Dikihẹ Ga Avọ Imuẹro Egaga
“Okwakwa Obọdẹ”
NO ANWỌ emuhọ ikuigbe ọgbọna rai ze, Isẹri Jihova a wo isiuru gaga kpahe eruẹaruẹ Jesu Kristi jọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.” (Matiu 24:14) Nọ 1914—emuhọ “edẹ urere” na—o je sikẹle, Emọ-Uwuhrẹ Ebaibol oruọzewọ a duomahọ ewhowho akpọ-soso nọ o wo ibe he ọrọ ewuhrẹ nọ o no Ikereakere Efuafo na ze avọ imuẹro egaga.—2 Timoti 3:1.
Re a nyate ute rai ọrọ ewhowho emamọ usi na wariẹ akpọ-soso họ, idibo Jihova enana a fi edhere jọ nọ o jọ ọkpokpọ, vọ avọ aruọwha, jẹ jọ vevẹ h’iruo. Re ma wuhrẹ kpahe iẹe viere, joma zihe kpohọ oke anwae.
Edhere Ọkpokpọ nọ A ro Whowho Emamọ Usi Na
O jọ amara January, ukpe 1914. Dae rehọ iẹ nọ whọ keria udevie ahwo 5,000 evaọ ọgwa-ologbo jọ nọ o muebi evaọ New York City. Ughẹgbe isinima jọ o rọ aro ra. Ọzae jọ nọ ọ dhẹ eza uzou nọ o ku ewu othethei họ ọ tẹ romavia evaọ ughẹgbe na. Whọ ruẹ iwoho isinima nọ e be t’ẹme he no, rekọ ọzae ọnana ọ be t’ẹme, yọ who bi yo eme riẹ. Whọ be ruẹ odhesẹvia ọsosuọ ọrọ okwakwa ona jọ nọ a bi dhesẹ, yọ ovuẹ na o rọ oghẹrẹsa. Ọnọ ọ be t’ẹme na họ Charles Taze Russell, prẹsidẹnte ọsosuọ ọrọ Watch Tower Society, yọ okwakwa nọ a ru na họ “Photo-Drama of Creation.”
C. T. Russell o vuhu ewoma isinima mu evaọ ẹnyate ahwo buobu. Fikiere, evaọ 1912, o te muọ “Photo-Drama of Creation” na họ eruo. Uwhremu na, o tẹ te jọ okwakwa ifoto gbe isinima nọ u theri te euwa eree, avọ ekọlọ gbe edo.
A ruẹrẹ e riẹ họ re a dhesẹ iẹe evaọ abane, “Photo-Drama” na o rehọ enọ i bi rri rie no etoke emama ruọ ikuigbe ohwo-akpọ rite ekuhọ ẹjiroro Jihova Ọghẹnẹ kẹ otọakpọ na gbe ohwo-akpọ evaọ etoke ekuhọ Esuo Odu-Ikpe Kristi. Ikpe buobu e te vrẹ taure ewuhrẹ-eware-ikuo utioye na o tẹ te nya-eki ziezi evaọ akpọ na. Ghele na, ima ahwo buobu a rri “Photo-Drama of Creation” na ọvọvẹ!
Ikporakporo obọdẹ gbe eme 96 nọ a kporo fihọ erekọdo eye a ruẹrẹhọ kẹ “Photo-Drama” na. Iwoho sa-sa nọ a je dhesẹ na yọ iwoho nọ a drọ nọ i dhesẹ ikuigbe akpọ. O tẹ jẹ gwọlọ re a drọ iwoho ekpokpọ udhusoi ẹko buobu. Iwoho jọ nọ a je dhesẹ na gbe ifimu na yọ enọ a rehọ obọ drọ avọ ẹroyẹ. Yọ a ru onana unu ẹsebuobu, keme, nọ omoke jọ o vrẹ no, a te ru eko 20 nọ ọvuọvo o wo abane na. Onana u te ru ei lọhọ re a sai dhesẹ abọjọ “Photo-Drama” na evaọ ikpẹwho 80 evaọ ẹdọvo!
Oware nọ Ogbotu na A Jẹ Ruẹ Hẹ
Eme ọ via nọ ogbotu na ọ jẹ ruẹ hẹ evaọ etoke edhesẹ “Photo-Drama” na? Alice Hoffman Ọmọ-Uwuhrẹ Ebaibol na ọ ta nọ: “Edrama na i re muhọ avọ uwoho Brọda Russell. Nọ ọ tẹ romavia no evaọ ughẹgbe na, igbenu riẹ i ve muhọ enuhu, a ve fi erekọdo họ . . . ma vẹ reawere ezọgaviẹ kẹ urru riẹ.”
Nọ ọ jẹ ta kpahe isinima na, Zola Hoffman ọ kareghẹhọ nọ: “Mẹ keria kparo fihọ avọ igbunu nọ ma je rri edhesẹ edẹ emama na. Idodo e jariẹ nọ i re rovie ẹmẹrera evaọ iraro mai na.”
Ọnọ o you ikporakporo na, Karl F. Klein ọrọ Ugboma Esuo Isẹri Jihova na o fibae nọ: “Eva okiovo na nọ a bi dhesẹ iwoho enana na, ikporakporo iwowoma jọ i re lelie ei, ikporakporo wọhọ erọ Narcissus gbe Humoreske.”
Eware efa nọ a rẹ kareghẹhọ e riẹ re. “Ẹsejọ eware ethobọ jọ nọ i re fou ehwẹ e rẹ via,” ere Clayton J. Woodworth, ọrọ ọmaha ọ kareghẹhọ. “Okejọ erekọdo na i je kporo ọ ‘Rra Wọhọ Ọvra Kpohọ Ugbehru Ra,’ yọ evaọ ughẹgbe na ifoto ọ gigantosaurus, arao ologbo jọ nọ ọ jọ taure Ẹvo na o te ti ku, ọ tẹ romavia”!
U no “Photo-Drama of Creation” na no, u kri hi “Eureka Drama” o te lelie ei. (Rri ẹkpẹti na.) Ọyena yọ ọguakugbe ọ evuẹ ogbotu, avọ ikporakporo nọ a rekọdo. Ọdekọ na o wo erekọdo gbe iwoho. Dede nọ “Eureka Drama” na o wo iwoho nọ e rẹ nya ha, o wo obokparọ gaga nọ a je dhesẹ iẹe evaọ eria nọ ahwo a jo bu tere he.
Okwakwa Isẹri-Ise Ulogbo
Evaọ ekuhọ 1914, yọ a dhesẹ “Photo-Drama” na kẹ ogbotu nọ o bu vi 9,000,000 no evaọ North America, Europe, gbe Australia. Dede nọ a bu tere he, Emọ-Uwuhrẹ Ebaibol na a kare imuẹro egaga nọ a gwọlọ họ re a rehọ okwakwa okpokpọ nana whowho emamọ usi na. A ghọghọ re a zọhọ ugho nọ o gwọlọ re a haya eria nọ i fo nọ a re jo dhesẹ iwoho enana. Fikiere “Photo-Drama of Creation” na o ruiruo ilogbo evaọ eruvẹ Ẹme gbe ẹjiroro Ọghẹnẹ kẹ enọ i rri rie.
Evaọ ileta ro se C. T. Russell, ohwo jọ o kere nọ: “Iweze ọsosuọ yena nọ me ro rri Edrama ra na o jọ oke enwene ologbo evaọ uzuazọ mẹ; hayo, mẹ rẹ ta nọ, oke enwene ologbo evaọ eriariẹ mẹ kpahe Ebaibol na.” Omọfa jọ ọ ta nọ: “Me je ti kie ruọ agbefẹ iroro ekpavrẹ egagọ no yọ me roro nọ ‘Photo-Drama of Creation’ na nọ a dhesẹ evaọ etenẹ evaọ uvewhru nọ u kpo na họ oware nọ u siwi omẹ. . . . Enẹna me wo udhedhẹ oyena nọ akpọ na ọ sae kẹ hẹ na no yọ u ti no omẹ obọ họ fiki aghare riẹ kpobi.”
Demetrius Papageorge, oruiruo nọ o kri no evaọ oria-uzou Society, ọ ta nọ: “ ‘Photo-Drama’ na yọ okwakwa obọdẹ, nọ ma te roro unu osese orọ Emọ-Uwuhrẹ Ebaibol na gbe umutho ugho nọ o jariẹ. O ghine wo ẹzi Jihova evaọ emu riẹ!”
[Ẹkpẹti/Iwoho nọ e rrọ ẹwẹ-obe avọ 28, 29]
“Eureka Drama” Na
Emerae eree nọ a ru edhesẹ ọsosuọ “Photo-Drama” na no, Society ọ tẹ ruẹ ẹgwọlọ re a ru oghẹrẹ ofa riẹ nọ a re se “Eureka Drama.” Nọ a gbe je dhesẹ “Photo-Drama” na evaọ ikpewho ilogbo na, yọ “Eureka” na o be kẹ ugogo ovuẹ ovona evaọ iwhre gbe eria imivu. A dhesẹ abọjọ “Eureka Drama” na inọ o kẹ “inievo-emetẹ na uvẹ obọdẹ” nọ a rẹ rọ ta usiuwoma na. Fikieme o rọ rrọ ere? Fikinọ ẹkpẹti erekọdo riẹ o gbẹdẹ te 14kg gheghe ọvo. Dede na, re a dhesẹ iẹe, o rẹ gwọlọ re a wọ erekọdo lele oma.