Eru Ebe-Iwuhrẹ Ebaibol nọ E rẹ Nyaharo
Abọ Avọ 8: Ọmọ-Uwuhrẹ na nọ A rẹ Kpọ Rri Ukoko Na
1 Orọnikọ ute mai nọ ma bi ro ru ebe-iwuhrẹ Ebaibol họ re ma wuhrẹ ahwo eriariẹ ọvo ho, rekọ re ma je fiobọhọ kẹ emọ-uwuhrẹ na re a kuomagbe ukoko Ileleikristi na. (Zek. 8:23) Ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo? o rẹ sai fiobọhọ k’omai ru onana. Fi ojọ họ ada kẹ emọ-uwuhrẹ Ebaibol ekpokpọ ra, jẹ tuduhọ ae awọ re a sei. Fibae, jọ uwuhrẹ na rehọ umutho iminiti jọ koka koka rọ ta kẹ ae kpahe ukoko Jihova.
2 Iwuhrẹ Ukoko: Ugogo edhere nọ emọ-uwuhrẹ Ebaibol a sai ro wo ovuhumuo kẹ ukoko Ọghẹnẹ họ ẹkwoma oma nọ a re kugbe omai evaọ iwuhrẹ ukoko. (1 Kọr. 14:24, 25) Fikiere, whọ rẹ sai mu iwuhrẹ isoi nọ ma wo eva ẹkpoka na họ edhesẹ kẹ ọmọ-uwuhrẹ na unọjọ utọjọ. Fodẹ uzoẹme ovuẹ ogbotu notha na. Dhesẹ oria nọ a ti wuhrẹ evaọ Uwuhrẹ Uwou-Eroro na gbe Obe Uwuhrẹ Ukoko na kẹ ae. Dhesẹ epanọ a re ru Isukulu Odibọgba Esuo-Ọghẹnẹ gbe Ewuhrẹ Odibọgba na kẹ ae. Nọ who te wo ẹme evaọ isukulu na, otiẹsejọ whọ sai dhesẹ epanọ who ti ru ẹme na kẹ ae. Ta ugogo eware jọ nọ a jọ iwuhrẹ na ta kpahe kẹ ae. Rehọ iwoho nọ e rrọ ebe mai ro fiobọhọ kẹ ae re a jọ iroro rai ruẹ oware nọ ma re ru evaọ iwuhrẹ mai. Jọ umuo ẹdẹ ọsosuọ nọ whọ rọ to obe-uwuhrẹ Ebaibol họ kugbe ai na zizie ai re a ziọ ewuhrẹ iwuhrẹ ukoko mai.
3 Nọ Emu Owọwọ Olori na, ikokohọ, gbe iweze ọsẹro okogho e tẹ be kẹle no, rehọ iminiti jọ ro dhesẹ epanọ e rẹ jọ kẹ ae, jẹ bọ isiuru rai kẹ eruẹrẹfihotọ nana. Rọ oma totọ kiyo enọ wọhọ: Fikieme a bi ro se omai Isẹri Jihova? Fikieme ma bi ro se eria egagọ mai Egwa Uvie? Iruo vẹ ekpako ukoko gbe idibo iruiruo a wo? Ẹvẹ a be rọ rehọ ẹro te iruo usiuwoma ota gbe ẹkwotọ usiuwoma ota na? Ẹvẹ a bi ro kere ebe mai? Ẹvẹ a be rọ ruẹ ugho nọ a be rọ wha iruo ukoko na haro? Iruo vẹ uwou ogha gbe Ugboma Esuo nọ o be rọ ẹro te iruo na a wo?
4 Ividio nọ I re Wuhrẹ Ohwo: Edhere ọfa nọ ọmọ-uwuhrẹ Ebaibol ọ sae rọ riẹ oghẹrẹ nọ ukoko Jihova o rrọ họ ẹkwoma ividio mai. Ividio na To the Ends of the Earth u dhesẹ iruo usiuwoma ota akpọ-soso mai; Our Whole Association of Brothers u dhesẹ okugbe inievo akpọ-soso mai; gbe United by Divine Teaching u dhesẹ okugbe nọ Isẹri Jihova a wo. Nọ aye jọ nọ ọ rehọ emagazini gbe ebe efa mai te ikpe isoi no o rri ividio ọ Jehovah’s Witnesses—The Organization Behind the Name na no, irui oviẹ i te su noi aro ze. O wo evaifihọ kpahe Isẹri nọ i bi weze bru ei ze na, rekọ nọ o rri ividio na no, o te wo iroro inọ o re fi eva họ ukoko na re. A te mu uwuhrẹ họ kugbei, yọ eva oka nọ u lelei rie, o te kpohọ iwuhrẹ eva Ọgwa Uvie.
5 Ẹkwoma umutho iminiti jọ nọ ma rẹ raha kugbe emọ-uwuhrẹ mai koka koka, gbe ebe mai nọ a kere no Ebaibol ze na nọ ma re ro ruiruo, ma rẹ sae rọ ẹmẹrera kpọ emọ-uwuhrẹ Ebaibol rri ukoko nọ Jihova o bi ro ruiruo nẹnẹ.
[Study Questions]
1. Fikieme o jẹ rrọ oware erere re ma ta ẹme jọ kpahe ukoko Jihova evaọ oka kpobi nọ ma bi ru obe-uwuhrẹ Ebaibol?
2. Ẹvẹ ma sae rọ ta udu họ emọ-uwuhrẹ Ebaibol awọ re a ziọ iwuhrẹ ukoko?
3. Abọ ukoko na vẹ ma rẹ sae ta ẹme kpahe?
4, 5. Ẹvẹ ividio mai e sae rọ lẹliẹ ahwo wo ovuhumuo kẹ ukoko na?