Fikieme A Je Ru Ei?
1 A ruẹaro kpahe Kristi na nọ ‘ọwhọ kẹ uwou Ọghẹnẹ o re ti mu ei lọ.’ (Ol. 69:9) Ọwhọ Jesu kẹ egagọ uzẹme Jihova o wọ riẹ re o fi odibọgba na họ oware ọsosuọ. (Luk 4:43; Jọn 18:37) Ọwhọ ọvo ọnana re a se isẹri kpahe uzẹme na u dhesẹ oma via no evaọ odibọgba Isẹri Jihova nẹnẹ. Ukpe iruo n’ukpo, ahwo 645,509 evaọ akpọ soso a w’abọ evaọ abọ iruo ọkobaro na jọ kamara kamara. Nọ ma te roro kpahe omarọkẹ Ọghẹnẹ mai, ma rẹ sai roro sọ ma sae ruẹrẹ eyero mai họ re ma ruẹse ruiruo wọhọ ọkobaro ubroke hayo ọrọ ẹsikpobi.—Ol. 110:3; Ọtausi. 12:1; Rom 12:1.
2 Re a rria evaọ eyero-akpọ nọ o wo oriobọ ekwakwa-efe, ahwo buobu evaọ akpọ na a rẹ sai wo otoriẹ oware nọ o soriẹ ze nọ ohwo o je ruiruo gaga evaọ odibọgba na kẹ oware nọ o rẹ wha erere ugho hayo oruaro ze he he. Kọ fikieme ekobaro na a je ru ei? Ekobaro e riẹ nọ a bi ru iruo nọ o rẹ kẹ uzuazọ. Fiki uyoyou udidi nọ o be wọ ai kẹ Jihova jẹ rọ kẹ erivẹ rai, o wọhọ nọ owha-ulogbo jọ o re rai uzou re a fiobọhọ siwi izuazọ ahwo. (Rom 1:14-16; 1 Tim. 2:4; 4:16) Imava-orọo ekobaro jọ a kurie họ ta nọ: “Fikieme ma je bi ruiruo ọkobaro? Kọ ma sae dikihẹ aro Jihova avọ iroro efuafo gu inoma oware nọ o whaha omai iruo ọkobaro?”
3 Oniọvo-ọmọtẹ ọfa o kere kpahe ẹjiroro riẹ re o mu iruo ọkobaro họ: “Mẹ avọ ọzae mẹ ma jiroro nọ omọvo o re ruiruo, nọ u dhesẹ nọ ma re siobọno ẹdẹ eware nọ i wuzou hu. Ghele, Jihova ọ ghale omai gaga no, o gbabọ k’omai re uvuhu u kpomai hi hayo oware ovo okare omai hi. . . . Mẹ ruẹ uvi ẹjiroro nọ mẹ rẹ rọ jọ uzuazọ no—orọ obufihọ kẹ ahwo nọ i wo ẹgwọlọ ẹzi re a nyaze te riẹ Jihova, Ọghẹnẹ uzẹme na, inọ o thabọ no ahwo nọ e be gwọlọ iẹe he.” Nọ a bi roro kpahe ẹkpata oke nana, eware nọ e r’oja evaọ uzuazọ e be da ekobaro ẹro nọ a be ghinẹ daoma re a wo efe ẹzi nọ e rẹ jọ bẹdẹ bẹdẹ na.—1 Tim. 6:8, 18, 19.
4 Otẹrọnọ uvẹ o rọ k’owhẹ, kọ ẹvẹ who gbe kuomagbe egba idu inievo-emezae gbe emetẹ akpọ soso ra ha enọ i bi ru iruo ọkobaro na? Eva ere o ruo whọ jẹ sae ruẹ obọ oghọghọ ovo rai nọ a wo.