Iwhowho Uvie A n’Iyẹrẹ

Ẹnyate Ahwo nọ O rọ Bẹbẹ re A Nyate

ISẸRI JIHOVA a rẹ daoma re a rọ ovuẹ Uvie na nyabru ahwo kpobi nọ a rẹ sae nyate oma. Ẹsejọ, o rẹ gwọlọ omodawọ ulogbo re a nyate ahwo nọ o rrọ bẹbẹ re a duku eva uwou. (Mak 13:10) Rọ kpahe onana, ọgbodibo ọkobaro obọdẹ jọ evaọ orẹwho South America jọ o gbiku oware onana nọ o via.

“Ẹdẹjọ mẹ tẹ riẹ nọ osu ubrotọ na o bi ti weze ziọ ẹkwotọ nọ a fi omẹ avọ aye mẹ họ. Nọ o rọ vevẹ nnọ ọ rọ usu ahwo nọ o rọ bẹbẹ re a nyabru eva uwou na, me te kere ileta sei je fi ebe jọ nọ a kporo no Ebaibol ze fihọ iẹe, kugbe ibroshọ na Eme Ọghẹnẹ Ọ Gwọlọ Mi Omai? gbe obe ọ Mankind’s Search for God avọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na. Ileta mẹ i dhesẹ ẹjiroro ebe enana ọvuọvo.

“Fikinọ me wo isiuru re mẹ riẹ iroro riẹ kpahe ebe na, mẹ tẹ yare re me lele iei t’ẹme. Eka jọ nọ i lele i rie, a tẹ k’omẹ uvẹ re me lele iei t’ẹme, mẹ tẹ wha ividio na Jehovah’s Witnesses—The Organization Behind the Name lele oma. Me lele i rie t’ẹme evaọ oware wọhọ euwa ivẹ. Nọ me lele osu na rri ividio na no, mẹ tẹ nọe oware nọ o roro. Ọ kuyo nọ: ‘Ukoko ofa o rrọ otọakpọ na wọhọ ọrai na ha. Dodokọ me wo ahwo wọhọ owhẹ na nọ i re fiobọhọ k’omẹ ru iruo isuẹsu mẹ!’ Kẹsena ọ tẹ nọ sọ me te oria nọ u wuzou ukoko mai evaọ akpọ-soso no. Mẹ tẹ ta kẹe nọ dede nọ o rọ ute mẹ anwẹnọ mẹ jọ ikpe 14, me ti wo uvẹ nọ me ro weze kpohọ oria nọ u w’uzou ukoko mai evaọ akpọ-soso nọ o rọ Brooklyn, New York ho. Oyena yọ ovojọ evaọ itee nọ e rẹ bẹ ẹnyate. O te dhizu nabi rri omẹ evaọ omoke jọ. Ọ tẹ ta nọ ọ gwọlọ re me wo uvẹ na. O te ru ebe erẹ na k’omai jẹ hwaosa igho arupre mai!

“Enẹna osu na o bi wo emagazini Uwou-Eroro gbe Awake! na ẹsikpobi. Ma rẹro nọ kẹle na ma te sai mu uwuhrẹ Ebaibol họ kugbei.”