Ẹkpọ Emọ-Uwuhrẹ Kpohọ Ukoko nọ O rọ Emu Odẹ Mai Na
1 “O rọ ovuẹ nọ a be ta evaọ evẹrẹ nọ i bu vi 200. O rọ ovuẹ nọ a bi yo evaọ ekuotọ nọ i bu vi 210. O rọ ovuẹ nọ a be wọ nya kpohọ oria kpobi nọ a rẹ jọ ruẹ ahwo. O rọ abọ ewhowho usiuwoma nọ o mai rro kpobi nọ akpọ na o tu ruẹ, ovuẹ nọ u bi ku ima ahwo buobu gbe evaọ otọakpọ na. A rehọ ikpe nọ i bu vi udhusoi rọ ruẹrẹ Isẹri Jihova họ no re a ru iruo enana!”
2 Eme enana a ro muọ ividio ọ Jehovah’s Witnesses—The Organization Behind the Name họ. U muhọ avọ iyo enọ nana nọ ọ kẹ: Amono Isẹri Jihova a ghinẹ rọ? Ẹvẹ a rọ ruẹrẹ iruo rai họ? Be rọ kpọe? Be rẹro te araha-igho riẹ? O rẹ lẹliẹ ahwo nọ i bi rri rie riẹ nọ “a wuhrẹ Isẹri Jihova evaọ akpọ soso wọhọ ukoko re a fiobọhọ kẹ erivẹ rai bọ ẹrọwọ fihọ Ebaibol na,” yọ o tudu họ ai awọ re a ruẹ kẹ oma rai ukoko nọ o rọ emu odẹ mai na. Nọ o riwi ividio ọnana no, aye jọ nọ o bi wuhrẹ obe kugbe omai o te kie ruọ oviẹ oghọghọ gbe ovuhumuo ọ tẹ ta nọ: “Kọ ẹvẹ ohwo jọ ọ gbẹ rọ riẹ nọ ọnana họ ukoko Jihova, Ọghẹnẹ uzẹme na ha?”—Wawo 1 Ahwo Kọrint 14:24, 25.
3 Aye ọfa jọ o wuhrẹ Ebaibol na kpemu kparo no evaọ ikpe buobu, rekọ ọ be sae rọwo uzẹme na ha inọ Esanerọvo na yọ uwuhrẹ erue. A te dhesẹ ividio mai na kẹe gbe ọzae riẹ. U te duobọ te ai udu gaga a te rri rie isiava evaọ aso ọvo ọyena. Evaọ obe uwuhrẹ ọfa rai, aye na o te dhesẹ isiuru riẹ inọ ọ gwọlọ jọ Osẹri. Ọ tẹ ta nọ anwẹdẹ ọ rẹriẹ ova dhe ẹrọwọ Esanerọvo riẹ ọ tẹ se nọ ọ rẹ tẹro vi ukoko mai gbe ahwo nọ e riẹ eva. No ividio na ze o te vuhumu nọ ọ ruẹ ukoko uzẹme Ọghẹnẹ no. Ọ gwọlọ nọ ọ rẹ ta usiuwoma n’uwou ruọ uwou ovavo. Nọ a ta kẹe oghẹrẹ owọ nọ u fo nọ ọ rẹ jẹ re ọ tẹ jọ owhowho-uvie nọ ọ re họ-ame he, ọ tẹ ta nọ: “Me ti ru oware nọ o gwọlọ kpobi vẹrẹ vẹrẹ.” O te no ichọche riẹ no, o te mu usiuwoma họ ẹta, ọ tẹ jẹ be họre gaga mukpahe ewuhrẹ Esanerọvo na.
4 Uzẹme o rọ inọ emọ-iwuhrẹ Ebaibol a re ru emamọ ẹnyaharo ẹzi jẹ rro te ẹkpako vẹrẹ okenọ a te vuhu ukoko Jihova jẹ be nyusu kugbei. Nwani fo, nọ ahwo 3,000 e họ-ame no evaọ Pẹntikọst, “a tẹ ruẹ obọ họ uwuhrẹ ahwo ikọ na avọ usu-ovo-onya.” (Iruẹru 2:42) U wuzou nọ ma re fiobọhọ kẹ emọ-uwuhrẹ re a ru epọvo na nẹnẹ. Kọ ẹvẹ ma sai ro ru erei?
5 Wọ Owha-Iruo Na: Ohwo kpobi nọ o bi ru ilele ọ rẹ riẹ nọ o rọ owha-iruo riẹ re ọ kpọ ova ọmọ-uwuhrẹ Ebaibol na ziọ ukoko Ọghẹnẹ. (1 Tim. 4:16) A re riwi oke uwuhrẹ kpobi wọhọ owojẹ kpohọ ẹdẹ evawere nọ ohwo ọkpokpọ na o ti ro dhesẹ omarọkẹ Jihova riẹ via evaọ ame-ọhọ. Onọ ovo jọ nọ a rẹ nọe evaọ oke ame-ọhọ na họ: “Kọ who vuhumu nọ omarọkẹ gbe ame-ọhọ ra u dhesẹ owhẹ via wọhọ omọvo Isẹri Jihova evaọ usu kugbe ukoko Ọghẹnẹ nọ ẹzi ọ be kpọ?” Fikiere, u wuzou nọ o re vuhumu inọ ọ rẹ sae gọ Ọghẹnẹ hẹ ababọ ukoko Ileleikristi uzẹme na nọ ọ rẹ nyusu kugbe.—Mat. 24:45-47; Jọn 6:68; 2 Kọr. 5:20.
6 Gbẹ hai wuhrẹ ọmọ-uwuhrẹ na kpahe ukoko okogho na gbe ukoko akpọ-soso na nọ o rọ emu Isẹri Jihova. Ru onana evaọ uwuhrẹ Ebaibol kpobi, muhọ evaọ uwuhrẹ ọsosuọ na. No emuhọ ze, zizie ọmọ-uwuhrẹ na ziọ iwuhrẹ, whọ vẹ gbẹ hai ziziei.—Evia. 22:17.
7 Rehọ Ekwakwa nọ A Kẹ na ro Ruiruo: Ebe obọdẹ mai nọ a re ro ru iwuhrẹ Ebaibol họ ibroshọ na Eme Ọghẹnẹ Ọ Gwọlọ Mi Omai? gbe obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Ebe ivẹ na i fiẹgba họ ẹgwọlọ nọ a rẹ rọ nyusu kugbe ukoko na. Ekuhọ uwuhrẹ avọ 5 evaọ ibroshọ Ọghẹnẹ Ọ Gwọlọ na o ta nọ: “U fo nọ who re gbe he wuhrẹ kpahe Jihova je yoẹme kẹ ẹgwọlọ riẹ. Ekpohọ iwuhrẹ evaọ Ọgwa Uvie Isẹri Jihova u ti fiobọhọ k’owhẹ ru ere.” Kẹse kẹse obe Eriariẹ na o tuduhọ ọmọ-uwuhrẹ na re o kpohọ iwuhrẹ. Uzou avọ 5, edhe-ẹme avọ 22, o kẹ uzizie onana: “Isẹri Jihova . . . a rọ oma oruọruọ kpakpa owhẹ re who wo abọ kugbe ai gọ Ọghẹnẹ ‘evaọ ẹzi gbe uzẹme.’ (Jọn 4:24)” Uzou avọ 12, edhe-ẹme avọ 16, o ta nọ: “Nọ whọ gbẹ be nyaharo evaọ ewuhrẹ ọnana je bi ru ei fihọ uruemu re who kpohọ iwuhrẹ Isẹri Jihova na, ẹrọwọ ra ọ rẹ te ga viere.” Uzou avọ 16, edhẹ-ẹme avọ 20, o ta nọ: “Ru ei họ uruemu ra re who he kpohọ iwuhrẹ Isẹri Jihova.” O te fibae nọ: “Onana u re ti fiobọhọ k’owhẹ wo otoriẹ je fi eriariẹ Ọghẹnẹ họ iruo evaọ uzuazọ ra o vẹ jẹ wha evawere se owhẹ. Re whọ jọ abọ okugbe-inievo Ileleikristi akpọ soso u re ti fiobọhọ k’owhẹ si kẹle Jihova.” Uzou avọ 17 o t’ẹme kpahe oghẹrẹ nọ ohwo ọ rẹ rọ ruẹ uvi ufuoma evaọ udevie ahwo Ọghẹnẹ. Nọ ma bi wuhrẹ kugbe amọfa na, o rọ owha-iruo mai re ma fiẹgba họ abọ iwuhrẹ enana.
8 Ibroshọ na Jehovah’s Witnesses—Unitedly Doing God’s Will Worldwide yọ emamọ okwakwa nọ a kporo re o lẹliẹ ahwo riẹ kpahe ukoko ovo nọ a rẹ ruẹ nọ Jihova o bi ro ruiruo nẹnẹ ro ru oreva riẹ gba. Eme ivevẹ nọ e riẹ eva kpahe odibọgba mai, iwuhrẹ mai, gbe ukoko na e rẹ tudu họ enọ i se rie awọ re a nyusu kugbe omai evaọ egagọ Ọghẹnẹ. Nọ a te mu uwuhrẹ Ebaibol họ no, u fo nọ ma re fi ibroshọ ọnana jọ họ ada kẹ ọmọ-uwuhrẹ na re o se kẹ omobọ riẹ. U du fo re ma wuhrẹ iẹe kugbei hi wọhọ epanọ ma jẹ hai ru vẹre.
9 Ividio nọ Ukoko-Ulogbo o kporo no e rọ ekwakwa obọdẹ nọ a rẹ rọ kpọ emọ-uwuhrẹ kpohọ ukoko nọ o rọ emu odẹ mai na. U re woma otẹrọnọ a rẹ sae riwi (1) The New World Society in Action, ọwariẹru ọrọ 1954 nọ u dhesẹ oghẹrẹ edhere owoma, ẹkpatiẹ, gbe ẹzi uyoyou nọ ukoko Jihova ọ be rọ nyaharo; (2) United by Divine Teaching, nọ o ta kpahe okugbe udhedhẹ nọ a dhesẹ via no evaọ ikokohọ-ilogbo akpọ soso mai evaọ ofẹ Ovatha-Ọre Europe, Obọze-Ọre America, Africa, gbe Esia; (3) To the Ends of the Earth, onọ u kpoka họ ukpe avọ 50 ọrọ Isukulu Ebaibol ọ Uwou-Eroro obọ Giliad je dhesẹ epanọ imishọnare na a kpomahọ iruo usiuwoma ota akpọ na soso no; (4) Jehovah’s Witnesses Stand Firm Against Nazi Assault, onọ o t’ẹme kpahe ikuigbe ejaja aruọwha Isẹri na gbe obokparọ rai evaọ aro olahiẹ nọ Hitler ọ jẹ kẹ ai; jegbe (5) Jehovah’s Witnesses—The Organization Behind the Name.
10 Kpahe Iwuhrẹ, Fi Ute Ẹnyaharo Họ: A re ru ei vevẹ kẹ emọ-iwuhrẹ na nọ u fo re a wuhrẹ omai evaọ obe uwuhrẹ Ebaibol evaọ obọ iwou mai gbe ọrọ uwuhrẹ ogbotu evaọ iwuhrẹ ukoko. (Jọn 6:45) U fo re ohwo ọkpokpọ ọ nyaharo evaọ otoriẹ riẹ ọrọ Ikereakere na gbe ukoko na. Re oyena u t’obọ, ekpohọ iwuhrẹ e r’oja. (Hib. 10:23-25) Muọ ohwo na họ ezizie ziọ iwuhrẹ ukoko na ovavo. Ahwo kpokpọ jọ nọ i wo isiuru a re muọ iwuhrẹ na họ ẹnyaze makọ taure a te mu uwuhrẹ Ebaibol uviuwou ẹsikpobi họ. Dede, u fo re ma kẹ emamọ oriruo ẹkwoma iwuhrẹ nọ ma rẹ nyaze ẹsikpobi.—Luk 6:40; Fil. 3:17.
11 Kẹ ovuẹ buobu kpahe iwuhrẹ na gbe oghẹrẹ nọ a re ru ai re udu u te ọmọ-uwuhrẹ na otọ nọ ọ tẹ be nyaze ewuhrẹ ọsosuọ riẹ. Nọ aro i re ru ahwo buobu gedegede nọ a te bi kpohọ oria evaọ oke ọsosuọ na, o rẹ sae kẹ erere re who su ọmọ-uwuhrẹ na kpohọ Ọgwa Uvie na nọ ọ tẹ be nyaze uwuhrẹ ọsosuọ riẹ. Udu u re tei otọ viere nọ whọ tẹ rọ usu riẹ nọ o bi zere ahwo ukoko na. Maero, dede iei ziezi, ruei re udu riẹ u t’otọ.—Mat. 7:12; Fil. 2:1-4.
12 Tudu họ ọmọ-uwuhrẹ na awọ re o kpohọ ẹdẹ okokohọ obọdẹ jọ, okokohọ okogho, hayo okokohọ ubrotọ nọ uvẹ u te rovie. Ẹsejọ whọ rẹ sai kere odẹ riẹ fihọ otọ kẹ omoto dede.
13 Ru ei Wo Uvi Ovuhumuo: Organized to Accomplish Our Ministry, ẹwẹ-obe avọ 92, o ta nọ: “Otẹrọnọ ovuhumuo odidi ra kẹ ukoko Jihova u dhesẹ oma via evaọ ẹmeọta ra kugbe ahwo nọ i wo isiuru, o rẹ te lọhọ kẹ ai re a rro avọ ovuhumuo o vẹ jẹ wọ ai wo ẹnyaharo evaọ ẹriẹ Jihova.” Hae t’ẹme nọ o liọ ẹsikpobi kpahe ukoko okogho na, orọnikọ ẹme ẹkpẹlobọ họ. (Ol. 84:10; 133:1, 3b) Evaọ elẹ nọ whọ be lẹ evaọ uwuhrẹ Ebaibol na, fodẹ ukoko na gbe ẹgwọlọ nọ ọmọ-uwuhrẹ na o re ro kpohọ iẹe ẹsikpobi.—Ẹf. 1:15-17.
14 Ma ghinẹ gwọlọ nọ ahwo kpokpọ a dhesẹ ovuhumuo udu rai kpobi kẹ usu awere gbe ufuoma ẹzi nọ a rẹ jọ udevie ahwo Ọghẹnẹ ruẹ. (1 Tim. 3:15; 1 Pita 2:17; 5:9) Wọhọ Isẹri Jihova, j’oma ru utho ẹgba mai re ma kpọ emọ-iwuhrẹ Ẹme Ọghẹnẹ kpohọ ukoko nọ o rọ emu odẹ mai.
[Blurb on page 3]
Emọ-iwuhrẹ a re ru ẹnyaharo ẹzi vẹrẹ viere nọ a tẹ ruẹ ukoko na kẹ oma rai
[Blurb on page 4]
Whọ raha oke he evaọ ezizie emọ-iwuhrẹ kpohọ iwuhrẹ