Enọ Ahwo nọ A s’Ebe
Eruaruẹ jọ kpahe Mesaya na nọ e viodẹ gaga e rrọ Aizaya uzou avọ 53. Owọ avọ 10 o ta nọ: ‘O rọ oreva ỌNOWO na nọ a horie ei oma; o te fi ei họ uweri.’ Eme họ otọ ẹme ọnana?
O rẹ lọlọhọ re a ruẹ oware nọ onọ kpahe Aizaya 53:10 o jẹ sae r’oma via. Ileleikristi uzẹme a re roro vievie he inọ Ọghẹnẹ mai nọ o wo ohrọriọ jẹ rrọ wowolẹ na o re wo evawere kpahe omanwa hayo ru ohwo jọ fihọ uweri. Ebaibol na ọ k’omai ehri rọkẹ evaifihọ nnọ Ọghẹnẹ o re wo isiuru kpahe olahiẹ ọvowa ha. (Iziewariẹ 32:4; Jerimaya 7:30, 31) Ẹsejọ, evaọ ikpe udhusoi buobu ze na, Jihova ọ sae k’uvẹ kẹ uye-oruẹ fiki ẹjiroro nọ ọ rọwo-kugbe areghẹ gbe uyoyou riẹ. Dede na orọnikọ ọye o ghine ru Ọmọ oyoyou riẹ, Jesu, ruẹ uye he. Fikiere, kọ eme ikere nana o bi ghine dhesẹ na?
Whaọ, o rẹ sai fiobọhọ k’omai riẹ otofa ẹme na otẹrọnọ ma roro kpahe oma owọ na kpobi, je muẹrohọ isiava nọ ẹme na “oreva” ọ roma via. Aizaya 53:10 o se nọ: ‘O rọ oreva ỌNOWO na nọ a horie ei oma; o te fi ei họ uweri; nọ ọ rehọ oma riẹ dhidhe fiki uzioraha, re ọ ruẹ uzuazọ uthethe, ọ vẹ te ruẹ emọ iruọmọ riẹ; oreva ỌNOWO na u reti vihọ evaọ obọ riẹ.’
Ovuẹ nọ o rrọ Ebaibol na kpobi u dhesẹ nnọ “oreva ỌNOWO na,” nọ a fodẹ evaọ urere owọ nana, u w’obọ kpahe erugba ẹjiroro riẹ ẹkwoma Uvie na. Jihova o te ru onana, o rẹ kpare esuo riẹ kpehru jẹ kuvẹ re a si izieraha nọ a reuku rai na no kẹ ahwo-akpọ ẹmeoyo—izieraha mai. (1 Iruẹru-Ivie 29:11; Olezi 83:18; Iruẹru 4:24; Ahwo Hibru 2:14, 15; 1 Jọn 3:8) Usiavẹ rọkẹ enana kpobi họ Ọmọ Ọghẹnẹ o re zihe ruọ ohwo-akpọ je dheidhe ẹtanigbo na. Wọhọ epanọ ma riẹ, evaọ ere oruo Jesu ọ ghinẹ ruẹ-uye. Ebaibol na ọ ta k’omai nọ “o te wuhrẹ [ẹmeoyo] eva udevie uye riẹ kpobi.” Fikiere Jesu o tube wo erere ro no uye-oruẹ oyena ze dede.—Ahwo Hibru 5:7-9.
Jesu ọ riẹ no emuhọ ze nnọ edhere ọghaghae nọ ọ gwọlọ nya na ọ rẹ te kẹre te uye ẹrova. Oyena u re vevẹ ro no eme riẹ nọ a kere fihọ Jọn 12:23, 24 na ze, oria nọ ma jọ se nọ: “Okenọ a rẹ rọ kẹ Ọmọ ohwo oro, u te no. Uzẹme, uzẹme mẹ ta kẹ owhai, ubi-ọka u gbe kie otọ re u whu hu, oye ọvo o rẹ jọ; rekọ u te whu, o rẹ mọ ibi buobu.” Ẹhẹ, Jesu ọ riẹ nọ o re kru ẹgbakiete riẹ tube rite uye-oruẹ uwhu. Ikuigbe na e gbẹ nyaharo: “ ’Whaọ ẹzi mẹ ọ be rova enẹna; kẹvẹ mẹ rẹ ta? Rekọ fiki onana mẹ jẹ nyaze oke nana. Ọsẹ kẹ odẹ ra oro.’ Koyehọ uru jọ u te no eva ehru ze nọ, ‘Mẹ kẹ riẹ oro uno, mẹ jẹ te wariẹ kẹ e oro.’ ”—Jọn 12:27, 28; Matiu 26:38, 39.
Eme nana nọ e wariẹ ikere na họ na ma rẹ sae rọ riẹ otọ Aizaya 53:10. Jihova ọ riẹ ziezi nọ oware nọ o te via kẹ Ọmọ riẹ na o ti wo enwoma. Ghele na avọ oruaro gbe ewoma ọkẹkẹe nọ o ti noi ze nọ o wo họ iroro, Jihova o te wo evawere kpahe oware nọ o te via kẹ Jesu na. Evaọ edhere yena o rọ ‘rọ oreva ỌNOWO na nọ a horie’ hayo a nwa, Mesaya na oma. Yọ Jesu omariẹ re o wo evawere kpahe oware nọ ọ sai ru nọ o ghine rugba na. Uzẹme, wọhọ epanọ Aizaya 53:10 u ku rie ei họ na, ‘oreva ỌNOWO na u ghine vihọ evaọ obọ riẹ.’