Enọ Ahwo nọ A s’Ebe
Eme họ “eriosehọ” nọ a t’ẹme kpahe evaọ Ahwo Hibru 4:9-11 na, kọ ẹvẹ ohwo ọ rẹ rọ “rueva eriosehọ na”?
Ro se Ileleikristi Hibru erọ ikpe-udhusoi ọsosuọ na, Pọl ukọ na o kere nọ: “Ẹdẹ ẹdijala eriosehọ ọfa [ọ] gbẹ rọ kẹ ahwo Ọghẹnẹ; keme na ohwo kpobi nọ ọ ruọ eva eriosehọ Ọghẹnẹ na o re siobọno iruo riẹ re nwane wọhọ epanọ Ọghẹnẹ o ruru. Whaọ joma họre gaga re ma rueva eriosehọ na.”—Ahwo Hibru 4:9-11.
Okenọ Pọl ọ t’ẹme kpahe eriosehọ Ọghẹnẹ rono iruo Riẹ, ẹsejọhọ oware nọ a kere fihọ Emuhọ 2:2 ọ jẹ t’ẹme kpahe na, oria nọ ma jọ se nọ: “Ẹdẹ avọ ihrẹ, Ọghẹnẹ o te ku iruo riẹ họ, o te serihọ [no] iruo riẹ nọ o je ru.” Fikieme Jihova o je ‘serihọ evaọ ẹdẹ avọ ihrẹ na’? Evaọ uzẹme, orọnikọ fiki epanọ ọ gwọlọ s’oma họ no “iruo riẹ nọ o je ru” hu. Owọ nọ u lele i rie u ru ẹme na vẹ: “Ọghẹnẹ ọ tẹ ghale ẹdẹ avọ ihrẹ na, o te ru ei ọrẹri; keme eva riẹ Ọghẹnẹ o je serihọ [no] iruo riẹ kpobi nọ o ru eva emama.”—Emuhọ 2:3; Aizaya 40:26, 28.
“Ẹdẹ avọ ihrẹ” na o wo ohẹriẹ no edẹ ezeza nọ e vrẹ na fikinọ ọye họ ẹdẹ nọ Ọghẹnẹ ọ ghale je ru fihọ ọrẹri, koyehọ, ẹdẹ nọ a ruẹrẹ fihọ kẹ, hayo nọ a ro mudhe kẹ, ẹjiroro obọdẹ. Eme họ ẹjiroro ọyena? Vẹre, Ọghẹnẹ o dhesẹ ẹjiroro riẹ kpahe ahwo-akpọ gbe otọakpọ na via no. Ọghẹnẹ ọ ta kẹ ọzae gbe aye ọsosuọ na nọ: “Wha yẹ, wha vi, re wha vọ evaọ akpọ na re wha wo i; re wha wuzou iyei obọ abade gbe evra obọ ehru gbe eware kpobi nọ i wo uzuazọ nọ e be nya evaọ akpọ na.” (Emuhọ 1:28) Dede nọ Ọghẹnẹ ọ kẹ ahwo-akpọ gbe otọakpọ na emuhọ ọgbagba, o te rehọ oke re a vọ otọakpọ na soso je nwene iei kpohọ aparadase nọ ọ vọ avọ uviuwou ahwo-akpọ egbagba, wọhọ epanọ Ọghẹnẹ ọ jiroro riẹ. Fikiere, eva “ẹdẹ avọ ihrẹ” na, Ọghẹnẹ o serihọ hayo siobọno iruo emama otọakpọ efa re ọ kuvẹ kẹ eware nọ ọ ma no vẹre re e nyaharo kpohọ erugba oreva riẹ. Evaọ ekuhọ “ẹdẹ” ọyena, eware kpobi nọ Ọghẹnẹ ọ jiroro rai i ve ti rugba. Ẹvẹ eriosehọ ọyena o ti theri te?
Ma te zihe kpohọ eme ọ Pọl evaọ obe Ahwo Hibru na, ma re muẹrohọ nọ ọ ta nọ “ẹdẹ ẹdijala eriosehọ ọfa [ọ] gbẹ rọ kẹ ahwo Ọghẹnẹ,” yọ ọ tuduhọ ibe Ileleikristi riẹ awọ re a daoma rai re a “rueva eriosehọ na.” Onana u dhesẹ nọ evaọ okenọ Pọl o kere eme eyena, “ẹdẹ avọ ihrẹ” ọrọ eriosehọ Ọghẹnẹ na, onọ u muhọ evaọ oware wọhọ ikpe 4,000 nọ i kpemu no, o gbẹ rọ otọ. O ti kuhọ họ bẹsenọ ẹjiroro Ọghẹnẹ kpahe ahwo-akpọ gbe otọakpọ na o re rugba no riẹriẹriẹ evaọ ekuhọ Esuo Ikpe Odu Jesu Kristi, ọnọ ọ rọ “olori ẹdẹ ẹdijala” na.—Matiu 12:8; Eviavia 20:1-6; 21:1-4.
Avọ irẹro igbunu yena nọ o wo họ iroro, Pọl o te dhesẹ epanọ ohwo ọ sae rọ rueva eriosehọ Ọghẹnẹ. O kere nọ: “Ohwo kpobi nọ ọ ruọ eva eriosehọ Ọghẹnẹ na o re siobọno iruo riẹ.” Onana u dhesẹ k’omai nọ dede nọ a wo emuhọ ọgbagba, ahwo-akpọ soso a re te rueva eriosehọ Ọghẹnẹ no ho. Onana o rọ ere keme Adamu avọ Ivi a koko eriosehọ Ọghẹnẹ evaọ “ẹdẹ avọ ihrẹ” na oke krẹkri hi ẹkwoma ẹjẹrehọ ọruẹrẹfihotọ riẹ rọkẹ ae. Ikpoye, a kpareso jẹ gwọlọ wo mẹrẹjọmẹsa rono Ọghẹnẹ. Evaọ uzẹme, a nya lele omaa Setan ukpenọ a rẹ jẹ ọkpọvio uyoyou Ọghẹnẹ rehọ. (Emuhọ 2:15-17) Fikiere, a te ku irẹro ẹria ebẹdẹ bẹdẹ evaọ aparadase otọakpọ fiẹ. No okeoye vrẹ, ahwo-akpọ kpobi a te zihe ro irigbo kẹ uzioraha gbe uwhu.—Ahwo Rom 5:12, 14.
Ọkparesuọ ohwo-akpọ o bru ẹjiroro Ọghẹnẹ dhe he. Ẹdẹ eriosehọ riẹ ọ gbẹ be nyaharo. Dede na, Jihova o ru ọruẹrẹfihotọ uyoyou—ẹtanigbo na—ẹkwoma Ọmọ riẹ, Jesu Kristi, re ahwo kpobi nọ e jẹ riẹ rehọ avọ ẹrọwọ a sai rri kparo kẹ obusino gbe eriosehọ rono owha-ogbẹgbẹdẹ uzioraha gbe uwhu. (Ahwo Rom 6:23) Oye jabọ nọ Pọl ọ rọ tuduhọ ibe Ileleikristi riẹ awọ re a ‘serihọ no iruo rai.’ U fo re a jẹ ọruẹrẹfihotọ Ọghẹnẹ kẹ usiwo rehọ re a siọ edhere obaro rai ba ẹgbẹ kẹ omobọ rai, wọhọ epanọ Adamu avọ Ivi a ru. A rẹ jẹ whaha ele iruo ẹrẹreokie omobọ rai.
Re a fi ilale oriobọ omobọ ohwo hayo orọ eware akpọ na họ akotọ re a ru oreva Ọghẹnẹ o ghinẹ rrọ oware omosasọ. Jesu ọ kẹ uzizie osasa onana: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ [mi] omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.”—Matiu 11:28-30.
Ẹmeọta Pọl kpahe eriosehọ Ọghẹnẹ gbe epanọ ohwo ọ sae rọ rueva riẹ o ghinẹ jọ ehri uduotahawọ kẹ Ileleikristi Hibru nọ e jọ Jerusalẹm, enọ i thihakọ ukpokpoma gbe ẹkoko buobu fiki ẹrọwọ rai. (Iruẹru 8:1; 12:1-5) Epọvo na re, eme ọ Pọl na e sae jọ ehri uduotahawọ kẹ Ileleikristi nẹnẹ. Nọ ma riẹ nọ orugba eyaa Ọghẹnẹ re ọ rehọ aparadase otọakpọ evaọ otọ Uvie ẹrẹreokie riẹ ze o kẹle gaga no na, ma re je serihọ no iruo mai jẹ daoma mai re ma rueva eriosehọ ọyena.—Matiu 6:10, 33; 2 Pita 3:13.
[Iwoho nọ e rrọ ẹwẹ-obe avọ 31]
Eyaa Ọghẹnẹ ọrọ aparadase otọakpọ na i ti wo orugba eva ekuhọ ẹdẹ eriosehọ riẹ