Idhe Ujiro Nọ E Rẹ Were Jihova
“Wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ.”—AHWO ROM 12:1.
1. Eme Ebaibol na ọ ta kpahe aghare ubroke idhe evaọ otọ Uzi Mosis na?
“EPANỌ uzi na o rọ uwoho eware iwoma nọ e be tha evaọ ẹta uvi eware enana, dazigbe, ọ sae rehọ fiki iwẹ kukpe kukpe evo na nọ a re dhe ẹgẹgọ ru ahwo nọ a bikẹle fua ha.” (Ahwo Hibru 10:1) Pọl ukọ na ọ jọ etenẹ dhesẹ vevẹ nnọ idhe kpobi nọ a dhe evaọ otọ Uzi Mosis na i wo aghare ebẹdẹ bẹdẹ kpahe esiwo ohwo-akpọ họ.—Ahwo Kọlọsi 2:16, 17.
2. Fikieme o gbẹ rọ rrọ oware ufofe he re a daoma wo otoriẹ evuẹ kpobi nọ e rrọ Ebaibol na kpahe akpẹwẹ gbe idhe Uzi na?
2 Kọ onana u dhesẹ nọ evuẹ nọ e rrọ Ebe Isoi Ọsosuọ Ebaibol na kpahe akpẹwẹ gbe idhe na i wo uvumọ aghare kẹ Ileleikristi nẹnẹ hẹ? Uzẹme, evaọ etoke ukpe ovo gbe omoke jọ, ahwo nọ a kere odẹ fihọ otọ kẹ Isukulu Odibọgba Ọghẹnẹ na evaọ ikoko Isẹri Jihova evaọ akpọ-soso a se ebe isoi ọsosuọ Ebaibol na reno kẹle na. Ejọ e daoma gaga re a se je wo otoriẹ eware na kpobi. Kọ omodawọ rai na kpobi o rrọ ufofe? O sae jọ ere he, keme “eware kpobi nọ a kere oke anwae, a kere ai rọ kẹ omai ohrẹ, re ma rehọ fiki odiri gbe eri ikereakere na, wo ẹruore.” (Ahwo Rom 15:4) Fikiere, onọ na họ, Didi “ohrẹ” gbe “eri” ma rẹ sai wo nọ evuẹ nọ e rrọ Uzi na kpahe akpẹwẹ gbe idhe ze?
Rọkẹ Uthubro gbe Omosasọ Mai
3. Ugogo ẹgwọlọ vẹ ma wo?
3 Dede nọ ma bi dhe idhe evaọ edhere nọ Uzi na o ta ha, ma gbẹ gwọlọ oware nọ idhe na i dina rugba kẹ emọ Izrẹl na gaga, koyehọ, re a rọ izieraha mai vrẹ omai jẹ reawere aruoriwo Ọghẹnẹ. Nọ ma gbe bi dhe idhe itieye he na, ẹvẹ ma sai ro wo irere itieye na? Nọ o dhesẹ ọnyaba idhe nọ a rẹ rọ arao ro dhe na no, Pọl o te whowho nọ: “Nọ [Jesu] ọ teze eva akpọ na, ọ tẹ ta nọ, ‘Iwẹegọ gbe idhe whọ guọlọ erae he, rekọ oma whọ ruẹrẹ kpahe kẹ omẹ; idhe-emahọ gbe iwẹegọ uzioraha who wo awere eva rai hi. Kẹsena mẹ jẹ ta nọ, “[Rri], mẹ ze ti ru o rọ eva ra, O Ọghẹnẹ,” wọhọ epanọ a kere kpahe omẹ eva obe na.’ ”—Ahwo Hibru 10:5-7.
4. Ẹvẹ Pọl ọ rọ rehọ Olezi 40:6-8 ro ruiruo kpahe Jesu Kristi?
4 Nọ ọ jẹ wariẹ eme Olezi 40:6-8, Pọl ọ riobọhọ nnọ orọnikọ Jesu ọ nyaze te whobọhọ “iwẹegọ gbe idhe,” “idhe-emahọ gbe iwẹegọ uzioraha” na ha, enọ evaọ okenọ Pọl o je kere na i gbe wo ọjẹrehọ Ọghẹnẹ hẹ na. Ikpoye, Jesu ọ rehọ oma nọ Ọsẹ riẹ obọ odhiwu ọ ruẹrẹhọ no ze, onọ o rrọ ẹrẹrẹe evaọ abọ kpobi kugbe onọ Ọghẹnẹ ọ ruẹrẹhọ evaọ okenọ Ọ ma Adamu. (Emuhọ 2:7; Luk 1:35; 1 Ahwo Kọrint 15:22, 45) Wọhọ Ọmọ ọgbagba Ọghẹnẹ, Jesu o wo ẹkẹ-abọ iruo ‘ubi’ aye na, wọhọ epanọ a ruẹaro eva Emuhọ 3:15. Ọ te j’owọ re ọ ‘nwa Setan uzou,’ dede nọ Jesu omariẹ a te “royẹe ithihrawọ.” Evaọ edhere ọnana, Jesu o te zihe ro okwakwa nọ Jihova ọ ruẹrẹhọ kẹ esiwo ahwo-akpọ, onọ ezae ẹrọwọ a je rẹro riẹ no edẹ Ebẹle ze.
5, 6. Didi edhere okpehru nọ a re ro bru Ọghẹnẹ ọ rrọ kẹ Ileleikristi?
5 Nọ ọ jẹ t’ẹme kpahe ẹkẹ-abọ obọdẹ nana nọ Jesu o wo na, Pọl ọ ta nọ: “Fiki mai [Ọghẹnẹ] o je ru ei ọrahuzi, ọ nọ ọ kare uzioraha, re ma ruẹse zihe ruọ ẹrẹreokie Ọghẹnẹ.” (2 Ahwo Kọrint 5:21) Eme na “ru ei ọrahuzi” a sae jẹ fae nọ ‘ru ei wọhọ idhe uzioraha.’ Jọn ukọ na ọ ta nọ: “Ọye họ okiofu izieraha mai, orọnọ rọ kẹ izieraha mai evo ho rekọ rọ kẹ izieraha akpọ na ọsoso.” (1 Jọn 2:2) Fikiere, nọ emọ Izrẹl a wo edhere ubroke nọ a re ro bru Ọghẹnẹ ẹkwoma idhe rai na, Ileleikristi i wo otọhotọ ukpehru rọkẹ ẹnyabru Ọghẹnẹ—idhe Jesu Kristi. (Jọn 14:6; 1 Pita 3:18) Otẹrọnọ ma dhesẹ ẹrọwọ fihọ idhe ẹtanigbo nọ Ọghẹnẹ ọ ruẹrẹhọ na je yoẹme Riẹ, a te jẹ rehọ izieraha mai rọvrẹ omai re, yọ ma rẹ jẹ reawere aruoriwo gbe oghale Ọghẹnẹ. (Jọn 3:17, 18) Kọ oyena o gbẹ rrọ ehri omosasọ? Ghele na, ẹvẹ ma sai ro dhesẹ nọ ma wo ẹrọwo fihọ idhe ẹtanigbo na?
6 Nọ o ru ei vẹ no nnọ Ileleikristi a wo otọhotọ okpehru nọ a re ro bru Ọghẹnẹ, Pọl ukọ na o te dhesẹ idhere esa nọ ma sai ro dhesẹ ẹrọwọ gbe ovuhumuo mai kẹ ọruẹrẹfihọ uyoyou Ọghẹnẹ, wọhọ epanọ ma se eva Ahwo Hibru 10:22-25. Dede nọ a mae kpọ ohrẹ Pọl na bru enọ i wo uvẹ ‘ẹruọ oria ẹri na’—koyehọ, Ileleikristi nọ a wholo avọ use obọ odhiwu na—u fo re ahwo-akpọ kpobi a muẹrohọ eme ọ Pọl nọ a kẹ ẹgba na otẹrọnọ a gwọlọ wo erere no idhe ofu-okie Jesu na ze.—Ahwo Hibru 10:19.
Dhe Idhe Efuafo nọ A Gbeku Hu
7. (a) Ẹvẹ Ahwo Hibru 10:22 o rọ rrọ edhesẹ oware nọ a je ru evaọ oke idheidhe? (b) Eme a re ru re u muẹro nọ Ọghẹnẹ ọ jẹ idhe rehọ?
7 Orọ ọsosuọ, Pọl ọ tuduhọ Ileleikristi awọ nọ: “Wha joma rehọ emamọ eva bikẹle avọ orọwọ nọ umuẹro, avọ eva mai ewozẹ no iroro iyoma, avẹ jẹ rehọ ame ọfuafo wozẹ oma mai na.” (Ahwo Hibru 10:22) Oghẹrẹ ẹta-ẹme ọ Pọl evaọ etenẹ na o nwani dhesẹ epanọ a je ghine dhe idhe evaọ otọ Uzi na. Onana u kiehọ keme re a jẹ idhe rehọ, a re dhe ae avọ emamọ iroro o vẹ jẹ jọ oware ofuafo gbe onọ a gbeku hu. Arao idhe na o re no uthuru na ze, koyehọ no udevie erao efuafo na ze, jẹ jọ ọnọ ọ rrọ ‘omakọkọ,’ nọ ọ kare epe. Otẹrọnọ idhe na yọ ọrọ evra, o rẹ jọ irueruẹ hayo ilekuku. Ọ tẹ nyate itee eyena, “a vẹ te rehọ iẹ o vẹ te jọ idhe oma-uvoro rọ kẹe.” (Iruo-Izerẹ 1:2-4, 10, 14; 22:19-25) Idhe eka na e rẹ kare ẹvi, onọ o rrọ oka ogbekuo; yọ o rẹ kare ọnyọ re, ẹsejọhọ ame ubi-ure, onọ o rẹ lẹliẹ oware ga. Okenọ a te dhe idhe na—arao hayo ibi-ekakọ—evaọ ehru agbada-idhe na, a re ku uwhei, okwakwa nọ a rẹ rọ rawo oware, kugbe ei.—Iruo-Izerẹ 2:11-13.
8. (a) Eme a gwọlọ mi ohwo nọ o bi dhe idhe? (b) Ẹvẹ mai sai ro wo imuẹro nọ Jihova ọ jẹ egagọ mai rehọ?
8 Kọ eme a gwọlọ mi ọnọ o bi dhe idhe na? Uzi na o ta nọ kohwo kohwo nọ o bi bru Jihova ze ọ rẹ jọ fuafo jẹ kare ogbekuo. Ohwo nọ o gbeku fiki oware jọ ọ rẹ kaki dhe idhe uzioraha hayo idhe oruthọ re ọ sai ru edikihẹ riẹ fo evaọ aro Jihova re Ọ sae jẹ idhe emahọ hayo idhe udhedhẹ riẹ rehọ. (Iruo-Izerẹ 5:1-6, 15, 17) Fikiere, kọ ma wo ovuhumuo epanọ u wuzou te re ma yọrọ edikihẹ ọfuafo evaọ aro Jihova ẹsikpobi? Otẹrọnọ ma gwọlọ nọ Ọghẹnẹ ọ jẹ egagọ mai rehọ, o rẹ vẹrẹ omai obọ re ma kpọ iruthọ kpobi kpahe izi Ọghẹnẹ vi. Ma rẹ rehọ edhere obufihọ nọ Ọghẹnẹ ọ kẹ na—‘ekpako ukoko na’ gbe “okiofu izieraha mai” Jesu Kristi, ro ruiruo ababọ oke oraha.—Jemis 5:14; 1 Jọn 2:1, 2.
9. Eme họ ugogo ẹhẹriẹ nọ ọ rrọ udevie idhe nọ a je dhe kẹ Jihova gbe enọ a je dhe kẹ eghẹnẹ erue?
9 Evaọ uzẹme, ẹgba nọ a fihọ ababọ ogbekuo oghẹrẹ kpobi na họ ugogo ẹhẹriẹ nọ ọ rrọ udevie idhe nọ a je dhe kẹ Jihova gbe enọ ahwo erẹwho nọ e wariẹ Izrẹl họ a je dhe kẹ eghẹnẹ erue. Nọ o jẹ t’ẹme kpahe abọ ohẹriẹ idhe Uzi Mosis nana, obe jọ o ta nọ: “Ma sai muẹrohọ nọ ọjẹhọ ọvuọvo kugbe aro-ọruẹ hayo oka ugbunu o jariẹ hẹ; ugberu egagọ, oma ogbẹre, hayo igberẹ-ibro ọrẹri, iruemu ọfariẹ-ogbe ọgaga e jariẹ hẹ; a jẹ rehọ ahwo dhe idhe he; a je dhe idhe kẹ iwhuowhu na ha.” Enana kpobi i si iroro kpohọ uzẹme jọ: Jihova ọ rrọ ọrẹri, o re rri vo hayo jẹ uzioraha hayo ogbekuo uvumọ oghẹrẹ rehọ họ. (Habakuk 1:13) Egagọ gbe idhe nọ a rẹ kẹe e rẹ jọ fuafo jẹ kare ogbekuo—ọrọ ugboma, ọrọ uruemu, gbe ọrọ abọ-ẹzi.—Iruo-Izerẹ 19:2; 1 Pita 1:14-16.
10. Rọwo kugbe ohrẹ Pọl nọ a kere fihọ Ahwo Rom 12:1, 2, didi ọkiẹriwi omobọ-ohwo ma re ru?
10 Fiki onana, u fo nọ ma kiẹ oma mai riwi evaọ kabọ kabọ uzuazọ re u mu omai ẹro nọ Jihova ọ jẹ egagọ mai rehọ. Ma re roro vievie he inọ nọ ma bi w’abọ evaọ iwuhrẹ Ileleikristi gbe odibọgba na, oware nọ ma bi ru evaọ uzuazọ mai u gbe fiẹme he. Ma re roro gbe he inọ abọ-owo evaọ iruo Ileleikristi o k’omai uvẹ nọ ma rẹ rọ siọ izi Ọghẹnẹ ba ẹrria lele evaọ abọ ọfa uzuazọ mai. (Ahwo Rom 2:21, 22) Ma rẹ sai rẹro oghale gbe aruoriwo Ọghẹnẹ hẹ otẹrọnọ ma kuvẹ kẹ eware igbegbe hayo ogbekuo jọ evaọ aro riẹ re i gbe iroro gbe uruemu mai ku. Kareghẹhọ eme ọ Pọl: “Imoni, mẹ rehọ epa ehrọ Ọghẹnẹ lẹ owhai re wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ, nọ e rọ egagọ Ẹzi rai. Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai, re wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.”—Ahwo Rom 12:1, 2.
Rọ Udu Kpobi Dhe Idhe Ujiro
11. Eme ẹme na “ọrọwovia,” onọ a fodẹ eva Ahwo Hibru 10:23 na ọ kẹre te?
11 Nọ o je kere se ahwo Hibru, Pọl o te je si iroro kpohọ abọ ọfa nọ o wuzou evaọ egagọ uzẹme: “Wha joma yọrọ ọrọwovia ẹruore mai na whawha ababọ enuho, keme ọ nọ ọ yeya na o kiẹrẹe.” (Ahwo Hibru 10:23) Ẹme na “ọrọwovia” o dikihẹ kẹ “evaefa,” yọ Pọl ọ t’ẹme te ‘idhe ejiro’ re. (Ahwo Hibru 13:15) Onana o kareghẹhọ omai oghẹrẹ idhe nọ ahwo wọhọ Ebẹle, Noa, gbe Abraham a kẹ.
12, 13. Eme ọmọ Izrẹl o re vuhumu evaọ okenọ o te bi dhe idhe emahọ, kọ eme ma rẹ sai ru ro dhesẹ ẹzi otiọye na?
12 Okenọ ọmọ Izrẹl o te bi dhe idhe emahọ, o re ru ei “avọ unevaze riẹ kẹ Jihova.” (Iruo-Izerẹ 1:3, NW ) Ẹkwoma idhe itieye na, o bi ru owhowhovia ẹgbede, hayo ovuhumuo, ọrọ eghale ibuobu gbe uyoyou-ẹwo Jihova rọkẹ ahwo riẹ. Kareghẹhọ nọ abọ jọ nọ o wo ohẹriẹ evaọ idhe emahọ na họ a rẹ mahe idhe na kpobi evaọ agbada-idhe na—oka omorọkẹ gbe omarodhidhe udu kpobi nọ u kiehọ. Nwane ere ọvona, ma re dhesẹ ẹrọwọ mai fihọ idhe ẹtanigbo na gbe uyere mai kẹ ọruẹrẹfihọ ọyena evaọ okenọ ma tẹ rọ unevaze gbe udu kpobi ro dhe ‘idhe ujiro, koyehọ, ibi ikpenu’ mai rọkẹ Jihova.
13 Dede nọ Ileleikristi a bi dhe idhe arao hayo ẹbe-ọrọrọ họ na, a wo owha-iruo re a sisẹi kẹ emamọ usi Uvie na gbe eruo ilele kẹ Jesu Kristi. (Matiu 24:14; 28:19, 20) Kọ whọ be rehọ uvẹ nọ u rovie fihọ w’obọ evaọ ewhowho emamọ usi Uvie Ọghẹnẹ na evaọ ẹgbede re ahwo buobu efa a sae nyaze te riẹ eware igbunu nọ Ọghẹnẹ ọ ruẹrẹhọ kẹ ahwo-akpọ ẹmeoyo? Kọ whọ rẹ raha oke gbe ẹgba ra avọ unevaze evaọ ewuhrẹ ahwo isiuru gbe obufihọ kẹ ae re a te jọ ilele Jesu Kristi? Abọ-owo ọwhọ mai evaọ odibọgba na, wọhọ ore awere idhe emahọ, o rẹ were Ọghẹnẹ eva ziezi.—1 Ahwo Kọrint 15:58.
Ghọghọ Evaọ Usu Onya Kugbe Ọghẹnẹ gbe Ahwo-Akpọ
14. Ẹvẹ eme ọ Pọl eva Ahwo Hibru 10:24, 25 i ro tho ẹjiroro idhe udhedhẹ na?
14 Ukuhọ riẹ, Pọl o te si iroro kpohọ usu mai kugbe ibe Ileleikristi nọ ma be gọ Ọghẹnẹ na. “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi. Wa [hẹ se] oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” (Ahwo Hibru 10:24, 25) Eme na “re o wo uyoyou, je ru iruo ezi kpobi,” “oma . . . e kugbe,” gbe “ohwo ọ hẹ ta udu họ ohwo awọ,” aikpobi e kareghẹhọ omai oware nọ idhe udhedhẹ evaọ Izrẹl u ru rọkẹ ahwo Ọghẹnẹ.
15. Ithatho vẹ ma rẹ ruẹ evaọ udevie idhe udhedhẹ na gbe iwuhrẹ Ileleikristi?
15 Ubiẹme Hibru kẹ “udhedhẹ” evaọ eme na ‘idhe udhedhẹ’ u dhesẹ orọ abọ buobu, ẹsejọhọ u dhesẹ nọ abọ-owo evaọ idhe itieye na o rẹ wha udhedhẹ kugbe Ọghẹnẹ gbe udhedhẹ kugbe ibe egegagọ ze. Kpahe idhe udhedhẹ na, ọwena–isukulu jọ o muẹrohọ nọ: “Uzẹme, onana yọ ezi usu evawere kugbe Ọghẹnẹ Ọvọ na, ọnọ O je hrẹ oma kpotọ zihe ro Ọrara Izrẹl eva emuore idhe na, nwane wọhọ epanọ Ọ rẹ jọ Ọnọ a kpahe ẹsikpobi na.” Onana o kareghẹhọ omai eyaa Jesu: “Oria nọ imava hayo imasa a rehọ odẹ mẹ koko họ, mẹ rẹ jọ etẹe eva udevie rai.” (Matiu 18:20) Ẹsikpobi nọ ma kpohọ iwuhrẹ Ileleikristi, ma re wo erere no usu ọbọga, uthubro uduotahawọ, gbe iroro na inọ Jesu Kristi Olori mai ọ rrọ kugbe omai ze. Oyena u re ru iwuhrẹ Ileleikristi fihọ etoke oghọghọ gbe ọbọga ẹrọwọ.
16. Avọ iroro ọ idhe udhedhẹ na, eme o re ru iwuhrẹ Ileleikristi fihọ etoke nọ ọ rẹ mae kẹ oghọghọ?
16 Evaọ idhe udhedhẹ na, iwhri na kpobi—nọ e wariẹ ivu na, ubieku na, abefẹ edhẹ na, gbe agada na, je kugbe uweli ọpoporiẹ ogodẹ na—a rẹ rehọ ae kẹ Jihova ẹkwoma ẹmahe, nọ a rẹ mahe ae evaọ ehru agbada-idhe na. (Iruo-Izerẹ 3:3-16) A rri iwhri na wọhọ abọ nọ ọ rẹ mae were jẹ mai woma evaọ arao. Ẹkẹ riẹ evaọ ehru agbada-idhe na u dikihẹ kẹ ẹrehọ onọ o mai woma kpobi kẹ Jihova. Oware nọ u re ru iwuhrẹ Ileleikristi mai wo oghọghọ họ orọnikọ ma re wo uthubro ọvo ho rekọ ma rẹ jẹ kẹ Jihova ujiro. Ma rẹ sai ru onana ekwoma abọ-owo—evaọ omarokpotọ rekọ avọ omodawọ obọdẹ—evaọ ile-esuọ avọ ọwhọ, ezọgaviẹ ziezi, gbe ekpahe-fihọ evaọ okenọ u te fo. “Jiri ỌNOWO!” ere ọso-ilezi na o bo. “Wha suole ọkpokpọ kẹ ỌNOWO na, a jiri ei eva ukoko enọ e rọwo!”—Olezi 149:1.
Eghale Buobu No Obọ Jihova Ze E be Hẹrẹ Omai
17, 18. (a) Idhe ilogbo vẹ Solomọn o dhe eva oke erovie etẹmpol na evaọ Jerusalẹm? (b) Eghale vẹ i no ehaa erovie etẹmpol na ze kẹ ahwo na?
17 Eva oke erovie etẹmpol na evaọ Jerusalẹm, eva amara avọ ihrẹ ọrọ ukpe 1026 B.C.E., Solomọn Ovie na ọ tẹ rehọ idhe “emahọ gbe idhe eka gbe ekẹ erao iwhri idhe udhedhẹ” ro “dheidhe kẹ ỌNOWO na.” Fiba oware nọ ọ kẹ evaọ idhe eka na, ọ rehọ iruẹ nọ i bu te 22,000 gbe igodẹ 120,000 ro dheidhe eva etoke ọyena.—1 Ivie 8:62-65.
18 Kọ whọ sai roro araha gbe unu iruo nọ ehaa ilogbo otiọye na o gwọlọ? Ghele na, eghale nọ Izrẹl o wo e rro vi araha na. Eva ekuhọ ehaa na, Solomọn “o te siobọno ahwo na kpo; a tẹ kẹ ovie oruaro, a je kpo obọ iwou rai avọ oghọghọ gbe evawere fiki ewoma nọ ỌNOWO na ọ rọ via kẹ Devidi odibo riẹ gbe Izrẹl ahwo riẹ.” (1 Ivie 8:66) Uzẹme, wọhọ epanọ Solomọn o fi rie họ, “oghale ỌNOWO na u re ru ohwo họ ọdafe, o re ku enuobro kugbe ei hi.”—Itẹ 10:22.
19. Eme ma rẹ sai ru ro wo eghale ilogbo no obọ Jihova ze enẹna gbe ebẹdẹ bẹdẹ?
19 Ma be rria etoke nọ “uvi eware enana” i ro nwene erọ “uwoho eware iwoma nọ e be tha” na no. (Ahwo Hibru 10:1) Jesu Kristi, evaọ ọkwa ọrọ ọkpọ Ozerẹ Okpehru ologbo na, ọ rueva odhiwu omariẹ no jẹ rehọ aghare azẹ riẹ ke no re o ro ru omavoro kẹ ohwo kpobi nọ o bi fi ẹrọwọ họ idhe riẹ. (Ahwo Hibru 9:10, 11, 24-26) Fiki idhe eruaro yena gbe ẹkwoma idu mai kpobi nọ ma re ro dheidhe ujiro nọ e rrọ fuafo jẹ kare ogbekuo kẹ Ọghẹnẹ, ma sae nya haro “avọ oghọghọ gbe evawere,” je rri kpobaro kẹ eghale buobu no obọ Jihova ze.—Malakae 3:10.
Ẹvẹ Whọ te k’Uyo?
• Didi uthubro gbe omosasọ ma rẹ sai wo no evuẹ nọ e rrọ Uzi na kpahe idhe gbe akpẹwẹ ze?
• Eme họ ute ọsosuọ nọ a rẹ rọ jẹ idhe rehọ, kọ otofa vẹ oyena u wo k’omai?
• Eme ma rẹ sae kẹ nọ o wọhọ idhe emahọ unevaze?
• Evaọ idhere vẹ a sae rọ rehọ iwuhrẹ Ileleikristi wawọ idhe udhedhẹ?
[Uwoho nọ o rrọ ẹwẹ-obe avọ 10]
Jihova ọ ruẹrẹ idhe ẹtanigbo Jesu họ rọkẹ esiwo ahwo-akpọ
[Uwoho nọ o rrọ ẹwẹ-obe avọ 12]
Re Jihova ọ jẹ egagọ mai rehọ, ma rẹ kare ogbekuo oghẹrẹ kpobi
[Uwoho nọ o rrọ ẹwẹ-obe avọ 13]
Ma bi whowho ewoma Jihova kẹ amọfa evaọ okenọ ma te w’obọ evaọ odibọgba na