Kọ Who Wo Ovuhumuo Kẹ Ukoko Jihova?

“Enẹ ỌNOWO na ọ tae: ‘Odhiwu họ agbara-uvie mẹ akpọ na kọ uririawọ mẹ.’”—AIZAYA 66:1.

1, 2. (a) Imuẹro ukoko Jihova vẹ nọ a rẹ ruẹ whọ rẹ sae riobọ kpohọ? (b) Diẹse Jihova ọ be rria?

KỌ WHỌ rọwo nọ Jihova o wo ukoko? Otẹrọ ere, fikieme whọ jẹ rọwo ere? Whọ rẹ sae kuyo nọ: ‘Whaọ, ma wo Ọgwa Uvie. Ma wo ukoko nọ u koko oma họ ziezi avọ ugboma ekpako. Ma wo ọsẹro okogho nọ a ro mu nọ o re weze bru omai ze ẹsikpobi. Ma re kpohọ ikokohọ esese gbe ilogbo nọ a ruẹrẹhọ kpatiẹ. Ma wo uwou ogha Watch Tower Society evaọ orẹwho mai. Uzẹme, enana kpobi gbe efa buobu i dhesẹ nọ Jihova o wo ukoko nọ u bi ruiruo.’

² Eware eyena kpobi e rọ imuẹro ọ ukoko. Rekọ otẹrọnọ eware nọ ma be ruẹ je vuhumu kpobi e rọ eware otọakpọ ọvo, koyehọ ma wo otoriẹ ukoko Jihova vọvọ họ. Jihova ọ ta kẹ Aizaya nnọ otọakpọ na yọ uririawọ Riẹ, rekọ idhiwu na họ agbara-uvie Riẹ. (Aizaya 66:1) “Odhiwu” vẹ Jihova ọ jẹ t’ẹme kpahe na? Evevẹ mai na? Idadeghe mai na? Hayo kọ kpahe eware uzuazọ efa jọ? Aizaya ọ t’ẹme kpahe “oria ẹria oruaro ẹri” Jihova, yọ ọso-ilezi na o dhesẹ idhiwu na wọhọ ‘oria nọ ọ be rria.’ Fikiere, “odhiwu” eva Aizaya 66:1 o be ta kpahe oria ẹrria ẹzi nọ a rẹ ruẹ hẹ nọ Jihova ọ jẹ rọ ọkwa erumeru, hayo ọnyaba kpobi.—Aizaya 63:15; Olezi 33:13, 14.

3. Ẹvẹ ma sai ro fi avro kparobọ?

³ Fikiere, ma tẹ ghinẹ gwọlọ wo otoriẹ je vuhu ukoko Jihova mu, ma re rri kpohọ obọ idhiwu hrọ. Yọ onana họ ehri ẹbẹbẹ kpobi nọ ahwo jọ a wo. Nọ a rẹ ruẹ ukoko odhiwu Jihova ha na, ẹvẹ ma rọ riẹ nọ o ghinẹ rọ? Ahwo jọ a re tube wo avro buobu, u ve gbe ai unu inọ, ‘Ẹvẹ o sai ro mu omai ẹro?’ Whaọ, ẹvẹ ẹrọwọ o sai ro fi avro kparobọ? Ugogo idhere ivẹ jọ họ ewuhrẹ ọgaga ọrọ Ẹme Ọghẹnẹ gbe ekpohọ avọ abọ nọ ma re wo evaọ okuomagbe Ileleikristi kpobi. Evaọ ukuhọ riẹ kọ ma rẹ te ruẹ elo uzẹme na. Idibo Ọghẹnẹ efa e riẹ nọ i wo avro no. Joma roro kpahe oware nọ o via kẹ odibo Elaesha evaọ okenọ ovie Siria ọ wọ ohọre bru Izrẹl ze.—Wawo Jọn 20:24-29; Jemis 1:5-8.

Ọnọ Ọ Ruẹ Egbaẹmo Odhiwu Na

4, 5. (a) Didi ẹbẹbẹ odibo Elaesha o wo? (b) Ẹvẹ Jihova ọ rọ k’uyo kẹ olẹ Elaesha?

⁴ Ovie Siria o vi ogbaẹmo ulogbo evaọ aso kpohọ Dọthan re a mu Elaesha. Okenọ odibo Elaesha ọ kparoma ohiohiẹ frifri jẹ ruọ otafe, ẹsejọhọ re ọ rehọ ofou jọ evaọ okpo-uwou ọpraprara ọ uwou Udevie Ovatha-Ọre rai, whaọ, otuekpahe o te fi ei oma! Ogbaẹmo ahwo Siria soso avọ enyenya gbe ekẹkẹ ẹmo e wariẹ ẹwho na họ, be hẹrẹ re a mu ọruẹaro Ọghẹnẹ. Odibo na o te bo se Elaesha nọ: “O, olori mẹ! kẹvẹ ma re ti ruẹ?” Ababọ avro, avọ ẹwolẹ gbe imuẹro, Elaesha ọ tẹ kuyo nọ: “Ozọ u mu owhẹ hẹ, keme enọ e rọ kugbe omai i bu vi enọ e rọ kugbe ai.” O sai gbe odibo na unu nọ, ‘Diẹse a rọ? Mẹ be rue rae he!’ Ẹsejọhọ oyena o rẹ sae jọ ẹbẹbẹ mai re—ababọ ibiaro otoriẹ nọ ma rẹ rọ ruẹ, hayo wo otoriẹ egbaẹmo obọ odhiwu.—2 Ivie 6:8-16; Ahwo Ẹfẹsọs 1:18.

⁵ Elaesha ọ tẹ lẹ re ibiaro odibo riẹ i rovie. Eme ọ via? “Fikiere ỌNOWO na o te rovie aro ọmoha na, ọ tẹ ruẹ; ri ugbehru na soso o tẹ vọ avọ enyenya gbe ekẹkẹ erae nọ e wariẹ Elaesha họ.” (2 Ivie 6:17) Ẹhẹ, ọ ruẹ egbaẹmo obọ odhiwu na, egbaẹmo enjẹle nọ e be hẹrẹ re a thọ odibo Ọghẹnẹ. Enẹna o wo otoriẹ evaifihọ Elaesha no.

6. Ẹvẹ ma sae rọ riẹ kpahe ukoko odhiwu Jihova?

⁶ Kọ ẹsejọ ma re wo ẹbẹbẹ otoriẹ wọhọ onọ odibo Elaesha o wo na? Kọ iyero abọ-iwo nọ i bi kpokpo omai hayo iruo Ileleikristi na evaọ ekwotọ jọ ọvo ma be ruẹ? Otẹrọ ere, kọ ma rẹ sai rẹro eruẹaruẹ obọdẹ jọ re e k’omai elo? Ijo, keme ma wo oware jọ nọ odibo Elaesha o wo ho—obe ulogbo jọ nọ u wo eruẹaruẹ buobu, Ebaibol na, nọ o rẹ sae k’omai otoriẹ kpahe ukoko obọ odhiwu. Ẹme Ọghẹnẹ ọyena o tẹ jẹ kẹ ehri-izi ọkpọvio re e kpọ iroro gbe edhere uzuazọ mai vi. Dede na, ma rẹ daoma re ma gwọlọ orimuo je wo ovuhumuo kẹ ọruẹrẹfihotọ Jihova. Yọ ma rẹ sai ru oyena ẹkwoma uwuhrẹ omobọ ohwo, kugbe olẹ gbe eroro.—Ahwo Rom 12:12; Ahwo Filipai 4:6; 2 Timoti 3:15-17.

Ewuhrẹ kẹ Otoriẹ

7. (a) Didi ẹbẹbẹ ahwo jọ a rẹ sai wo kpahe ewuhrẹ Ebaibol om’obọ ohwo? (b) Fikieme uwuhrẹ omobọ-ohwo u ro te kẹ omodawọ na?

⁷ Ewuhrẹ omobọ ohwo o rọ isiuru kẹ ahwo buobu hu, wọhọ ahwo nọ a rẹ gwọlọ se obe evaọ isukulu hu hayo enọ i wo uvẹ nọ a re ro se obe he. Dede na, ma tẹ gwọlọ wo otoriẹ je vuhu ukoko Jihova mu avọ ibiaro otoriẹ mai, ma re wo isiuru nọ ma re ro wuhrẹ. Kọ whọ rẹ sae reawere emamọ emuore ababọ omaruẹrẹhọ? Wọhọ epanọ othere-emu kpobi ọ rẹ sae ta k’owhẹ, o rẹ gwọlọ iruo buobu re a there emamọ emu. Ghele na, a rẹ re emu na evaọ auwa ọvo hayo kawo viere. Evaọ abọdekọ riẹ, irere ewuhrẹ omobọ ohwo i re kri te oke uzuazọ soso. Ewuhrẹ omobọ ohwo o re mu omai họ ẹwere ẹmẹrera nọ ma tẹ ruẹ ẹnyaharo nọ ma rẹ sai ru. Pọl ukọ na ọ ta gbagba inọ ma sẹro omobọ mai gbe iwuhrẹ mai ẹsikpobi jẹ ruabọhọ isase ẹgbede. O gwọlọ omodawọ ikẹse kẹse, rekọ irere na e rẹ sae jọ bẹdẹ bẹdẹ.—1 Timoti 4:13-16.

8. Didi uruemu obe Itẹ o fodẹ k’omai?

⁸ Ọzae owareghẹ anwae jọ ọ ta nọ: “Ọmọ mẹ, otẹrọnọ whọ rehọ eme mẹ, re whọ yọrọ izi mẹ fihọ eva ra, re whọ gaviezọ kẹ areghẹ, who ve je rovie udu ra kẹ otoriẹ, uzẹme, otẹrọnọ who bo kẹ orimuo, whọ vẹ jẹ kpare uru ra kẹ otoriẹ, otẹrọnọ whọ gwọle riẹ wọhọ isiliva, jẹ gwọlọ iẹe wọhọ efe nọ a sino, kẹsena whọ vẹ te riẹ ozodhẹ ỌNOWO na jẹ ruẹ eriariẹ Ọghẹnẹ na.”—Itẹ 2:1-5.

9. (a) Ẹvẹ aghare igoru o rọ wawo “eriariẹ Ọghẹnẹ na”? (b) Didi ekwakwa ma gwọlọ re ma wo eriariẹ egbagba?

⁹ Kọ who muẹrohọ ohwo nọ ọ gwọlọ omodawọ na? ‘Otẹrọnọ whẹ,’ oye họ ẹme nọ a dhe ẹwẹwariẹ na. Je muẹrohọ ẹme na, ‘Otẹrọnọ whọ gwọlọ e riẹ ẹsikpobi wọhọ efe nọ a sino.’ Roro kpahe etotọ nọ e be tọ anwọ ikpe-udhusoi buobu na be gwọlọ isiliva gbe igoru evaọ Bolivia, Mexico, South Africa, gbe erẹwho efa. A re ruiruo gaga, rehọ ekpọ esiọsiọle gbe eshọvẹle tọ itho nọ a rẹ jọ ruẹ eware eghaghae na. A rri igoru ghaghae te epanọ evaọ eghogho jọ evaọ California, U.S.A., a tọ ọgọdọ nọ ọ kẹre te ikilomita 591, nọ o diwi te ikilomita ọvo gbe ubro—fiki igoru. Ghele na, kọ whọ sai fi igoru họ unu re? Whọ sae da igoru? Kọ o rẹ sae sẹro ra evaọ udhude otẹrọnọ uruame gbe ohọwo u kp’owhẹ t’uwhu no? Ijo, aghare ugho ọvo o wo gbe evaọ ẹro omomọvo, unuigho riẹ u re dhe enwenwene wọhọ epanọ o rọ evaọ obọ eki. Ghele na, ahwo a whu kẹe no. Kọ didi omodawọ o gwọlọ re a wo igoru abọ-ẹzi, “eriariẹ Ọghẹnẹ na”? Roro kpahe iẹe, eriariẹ Olori Osu ehrugbakpọ na, ukoko riẹ, gbe ẹjiroro riẹ! Evaọ abọ ọnana, ma rẹ sae rehọ ekpọ esiọsiọle gbe eshọvẹle abọ-ẹzi rọ tọ. Enana họ ebe nọ a kere no Ebaibol ze nọ i re fiobọhọ k’omai tọ rueva Ẹme Jihova je wo otoriẹ riẹ.—Job 28:12-19.

Ẹtọ kẹ Orimuo

10. Eme Daniẹl ọ ruẹ evaọ eruẹaruẹ?

¹⁰ Joma tọ evaọ abọ-ẹzi jọ re ma muọ eriariẹ ukoko odhiwu Jihova họ ewo. Rọ kẹ ugogo orimuo jọ, joma rovie kpohọ eruẹaruẹ Daniẹl ọrọ Ọkpako Edẹ na evaọ agbara-uvie riẹ. Daniẹl o kere nọ: “Epanọ me bi ro riwi na, mẹ tẹ ruẹ [egbara-uvie] nọ a ruẹrẹhọ gbe ọnọ ọ rọ no oke anwae ze ọ keria ae; yọ ewu riẹ ọ be fua wọhọ ekpalekpa ame, jegbe eto uzou riẹ e wọhọ emamọ ivovo; agbara uvie riẹ ọ wọhọ ebrerae, etẹ riẹ e wọhọ erae nọ e rẹ tuọ. Uto erae u te noi ze bru fi ei oma; odu idu e tẹ gọ e; idu ikpe akuakpe i te dikihẹ aro riẹ; otu ẹguae a tẹ keria re a bru-oziẹ, a te rovie ebe na fihọ.” (Daniẹl 7:9, 10) Amono họ idu nana nọ e jẹ gbodibo kẹ Jihova na? Uhie ọ eme-efa evaọ New World Translation na, nọ e fodẹ “ekpọ esiọsiọle” gbe “eshọvẹle” na, e rehọ omai kpohọ eria wọhọ Olezi 68:17 gbe Ahwo Hibru 1:14. Ẹhẹ, enọ e jẹ gbodibo na họ enjẹle obọ odhiwu!

11. Ẹvẹ eruẹaruẹ Daniẹl e sai ro fiobọhọ k’omai wo otoriẹ eme Elaesha?

¹¹ Ikere Daniẹl e ta ha inọ ọ ruẹ enjẹle ẹrọwọ nọ Ọghẹnẹ o wo kpobi evaọ etẹe. Ima buobu efa e sae gbẹ jariẹ. Rekọ ababọ avro ma rẹ sai wo ovuhumuo oware nọ Elaesha ọ sae rọ ta nọ: “Enọ e rọ kugbe omai i bu vi enọ e rọ kugbe ai.” Dede nọ enjẹle nọ i wo ẹrọwọ họ, idhivẹri na, e rọ emu egbaẹmo ovie Siria na, egbaẹmo odhiwu Jihova i bu vi ai gaga!—Olezi 34:7; 91:11.

12. Ẹvẹ whọ sae rọ riẹ kpahe enjẹle viere?

¹² Ẹsejọhọ whọ gwọlọ riẹ viere kpahe enjẹle enana, wọhọ iruo nọ a wo evaọ egagọ Jihova. No ubiẹme Grik kẹ enjẹle ze, ma rẹ sae ruẹ nọ ewhovuẹ a rọ keme ubiẹme na o sai je dhesẹ “ọwhovuẹ.” Dede na, iruo rai e rro viere. Rekọ, re ma riẹ iruo rai, ma rẹ tọ hrọ. Otẹrọnọ Insight on the Scriptures ra o kẹle otọ, whọ rẹ sai se uzoẹme na “Angels” (Enjẹle), hayo whọ rẹ sai kpohọ izoẹme Uwou-Eroro Na nọ i kpemu no kpahe enjẹle. Eware nọ who ti wuhrẹ kpahe idibo obehru Ọghẹnẹ enana i ti gb’owhẹ unu who ve ti je wo ovuhumuo kẹ uketha rai. (Eviavia 14:6, 7) Dede na, evaọ ukoko odhiwu Ọghẹnẹ, emama ẹzi jọ a wo obọdẹ iruo.

Oware nọ Aizaya Ọ Ruẹ

13, 14. Eme Aizaya ọ ruẹ evaọ eruẹaruẹ, kọ ẹvẹ onana u ro kpomahọ iẹe?

¹³ Obọnana joma tọ omojọ evaọ eruẹaruẹ Aizaya na. Nọ who te se uzou avọ 6, owọ 1 rite 7, u re gb’owhẹ unu. Aizaya ọ “ruẹ ỌNOWO na nọ ọ keria ehru akaba-uvie,” yọ “ikọ-odhiwu i dikihẹ obọ ehru uzou riẹ.” A bi bubo kpahe oruaro Jihova, bi jiri ẹfuọ riẹ. Who te se oria onana ọvo dede u re kpomahọ owhẹ. Ẹvẹ o jọ Aizaya oma? “Koyehọ mẹ tẹ ta nọ, ‘Odo mẹ hrọ! Keme me vru no [evaọ Shiol]; keme mẹ ohwo nọ igbenu riẹ e foho, mẹ tẹ jẹ be ria udevie ahwo nọ igbenu rai e fo ho; keme ibiaro mẹ e ruẹ Ovie na no, ỌNOWO Ogbaẹmo na!’” Ẹvẹ eruẹaruẹ na i gbe rie unu te! Kọ u gb’owhẹ unu re?

¹⁴ Fikiere ẹvẹ Aizaya ọ sae rọ r’udu dhe ughe oruaro onana nọ ọ ruẹ na? Ọ ta nọ enjẹle jọ ọ dhogbo bru ei ze jẹ ta nọ: “A si obrukpe ra no, a tẹ jẹ rehọ izieraha ra vrẹ owhẹ no.” (Aizaya 6:7) Aizaya ọ rẹ sai fievahọ ohrọ Ọghẹnẹ jẹ gaviezọ kẹ eme Jihova. Kọ, whọ gbẹ gwọlọ riẹ viere kpahe emama ẹzi ikpehru enana? Kọ eme who re ru hrọ? Tọ kẹ evuẹ efa. Okwakwa jọ nọ whọ rẹ sae rọ tọ họ Watch Tower Publications Index, avọ elele ebe oruvẹ buobu nọ o riobọ kpohọ.

Eme Izikiẹl Ọ Ruẹ?

15. Eme o dhesẹ nọ eruẹaruẹ Izikiẹl i wo evaifihọ?

¹⁵ Joma rẹriẹ ovao ku oghẹrẹ emama ẹzi efa. Izikiẹl ọ ruẹ eruẹaruẹ isiuru jọ okenọ ọ gbẹ jọ igbo evaọ Babilọn. Rovie Ebaibol ra kpohọ Izikiẹl uzou 1, awọ esa ọsosuọ na. Ẹvẹ ikere na i ro muhọ? Kọ o ta nọ, ‘Ẹdẹjọ, evaọ ẹkwotọ othabọ jọ . . .’? Ijo, onana o rọ iku osia oke anwae jọ họ. Owọ 1 o ta nọ: “Evaọ ẹdẹ avọ isoi ọ rọ amara avọ ene evaọ ikpe ọgba nọ mẹ rọ jọ udevie erigbo nọ e jọ akotọ ethẹ Keba, ihru i te rovie, mẹ tẹ ruẹ eruẹaruẹ Ọghẹnẹ.” Eme who muẹrohọ evaọ owọ onana? O fodẹ uzedhe ẹdẹ gbe oria na. Eme enana e riobọ kpohọ ukpe avọ isoi ọrọ igbo Jehoakin ovie na, ukpe 613 B.C.E.

16. Eme Izikiẹl ọ ruẹ?

¹⁶ Jihova ọ tẹ jọ kugbe Izikiẹl, o te muọ ughe idudu Jihova họ ẹruẹ evaọ agbara-uvie evaọ akẹkẹ odhiwu ologbo jọ nọ o wo etẹ avọ ibiaro nọ e wariẹ etẹ na họ. Oware nọ o jọ etenẹ si omai urru na họ emama ene e jariẹ, ọvo o dikihẹ abọ sa-sa ẹtẹ na. “Erao ene nọ e wọhọ ahwo i te no udevie erae na ze. Ọvuọvo o wo evao ene, gbe ibekpe ene. Evao nọ e rọ obọ aro rai e wọhọ ovao ohwo, a wo ovao okpohrokpo evaọ abọ obọze rai, obọ abọ ẹkpẹlobọ kọ ovao eruẹ, ae ene na a wo ovao ugo re evaọ abọ obọ emu rai.”—Izikiẹl 1:5, 6, 10.

17. Eme evao ene chẹrub na i dikihẹ kẹ?

¹⁷ Eme họ emama uzuazọ ene enana? Izikiẹl omariẹ ọ ta k’omai nọ eye họ chẹrub. (Izikiẹl 10:1-3, 14) Fikieme i je wo evao ene? Re i dikihẹ kẹ ekwakwa ikpehru ene Olori Osu na Jihova. Ovao ugo na o rọ oka areghẹ nọ o rẹ ruẹ thethabọ. (Job 39:27-29) Eme ovao eruẹ na u dikihẹ kẹ? Avọ ogaga ulogbo uriohọ gbe ẹkoko riẹ, eruẹ nọ ọ be họre ọ rẹ sae frẹ anyenya gbe ọnọ ọ be dhẹe n’otọ no vovori. Evaọ uzẹme, eruẹ na yọ oka ogaga Jihova nọ u wo umuo ho. A rehọ okpohrokpo na dikihẹ wọhọ oka uvi-ẹdhoguo aruọwha. Ukuhọ riẹ, ovao ohwo na o tẹ nwani dhesẹ uyoyou Ọghẹnẹ, keme ohwo ọvo họ omama otọakpọ ọnọ ọ rẹ sai dhesẹ okwakwa onana gbagba.—Matiu 22:37, 39; 1 Jọn 4:8.

18. Ẹvẹ Jọn ukọ na o ro fiba otoriẹ mai ọrọ ukoko odhiwu na?

¹⁸ Eruẹaruẹ efa e riẹ nọ e rẹ sai fiobọhọ k’omai rri ẹme na kpobi fuafo. Eruẹaruẹ Jọn nọ a kere fihọ obe Eviavia ọrọ Ebaibol na e rọ usu enana. Ọye, wọhọ Izikiẹl, ọ ruẹ Jihova evaọ agbara-uvie oruaro avọ chẹrub. Eme chẹrub na a bi ru? A kpare edo sẹraf ọrọ Aizaya uzou 6 na kpehru, ta nọ: “Ọrẹri, Ọrẹri, Ọrẹri, Ọnowo Ọghẹnẹ Erumeru, ọnọ ọrọ, nọ ọ rẹ ria, nọ ọ rẹ te tha!” (Eviavia 4:6-8) Jọn ọ tẹ jẹ ruẹ omogodẹ kẹle agbara-uvie na. Kọ ono ọyena o dikihẹ kẹ? Uzedhe Omogodẹ Ọghẹnẹ, Jesu Kristi.—Eviavia 5:13, 14.

19. Ẹkwoma uwuhrẹ onana, eme whọ riẹ kpahe ukoko Jihova no?

¹⁹ Fikiere ẹkwoma eruẹaruẹ enana, eme ma ruẹ no? Inọ Jihova Ọghẹnẹ họ ọnọ ọ be kpọ ukoko obọ odhiwu na evaọ ehru agbara-uvie riẹ avọ Omogodẹ na, Jesu Kristi, nọ ọ rọ kugbei, ọnọ ọ rọ Ẹme na, hayo Logos. Ma tẹ jẹ ruẹ ogbaẹmo odhiwu enjẹle no, kugbe sẹraf avọ chẹrub. A rọ abọ jọ ukoko okugbe ulogbo ovo nọ u bi ru ẹjiroro Jihova gba. Yọ usu ẹjiroro eyena họ ẹta emamọ usi na evaọ akpọ na soso evaọ oke urere na.—Mak 13:10; Jọn 1:1-3; Eviavia 14:6, 7.

20. Didi onọ ma te k’uyo riẹ evaọ uwuhrẹ n’otha na?

²⁰ Ukuhọ riẹ, ma wo Isẹri Jihova evaọ otọakpọ nọ i bi kokohọ evaọ Egwa Uvie rai re a wuhrẹ epanọ a re ro ru oreva Olori Osu na. Evaọ uzẹme, enẹna ma re wo ovuhumuo inọ amọfa buobu a rọ kugbe omai vi enọ e rọ kugbe Setan gbe ewegrẹ uzẹme na. Onọ jọ o gbẹ r’otọ, Didi abọ ukoko obọ odhiwu na u wo kugbe ẹta emamọ usi Uvie na? Uzoẹme n’otha na o ti duobọ te ẹme ọyena gbe efa.

Enọ Ọkiẹkpemu

◻ Re ma wo ovuhumuo kẹ ukoko Jihova, otoriẹ vẹ ma re wo?

◻ Eme ọ via kẹ odibo Elaesha, kọ ẹvẹ ọruẹaro na ọ rọ tudu họ iẹe awọ?

◻ Ẹvẹ ma re rri uwuhrẹ omobọ-ohwo?

◻ Ẹvẹ Daniẹl, Aizaya, avọ Izikiẹl a kere kpahe ukoko obọ odhiwu?

[Pictures on page 5]

Irere uwuhrẹ omobọ- ohwo i kpehru gaga vi emuore nọ a riẹ there

[Picture on page 7]

Eruẹaruẹ egbaẹmo odhiwu họ uyo Jihova kẹ olẹ Elaesha