Eme Jihova Ọ Yare Mi Omai Nẹnẹ?

“Uru jọ u te no evaọ ẹgho na ze, anọ, ‘ [Ọnana] họ Ọmọ oyoyou mẹ, ọnọ ọ were omẹ hrọ; wha yo ẹme riẹ.’”—MATIU 17:5.

1. Okevẹ Uzi na u ro ru ẹjiroro riẹ gba?

JIHOVA ọ kẹ orẹwho Izrẹl Uzi, avọ abọ sa-sa riẹ. Rọ kpahe ae, Pọl ukọ na o kere nọ: “Izi nọ a fihọ kẹ oma na ọvo, nọ a fihọ ri bọ ezi ẹrẹriẹ eware na kpobi.” (Ahwo Hibru 9:10) Okenọ Uzi na u su okiọkotọ emọ Izrẹl rọ jẹ Jesu rehọ wọhọ Mesaya, hayo Kristi na no, koyehọ u ru ẹjiroro riẹ gba no. Fikiere, Pọl o te whowho nọ: “Kristi họ ọnyaba uzi na.”—Ahwo Rom 10:4; Ahwo Galesha 3:19-25; 4:4, 5.

2. Amono a jọ otọ Uzi na, kọ okevẹ a ro no otọ riẹ?

² Kọ oyena u dhesẹ nọ ma rọ otọ Uzi na nẹnẹ hẹ? Evaọ uzẹme, ogbotu ahwo-akpọ na kpobi a jọ otọ Uzi na ẹdọvo ho, wọhọ epanọ ọso-ilezi na o dhesẹ na: “[Jihova] o dhesẹ ẹme riẹ kẹ Jekọp, ujaje gbe uzi riẹ rọ kẹ Izrẹl. O ri ru utiona kẹ orẹwho ofa ẹdẹọvo ho; a riẹ uzi riẹ gbe he.” (Olezi 147:19, 20) Okenọ Ọghẹnẹ ọ rọ fiki idheidhe Jesu rehọ ọvọ ọkpokpọ na mu, o gbẹ gba makọ orẹwho Izrẹl họ re a yoẹme kẹ Uzi na ha. (Ahwo Galesha 3:13; Ahwo Ẹfẹsọs 2:15; Ahwo Kọlọsi 2:13, 14, 16) Kọ otẹrọnọ Uzi na u gbe wo iruo ho, eme Jihova ọ be yare mi enọ e gwọlọ gọe nẹnẹ?

Oware nọ Jihova Ọ Be Yare

3, 4. (a) Ugogo oware vẹ Jihova ọ gwọlọ mi omai nẹnẹ? (b) Fikieme ma je lele ithihi Jesu kpekpekpe?

³ Evaọ ukpe urere odibọgba Jesu, ikọ riẹ Pita, Jemis, avọ Jọn a te su ei kpohọ ugbehru ukpehru jọ, ẹsejọhọ oria osiọsiọle Ugbehru Hẹmọn. A tẹ jọ obei ruẹ eruẹaruẹ Jesu evaọ oruaro ulogbo je yo urru obọ Ọghẹnẹ nọ o whowho nọ: “[Ọnana] họ Ọmọ oyoyou mẹ, ọnọ ọ were omẹ hrọ; wha yo ẹme riẹ.” (Matiu 17:1-5) Oware nọ Jihova ọ be yare mi omai kpobi oye—re ma kezọ kẹ Ọmọ riẹ je lele oriruo gbe iwuhrẹ riẹ. (Matiu 16:24) Fikiere, Pita ukọ na o te kere nọ: “Kristi ọ ruẹ uye kẹ owhai no re, o te fi oriruo họ-otọ kẹ owhai re wha rọ kpahe ithihi riẹ.”—1 Pita 2:21.

⁴ Fikieme ma je lele ithihi Jesu kpekpekpe? Kemena ẹkwoma aro o ro kele iei yọ ma be raro kele Jihova Ọghẹnẹ. Jesu ọ riẹ Ọsẹ na kpekpekpe, keme ikpe nọ ọ raha kugbei evaọ obọ odhiwu taure ọ tẹ te ziọ otọakpọ ẹkpẹ-họ-ẹbe. (Itẹ 8:22-31; Jọn 8:23; 17:5; Ahwo Kọlọsi 1:15-17) Okenọ ọ jọ otọakpọ, Jesu ọ rehọ omarokpotọ dikihẹ kẹ Ọsẹ riẹ. Ọ ta nọ: “Epanọ Ọsẹ [na] o wuhrẹ omẹ, mẹ rọ ta eme eware enana.” Evaọ uzẹme, Jesu ọ raro kele Jihova gbagba te epanọ ọ sae rọ ta nọ: “Ọ nọ ọ ruẹ omẹ ọ ruẹ Ọsẹ na” no.—Jọn 8:28; 14:9.

5. Otọ uzi vẹ Ileleikristi a rọ, kọ okevẹ uzi na o rọ ze iruo?

⁵ Eme o gwọlọ re a kezọ kẹ Jesu jẹ raro kele iei? Kọ u dhesẹ nọ a rẹ jọ otọ uzi jọ? Pọl o kere nọ: “[Mẹ] rọ otọ uzi hi.” Ọ jẹ jọ etenẹ ta kpahe “ọvọ anwae na,” ọvọ Uzi nọ a re kugbe Izrẹl. Pọl ọ rọwo inọ ọ rọ “otọ uzi Kristi.” (1 Ahwo Kọrint 9:20, 21; 2 Ahwo Kọrint 3:14) Nọ ọvọ Uzi anwae na o kuhọ, “ọvọ ọkpokpọ” o te mu iruo họ avọ “uzi Kristi” riẹ nọ idibo Jihova kpobi nẹnẹ a re yoẹme kẹ hrọ.—Luk 22:20; Ahwo Galesha 6:2; Ahwo Hibru 8:7-13.

6. Ẹvẹ a rẹ sai dhesẹ “uzi Kristi” na, kọ ẹvẹ ma re ro yoẹme kẹe?

⁶ Jihova o ru re a kere “uzi Kristi” na họ uko-obe he, re a dhe ai họ ẹkuẹko, wọhọ epanọ o jọ evaọ ọvọ Uzi anwae na. Uzi okpokpọ nana kẹ ilele ọ Kristi u wo oghoghẹrẹ izi buobu hu. Dede na, evaọ Ẹme riẹ, Jihova ọ rawo ikuigbe ekẹkẹe ene kpahe uzuazọ gbe iwuhrẹ Ọmọ riẹ. Ofariẹ, Ọghẹnẹ ọ kẹ ilele ọsosuọ Jesu jọ ẹgba re a kere ithubro jọ kpahe uruemu omobọ ohwo, iruẹru ukoko, uruemu evaọ uviuwou, gbe eme efa. (1 Ahwo Kọrint 6:18; 14:26-35; Ahwo Ẹfẹsọs 5:21-33; Ahwo Hibru 10:24, 25) Ma tẹ kpọ izuazọ mai lele oriruo gbe iwuhrẹ Jesu Kristi je lele ohrẹ enọ a kẹ ẹgba evaọ ikpe-udhusoi ọsosuọ ro kere Ebaibol na, yọ ma bi yoẹme kẹ “uzi Kristi” na. Oware nọ Jihova ọ yare mi idibo riẹ nẹnẹ oye.

Epanọ Uyoyou U Wuzou Te

7. Ẹvẹ Jesu o ro fiẹgbahọ ẹjiroro uzi na evaọ Ọnyavrẹ urere kugbe ikọ riẹ?

⁷ Nọ uyoyou u wuzou evaọ otọ Uzi na, ababọ riẹ uzi Kristi na o rẹ jọ họ. Jesu o fiẹgbahọ ẹme nana okenọ tei te ikọ na a je ru ehaa Ọnyavrẹ ọ 33 C.E. na. Wọhọ epanọ ikere Jọn ukọ na nọ e gba eware nọ e via evaọ aso ọyena kpobi ekru i dhesẹ na, eme urirẹ Jesu i kugbe asia 28 nọ ọ ta kpahe uyoyou. Onana u te dhesẹ otofa hayo ugogo ẹjiroro uzi na vevẹ kẹ ikọ riẹ. Nwani fo, Jọn o muọ eme nọ o kere kpahe owọwọ obọdẹ oyena họ ẹta enẹ: “Whaọ nọ Eha-Iwẹ-Ọnyavrẹ o ri te he, yọ Jesu ọ riẹ nọ oke riẹ u te no nọ o re ti ro no akpọ na no kpobọ Ọsẹ na epanọ o you erọ obọ riẹ nerọ evaọ akpọ na, o te you ai te [urere].”—Jọn 13:1.

8. (a) Didi imuẹro e riẹ inọ ẹwhọ ọ jọ udevie ikọ na ẹsikpobi? (b) Ẹvẹ Jesu o ro wuhrẹ ikọ riẹ uwuhrẹ evaọ omaurokpotọ?

⁸ Jesu o you ikọ riẹ, dede nọ o fiobọhọ kẹ ai bẹ no re a kparobọ vi isiuru egaga rai kẹ ogaga gbe ọkwa. Emerae buobu taure a tẹ te ziọ Jerusalẹm, ‘a jẹ jọ omoma rai vroavro ọ ohwo nọ ọ mae rro.’ Yọ taure a tẹ te nwane ziọ okpẹwho na kẹ Ọnyavrẹ na, ẹwhọ kpahe ọkwa ọ tẹ jẹ wariẹ du lahwe. (Mak 9:33-37; 10:35-45) Inọ ẹbẹbẹ ọnana ọ riotọ kri no u dhesẹ oma via evaọ oware nọ o via nọ ikọ na a nwane ruọ evaọ ubruwou ehru na kẹ Ọnyavrẹ urere rai kugbe no. Eva oke oyena uvumọ ohwo ọ rehọ uvẹ na dhesẹ uruemu ọghọ-oruo nọ a rẹ rọ wozẹ awọ amọfa ha. Re o wuhrẹ ai uwuhrẹ omaurokpotọ, Jesu ọvo ọ tẹ wozẹ awọ rai.—Jọn 13:2-15; 1 Timoti 5:9, 10.

9. Ẹvẹ Jesu o ro yeri kugbe uyero nọ o roma via evaọ Ọnyavrẹ urere na?

⁹ Ghelọ uwuhrẹ oyena, okenọ Ọnyavrẹ na o kuhọ no nọ Jesu ọ rehọ Ekareghẹhọ uwhu riẹ mu no, muẹrohọ oware nọ o wariẹ via. Enẹ Usiuwoma Luk o ta: “Ẹwhọ ọ tẹ ruọ udevie rai epa ọnọ a roro nọ ọ mae ro.” Ukpenọ ọ dh’eva kẹ ikọ riẹ re ọ whọku ai, Jesu avọ ẹwo ọ tẹ hrẹ rai kpahe ẹgwọlọ nọ a re ro wo ohẹriẹ no isu akpọ nọ ogaga u re siuru. (Luk 22:24-27) Ọ tẹ kẹ oware nọ a rẹ sae rehọ wọhọ utho ubienẹ ọrọ uzi Kristi na, ta nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo.”—Jọn 13:34.

10. Didi ujaje Jesu ọ rọ kẹ ilele riẹ, kọ eme u kugbe?

¹⁰ Uwhremu na evaọ owọwọ yena Jesu o dhesẹ epanọ uyoyou nọ u tho orọ Kristi o rẹ kẹre te. Ọ ta nọ: “Onana họ ujaje mẹ, re whai ohwo o you ohwo wọhọ epanọ me you owhai na. Ohwo ọvo o wo uyoyou nọ o ro vi ona ha, re ohwo o siobọno uzuazọ riẹ fihọ otọ fiki ezọ riẹ.” (Jọn 15:12, 13) Kọ Jesu ọ be ta nọ u re no ilele riẹ eva ze re a whu kẹ ibe ọnọ ọ rọwo otẹrọnọ o gwọlọ ere? Ere Jọn nọ ọ jọ etẹe ọ rehọ e riẹ, keme uwhremu na o kere nọ: “Fiki onana ma re ro vuhu uyoyou, epanọ [Jesu Kristi] o ro fi uzuazọ riẹ họ otọ kẹ omai; u te omai te epanọ ma ro fi uzuazọ mai họ otọ kẹ imoni na.”—1 Jọn 3:16.

11. (a) Ẹvẹ ma re ro ru uzi Kristi na gba? (b) Didi oriruo Jesu ọ kẹ?

¹¹ Fikiere, orọnikọ ma re ru uzi Kristi na gba ẹkwoma amọfa nọ ma re wuhrẹ kpahe iẹe ọvo ho. Ma rẹ rria je ru wọhọ epanọ Jesu o ru. Uzẹme, Jesu ọ jẹ hae rọ eme awere, nọ ọ nabe salọ ziezi gbiku. Ghele na, ọ rehọ oriruo wuhrẹ re. Dede nọ Jesu ọ jọ omama ẹzi ologbo evaọ odhiwu, o dede uvẹ-ọghọ nọ ọ rẹ rọ jọ otọakpọ ru isiuru Ọsẹ riẹ rehọ re o je dhesẹ epanọ u fo nọ ma rẹ rria. O wo omarokpotọ, jọ wowou, avọ ororokẹ, je fiobọhọ kẹ ahwo nọ ewha enyẹ yaotọ nọ a bi kienyẹ. (Matiu 11:28-30; 20:28; Ahwo Filipai 2:5-8; 1 Jọn 3:8) Jesu ọ tuduhọ ilele riẹ awọ re a you ohwohwo, wọhọ epanọ o you rai.

12. Fikieme ma jẹ sae ta nnọ uzi Kristi u rri uyoyou kẹ Jihova kuẹku hu?

¹² Didi oria uyoyou kẹ Jihova—ujaje Uzi na nọ o mae rro kpobi na—u wo evaọ uzi Kristi? (Matiu 22:37, 38; Ahwo Galesha 6:2) Oria avivẹ? Dazigbe! Uyoyou kẹ Jihova gbe uyoyou kẹ ibe Ileleikristi e j’obọ họ ohwohwo. Ohwo ọ rẹ sai ghine you Jihova ha ababọ oniọvo riẹ nọ o re you, keme Jọn ukọ na ọ ta nọ: “Re ohwo jọ ọtẹta nọ, ‘Me you Ọghẹnẹ’, o te mukpahe omoni riẹ, ọyena họ ọterue, keme ọnọ o you omoni riẹ hẹ, ọnọ ọ rẹ ruẹ, ọsai you Ọghẹnẹ hẹ, ọnọ ọ rẹ ruẹ hẹ.”—1 Jọn 4:20; wawo 1 Jọn 3:17, 18.

13. Eme o no rie ze okenọ ilele na a yoẹme kẹ ujaje okpokpọ Jesu?

¹³ Okenọ Jesu ọ kẹ ilele riẹ ujaje okpokpọ na re a you ohwohwo wọhọ epanọ o you rai, o dhesẹ oware nọ u ti noi ze. Ọ ta nọ: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:35) Wọhọ epanọ Tertullian, ọnọ ọ rria bu vi ikpe udhusoi nọ oke uwhu Jesu o vrẹ no ọ ta, oyena u no uyoyou inievo Ileleikristi ọsosuọ na ze. Tertullian ọ wariẹ eme nọ ahwo nọ a rọ Ileleikristi hi a jẹ ta kpahe ilele ọ Kristi anọ: ‘Rri epanọ a you ohwohwo te gbe epanọ a ruẹrẹ oma kpahe re a whu kẹ ohwohwo.’ Ma rẹ sae nọ omobọ mai inọ, ‘Kọ me bi dhesẹ uyoyou utioye na kẹ ibe Ileleikristi nọ u dhesẹ nọ mẹ yọ omọvo olele Jesu?’

Epanọ Ma re ro Dhesẹ Uyoyou Mai

14, 15. Eme o rẹ sai ru ei jọ bẹbẹ re a yoẹme kẹ uzi Kristi na, rekọ eme o rẹ sai fiobọhọ k’omai ru ei?

¹⁴ U wuzou re idibo Jihova a dhesẹ ọkpọ uyoyou Kristi. Rekọ whọ ruẹ inọ o rrọ bẹbẹ re who you ibe Ileleikristi nọ i bi dhesẹ uruemu oriobọ? Whaọ, wọhọ epanọ ma ruẹ no na, makọ ikọ na a je lele omoma rai vro avro jẹ gwọlọ wha isiuru obọ rai haro. (Matiu 20:20-24) Ahwo Galesha dede a je lele ohwohwo whọ. Nọ o dhesẹ nnọ uyoyou ọrivẹ yọ orugba Uzi na no, Pọl ọ tẹ vẹvẹ ai unu nọ: “Rekọ otẹrọnọ whai ohwo ọ be gbẹroma ohwo, yọrọ oma re whai ohwo ọ siọ ohwo ba ẹraha.” Nọ ọ rehọ iruo uwo na wawo ubi ẹzi Ọghẹnẹ no, Pọl o te fi ohrẹ na bae: “Wha joma jọ otu omovia ha, nọ a rẹ guọlọ ẹwhọ họ, nọ a re wo ẹro-oyoma kpahọ ọrivẹ gbe he.” Kẹsena ukọ na ọ tẹ tuduhọ ae awọ nọ: “Whai ohwo ọ wha uye ohwo, re wha rọ ere ru uzi Kristi na gba.”—Ahwo Galesha 5:14–6:2.

¹⁵ Ẹkwoma ẹyare ẹmeoyo kẹ uzi Kristi na, kọ Jihova ọ be yare mi omai bu hrọ? Dede nọ o rẹ jọ bẹbẹ re a dhesẹ ẹwo kẹ enọ e rehọ unu raha odẹ mai no, o gba omai họ re ma ‘raro kele Ọghẹnẹ, wọhọ emọ iyoyou, re ma nya eva uyoyou.’ (Ahwo Ẹfẹsọs 5:1, 2) U fo re ma gbẹ hai rri oriruo Ọghẹnẹ, ọnọ “o ru [uyoyou] riẹ gba kẹ omai keme okenọ ma gbẹ jọ erahaizi, Kristi o te whu kẹ omai.” (Ahwo Rom 5:8) Ẹkwoma owọ nọ ma rẹ jẹ ro fiobọhọ kẹ amọfa, kugbe enọ e be riẹ omai ru hu, ma rẹ sae reawere evevọwẹ ọrọ ẹriẹ inọ ma be raro kele Ọghẹnẹ je bi yoẹme kẹ uzi Kristi.

16. Ẹvẹ ma re ro dhesẹ uyoyou mai kẹ Ọghẹnẹ avọ Kristi?

¹⁶ Ma rẹ kareghẹhọ nọ ma re dhesẹ uyoyou mai ẹkwoma oware nọ ma bi ru, orọnikọ onọ ma be ta ọvo ho. Makọ okejọ dede o jọ bẹbẹ kẹ Jesu re ọ jẹ abọjọ oreva Ọghẹnẹ rehọ fiki eware nọ onana u kpomahọ. Jesu ọ lẹ nọ: “[Ọsẹ], u te je owhẹ, si egho ọnana no omẹ.” Rekọ o te fibae vẹrẹ vẹrẹ inọ: “Rekọ orọnọ, orọ eva mẹ hẹ, rekọ orọ eva ra.” (Luk 22:42) Ghelọ uye nọ Jesu ọ ruẹ kpobi na, o ru oreva Ọghẹnẹ. (Ahwo Hibru 5:7, 8) Ẹmeoyo yọ imuẹro uyoyou mai u te je dhesẹ nọ ma vuhu edhere Ọghẹnẹ mu wọhọ onọ o mai woma. Ebaibol na ọ ta nọ: “Uyoyou Ọghẹnẹ ona, nnọ ma re koko ijaje riẹ.” (1 Jọn 5:3) Yọ Jesu ọ ta kẹ ikọ riẹ nọ: “Wha te you omẹ, wha re ti koko izi mẹ.”—Jọn 14:15.

17. Didi ujaje obọdẹ Jesu ọ rọ kẹ ilele riẹ, kọ ẹvẹ ma rọ riẹ nnọ u kpomahọ omai nẹnẹ?

¹⁷ U te no ujaje nọ ọ kẹ ilele riẹ re a you ohwohwo no, didi obọdẹ ujaje Kristi ọ rọ kẹ ae? Ọ ta nnọ a ru iruo usiuwoma ota onọ o wuhrẹ i rai kẹ na. Pita ọ ta nọ: ‘O je uzi kẹ omai re ma vuẹ ahwo je se obọdẹ isẹri.’ (Iruẹru 10:42) Jesu o j’uzi dẹẹ inọ: “Fikiere wha ru ilele ahwo erẹwho kpobi, wha họ ae ame evaọ odẹ Ọsẹ gbe Ọmọ gbe ẹzi ọfuafo, wha wuhrẹ ai re a koko eware nọ me je kẹ owhai kpobi.” (Matiu 28:19, 20, NW; Iruẹru 1:8) Jesu o dhesẹ nọ ithubro eyena i ti kpomahọ ilele inẹnẹ riẹ evaọ “oke urere” na, keme ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Daniẹl 12:4; Matiu 24:14) Uzẹme, o rọ oreva Ọghẹnẹ re ma ta usiuwoma. Ghele na, ahwo jọ a re roro nọ u bu hrọ k’omai re Ọghẹnẹ ọ gwọlọ nọ ma ru iruo nana. Kọ ghinẹ uzẹme?

Oware nọ O Jẹ Wọhọ nọ O Rẹ Gaga

18. Eme ma rẹ kareghẹhọ nọ ma tẹ be ruẹ uye fiki ọ eruo oware nọ Jihova ọ yare?

¹⁸ Wọhọ epanọ ma ruẹ no na, Jihova ọ yare ahwo re a roma kpotọ kẹ ẹgwọlọ sa-sa no evaọ ikuigbe kpobi ze. Yọ wọhọ epanọ eware nọ ọ gwọlọ mi ai e rọ sa-sa na, ere edawọ nọ i te rai e rrọ re. Ọmọ ọghaghae Ọghẹnẹ ọ ruẹ edawọ nọ e mae ga kpobi, a te ti kpei evaọ edhere nọ ọ mae da kpobi fiki eruo oware nọ Ọghẹnẹ ọ gwọlọ mi ei. Rekọ ma tẹ ruẹ uye fiki eruo oware nọ Jihova ọ yare mi omai, ma rẹ kareghẹhọ nnọ orọnikọ ọye ọ be wha edawọ mai ze he. (Jọn 15:18-20; Jemis 1:13-15) Ọkparesuọ Setan oye o wha uzioraha, uye-oruẹ, gbe uwhu ze, yọ ọye họ ọnọ ọ wha iyero nọ i ru rie bẹbẹ kẹ eruo oware nọ Jihova ọ yare mi idibo riẹ ze.—Job 1:6-19; 2:1-8.

19. Fikieme o jẹ rọ uvẹ-ọghọ re a ru oware nọ Ọghẹnẹ ọ yare mi omai ẹkwoma Ọmọ riẹ?

¹⁹ Ẹkwoma Ọmọ riẹ, Jihova ọ kẹ ujaje no nnọ evaọ oke urere nana, idibo Riẹ a rẹ jọ akpọ soso whowho nnọ ifue evuovo nọ e riẹ kẹ uye-oruẹ ohwo-akpọ kpobi họ esuo Uvie na. Egọmeti Ọghẹnẹ nana o ti si ebẹbẹ kpobi no otọakpọ na—ẹmo, ethube, uvuhu, owho, ẹyao, gbe uwhu. Uvie na o te jẹ rehọ aparadase oruaro otọakpọ kpobi ze, onọ a te tubẹ jọ kpare iwhuowhu na ze. (Matiu 6:9, 10; Luk 23:43; Iruẹru 24:15; Eviavia 21:3, 4) Ẹvẹ uvẹ-ọghọ riẹ o rro te re a whowho emamọ usi eware itieye! U re vevẹ, uvumọ ẹbẹbẹ o rọ oware nọ Jihova ọ yare omai nọ ma ru hu. Ma be nyaku ọkparesuọ, rekọ Setan Ẹdhọ na avọ akpọ riẹ a be wha enana ze.

20. Ẹvẹ ma sae rọ nyate ọzadhe nọ Ẹdhọ ọ rọ ze kpobi?

²⁰ Ẹvẹ ma sae rọ dadamu kẹ ezadhe nọ Setan ọ rẹ wha ze kpobi? Ẹkwoma ẹkareghẹhọ eme nana: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” (Itẹ 27:11) Jesu ọ kẹ Jihova uyo rọkẹ ẹpoviẹ Setan ẹkwoma ẹnyaseba ufuoma uzuazọ obọ odhiwu re ọ te jọ otọakpọ ru oreva Ọsẹ riẹ. (Aizaya 53:12; Ahwo Hibru 10:7) Wọhọ ohwo-akpọ, Jesu o thihakọ edawọ kpobi nọ i te rie, makọ uwhu evaọ ure oja. Ma te lele iei wọhọ Oriwiruo mai, ma rẹ sai thihakọ uye-oruẹ re je ru oware nọ Jihova ọ gwọlọ mi omai.—Ahwo Hibru 12:1-3.

21. Ẹvẹ uyoyou nọ Jihova gbe Ọmọ riẹ a dhesẹ o rọ owhẹ oma?

²¹ Ẹvẹ uyoyou nọ Ọghẹnẹ gbe Ọmọ riẹ a dhesẹ k’omai o rro te! Fiki idheidhe Jesu, ahwo-akpọ ẹmeoyo a wo irẹro ẹrria bẹdẹ bẹdẹ evaọ Aparadase. Fikiere ma jọ uvumọ oware o raha ẹruore mai hi. Ukpoye, joma kareghẹhọ oware nọ Jesu o ru lọhọ, wọhọ Pọl, ọnọ ọ ta nọ: ‘Ọmọ Ọghẹnẹ . . . o you omẹ, ọ jẹ rehọ oma riẹ kẹ fiki mẹ.’ (Ahwo Galesha 2:20) Yọ joma yere Ọghẹnẹ oyoyou mai, Jihova, ọnọ ọ rẹ yare bu hrọ mi omai hi na, no udu ze.

Ẹvẹ Whọ te k’Uyo?

◻ Eme Jihova ọ gwọlọ mi omai nẹnẹ?

◻ Evaọ owọwọ urere riẹ kugbe ikọ riẹ, ẹvẹ Kristi o ro dhesẹ epanọ uyoyou u wuzou te?

◻ Ẹvẹ ma sai ro dhesẹ nọ ma you Ọghẹnẹ?

◻ Fikieme o rọ rrọ uvẹ-ọghọ re ma ru oware nọ Jihova ọ yare mi omai?

[Picture on page 12]

Didi uwuhrẹ Jesu o wuhrẹ ẹkwoma ẹwezẹ awọ ikọ riẹ?

[Picture on page 14]

Makọ ọkparesuọ, ẹghale emamọ usi na yọ uvẹ-ọghọ evawere