Isẹri Jihova—A be Nyaharo avọ Imuẹro Egaga!

Iyẹrẹ Ẹgwae Ẹgbukpe

EVAỌ edẹ avro enana, Isẹri Jihova e viodẹ wọhọ Ileleikristi nọ i wo imuẹro egaga. A ru onana vẹ eva ẹgwae ẹgbukpe ọrọ Watch Tower Bible and Tract Society of Pennsylvania, ọnọ a gba evaọ Ọgwa Okokohọ Isẹri Jihova ọrọ Jersey City, New Jersey, evaọ Saturday, October 7, 2000.a

Evaọ eme emuhọ riẹ, ohwo-agbara na, John E. Barr, omọvo Ugboma Esuo ọrọ Isẹri Jihova, ọ ta nọ: “Evaọ usu ahwo ima-idu erọ otọakpọ na kpobi, mai họ enọ e riẹ jẹ rọwo nnọ a rehọ Ọmọ oyoyou Jihova, Kristi Jesu, mu no evaọ obọ idhiwu, nọ o bi su evaọ udevie ewegrẹ riẹ.” A dhesẹ oka imuẹro egaga itieye na via evaọ iyẹrẹ oghọghọ ezeza rono eria sa-sa akpọ na ze.

Uzẹme Ebaibol U Ro Fi Iruẹru-Imizi Kparobọ Evaọ Haiti

Iruẹru-imizi e da Haiti fia. Ọsẹro Ogbẹgwae Uwou-Ogha na, John Norman, o gbiku nọ: “Ahwo a rẹ dẹ eda rọ thọ oma rai.” Ọboẹva jọ o te ti wo avro evaọ okenọ o bru owọ riẹ evaọ asidẹnte. U gbe rie unu nọ: ‘Fikieme onana o jẹ via kẹ omẹ otẹrọnọ imizi na e be thọ omẹ?’ Wọhọ amọfa buobu, Isẹri Jihova a te ti wuhrẹ ọzae nana uzẹme na, a te fiobọhọ kẹe siomano iruẹru-imizi. Irẹro ẹvi evaọ Haiti i dhesẹ oma via evaọ uzẹme na nnọ evaọ April 19, 2000, ahwo nọ a ziọ Ekareghẹhọ uwhu Kristi a rọ asiane bu vi iwhowho Uvie nọ e rọ ẹkwotọ ọyena.

Ọwhọ Evaọ Ẹkwotọ Ologbo Korea

Evaọ Korea, ahwo 40 evaọ udhusoi Isẹri Jihova a rọ odibọgba oke-kpobi na. Ọsẹro Ogbẹgwae Uwou-Ogha na, Milton Hamilton, ọ ta nọ: “Ẹkwoma ogbaẹmo ulogbo nana, ma bi ru ẹkwotọ mai nọ ahwo riẹ a bu vi ima 47 na re ẹsiẹvo amara.” Ubu orọ ikoko obọ-rọ-t’ẹme u gbunu. Evaọ okogho obọ-rọ-t’ẹme jọ, a bi ru ebe iwuhrẹ Ebaibol 800. A tẹ ghale iẹe, o rẹ jọ obe uwuhrẹ ovo kẹ omọvo. Yoma na, a gbe bi mu emoha fihọ uwou-odi fiki seomaba-edhehọ rai. Rekọ a bi tete Ileleikristi ẹrọwọ enana nọ a fihọ uwou-odi na, yọ ẹsibuobu a rẹ kẹ ai iruo nọ a jọ gwọlọ ohwo nọ a fievahọ.

Ẹnyate Use-abọ Ubu Evaọ Mexico

Iwhowho Uvie 533,665 e niyẹrẹ usiuwoma ota evaọ Mexico evaọ August 2000. Ahwo nọ a kpohọ Ekareghẹhọ a rọ akuasa bu vi unu oyena. Ọsẹro Ogbẹgwae Uwou-Ogha na, Robert Tracy, ọ ta nọ: “Ute mai kẹ enukpe nana họ ma rẹ bọ Egwa Uvie 240 efa.” O fibae nọ: “Dede na, unu nọ ma gwọlọ u bu viere.”

Emoha nọ e rọ udevie Isẹri Jihova evaọ Mexico a fo aruorokele. Kpahe uzoge jọ, ozerẹ Kathọlik jọ ọ ta nọ: “Mẹ hae gwọlọ wo uzoge ọvuọvo nọ ọ wọhọ e riẹ evaọ udevie ilele mẹ. Ahwo nana a si omẹ urru fiki ẹgbakiete rai gbe eroruiruo areghẹ ọrọ Ebaibol na. A thothọ Ọghẹnẹ no, makọ o tẹ gwọlọ nọ a re fi izuazọ rai họ ọza dede.”

Ẹgbakiete Evaọ Udevie Ozighi Evaọ Sierra Leone

No anwọ April 1991 ze, okenọ ẹmo omoma o ro du lahwe evaọ Sierra Leone, a kpe idu ahwo buobu no, nwae oma hayo ru ai zihe ruọ emo. Ọsẹro Ogbẹgwae Uwou-Ogha na, Bill Cowan, ọ niyẹrẹ nọ: “Ẹmo gbe ọbẹwẹ i kpomahọ ahwo gaga no. Ibuobu nọ i je gbolo aro kẹ ovuẹ mai a be kezọ avọ isiuru enẹna. O rọ oware aghẹruẹ hẹ re ahwo a wẹriẹ rueva Egwa Uvie mai ziọ uwuhrẹ ọsosuọ rai. A be da inievo na ji evaọ edhere ẹsibuobu be yare uwuhrẹ Ebaibol.” Ghelọ ozighi nọ ọ rọ orẹwho na, iruo usiuwoma ota Uvie na e be mọ ubi evaọ Sierra Leone.

Iruo Ebabọ Ilogbo Evaọ South Africa

Obọnana, ẹgwọlọ rọkẹ idu Egwa Uvie buobu ọ rọ ẹkwotọ nọ uwou-ogha South Africa o be rẹro te na. A bọ egwa udhusoi buobu no. Omọvo Ogbẹgwae Uwou-Ogha na, John Kikot, o muẹrohọ nọ: “Ukpenọ a rẹ jọ uwou owhre hayo otọ ire ru ewuhrẹ, wọhọ epanọ a je ru vẹre, inievo mai a be sai ru ewuhrẹ evaọ emamọ eria avọ emamọ egbara. Dede nọ Egwa Uvie enana buobu i bu ona ha, e rọ iwou nọ e mai woma evaọ oria rai. Evaọ eria jọ, a ruẹ nọ okenọ a tẹ bọ Ọgwa Uvie no, ukpe nọ u lele i rie na ukoko na o vẹ rọ akuava bu viere.”

Oge Ọkpokpọ Isẹri Evaọ Ukraine

Evaọ etoke ukpe iruo 2000 na, ẹkwotọ nana ọ ruẹ ẹvi nọ ọ mai kpehru ọrọ iwhowho-uvie 112,720. Bu vi ahwo 50,000 evaọ udevie enana a wuhrẹ uzẹme Ebaibol na evaọ ikpe isoi nọ i kpemu na. John Didur, ọsẹro Ogbẹgwae Uwou-Ogha na, ọ ta nọ: “Evaọ uzẹme, Jihova ọ kpare oge ọkpokpọ, ọrọ uzoge Isẹri via no re a whowho odẹ riẹ!” O fibae nọ: “Evaọ ikpe ivẹ nọ i kpemu na, ma fi emagazini họ ada bu vi ima 50 no, onọ o rọ unu ahwo orẹwho na. K’amara k’amara, a tẹ ghale iẹe, ma bi wo ileta odu no obọ ahwo nọ a wo isiuru ze be yare evuẹ efa.”

Abọ Isiuru Ọfa ọrọ Ọruẹrẹfihotọ Na

Daniel Sydlik, omọvo Ugboma Esuo na, ọ t’ẹme nọ ọ rẹ daruọ oma. Uzoẹme na, “Epanọ Ugboma Esuo na O ro Wo Ohẹriẹ no Ogbẹgwae Uzi,” onọ o roma via evaọ emagazini nana, a rehọ e riẹ no ẹme ọyena ze.

Theodore Jaracz ọrọ Ugboma Esuo na ọ t’ẹme nọ o re duobọte iroro nọ uzoẹme riẹ o rọ “Ọghẹnẹ Họ Ọnọ Ọ Rehọ Esẹro gbe Idibo Iruiruo na Mu.” Uzoẹme jọ nọ o rọ emagazini nana u no ẹme ọyena ze.

Ẹgwae ẹgbukpe na o te je kugbe ovuẹ ojaja jọ nọ ohwo Ugboma Esuo na, David Splane, ọ kẹ kpahe uzoẹme ẹgbukpe orọ ukpe 2001 na. A rehọ e riẹ no eme Pọl ukọ na ze, onọ o ta nọ: “Dikihẹ ga avọ imuẹro eva oreva Ọghẹnẹ.” (Ahwo Kọlọsi 4:12) Isẹri Jihova evaọ akpọ na soso a gba riẹ mu re a ru ere nọ a be rọ oruọzewọ ruabọhọ ẹta emamọ usi Uvie Ọghẹnẹ evaọ otọakpọ na kpobi na.—Matiu 24:14.

[Oruvẹ-obotọ]