Obufihọ Re A Wo Otoriẹ Ebaibol Na
EBAIBOL na yọ obe oghẹrẹsa. Enọ i kere i rie a ta nọ Ọghẹnẹ ọ kẹ rae ẹgba, yọ eme nọ e rrọ eva riẹ e k’imuẹro buobu inọ ẹme rai na uzẹme. (2 Timoti 3:16) Evaọ usu eware efa, Ebaibol na o dhesẹ oria nọ ma no ze, oware nọ ma rọ rrọ etenẹ, gbe obonọ ma bi kpohọ. Uzẹme, o rrọ obe nọ u fo nọ ma re roro kpahe!
Ẹsejọhọ whọ daoma no re who se Ebaibol na rekọ whọ tẹ ruẹ nọ o rrọ bẹbẹ k’owhẹ re who wo otoriẹ riẹ. Ẹsejọhọ whọ riẹ obonọ who re kpohọ nyae gwọlọ iyo kẹ enọ ra ha. Otẹrọ ere, whọ ọvo o rrọ ere kẹ hẹ. Uyero ra o wọhọ orọ ọzae jọ nọ ọ rria evaọ ikpe-udhusoi ọsosuọ na. Ọ jọ ehru akẹkẹ je no Jerusalẹm kpohọ orẹwho riẹ, Ẹtiopia. Oletu ohwo Ẹtiopia nana o je se dovia no obe eruẹaruẹ Aizaya orọ Ebaibol na ze, onọ a kere evaọ ikpe nọ i bu vi udhusoi ẹko ihrẹ nọ i kpemu taure oke oyena u te te.
Idudhe na, ọzae jọ nọ ọ jẹ dhẹ abotọ akẹkẹ na vrẹ o te yere iei. Ọzae na họ Filip, olele Jesu, ọ tẹ nọ ohwo Ẹtiopia na inọ: ‘Whọ ghinẹ riẹ oware nọ who re se na?’ Ohwo Ẹtiopia na ọ tẹ kuyo nọ: “Ẹvẹ mẹ rẹ sae rọ riẹ, ogbẹrọnọ ohwo jọ o re dhesẹ otọ riẹ kẹ omẹ hẹ?” O te zizie Filip ruọ akẹkẹ na. Filip o te dhesẹ otofa oria nọ ọzae na o bi se na kẹe je whowho “usiuwoma Jesu” kẹe.—Iruẹru 8:30-35.
Wọhọ epanọ Filip o fiobọhọ kẹ ohwo Ẹtiopia ọyena wo otoriẹ Ẹme Ọghẹnẹ evaọ okeoye na, Isẹri Jihova a bi fiobọhọ kẹ ahwo wo otoriẹ Ebaibol na nẹnẹ. O te were ae re a fiobọhọ k’owhẹ re. Wọhọ epanọ u fo, o rẹ mai woma re a wuhrẹ Ebaibol na othotha, re a rehọ igogo iwuhrẹ Ikereakere na muhọ. (Ahwo Hibru 6:1) Nọ whọ be nyaharo na, whọ vẹ te sae rehọ oware nọ Pọl ukọ na o se “emu ọgaga”—koyehọ, izẹme ikokodo. (Ahwo Hibru 5:14) Dede nọ Ebaibol na who bi wuhrẹ na, ebe efa—ekwakwa obufihọ uwuhrẹ Ebaibol—e sai fiobọhọ k’owhẹ gwọlọ je wo otoriẹ eria Ebaibol nọ e ta kpahe izoẹme sa-sa.
A rẹ sae ruẹrẹ uwuhrẹ họ eva oke gbe oria nọ u kiehọ owhẹ oma. Ejọ e rẹ tubẹ jọ ifonu ru uwuhrẹ dede. A re ru uwuhrẹ na wọhọ ọrọ eklase he; o rọ ọruẹrẹfihotọ omobọ ohwo nọ a rẹ ruẹrẹhọ lele uyero omobọ ra, eriariẹ ra gbe epanọ whọ riẹ obe te. Who re du hwosa fihọ uwuhrẹ Ebaibol utioye na ha. (Matiu 10:8) A rẹ jariẹ ru ẹdawọ họ, yọ a re kpomovuọ họ owhẹ oma ha. A te kuyo enọ ra, yọ who ti wuhrẹ epanọ who re ro si kẹle Ọghẹnẹ. Dede na, fikieme who je wuhrẹ Ebaibol na? Roro kpahe eware jọ nọ uwuhrẹ Ebaibol o sai ro fi oghọghọ ba uzuazọ ra.