Iwuhrẹ Odibọgba Ọrọ April

Oka nọ O Rọ April 7 Muhọ

Ole avọ 100 (50)

12 min: Iwhowhovia obonẹ. Salọ Iwhowhovia no Odibọgba Uvie Mai ze. Tẹme kpahe “Ikokohọ-Ilogbo Akpọ-Soso Evaọ 1998.” Fodẹ eria iwoma jọ nọ e rọ emagazini ekpokpọ mai.

15 min: “Ahwo Buobu A bi Kurẹriẹ.” Enọ gbe iyo. Kiẹ igogo eme nọ a ta riwi nọ e rọ Uwou-Eroro Na ọrọ August 15, 1993 (ọrọ Oyibo), ewẹ-ebe 12-17.

18 min: “Fiobọhọ kẹ Ahwo Kpokpọ Wo Otoriẹ.” Enọ gbe iyo. Kiẹ eware nọ e rọ ibroshọ Ọghẹnẹ Ọ Gwọlọ na riwi: ona uwuhrẹ nọ a ru lọhọ, enọ nọ i fo, ifoto isiuru, eria Ikereakere buobu. Fiẹgba họ ute emuhọ iwuhrẹ nọ i re su kpohọ obe Eriariẹ na. Ru re owhowho-uvie nọ o te o ru odhesẹvia emuhọ uwuhrẹ re o ru ei lele edhere nọ a dhesẹ evaọ edhe-ẹme avọ 4 na. Tudu họ esẹ gbe ini kpobi evaọ ukoko na awọ re a wuhrẹ ibroshọ na kugbe emọ rai.

Ole avọ 130 (58) gbe olẹ ekuhọ.

Oka nọ O Rọ April 14 Muhọ

Ole avọ 107 (57)

10 min: Iwhowhovia obonẹ. Kiẹ Ẹkpẹti Onọ riwi, jẹ jọ ukoko na riẹ sọ ebe jọ e riẹ nọ a gwọlọ re a ruẹse ru evu-ebe Ọgwa Uvie na vọ.

15 min: “Ẹkpọ Emọ-Uwuhrẹ Kpohọ Ukoko nọ O rọ Emu Odẹ Mai Na.” (Edhe-eme 1-6) Enọ gbe iyo. Se edhe-eme 5-6 gbe ikereakere nọ a fodẹ na. Fodẹ epanọ emọ-iwuhrẹ Ebaibol nọ e rọ okogho na a ru okenọ a ruẹ ividio ọ Jehovah’s Witnesses—The Organization Behind the Name.

20 min: “Wuhrẹ Amọfa Oware nọ Ọghẹnẹ Ọ Gwọlọ.” Rehọ edhe-eme 1-4 t’ẹme kugbe ogbotu na. Ru odhesẹvia eme nọ e rọ edhe-ẹme avọ 5, rehọ oghẹrẹ eria sa-sa ene ru odhesẹvia na—evaọ iyẹrẹ, eva obọ uwou, evaọ oria ekiọthuọ, gbe eria nọ imoto e rẹ kpahe. Kareghẹhọ ahwo na kpobi re a dẹ ẹkẹ ibroshọ gbe emagazini rai kẹ usiuwoma ota re a te no Ọgwa Uvie na kpo nẹnẹ.

Ole avọ 126 (89) gbe olẹ ekuhọ.

Oka nọ O Rọ April 21 Muhọ

Ole avọ 113 (62)

15 min: Iwhowhovia obonẹ. Dhesẹ nọ u ri lehie hrọ họ re a fi obe họ kẹ iruo ọkobaro ubroke na evaọ May. Iyẹrẹ epanọ igho e nya. Oke o tẹ riẹ, t’ẹme kpẹkpẹe kpahe oware nọ o jọ usiuwoma via evaọ obonẹ kpahe ibroshọ Ọghẹnẹ Ọ Gwọlọ nọ a fihọ ada hayo ibroshọ na nọ a ro mu iwuhrẹ Ebaibol họ.

15 min: “Ẹkpọ Emọ-Uwuhrẹ Kpohọ Ukoko nọ O rọ Emu Odẹ Mai Na.” (Edhe-eme 7-14) Enọ gbe iyo. Ru re owuhrẹ nọ o te ọ roma totọ t’ẹme kugbe ọmọ-uwuhrẹ kpahe ẹgwọlọ nọ a re ro kpohọ iwuhrẹ.

15 min: Rehọ Ebe Mai Ruiruo Ziezi. Ẹme nọ ọkpako o re ru. (Rri Odibọgba Uvie Mai ọrọ March 1996, ewẹ-ebe 3-5.) Iyẹrẹ i dhesẹ nọ ikoko i bi vi emagazini bu vi enọ a rẹ sai fihọ ada evaọ amara. Enọ a be niyẹrẹ rai hi i bu te 50 evaọ udhusoi. (Dhesẹ unu nọ a be niyẹrẹ rai hi evaọ ukoko nana.) Kọ eme o be via kẹ emagazini enana? A be nyasiọ ibuobu rai ba ekọbọdo hayo ku ai fiẹ. Ẹvẹ a sae rọ whaha onana? Owhowho-uvie kpobi ọ rẹ roma kpotọ kiẹ unu nọ ọ gwọlọ o ve vi enọ ọ rẹ sae fihọ ada. Ruei họ uruemu re whọ rehọ emagazini kẹ ohwo nọ whọ nyaku kpobi. Who ku erọ anwae fiẹ hẹ. W’abọ evaọ iruo emagazini ẹsikpobi.

Ole avọ 128 (99) gbe olẹ ekuhọ.

Oka nọ O Rọ April 28 Muhọ

Ole avọ 121 (68)

15 min: Iwhowhovia obonẹ. Kareghẹhọ ahwo na kpobi re a niyẹrẹ usiuwoma ota April rai. Whowho edẹ ahwo nọ a ti ru iruo ọkobaro ubroke evaọ May. Fodẹ ọruẹrẹfihotọ nọ a bi ru evaọ ukoko na kẹ omakugbe usiuwoma ota. Evaọ etoke May ma rẹ daoma gaga re ma zihe bru ahwo nọ ma fi ibroshọ họ ada kẹ kpobi avọ ute emuhọ iwuhrẹ. Fodẹ idhere nọ a rẹ rọ rehọ ẹghẹ n’onọ edẹ gbe adrẹse ahwo nọ ma se isẹri ọnyakuo kẹ. Whọ rẹ sae kake fodẹ odẹ gbe adrẹse ra whọ vẹ nọ sọ o wo inọmba ifonu nọ a sae rọ t’ẹme kẹe. Zizie ogbotu na re a fodẹ idhere efa nọ i wo iruo kẹ ai no.

15 min: “Fikieme A Je Ru Ei?” Ọkpako ọ rẹ rehọ uzoẹme na t’ẹme kugbe ekobaro ẹsikpobi ivẹ hayo esa. (Otẹrọnọ ekobaro e gbẹ riẹ hẹ, rehọ enọ i re fi obe họ ẹsikpobi wọhọ ekobaro ubroke ruiruo.) Fi eme nọ e rọ uzoẹme na bae, “Ekobaro E rẹ Kẹ je Wo Eghale,” evaọ Uwou-Eroro Na ọrọ January 15, 1994 (ọrọ Oyibo). Ru re omomọvo ọ fodẹ oware nọ ọ jẹ rehọ iruo ọkobaro na. Ta kẹ ai re a gbiku nọ i dhesẹ oghẹrẹ nọ a ro wo eghale no fiki onana nọ a ru.

15 min: Ẹgwọlọ ukoko na. Ekpako na a rẹ sae rehọ oke nana kẹ evuẹ kpahe uvi ẹgwọlọ ukoko na jọ.

Ole avọ 129 (66) gbe olẹ ekuhọ.