Gwọlọ Jihova Taure Ẹdẹ Ofu Riẹ O Te Ti te
“Wha gwọlọ ỌNOWO na . . . wha gwọlọ ẹrẹreokie, wha gwọlọ oma-urokpotọ; otiẹsejọ a [rẹ te ko] owhai dhere eva ẹdẹ [ofu ỌNOWO] na.”—ZEFANAYA 2:3.
1. Ẹvẹ uyero abọ-ẹzi Juda o jọ evaọ okenọ Zefanaya o muọ iruo aruọruẹ riẹ họ?
ZEFANAYA o muọ iruo aruọruẹ riẹ họ evaọ etoke ukpokpoma evaọ ikuigbe Juda. Uyero abọ-ẹzi orẹwho na u kie kpotọ gaga. Ukpenọ a re fievahọ Jihova, ahwo na a jẹ rẹro so izerẹ egedhọ gbe ebuẹva-isi kẹ ọkpọvio. Egagọ Bale, avọ iruẹru emọyẹ riẹ, e da otọ na fia. Isu na—emọ-ivie na, ikpahwo, gbe iguẹdhọ na—a bi kienyẹ enọ a hae thọ. (Zefanaya 1:9; 3:3) Agbẹta nọ Jihova ọ rọ ‘riẹ obọ’ mukpahe Juda gbe Jerusalẹm re ọ raha ae na!—Zefanaya 1:4.
2. Didi ẹruore ọ riẹ kẹ idibo ẹrọwọ Ọghẹnẹ nọ e rọ Juda?
2 Dede na, epanọ uyero na u yoma te na, ẹruore ọ dina riẹ. Ọmọzae Amọn, Josaya, ọ ruọ uvie na no. Dede nọ ọmaha gheghe ọ rọ, Josaya o wo uvi uyoyou kẹ Jihova. Otẹrọnọ ovie ọkpokpọ na o zihe egagọ efuafo ziọ Juda, ẹvẹ o te jọ uduotahawọ te rọkẹ umutho ahwo nọ e be rọ ẹrọwọ gọ Ọghẹnẹ na! Onana o sae wọ amọfa re a kuomagbe ai re a je siwi ai evaọ ẹdẹ ofu Jihova na.
Itee nọ A rẹ Rọ Zọ
3, 4. Didi itee esa a rẹ nyate re ohwo ọ tẹ zọ evaọ ẹdẹ “ofu ỌNOWO na”?
3 Kọ a ti ghine siwi ahwo jọ evaọ ẹdẹ ofu Jihova na? E, thakpinọ a nyate itee esa nọ a jọ Zefanaya 2:2, 3 fodẹ na. Nọ ma bi ti se awọ nana na, joma muẹrohọ itee esa nana. Zefanaya o kere nọ: “[Taure] a te ti le owhai vrẹ wọhọ ohọrọ nọ a rẹ viẹ kufiẹ, [taure] ofu omuomu ỌNOWO na, o te ti te owhai oma, [taure] ẹdẹ ofu ỌNOWO na o te ti te owhai oma. Wha gwọlọ ỌNOWO na, whai enọ e rọ oma kpotọ eva otọ na, enọ i bi koko ijaje riẹ; wha gwọlọ ẹrẹreokie, wha gwọlọ oma-urokpotọ; otiẹsejọ a [rẹ te ko] owhai dhere eva ẹdẹ [ofu ỌNOWO] na.”
4 Re ohwo ọ ruẹse zọ, ọ rẹ (1) gwọlọ Jihova, (2) gwọlọ ẹrẹreokie, jegbe (3) gwọlọ omarokpotọ. Itee enana e rẹ jọ isiuru ilogbo k’omai nẹnẹ. Fikieme? Keme wọhọ epanọ Juda avọ Jerusalẹm a rẹriẹ ovao ku ẹdẹ ọvunugu evaọ ikpe-udhusoi avọ ihrẹ B.C.E. na, erẹwho Kristẹndọm—ẹhẹ, irumuomu kpobi—a be nya kpohọ ohọre kugbe Jihova Ọghẹnẹ eva ‘uye ulogbo’ nọ o be tha na. (Matiu 24:21) Ohwo nọ ọ gwọlọ nọ a rẹ ko ẹe dhere kpobi eva oke oyena ọ rẹ j’owọ areghẹ hrọ enẹna. Oghẹrẹ vẹ? Ẹkwoma ẹgwọlọ Jihova, ẹgwọlọ ẹrẹreokie, gbe ẹgwọlọ omarokpotọ re oke o tẹ te vabọ!
5. Eme u kugbe re a “gwọlọ ỌNOWO na” nẹnẹ?
5 Whọ rẹ sae ta nọ: ‘Mẹ yọ odibo Ọghẹnẹ nọ ọ r’oma mudhe jẹ họ-ame no, omọvo Isẹri Jihova. Kọ mẹ gbẹ be nyate itee eyena anwẹdẹ?’ Evaọ uzẹme, o gwọlọ vi oma mai nọ ma re ro mudhe kẹ Jihova. Izrẹl yọ orẹwho nọ o roma mudhe, rekọ evaọ edẹ Zefanaya ahwo Juda a jẹ rria te omarọkẹ oyena ha. Fikiere, a tẹ se orẹwho na. ‘Re a gwọlọ ỌNOWO na’ nẹnẹ o kẹre te ewo gbe ẹyọrọ emamọ usu kugbei avọ ukoko otọakpọ riẹ. O gwọlọ ẹriẹ epanọ Ọghẹnẹ o re rri eware gbe ẹjiroro riẹ nọ a rẹ kezọ kẹ. Nọ ma tẹ be roma totọ wuhrẹ Ẹme riẹ, roro kpahe iẹe, je bi fi ohrẹ riẹ họ iruo evaọ uzuazọ yọ ma be gwọlọ Jihova. Nọ ma be jẹ gwọlọ ọkpọvio Jihova evaọ olẹ ẹsikpobi jẹ be nya lele ekpakpọ ẹzi ofuafo riẹ na, usu mai kugbei u re diwi yọ oma o rẹ w’omai re ma gọe ‘avọ udu, ẹwẹ, gbe ẹgba mai kpobi.’—Iziewariẹ 6:5; Ahwo Galesha 5:22-25; Ahwo Filipai 4:6, 7; Eviavia 4:11.
6. Ẹvẹ ma rẹ rọ “gwọlọ ẹrẹreokie,” kọ ẹvẹ onana o rọ lọhọ makọ evaọ akpọ ọnana?
6 Ute avivẹ nọ a fodẹ eva Zefanaya 2:3 họ re a “gwọlọ ẹrẹreokie.” Ibuobu mai i ru inwene ilogbo no re ma sai te kẹ ame-ọhọ Oleleikristi, rekọ ma rẹ ruabọhọ ekru itee uruemu ikiẹrẹe Ọghẹnẹ evaọ edẹ uzuazọ mai kpobi. Ejọ nọ e riẹ muhọ ziezi evaọ abọ nana a kẹ oma rai uvẹ re akpọ na o gbe ai ku. O rẹ bẹbẹ re a gwọlọ ẹrẹreokie, keme ahwo nọ a bi rri ọfariẹ-ogbe, ọrueta, gbe izieraha efa wọhọ oware nọ u kie ze a wariẹ omai họ. Ghele na, isiuru egaga re ma ru Jihova eva were o rẹ g’obọ vi isiuru ẹgwọlọ ọjẹrehọ akpọ na ẹkwoma omodawọ re ma kie lele iei. Juda o ku aruoriwo Ọghẹnẹ fiẹ keme ọ raro kele erẹwho ekẹloma egedhọ riẹ. Ukpenọ ma rẹ raro kele akpọ na, joma ‘raro kele Ọghẹnẹ,’ hae wha “ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.”—Ahwo Ẹfẹsọs 4:24; 5:1.
7. Ẹvẹ ma rẹ rọ “gwọlọ oma-urokpotọ”?
7 Ute avesa nọ Zefanaya 2:3 o fodẹ họ otẹrọnọ ma gwọlọ nọ a ko omai dhere evaọ ẹdẹ ofu Jihova, ma rẹ “gwọlọ oma-urokpotọ.” N’ẹdẹ ruẹ ẹdẹ, ma be roma wholo ezae, eyae, gbe izoge nọ e kare omarokpotọ. Rọkẹ ae, re ohwo ọ jọ wowolẹ yọ aghọ. A rri ẹmeoyo wọhọ oyẹlẹ ulogbo. A re si ikẹ eware, avọ oriobọ, jẹ ta họ amọfa obọ, si ikẹ inọ oware nọ a rri fihọ “ẹkẹ” rai na u re te ai obọ hrọ, o tẹ make rọnọ o rẹ rehọ uzuazọ ohwo dede. Ẹvẹ u re yoma te otẹrọnọ iruemu enana jọ i kpomahọ omai! Onana họ oke nọ ma rẹ rọ “gwọlọ oma-urokpotọ.” Evaọ edhere vẹ? Ẹkwoma ẹmeoyo kẹ Ọghẹnẹ, rọ omarokpotọ jẹ ọwhọkuo riẹ rehọ jẹ nya lele oreva riẹ.
Fikieme Ẹkodhere O jẹ Rọ “Otiẹsejọ”?
8. Eme ẹme na “otiẹsejọ” nọ a ro ruiruo eva Zefanaya 2:3 na u dhesẹ?
8 Muẹrohọ nnọ Zefanaya 2:3 o ta nọ: “Otiẹsejọ a [rẹ te ko] owhai dhere eva ẹdẹ [ofu ỌNOWO] na.” Fikieme o jẹ ta nọ “otiẹsejọ” evaọ okenọ o jẹ ta kpahe “enọ e rọ oma kpotọ eva otọ na”? Whaọ, ahwo omarokpotọ na a jẹ emamọ owọ no, rekọ a re fu uke he. A ti yeri uzuazọ rai kuhọ no avọ ẹrọwọ họ. O lọhọ re ejọ rai a kie ruọ uzioraha. Ere o rọ k’omai re. Jesu ọ ta nọ: “Ọnọ o kiakọ te urere ọye a re ti siwẹ.” (Matiu 24:13) Ẹhẹ, esiwo evaọ ẹdẹ ofu Jihova o roma hwa oware uwoma nọ ma re gbe ru evaọ aro riẹ. Kọ oyena họ ọtamuo ra?
9. Didi owọ ukiẹrẹe Josaya Ovie ọmoha na ọ jẹ?
9 O rọ vevẹ nọ evaọ owojẹ kpahe eme Zefanaya, oma o wọ Josaya Ovie na “gwọlọ ỌNOWO na.” Ikereakere na e ta nọ: “Evaọ ukpe avọ eree riẹ nọ o je su, okenọ [Josaya] ọ gbẹ jọ ọmaha [oware wọhọ ikpe 16], o te mu Ọghẹnẹ Devidi ọsẹ riẹ họ ẹgwọlọ.” (2 Iruẹru-Ivie 34:3) Josaya ọ tẹ jẹ ruabọhọ ‘ẹgwọlọ ẹrẹreokie,’ keme ma se nọ: “Evaọ ukpe avọ ikpegbivẹ [nọ Josaya ọ jọ oware wọhọ ikpe 20], o te mu eria ikpehru Juda avọ Jerusalem họ e ru fuọ, Asherim gbe emedhọ nọ a ru kpobi na. A te kporo egbada-idhe Bale no evaọ iraro riẹ.” (2 Iruẹru-Ivie 34:3, 4) Josaya ọ “gwọlọ oma-urokpotọ” re, ọ romakpotọ j’owọ ru Jihova eva were ẹkwoma otọ na nọ o ru fo no emedhọ gbe iruẹru egagọ erue efa. Ẹvẹ iruẹru orufuọ eyena e lẹliẹ eva were otu omarokpotọ efa te!
10. Eme ọ jọ Juda via evaọ 607 B.C.E., kọ amono a seba?
10 Ahwo Ju buobu a kurẹriẹ bru Jihova ze evaọ etoke esuo Josaya. Rekọ, nọ ovie na o whu no, ibuobu i te zihe kpohọ idhere anwae rai—kpohọ iruemu nọ Ọghẹnẹ ọ jẹrehọ vievie he. Wọhọ epanọ Jihova ọ ta no, ahwo Babilọn a tẹ wọ ze Juda a tẹ raha okpẹwho riẹ, Jerusalẹm, evaọ 607 B.C.E. Ghele na, ẹruore ọ gbẹ riẹ. Jerimaya ọruẹaro na, Ẹbẹdmẹlẹk ohwo Ẹtiopia na, uyẹ Jonadab na, gbe amọfa nọ a jọ avọ ẹrọwọ kẹ Ọghẹnẹ a ko rae dhere evaọ ẹdẹ ofu Jihova ọyena.—Jerimaya 35:18, 19; 39:11, 12, 15-18.
Ewegrẹ Ọghẹnẹ—Wha Yọroma!
11. Fikieme o rọ rrọ use-abọ re a jọ avọ ẹrọwọ kẹ Ọghẹnẹ nẹnẹ, kọ eme u fo nọ ewegrẹ ahwo Jihova a re roro kpahe?
11 Nọ ma be hẹrẹ ẹdẹ ofu Jihova kpahe eyero omuomu nana, ma be nyaku “egheghẹrẹ edawọ.” (Jemis 1:2) Evaọ ekwotọ buobu nọ a bi jo rri ufuoma egagọ ghaghae, isu-egagọ ẹghẹ a rehọ ogaga rai viẹ enọ e rọ egọmeti họ no re a sai kpokpo ahwo Ọghẹnẹ. Ahwo ugbarugba a be raha odẹ Isẹri Jihova, bi se ai “ẹko-egagọ imuozọ.” Ọghẹnẹ ọ riẹ kpahe owojẹ rai—yọ a te siọ enana uye ba ẹkẹ hẹ. U re woma re ewegrẹ riẹ a roro kpahe oware nọ o via kẹ ewegrẹ anwae ahwo riẹ itieye na wọhọ ahwo Filistia. Eruẹaruẹ na e ta nọ: “Gaza ọ rẹ te kua, Ashkelọn ọ rẹ te jọ ofofe; a re ti le ahwo Ashdọd no evaọ udevie uvo, a ve ti kpe ahwo Ekrọn kpobi no.” Ikpẹwho Filistia nọ a re se Gaza, Ashkẹlọn, Ashdọd, gbe Ekrọn a te raha ai no.—Zefanaya 2:4-7.
12. Eme ọ via kẹ Filistia, Moab, gbe Amọn?
12 Eruẹaruẹ na e gbẹ nyaharo be ta nọ: “Me yo ẹkoko ahwo Moab, gbe eka-ela ahwo Amọn, epanọ a rehọ ahwo mẹ gbọdẹ te, je se eha kpahe etọ rai.” (Zefanaya 2:8) Uzẹme, Ijipti gbe Ẹtiopia a ruẹ-uye evaọ abọ egbaẹmo Babilọn. Kọ eme họ ẹdhoguo Ọghẹnẹ mukpahe Moab gbe Amọn, erẹwho nọ i mu no oma Lọt, ọmọ oniọvo Abraham, ze na? Jihova ọ ruẹaro nọ: “Moab ọ rẹ te jọ wọhọ Sọdọm, jegbe Amọn wọhọ Gomora.” Wo ohẹriẹ no ini-ode rai—emetẹ ivẹ Lọt, enọ e zọ no ọraha Sodọm avọ Gomora—a te ko Moab avọ Amọn omoya na dhere he evaọ ẹdhoguo ofu Ọghẹnẹ. (Zefanaya 2:9-12; Emuhọ 19:16, 23-26, 36-38) Nẹnẹ, diẹse Filistia gbe ikpewho riẹ e rọ? Kọ ẹvẹ kpahe Moab avọ Amọn nọ i je heri vẹre na? Whọ tẹ gwọlọ kẹhẹ, whọ te rue rae he.
13. Ekwakwa anwae vẹ a jọ Ninẹve tọ ku?
13 Evaọ edẹ Zefanaya, Uvie Asiria o jọ gidigba. Nọ o je dhesẹ abọjọ uwou ovie nọ ọ tọ lahwe evaọ Ninẹve, okpẹwho Asiria, Austen Layard ọkiotọ eware-anwae na o kere nọ: “A ghale isilini na . . . fihọ ibribro, a drọ idodo hayo iwoho erao fihọ ae. A rehọ akọ-eni hwa ejọ, avọ ona gbe ekwakwa erru nọ e wariẹ igenu ẹwẹ ọvuọvo họ. A rehọ igoru gbe isiliva ralọ hayo ru ona họ ekpọ-ehi na gbe abọ otuwou na; yọ irre eghaghae, ejọ rai ure sida, a ro ku ekwakwa ire riẹ.” Ghele na, wọhọ epanọ a ruẹaro riẹ eva eruẹaruẹ Zefanaya, a te raha Asiria yọ okpẹwho riẹ, Ninẹve, o ti zihe ruọ “oria ufofe.”—Zefanaya 2:13.
14. Ẹvẹ eruẹaruẹ Zefanaya i ro rugba kpahe Ninẹve?
14 Ikpe 15 ọvo nọ Zefanaya ọ ta eruẹaruẹ yena no, Ninẹve ologbo na o te kie, a tẹ whọlọ uwou-uvie riẹ no. Ẹhẹ, okpẹwho omoya ọyena o zihe ruọ ezuzu no. A dhesẹ epanọ ọraha na ọ ga te vevẹ eva eme enana: “Udele gbe ọrigbẹ e rẹ te ria eria nọ i wo uzou eva riẹ [nọ i kie no], oturukpẹ o re ti gho eva unwido, [Ọraha o ti no] obọ eva unuẹthẹ [ze].” (Zefanaya 2:14, 15) Ikpiwou Ninẹve i re ti fo kẹ ẹrria ivuẹ gbe idele ọvo. Edo ekiọthuọ, ubo egbaẹmo, ubo-olẹ izerẹ e gbẹ te jọ iyẹrẹ okpẹwho na ha. Evaọ idhere eyena nọ i je titi vẹre na, uvou nọ a ti yo kpobi họ onọ o be jọ unwido so ile uweri, ẹsejọhọ ile oviẹ ọvra hayo edo ofou. Evaọ edhere ọvona, ajọ uzuazọ u kuhọ kẹ ewegrẹ Ọghẹnẹ kpobi!
15. Eme ma rẹ sai wuhrẹ no oware nọ o via kẹ Filistia, Moab, Amọn, gbe Asiria na ze?
15 Eme ma rẹ sai wuhrẹ no oware nọ o via kẹ Filistia, Moab, Amọn, gbe Asiria na ze? Ona: Wọhọ idibo Jihova, ma rẹ dhozọ uvumọ oware no obọ ewegrẹ mai ze he. Ọghẹnẹ ọ be ruẹ oware nọ enọ e wọso ahwo riẹ a bi ru. Jihova ọ j’owọ so ewegrẹ riẹ evaọ oke anwae, yọ ẹdhoguo riẹ o ti bru otọakpọ na kpobi ze nẹnẹ. Ghele na, ejọ e te zọ—‘otu obuobu nọ o no erẹwho kpobi ze.’ (Eviavia 7:9) Whọ sae jọ usu rai—rekọ ajokpanọ whọ rẹ ruabọhọ ẹgwọlọ Jihova, ẹgwọlọ ẹrẹreokie, gbe ẹgwọlọ omarokpotọ.
Uye U te Irumuomu Omoya!
16. Eme eruẹaruẹ Zefanaya e ta kpahe emọ-ivie gbe isu egagọ Juda, kọ fikieme eme enana i ro kie kpahe Kristẹndọm?
16 Eruẹaruẹ Zefanaya e tẹ wariẹ tẹrovi Juda gbe Jerusalẹm. Zefanaya 3:1, 2 o ta nọ: “O da omẹ hrọ kẹ okpẹwho nọ o rẹ họrọ umuomu nọ o zuoma no je kienyẹ ahwo! Ọ rẹ gaviezọ ẹme he, ọ rẹ rehọ ohrẹ hẹ. O fievahọ ỌNOWO na ha, o sikẹle Ọghẹnẹ riẹ gbe he.” Ẹvẹ u yoma te nnọ omodawọ Jihova re ọ whọku ahwo riẹ a kezọ kẹe he! Evaọ uzẹme, evega emọ-ivie na, ikpahwo na, gbe iguẹdhọ na i yoma thesiwa. Zefanaya o bruenu fiki ababọ omovuọ isu egagọ na, nọ ọ ta nọ: “Eruẹaro riẹ i wotọ họ, ahwo ababọ ẹrọwọ; izerẹ riẹ i re zue oware nọ e rọ ọrẹri, a rẹ rehọ ogaga rọ jẹ uzi.” (Zefanaya 3:3, 4) Ẹvẹ eme eyena e nwani dhesẹ uyero eruẹaro gbe izerẹ Kristẹndọm nẹnẹ te! Avọ orivo, a si odẹ Ọghẹnẹ no efafa Ebaibol rai no a te bi je wuhrẹ eware nọ e wọso Ọnọ a ta nọ a be gọ na.
17. Makọ ahwo a gaviezọ hayo a gaviezọ họ, fikieme ma jẹ ruabọhọ ewhowho emamọ usi na?
17 Avọ ororokẹ Jihova ọ vẹvẹ ahwo oke anwae riẹ unu kpahe owọ nọ ọ gwọlọ jẹ. O vi idibo riẹ, eruẹaro na—ejọ rai họ Zefanaya gbe Jerimaya—re a tuduhọ ahwo na awọ re a kurẹriẹ. Ẹhẹ, “ỌNOWO na . . . o re ru thọ họ; kohiohiẹ kohiohiẹ o re dhesẹ ẹruoziẹ riẹ, irioke ọ rẹ va e abọ họ.” Didi uyo a kẹ? Zefanaya ọ ta nọ: “Rekọ ọnọ o kiẹrẹe he ọ riẹ omovuọ họ.” (Zefanaya 3:5) A be kẹ unuovẹvẹ utioye na eva oke nana re. Whọ tẹ rọ ọnọ o bi whowho emamọ usi na, koyehọ who bi w’abọ evaọ iruo unuovẹvẹ nana. Gbẹ hai whowho emamọ usi na ababọ eriosehọ! Makọ ahwo na a gaviezọ hayo a gaviezọ họ, odibọgba ra o wo obokparọ evaọ eriwo Ọghẹnẹ thakpinọ whọ be rọ ẹrọwọ ru iruo ra gba; u du fo ho re whọ vuoma nọ who bi ru iruo Ọghẹnẹ avọ ọwhọ na.
18. Ẹvẹ Zefanaya 3:6 o ti ro rugba?
18 Orọnikọ oma Kristẹndọm ọvo ẹdhoguo obrukpe Ọghẹnẹ o ti jo kuhọ họ. Jihova o mu ofu riẹ kẹre te erẹwho na kpobi: “Me bru erẹwho na dhe no; ekuakua ẹmo rai e raha no; mẹ raha izore rai no re ohwo ọvo ọ se ae ba ẹnya; ikpewho rai i zihe ruọ ifofe.” (Zefanaya 3:6) Eme enana i muẹro te epanọ Jihova ọ rọ t’ẹme kpahe ọraha nana epaọ ẹsenọ o via no. Eme ọ via kẹ ikpewho Filistia, Moab, gbe Amọn? Kọ Ninẹve, okpẹwho Asiria na? Ọraha rai yọ oriruo unuovẹvẹ kẹ erẹwho na nẹnẹ. A rẹ rọ Ọghẹnẹ se ẹkoko ho.
Gbẹ Hae Gwọlọ Jihova
19. Didi enọ nọ e rẹ jaja iroro ma rẹ sae nọ?
19 Evaọ ẹdẹ Zefanaya, ofu Ọghẹnẹ o hwẹ ku ahwo omuomu “nọ a re ru iruo iyoma.” (Zefanaya 3:7) Oware ovona o te via evaọ oke mai na re. Kọ whọ be ruẹ imuẹro nnọ ẹdẹ ofu Jihova ọ kẹlino? Kọ whọ be ruabọhọ ‘ẹgwọlọ ỌNOWO na’ ẹkwoma ese Ẹme riẹ kẹse kẹse—kẹdẹ kẹdẹ? Kọ whọ be “gwọlọ ẹrẹreokie” ẹkwoma ẹrria uzuazọ okpakpatiẹ nọ o rọwo kugbe itee Ọghẹnẹ? Kọ whọ be “gwọlọ oma-urokpotọ” ẹkwoma edhesẹ uruemu ẹwo, orọ omarokpotọ kẹ Ọghẹnẹ gbe ọruẹrẹfihotọ riẹ kẹ esiwo?
20. Didi enọ ma te t’ẹme kpahe evaọ uzoẹme urere ọrọ ọruẹrẹhọ nana kpahe eruẹaruẹ Zefanaya na?
20 Ma tẹ be rọ ẹrọwọ ruabọhọ ẹgwọlọ Jihova, ẹrẹreokie, gbe omarokpotọ, ma rẹ sae reawere eghale buobu enẹna—ẹhẹ, makọ evaọ etoke “edẹ urere” ẹdawọ ẹrọwọ enana. (2 Timoti 3:1-5; Itẹ 10:22) Rekọ ma sae nọ inọ, ‘Evaọ idhere vẹ ma bi ro wo oghale wọhọ idibo Jihova inẹnẹ, kọ didi eghale obaro eruẹaruẹ Zefanaya i fihọ kẹ enọ a te ko dhere evaọ ẹdẹ ofu Jihova nọ ọ kẹle gaga no na?’
Didi Uyo Whọ Te Kẹ?
• Ẹvẹ ahwo a be rọ “gwọlọ ỌNOWO na”?
• Eme u kugbe re a “gwọlọ ẹrẹreokie”?
• Ẹvẹ ma sae rọ “gwọlọ oma-urokpotọ”?
• Fikieme ma jẹ ruabọhọ ẹgwọlọ Jihova, ẹrẹreokie, gbe omarokpotọ?
[Uwoho nọ o rrọ ẹwẹ-obe avọ 10]
Kọ whọ be gwọlọ Jihova ẹkwoma uwuhrẹ Ebaibol gbe olẹ ẹsikpobi?
[Iwoho nọ e rrọ ẹwẹ-obe avọ 13]
Fikinọ a ruabọhọ ẹgwọlọ Jihova, ogbotu obuobu a te zọ vrẹ ẹdẹ ofu riẹ