Owhowhovia Obọdẹ
EVA ekuhọ ẹgwae ẹgbukpe ọrọ Watch Tower Bible and Tract Society of Pennsylvania eva October 7, 2000, ohwo-agbara na, John E. Barr, omọvo Ugboma Esuo na o ru owhowhovia obọdẹ jọ. Owhowhovia ọnana o fiẹgbahọ eme nọ Theodore Jaracz gbe Daniel Sydlik a kake ta no vẹre evaọ ẹdẹ ọyena.—Rri ẹwẹ-obe avọ 3-7 gbe 24-27 ọrọ emagazini ọnana.
Nọ ọ jẹ riobọhọ okpẹme jọ, Broda Barr ọ ta nọ: “Iruo nọ a mu họ obọ ‘ọrigbo nọ o wo ẹrọwọ avọ areghẹ na’ avọ Ugboma Esuo riẹ i kpehru je bu vi enọ a kẹ egbẹgwae uzi. Eme nọ a kere fihọ obe-uzi egbẹgwae uzi itieye na i wo umuo evaọ ẹjiroro rai. Rekọ, Olori mai, Jesu Kristi, ọ rehọ utu ọrigbo ẹrọwọ na mu uzou ‘eware’ riẹ kpobi, hayo isiuru Uvie na evaọ otọakpọ na.”—Matiu 24:45-47.
Rọ kpahe ogbẹgwae Pennsylvania na, Brọda Barr o fibae nọ: “No anwẹnọ a rọ rehọ iẹe mu evaọ 1884 ze, Watch Tower Bible and Tract Society of Pennsylvania na o ruiruo ilogbo no evaọ ikuigbe ọgbọna mai. Ghele na, o rọ okwakwa uzi gheghe nọ ‘ọrigbo nọ o wo ẹrọwọ avọ areghẹ na’ o bi ro ruiruo evaọ okenọ u fo.”
Evaọ eme rai, Brọda Sydlik avọ Jaracz a ru rie vẹ nọ uzẹme na inọ a mu eware otọakpọ Olori na kpobi họ obọ ‘ọrigbo nọ o wo ẹrọwọ avọ areghẹ na’ o whaha utu ọrigbo na ha re a kuvẹ kẹ ezae nọ i te evaọ udevie “igodẹ efa” na re a rẹrote eghẹrẹ ewha-iruo jọ. (Jọn 10:16) Yọ uvumọ ẹjiroro Ikereakere ọ riẹ hẹ nọ o gwọlọ nọ ahwo kpobi hayo isu-iruo ọ egbẹgwae uzi nọ Isẹri Jihova a bi ro ruiruo na a rẹ jọ Ileleikristi nọ a wholo.
Brọda Barr ọ ta kẹ ogbotu na nọ kẹle na ahwo Ugboma Esuo orọ Isẹri Jihova jọ nọ i je ruiruo wọhọ isu-iruo a rehọ unevaze siobọno ọkwa isu-iruo ọrọ egbẹgwae kpobi nọ ‘ọrigbo nọ o wo ẹrọwọ avọ areghẹ na’ o bi ro ruiruo evaọ United States. A tẹ salọ inievo erọ utu igodẹ efa nọ i te ro nwene ai.
Ẹjiroro ọnana ọ be ghinẹ kẹ erere. O kẹ ahwo Ugboma Esuo na uvẹ re a raha oke viere evaọ ẹruẹrẹhọ emu abọ-ẹzi jẹ rẹro te ẹgwọlọ abọ-ẹzi okugbe-inievo akpọ soso na.
Evaọ ekuhọ, ohwo-agbara na ọ ta kẹ ogbotu riẹ nọ oma o be were na nọ: “Dede nọ a mu ewha-iruo uzi gbe erọ ẹruorote h’obọ esẹro nọ i te ziezi, . . . aikpobi a bi ruiruo evaọ otọ ọkpọvio abọ-ẹzi Ugboma Esuo na. . . . Mai kpobi ma rọ oma olẹ rẹroso Jihova kẹ eghale riẹ evaọ omodawọ okugbe mai evaọ eruo oreva riẹ, rọkẹ ọghọ gbe oruaro odẹ ulogbo riẹ.”