Enọ Ahwo nọ A s’Ebe

Okevẹ a rọ rehọ “emamọ oria ẹri” na mu, wọhọ epanọ a ruẹaro riẹ eva Daniẹl 9:24?

Daniẹl 9:24-27 yọ eruẹaruẹ kpahe ẹromavia ‘Mesaya Osu na’—Kristi na. Fikiere, eromuo “emamọ oria ẹri” nọ a ruẹaro riẹ na orọnikọ u dhesẹ eromuo ubrukpẹ Ọrẹri Erẹri ọrọ etẹmpol obọ Jerusalẹm na ha. Ukpoye, ẹme na “emamọ oria ẹri” u dhesẹ aruẹri obọ odhiwu ọrọ Ọghẹnẹ—Ọrẹri Erẹri obọ odhiwu na—evaọ etẹmpol abọ-ẹzi ologbo ọrọ Jihova na.a—Ahwo Hibru 8:1-5; 9:2-10, 23.

Okevẹ etẹmpol abọ-ẹzi Ọghẹnẹ o ro mu iruo họ? Whaọ, roro oware nọ o via evaọ okenọ Jesu ọ rehọ oma riẹ kẹ evaọ ame-ọhọ evaọ 29 C.E. No oke oyena vrẹ evaọ uzuazọ riẹ, Jesu o ru eme ọ Olezi 40:6-8 na gba. Evaọ uwhremu na Pọl ukọ na o te dhesẹ nọ Jesu ọ lẹ se Ọghẹnẹ nọ: “Iwẹegọ gbe idhe whọ guọlọ erae he, rekọ oma whọ ruẹrẹ kpahe kẹ omẹ.” (Ahwo Hibru 10:5) Jesu ọ riẹ nọ Ọghẹnẹ ‘ọ gwọlọ họ’ re a gbẹ hai dheidhe erao eva etẹmpol Jerusalẹm. Ukpoye, Jihova ọ ruẹrẹ ugboma ohwo-akpọ ogbagba họ kẹ Jesu re o ro dheidhe. Bi dhesẹ isiuru udu riẹ, Jesu ọ ta haro nọ: “Riri, mẹ ze ti ru o rọ eva ra, O Ọghẹnẹ.” (Ahwo Hibru 10:7) Kọ didi owọ Jihova ọ jẹ? Usiuwoma Matiu o ta nọ: “Nọ ọ jẹ họ Jesu ame no, Ọ tẹ nwane va no ame ze, koyehọ ihru i rovie, ọ tẹ ruẹ Ẹzi Ọghẹnẹ nọ Ọ be tha wọhọ erueruẹ, o te kiemu uzou riẹ; koyehọ uru jọ u no ehru ze nọ, ‘Ọnana họ Ọmọ oyoyou mẹ, ọnọ ọ were omẹ hrọ.’ ”—Matiu 3:16, 17.

Ọjẹrehọ Jihova Ọghẹnẹ ọrọ oma nọ Jesu o ro dheidhe u dhesẹ nọ a rehọ agbada-idhe nọ ọ rro vi agbada-idhe nọ ọ jọ etẹmpol Jerusalẹm na vi no. Onana họ agbada-idhe “oreva” Ọghẹnẹ, hayo ọruẹrẹfihotọ kẹ ọjẹrehọ uzuazọ ohwo-akpọ Jesu wọhọ idhe. (Ahwo Hibru 10:10) Ẹzi ọfuafo nọ a rọ rehọ Jesu mu u dhesẹ nọ Ọghẹnẹ ọ rehọ ọruẹrẹfihotọ etẹmpol abọ-ẹzi riẹ kpobi mu no.b Fikiere, eva oke ame-ọhọ Jesu, a ro wholo oria ẹria obọ odhiwu ọ Ọghẹnẹ, hayo hẹriẹe, wọhọ “emamọ oria ẹri” evaọ ọruẹrẹfihotọ etẹmpol abọ-ẹzi ologbo na.

[Oruvẹ-obotọ]

[Uwoho nọ o rrọ ẹwẹ-obe avọ 31]

A rehọ “emamọ oria ẹri” na mu evaọ okenọ Jesu ọ họ-ame