Ono Ọ Rẹ Hẹriẹ Omai No Uyoyou Ọghẹnẹ?

“Ma you [rie] keme ọye ọ kaki you omai.”—1 JỌN 4:19.

1, 2. (a) Fikieme u je wuzou re ma riẹ nọ a you omai? (b) Uyoyou ono ma mae gwọlọ?

ẸVẸ u wuzou te k’owhẹ re whọ riẹ nọ a you owhẹ? No etoke emaha rite etoke ọkpako, uyoyou u re ru ahwo-akpọ jọ bọbọbọ. Kọ whọ ruẹ ọmọ nọ oni ọ wọ họ oma no ẹdẹjọ? Ẹsibuobu, makọ oware nọ o be via wariẹ ọmọ na họ, nọ ọmọ na o bi rri ovao oni riẹ nọ o rrọ ohwohwẹ na, udu u re tei otọ, ọ rẹ daezọ oware ovo ho nọ ọ rrọ abọ oni nọ o you rie na. Hayo kọ whọ kareghẹhọ epanọ whọ jọ evaọ ikpe ebẹbẹ erọ etoke uzoge na? (1 Ahwo Tẹsalonika 2:7) Ẹsejọ, whọ jẹ riẹ oware nọ whọ gwọlọ hayo wo otoriẹ oghẹrẹ nọ oma o r’owhẹ hẹ, ghele na ẹvẹ u wuzou te re whọ riẹ nọ ọsẹ gbe oni ra a you owhẹ! Kọ o gbẹ jọ obufihọ nọ whọ riẹ nọ whọ rẹ sae wha oghẹrẹ ẹbẹbẹ hayo onọ kpobi bru rai? Uzẹme, evaọ etoke uzuazọ kpobi, ẹgwọlọ mai jọ nọ ọ mae rro họ re a you omai. Uyoyou utioye na o rẹ k’omai imuẹro inọ ma rrọ ghaghae.

² Uyoyou owhawha ọsẹ gbe oni ohwo u re ghine fiba emamọ orro gbe omakpọmu iroro. Ghele na, ewo imuẹro na inọ Ọsẹ obọ odhiwu mai, Jihova, o you omai o mai wuzou kẹ ewoma abọ-ẹzi gbe ọrọ iroro mai. Ẹsejọhọ ahwo jọ nọ a re se emagazini nana a wo esẹ gbe ini nọ e ghinẹ rẹrote ai hi. Otẹrọnọ ere o via k’owhẹ, kru udu ga. O tẹ make rọnọ a dhesẹ uyoyou ọsẹ gbe oni k’owhẹ hẹ hayo onọ a dhesẹ k’owhẹ u tulo ho, uyoyou omarokpotọ Ọghẹnẹ u re fiobọhọ.

3. Ẹvẹ Jihova ọ rọ kẹ ahwo riẹ imuẹro kpahe uyoyou nọ o wo kẹ ae?

³ Ẹkwoma Aizaya ọruẹaro riẹ, Jihova o dhesẹ nọ ọmọ unuevie ọ sae ‘thọrọ’ oni riẹ ẹro, rekọ ahwo riẹ a rẹ thọrọ iẹe ẹro ho. (Aizaya 49:15) Epọvo na re, Devidi ọ ta avọ imuẹro nọ: “Ọsẹ gbe oni mẹ a [tẹ] se omẹ, Ọnowahwo o re ti kru omẹ rehọ.” (Olezi 27:10) Ẹvẹ onana o rọ omosasọ te! Oghẹrẹ nọ uyero ra o rọ kpobi, otẹrọnọ whọ ruọ usu omarọkẹ kugbe Jihova Ọghẹnẹ no, whọ rẹ kareghẹhọ ẹsikpobi nọ uyoyou nọ o wo k’owhẹ o rro vi onọ ohwo-akpọ jọ o wo!

Daji Uyoyou Ọghẹnẹ

4. Ẹvẹ a rọ kẹ Ileleikristi ikpe-udhusoi ọsosuọ imuẹro kpahe uyoyou Ọghẹnẹ?

⁴ Okevẹ whọ rọ kake riẹ uyoyou Jihova? Ẹsejọhọ, epanọ o via kẹ Ileleikristi evaọ ikpe-udhusoi ọsosuọ na ere ọvo na o via k’owhẹ. Uzou avọ 5 orọ ileta Pọl ro se Ahwo Rom u dhesẹ ziezi epanọ erahaizi, nọ e hẹrioma no Ọghẹnẹ vẹre, a te rọ riẹ uyoyou Jihova. Ma jọ owọ avọ 5 se nọ: “A [ku] uyoyou Ọghẹnẹ họ . . . eva mai no fiki Ẹzi Ẹri na nọ a rọ kẹ omai.” Pọl o te fibae evaọ owọ avọ 8 nọ: “Onana Ọghẹnẹ oro ru uyoyou riẹ gba kẹ omai keme okenọ ma gbẹ jọ erahaizi, Kristi o te whu kẹ omai.”

5. Ẹvẹ who ro wo ovuhumuo kẹ epanọ uyoyou Ọghẹnẹ o kẹre te?

⁵ Evaọ oghẹrẹ ovona re, nọ a dhesẹ uzẹme Ẹme Ọghẹnẹ k’owhẹ nọ who je muọ ẹrọwọ họ edhesẹ, ẹzi ọfuafo Jihova o te mu iruo họ evaọ udu ra. Evaọ edhere ọnana who te mu ovuhumuo họ ewo kẹ aghare oware nọ Jihova o ru nọ o ro vi Ọmọ oyoyou riẹ ze re o whu k’owhẹ. Jihova ọ tẹ rọ ere fiobọhọ k’owhẹ riẹ epanọ o you ahwo-akpọ te. Okenọ who vuhumu nọ, dede nọ a yẹ owhẹ wọhọ ọrahauzi nọ ọ hẹrioma noi, Jihova o rovie edhere kẹ ahwo-akpọ no re a jọ ahwo nọ i kiẹrẹe avọ irẹro uzuazọ ebẹdẹ bẹdẹ, kọ oyena u gbe dhobọte udu ra? Kọ oma o gbẹ wọ owhẹ you Jihova?—Ahwo Rom 5:10.

6. Fikieme o jẹ j’omai oma ẹsejọ nọ ma thabọ no Jihova hrọ?

⁶ Nọ uyoyou Ọsẹ obọ odhiwu ra u si owhẹ bru ei ze jẹ lẹliẹ owhẹ ru inwene evaọ uzuazọ ra re ọ sae jẹ owhẹ rehọ no, whọ tẹ rehọ oma ra mudhe kẹ Ọghẹnẹ. Enẹna whọ be reawere udhedhẹ kugbe Ọghẹnẹ. Ghele na, kọ who re roro ẹsejọ nọ who thabọ no Jihova hrọ? Oyena o rẹ sae via kẹ ohwo kpobi. Rekọ kareghẹhọ ẹsikpobi inọ Ọghẹnẹ o re nwene he. Uyoyou riẹ o rẹ jọ ẹsikpobi jẹ tọ wọhọ ọre na, onọ u re serihọ họ evaọ ẹroro elo nọ o re vi ziọ otọakpọ na. (Malakae 3:6; Jemis 1:17) Evaọ abọdekọ riẹ, ma rẹ sai nwene—makọ evaọ ubroke dede. Nọ akpọ na o bi ghelie kurẹriẹ na, ebi o re ruru abọvo okogho-akpọ na. Epọvo na re, nọ ma te sioma no Ọghẹnẹ, makọ evaọ amabọjọ ọvo, ma rẹ sai wo oka evaọ usu mai kugbei. Eme ma rẹ sai ru rọ kpọ uyero oyena vi?

7. Ẹvẹ ẹkiẹriwo omobọ mai ọ sai ro fiobọhọ k’omai daji uyoyou Ọghẹnẹ?

⁷ Ma te roro nọ ma dina hẹriẹ oma no uyoyou Ọghẹnẹ, ma rẹ nọ oma mai nọ: ‘Kọ me gbabọkẹ uyoyou Ọghẹnẹ no? Kọ mẹ rọ ẹmẹrera hẹriẹ oma no Ọghẹnẹ uzuazọ, ọrọ uyoyou na no evaọ oghẹrẹ jọ, nọ mẹ be jọ idhere sa-sa dhesẹ ewhrehe ẹrọwọ? Kọ mẹ rọ iroro mẹ kpahe “eware iwo,” viukpe “eware nọ erọ erọ ẹzi”?’ (Ahwo Rom 8:5-8; Ahwo Hibru 3:12) Otẹrọnọ ma sioma mai no Jihova no, ma rẹ sae j’owọ rọ kpọ eware vi, re ma zihe ziọ usu okpekpe, osasa kugbei. Jemis ọ kpakpa omai nọ: “Bigba Ọghẹnẹ o re ti bigba owhẹ.” (Jemis 4:8) Gaviezọ kẹ eme ọ Jud na: “Iyoyou, wha rọ orọwọ ọrẹri rai yọrọ oma rai whẹro, wha lẹ evaọ Ẹzi Ẹri na; jẹ yọre oma rai eva uyoyou Ọghẹnẹ.”—Jud 20, 21.

Iyero nọ I Nwene I re Kpomahọ Uyoyou Ọghẹnẹ Hẹ

8. Eghẹrẹ inwene vẹ e rẹ sae roma via idudhe evaọ izuazọ mai?

⁸ Uzuazọ mai evaọ uyerakpọ nana u re dhe enwenwene. Solomọn Ovie na o muẹrohọ nọ ‘oke gbe eware idudhe o rẹ whae ze.’ (Ọtausiwoma Na 9:11) Uzuazọ mai o sai nwene riẹriẹriẹ aso-hẹrioke. Ma sai wo omakpokpọ nẹnẹ, odẹnotha okpẹyao o ve kru omai. Ma sae jọ iruo mai gidigba nẹnẹ, odẹnotha ma vẹ jọ ababọ iruo. Ohwo jọ nọ ma you ọ sai whu idudhe. Ileleikristi nọ e rrọ ẹkwotọ jọ e sae reawere uyero udhedhẹ evaọ oke jọ, idudhe na, ukpokpoma ozighi o vẹ roma via. Ẹsejọhọ a bọwo omai ota, yọ fiki onana, ma sae ruẹ uye oziẹbro-okienyẹ jọ. Ẹhẹ, akpọ o re nwene yọ omofọwẹ ovọvọ o riẹ hẹ.—Jemis 4:13-15.

9. Fikieme u je woma re ma roro kpahe abọjọ Ahwo Rom uzou avọ 8 na?

⁹ Okenọ eware ọkora e tẹ via k’omai, ma rẹ sai muhọ eroro nọ a gbabọ k’omai, tube roro nọ uyoyou Ọghẹnẹ k’omai u dhẹ no. Nọ o rọnọ eware itieye na e rẹ via k’omai kpobi na, u re woma re ma romatotọ roro kpahe eme uduotahawọ Pọl ukọ na nọ a kere fihọ Ahwo Rom uzou avọ 8. A kere eme eyena se Ileleikristi nọ a rọ ẹzi wholo. Ghele na, ma te rri rie kokodo i kie kpahe erọ igodẹ efa na re, enọ a dhesẹ kiẹrẹe no wọhọ egbẹnyusu Ọghẹnẹ, wọhọ epaọ Abraham taure oke Ileleikristi u te ti te.—Ahwo Rom 4:20-22; Jemis 2:21-23.

10, 11. (a) Didi ota ewegrẹ e rẹ bọwo ahwo Ọghẹnẹ ẹsejọ? (b) Fikieme ota itieye na e gbẹ rọ okpoware kẹ Ileleikristi hi?

¹⁰ Se Ahwo Rom 8:31-34. Pọl ọ nọ inọ: “Otẹrọnọ Ọghẹnẹ ọ rọ abọ mai no, kọ ono ọ rẹ rọ suọ omai?” Uzẹme, Setan gbe akpọ omuomu riẹ a wọso omai. Ewegrẹ e sae bọwo omai ota, makọ evaọ ekọto orẹwho dede. A bọwo eyewọ Ileleikristi jọ ota no inọ a mukpahe emọ ra fikinọ a kẹ rai uvẹ re a rehọ eghẹrẹ usiwo-imu nọ e rẹ raha uzi Ọghẹnẹ hẹ hayo fikinọ a kẹ rai uvẹ re a w’obọ evaọ ehaa egedhọ họ. (Iruẹru 15:28, 29; 2 Ahwo Kọrint 6:14-16) A bọwo Ileleikristi ẹrọwọ efa ota no inọ a wọso egọmeti fikinọ a rọwo nọ a re kpe ibe ahwo-akpọ evaọ ẹmo ho hayo fikinọ a re duomahọ esuo-ohrowo ho. (Jọn 17:16) Otu ọwọsuọ efa a vaha erue ọtaraha no evaọ ekwakwa awhusi, be tubẹ bọwo Isẹri Jihova ota inọ a rọ ẹko-egagọ imuozọ.

¹¹ Rekọ jọ o thọrọ owhẹ ẹro ho inọ evaọ edẹ ikọ na, a ta kpahe ae nọ: “Otu ọnana, ma riẹ nọ koria koria a jẹ rọ ẹme oyoma riẹ ẹta.” (Iruẹru 28:22) Kọ ota nọ a bọwo omai họ okpoware jọ? Ọghẹnẹ họ ọnọ o re dhesẹ Ileleikristi uzẹme kiẹrẹe, fiki ẹrọwọ rai kpahe idhe Kristi. Fikieme Jihova ọ jẹ siọ egegagọ riẹ ba eyou kpakiyọ ọ kẹ rae okẹ nọ o mae ghare kpobi no—Ọmọ obọ riẹ nọ o you gaga? (1 Jọn 4:10) Enẹna nọ a kpare Kristi no uwhu ze je fi ei họ obọze Ọghẹnẹ no na, ọ be thothọ Ileleikristi ẹsikpobi. Ono ọ rẹ sae ghinẹ vro othọ nọ Kristi ọ be thọ ilele riẹ hayo kọ ono ọ rẹ sae kpareso ẹdhoguo aruoriwo Ọghẹnẹ kpahe ahwo ẹrọwọ riẹ avọ obokparọ? Kaka ohwo!—Aizaya 50:8, 9; Ahwo Hibru 4:15, 16.

12, 13. (a) Didi iyero e rẹ sae hẹriẹ omai no uyoyou Ọghẹnẹ hẹ? (b) Ẹjiroro vẹ Ẹdhọ ọ be rọ wha ebẹbẹ s’omai? (c) Fikieme Ileleikristi e jẹ kparobọ riẹriẹriẹ?

¹² Se Ahwo Rom 8:35-37. U te no omai no, kọ ohwo hayo oware jọ o riẹ nọ o rẹ sae hẹriẹ omai no uyoyou Jihova gbe orọ Ọmọ riẹ, Kristi Jesu? Setan ọ sae rehọ ahwo riẹ evaọ otọakpọ wha ebẹbẹ buobu se Ileleikristi. Evaọ ikpe-udhusoi nọ e vrẹ na, inievo Ileleikristi mai buobu a ruẹ uye ukpokpoma no evaọ ekwotọ buobu. Evaọ eria jọ nẹnẹ, inievo mai e be rẹriẹ ovao ku ẹbẹbẹ ugho kẹdẹ kẹdẹ. Ejọ e be ruẹ edada ohọo hayo ababọ emuosẹ. Ẹjiroro vẹ Ẹdhọ ọ be rọ wha iyero ebẹbẹ enana ze? Ẹjiroro riẹ jọ họ re o whrehe udu ahwo no egagọ uzẹme Jihova. Setan ọ gwọlọ ru omai rọwo nnọ uyoyou Ọghẹnẹ u dhẹ no. Rekọ, ere o rọ?

¹³ Wọhọ Pọl, ọnọ ọ wariẹ eme Olezi 44:22 na, ma wuhrẹ Ẹme Ọghẹnẹ nọ a kere no. Ma riẹ nọ fiki odẹ Ọghẹnẹ eware enana e jẹ be via k’omai, “igodẹ” riẹ na. U w’obọ kpahe orufuọ odẹ Ọghẹnẹ gbe ẹkpare kpehru esuo ehrugbakpọ riẹ. Fiki eme-avro ilogbo itieye na Ọghẹnẹ ọ jẹ kuvẹ kẹ edawọ, orọnikọ fikinọ o gbe you omai ha ha. Makọ oghẹrẹ nọ uyero na o rẹ ga te kẹhẹ, ma wo imuẹro nọ uyoyou Ọghẹnẹ kẹ ahwo riẹ, kugbe omai omomọvo, u ri nwene he. Oware nọ o wọhọ ekie nọ ma rẹ sae ruẹ-uye riẹ kpobi u ti zihe kpohọ obokparọ otẹrọnọ ma yọrọ ẹgbakiete mai. Imuẹro uyoyou Ọghẹnẹ nọ u re kie he o rẹ kẹ omai ẹgba jẹ sẹro mai.

14. Fikieme Pọl o je wo imuẹro kpahe uyoyou Ọghẹnẹ ghelọ ebẹbẹ nọ Ileleikristi e rẹ sae ruẹ-uye rai?

¹⁴ Se Ahwo Rom 8:38, 39. Eme ọ kẹ Pọl imuẹro inọ uvumọ oware o rẹ sae hẹriẹ Ileleikristi no uyoyou Ọghẹnẹ hẹ? Ababọ avro, eware nọ Pọl ọ rọ ẹro ruẹ evaọ odibọgba na e bọ imuẹro riẹ ga inọ ebẹbẹ e rẹ sai kpomahọ uyoyou Ọghẹnẹ k’omai hi. (2 Ahwo Kọrint 11:23-27; Ahwo Filipai 4:13) Ofariẹ, Pọl o wo eriariẹ kpahe ẹjiroro ebẹdẹ bẹdẹ Jihova gbe oware nọ o ru kẹ ahwo Riẹ no evaọ oke anwae. Kọ uwhu o rẹ sai fi uyoyou Ọghẹnẹ kẹ ahwo nọ a be gọe avọ omarokpotọ kparobọ? Vievie! Ahwo ẹrọwọ otiọye na nọ i whu a rẹ gbẹ rria evaọ ekareghẹhọ egbagba Ọghẹnẹ, yọ ọ te kpare ae ze kẹle.—Luk 20:37, 38; 1 Ahwo Kọrint 15:22-26.

15, 16. Kele eware jọ nọ e rẹ sae whaha Ọghẹnẹ idibo ẹrọwọ riẹ eyou hu.

¹⁵ Oghẹrẹ idabolo kpobi nọ uzuazọ o rẹ wha s’omai nẹnẹ—makọ asidẹnte nọ ọ rẹ ko ohwo fihotọ, ẹyao ọgaga, hayo ekọ nọ e rẹ raha ku ohwo—uvumọ oware o rẹ sae raha uyoyou Ọghẹnẹ kẹ ahwo riẹ hẹ. Enjẹle nọ i wo ogaga, wọhọ ẹnjẹle aghẹmeeyo nọ o zihe ro Setan na, a rẹ sae whaha Jihova re ọ siọ idibo omarọkẹ riẹ ba eyou hu. (Job 2:3) Egọmeti e sae whaha iruo idibo Ọghẹnẹ, mu ai fihọ uwou-odi, lahiẹ ae jẹ tubẹ rehọ ae wọhọ “ahwo nọ a gwọlọ vievie he.” (1 Ahwo Kọrint 4:13) Omukpahe ekueku erẹwho otiọye na o rẹ sai tunye ahwo re a wọso omai, rekọ u re ru Osu-Okpehru ehrugbakpọ na re o gbabọkẹ omai hi.

¹⁶ Wọhọ Ileleikristi, ma re du dhozọ họ inọ eware nọ Pọl o se “eware nọ erọ enẹna”—eviavia gbe iyero nọ e rọ uyerakpọ onana—hayo “eware nọ e be tha” evaọ obaro na e rẹ sae raha usu Ọghẹnẹ kugbe ahwo riẹ. Dede nọ egaga akpọ gbe erọ izi imuomu e be họre omai, uyoyou omarokpotọ Ọghẹnẹ o riẹ nọ o rẹ sẹro omai. “Ekpehru, hayo ekodo” e rẹ whaha uyoyou Ọghẹnẹ hẹ, wọhọ epanọ Pọl o fiẹgba họ iẹe. Ẹhẹ, eware nọ e rẹ gwọlọ fi oyẹlẹ h’omai oma, hayo eware nọ e rẹ gwọlọ tunyẹ omai, e rẹ sae hẹriẹ omai no uyoyou Ọghẹnẹ hẹ; hayo omama ofa jọ o rẹ sae raha usu Ọnọma na kugbe idibo ẹrọwọ riẹ hẹ. Uyoyou Ọghẹnẹ u re kie he, o rẹ jọ bẹdẹ bẹdẹ.—1 Ahwo Kọrint 13:8.

Riwi Uyoyou-Ẹwo Ọghẹnẹ Ghaghae Bẹdẹ Bẹdẹ

17. (a) Fikieme ewo uyoyou Ọghẹnẹ u ro woma “vi uzuazọ”? (b) Ẹvẹ ma re ro dhesẹ nọ ma riwi uyoyou-ẹwo Ọghẹnẹ ghaghae?

¹⁷ Ẹvẹ uyoyou Ọghẹnẹ u wuzou te k’owhẹ? Kọ o rọ owhẹ oma wọhọ Devidi, ọnọ o kere nọ: “Keme uyoyou obọrobọ ra u vi uzuazọ, igbenu mẹ i re jiri owhẹ. Fikiere mẹ rẹ kpẹwẹ owhẹ epanọ mẹ sai ria krite kpobi; mẹ vẹ jẹ kpare abọ mẹ kpehru se odẹ ra”? (Olezi 63:3, 4) Evaọ uzẹme, kọ oware jọ o rọ nọ uzuazọ evaọ akpọ ọnana o rẹ kẹ nọ u woma vi uyoyou gbe usu omarokpotọ Ọghẹnẹ nọ ma rẹ reawere riẹ? Wọhọ oriruo, kọ ele okọ okpigho jọ evaọ akpọ na u woma vi udhedhẹ iroro gbe evawere nọ i re no usu okpekpe kugbe Ọghẹnẹ ze? (Luk 12:15) Ileleikristi jọ e rẹriẹ ovao ku ẹsalọ ẹsiọ Jihova hayo ovao oriẹriẹ dhe uwhu no. Oyena o via kẹ Isẹri Jihova buobu evaọ ega uye Nazi evaọ etoke Ẹmo Akpọ II na. U te no umutho ejọ no, inievo Ileleikristi mai a salọ nọ a rẹ gbẹ jọ evaọ uyoyou Ọghẹnẹ, avọ unevaze re a rẹriẹ ovao ku uwhu otẹrọnọ o gwọlọ ere. Ahwo nọ a rehọ omarokpotọ daji uyoyou riẹ a rẹ sai wo imuẹro obaro ebẹdẹ bẹdẹ nọ a re wo mi Ọghẹnẹ, oware nọ akpọ na ọ rẹ sae k’omai hi. (Mak 8:34-36) Rekọ eware efa e riẹ u te no uzuazọ ebẹdẹ bẹdẹ no.

18. Fikieme uzuazọ ebẹdẹ bẹdẹ u je siuru tere?

¹⁸ Dede nọ o lọhọ re a rria bẹdẹ bẹdẹ ababọ Jihova ha, fake dai roro epanọ uzuazọ nọ u thei gaga ababọ Ọnọma omai na o rẹ jọ. O rẹ jọ ufofe, ababọ uvi ẹjiroro. Jihova ọ kẹ ahwo riẹ iruo evevọwẹ evaọ edẹ urere nana no. Fikiere ma rẹ sai fievahọ nọ okenọ Jihova, Ọjiroro Ologbo na, ọ te kẹ uzuazọ ebẹdẹ bẹdẹ, o te vọ avọ eware isiuru, eware iwoma nọ ma re wuhrẹ kpahe je ru. (Ọtausiwoma Na 3:11) Makọ epanọ ma wuhrẹ te evaọ idu-ikpe nọ e rọ obaro na kẹhẹ, ma te sai wo otoriẹ ovọvọ orọ “edidi efe, gbe areghẹ, gbe ẹriẹ Ọghẹnẹ” vievie he.—Ahwo Rom 11:33.

Ọsẹ na O Wo Uyoyou k’Owhẹ

19. Didi eme ọ imuẹro Jesu Kristi ọ kẹ ilele riẹ re ọ tẹ nya se ai ba?

¹⁹ Evaọ Nisan 14, 33 C.E., evaọ owọwọ urere riẹ kugbe ikọ ẹrọwọ 11 riẹ, Jesu ọ t’eme buobu rọ kẹ ae ẹgba fiki eware nọ e rọ obaro. Aikpobi a talamu Jesu evaọ edawọ riẹ, yọ a ruẹ uyoyou nọ o wo kẹ ae omomọvo no. (Luk 22:28, 30; Jọn 1:16; 13:1) Kẹsena Jesu ọ tẹ kẹ ae imuẹro nọ: “Ọsẹ na [omariẹ] o you owhai.” (Jọn 16:27) Ẹvẹ eme eyena i fiobọhọ kẹ ilele na te riẹ ọdawẹ nọ Ọsẹ obọ odhiwu rai o wo kẹ ae!

20. Eme whọ ta mu no nọ who re ru, kọ eme whọ rẹ sai wo imuẹro kpahe?

²⁰ Ibuobu nọ e rọ uzuazọ enẹna a gọ Jihova avọ ẹrọwọ ikpe buobu no. Avro ọ riẹ hẹ, taure uyerakpọ umuomu onana u te ti kuhọ, ma te rẹriẹ ovao ku edawọ efa buobu. Whọ kuvẹ vievie he re edawọ hayo uye itieye na e lẹliẹ owhẹ wo avro kpahe uyoyou omarokpotọ Ọghẹnẹ kẹ owhẹ. O re bẹbẹ re ma bru okpa họ uzẹme onana: Jihova o wo uyoyou k’owhẹ. (Jemis 5:11) J’omai omomọvo ma hai ru ẹkẹ-abọ mai, rehọ omarokpotọ koko ijaje Ọghẹnẹ. (Jọn 15:8-10) Joma rehọ uvẹ kpobi ro jiri odẹ riẹ. Ma rẹ bọ ọtamuo mai ga re ma ruabọhọ esikẹle Jihova evaọ olẹ gbe ewuhrẹ Ẹme riẹ. Oghẹrẹ kpobi nọ odẹ n’ọtha ọ te jọ, nọ ma te bi ru uthoma mai re ma ru Jihova eva were, ma te jọ evaọ udhedhẹ, avọ imuẹro evọvọ kpahe uyoyou riẹ nọ u re kie he.—2 Pita 3:14.

Didi Uyo Whọ Te Kẹ?

• Re ma sae kpomamu evaọ abọ-ẹzi gbe evaọ iroro, uyoyou ono ma mae gwọlọ?

• Didi eware e rẹ sae whaha Jihova idibo riẹ eyou hu?

• Fikieme ewo uyoyou Jihova u je woma “vi uzuazọ”?

[Iwoho nọ e rrọ ẹwẹ-obe avọ 5]

Ma te roro nọ ma sioma no uyoyou Ọghẹnẹ, ma rẹ sae daoma re ma kpọ eware vi

[Uwoho nọ o rrọ ẹwẹ-obe avọ 7]

Pọl o wo otoriẹ oware nọ o soriẹ nọ a je ro kpokpo iei