Rọ Aro Kele Eruẹaro Na—Zefanaya
1. Eme ọ via evaọ etoke nọ Zefanaya ọ rọ jọ ọruẹaro, kọ ẹvẹ ọ rọ rrọ emamọ oriruo kẹ omai nẹnẹ?
1 Evaọ etoke ikpe-udhusoi avọ ihrẹ taure Kristi ọ tẹ te ze, egagọ Ebale e da Juda fia. Nọ a kpe Amọn ovie oyoma na no, u kri hi, a tẹ rọ Josaya nọ ọ gbẹ maha gaga mu ovie. (2 Irv. 33:21–34:1) Etoke yena Jihova ọ rọ rehọ Zefanaya mu ọruẹaro re o whowho ovuẹ ẹdhoguo riẹ kẹ ae. Ẹsejọhọ orua uvie Juda Zefanaya o no ze, ghele na ọ rọ ududu whowho ovuẹ ẹdhoguo Jihova rọkẹ isu Juda. (Zef. 1:1; 3:1-4) Epọvo na re, ma re wo udu wọhọ Zefanaya, ma rẹ kuvẹ re ahwo uviuwou mai a si omai kpemu hu evaọ egagọ Jihova. (Mat. 10:34-37) Didi ovuẹ Zefanaya o whowho, kọ eme o no rie ze?
2. Eme ma re ru nọ ma tẹ gwọlọ zọ evaọ ẹdẹ ofu Jihova?
2 Gwọlọ Jihova: Jihova ọvo o wo ẹgba nọ o re ro siwi ahwo evaọ ẹdẹ ofu riẹ na. Oyejabọ nọ Zefanaya ọ rọ vuẹ ahwo Juda nọ a gwọlọ Jihova, gwọlọ ẹrẹreokie, jẹ gwọlọ omaurokpotọ nọ oke o gbẹ riẹ na. (Zef. 2:2, 3) Ere ọvona o rrọ nẹnẹ re. Wọhọ Zefanaya, ma be tuduhọ ahwo awọ nọ a gwọlọ Jihova, yọ mai omamai ma gba riẹ mu nọ ma re “ki uke ku” Jihova ha. (Zef. 1:6) Ukpoye, ma rẹ gwọlọ Jihova ẹkwoma ẹme riẹ nọ ma rẹ romatotọ wuhrẹ, jẹ lẹ sei re ọ kpọ omai. Ma rẹ gwọlọ ẹrẹreokie nọ ma te bi siomano ikpehre iruemu. Ma rẹ gwọlọ omaurokpotọ nọ ma te bi yoẹme je ru lele ọkpọvio kpobi nọ ukoko Jihova o be kẹ omai.
3. Fikieme ma re ro rẹro nọ emamọ iyẹrẹ i ti no iruo usiuwoma ota na ze?
3 Emamọ Iyẹrẹ nọ I No Rie Ze: Ovuẹ ẹdhoguo Zefanaya na u ru ahwo jọ nwene evaọ Juda, rekọ o wọhọ nọ ohwo nọ o mai duobọte kpobi họ Josaya, ọnọ o mu Jihova họ ẹgwọlọ evaọ okenọ ọ gbẹ jọ ọmaha. Uwhremu na, Josaya ọ rọ ajọwha voro edhọgọ no ẹkwotọ na kpobi. (2 Irv. 34:2-5) Nẹnẹ, dede nọ ibi Uvie na jọ i bi kie fihọ akotọ edhere, ehru itho, gbe udevie inwe, ghele na ejọ i bi kie fihọ emamọ otọ jẹ be mọ ibi. (Mat. 13:18-23) Ma riẹ nọ Jihova ọ te gbẹ ghale omai nọ ma be daoma w’obọ vọvọ evaọ ẹkọ ibi Uvie na.—Ol. 126:6.
4. Fikieme ma rẹ rọ “hẹrẹ” ẹdẹ Jihova?
4 Ahwo buobu evaọ Juda a roro nọ Jihova o ti ru oware ovo ho. Rekọ, Jihova ọ ta vevẹ nọ ẹdẹ ologbo riẹ na ọ rẹ seba ẹtha ha. (Zef. 1:12, 14) Ahwo nọ a rehọ Jihova fihọ adhẹzọ rai ọvo o ti siwi. (Zef. 3:12, 17) Nọ ma be “hẹrẹ” ẹdẹ Jihova na, jọ mai idibo Ọghẹnẹ kpobi ma kuomagbe gọe avọ evawere.—Zef. 3:8, 9.