rẹ rọ gọe. A gwọlọ yọrọ usu oghọghọ onana n’udu kpobi ze, bi kru ufuoma nọ Jesu Kristi o ro ru ai họ emuyẹ na gaga ziezi bẹdẹ bẹdẹ.
Ẹvẹ Whọ te k’Uyo?
◻ Fikieme Ọghẹnẹ ọ gbẹ rọ ọriẹwẹ hẹ evaọ ẹsalọ Izrẹl re a jọ “efe-agheghọ”?
◻ Fikieme whọ jẹ sae ta nọ omarọkẹ Ileleikristi orọnikọ ufuoma nọ a kufiẹ hẹ?
◻ Eme họ irere omarọkẹ Jihova Ọghẹnẹ?
◻ Fikieme o jẹ mai fo re a jọ odibo Jihova vi ọrigbo ahwo?
[Picture on page 12]
Evaọ Izrẹl anwae, a yẹ ohwo no yọ ọ roma kẹ Ọghẹnẹ no
[Picture on page 13]
Omarọkẹ Ileleikristi yọ oware unevaze