Fiobọhọ kẹ Amọfa Kpohọ Iwuhrẹ
1 “Egbẹnyusu kpobi nọ e rọ okogho na . . . enọ e gwọlọ kpohọ iwuhrẹ na ma zizie i rai avọ evawere re a ru ere.” Anwẹnọ owhowhovia ọnana ọ romavia evaọ ukere November 1880, ọrọ Zion’s Watch Tower na, Isẹri Jihova a be hae rehọ ọwhọ zizie ahwo re a kuomagbe rọkẹ uwuhrẹ Ebaibol. (Evia. 22:17) Onana yọ abọ nọ o wuzou ọrọ egagọ uzẹme na.
2 O r’Oja re A Jariẹ: Eghale i re noi ze evaọ okenọ ma te kuomagbe ukoko na. Ma rẹ riẹ Ọghẹnẹ igbunu mai, Jihova, woma viere. Evaọ ukoko na, ma re kuomagbe re ‘ỌNOWO na o wuhrẹ’ omai. (Aiz. 54:13) Ukoko riẹ u ru ọruẹrẹfihotọ uwuhrẹ Ebaibol ikẹse kẹse fihọ nọ u re si omai kẹle iẹe jẹ kẹ obufihọ nọ u w’iruo evaọ efihiruo “ohrẹ Ọghẹnẹ” kpobi. (Iruẹru 20:27; Luk 12:42) Iwuhrẹ i re wuhrẹ omai kpahe ona ewuhrẹ Ẹme Ọghẹnẹ. Ekareghẹhọ nọ i no Ikereakere na ze i re fiobọhọ k’omai reawere usu obokparọ kugbe amọfa jegbe Jihova omariẹ. Usu kugbe enọ i you Ọghẹnẹ o rẹ kẹ ẹrọwọ mai ẹgba.—Rom 1:11, 12.
3 Kẹ Uzizie Ovavo: No uwuhrẹ ọsosuọ na vrẹ, zizie ọmọ-uwuhrẹ Ebaibol kpobi kpohọ iwuhrẹ na. Kẹe obe-uzizie na. Kpare isiuru riẹ ẹkwoma ẹme jọ nọ ọ tuduhọ owhẹ awọ evaọ ewuhrẹ n’ukpo na nọ whọ rẹ ghale kugbei gbe ẹkwoma ẹmeọta kpahe oware jọ nọ a te t’ẹme kpahe evaọ ewuhrẹ n’otha. Dhesẹ oghẹrẹ nọ Ọgwa Uvie na ọ rọ, je wo imuẹro nọ ọ riẹ epanọ ọ rẹ rọ gwọlọ iẹe.
4 Otẹrọnọ ọmọ-uwuhrẹ na ọ gbẹ nya ẹsiẹsiẹe he, gbẹ hai zizie ei. Rehọ umutho iminiti jọ k’oka k’oka ro dhesẹ kẹe epanọ ukoko mai u re ruiruo. Rehọ ibroshọ Doing God’s Will na gbe ividio Jehovah’s Witnesses—The Organization Behind the Name na, otẹrọnọ o lọhọ, ro dhesẹ kẹe kpahe omai gbe iwuhrẹ mai. Wha iwhowho-uvie efa lele oma re ọmọ-uwuhrẹ na ọ riẹ ae. Evaọ olẹ, yere Jihova kẹ ukoko na jẹ fodẹ ẹgwọlọ ọmọ-uwuhrẹ na re o kuomagbei.
5 Who sioma-họ-emu hu re who fiobọhọ kẹ ahwo ọkpokpọ nọ i wo isiuru re a kuomagbe omai. Nọ ovuhumuo rai kẹ Jihova ọ be rro na, o te wọ ae re a fi oware nọ a bi wuhrẹ họ iruo jẹ jọ abọjọ ukoko okugbe Ọghẹnẹ.—1 Kọr. 14:25.