Iwhowho Uvie A N’iyẹrẹ
“Mẹ Gwọlọ Gọ Ọghẹnẹ”
“AHWO mẹ, wha nya siẹ e ba.” Oye yọ use ẹnjẹle nọ Jọn ukọ na o yo evaọ ikpe-udhusoi ọsosuọ C.E. na. Evaọ edẹ mai na, ima ahwo udu-oruọzewọ buobu a j’owọ no a tẹ dhẹ no “Babilọn ologbo,” isuẹsu egagọ ọrue akpọ na. (Eviavia 18:1-4) Omọvo rai jọ họ Wilner ohwo Haiti, ọnọ o gbiku oma riẹ.
“A yẹ omẹ evaọ 1956 fihọ uviuwou nọ u kru Kathọlik gaga evaọ ẹmẹwho ọ St. Marc, Haiti. Dai roro oghọghọ uviuwou mẹ nọ a salọ omẹ, kugbe imava efa no ẹwho mai, re ma kpohọ isukulu-egagọ evaọ St. Michel de l’Atalaye, Haiti. Kẹsena, evaọ 1980, a te vi omai kpohọ Stavelot, Belgium, kẹ uwuhrẹ ofa. Ma tẹ jẹ jọ obei kpohọ yunivasiti Kathọlik.
“Evaọ oke ọsosuọ oma u je mu omẹ re mẹ ruọ iruo ọkwa-ozerẹ. Ẹdẹjọ evaọ ubrukpẹ nọ ma rẹ jọ riọ emu uvo, ozerẹ nọ ọ be rẹrote utu mai ọ tẹ ta nọ mẹ daji omojọ keme o wo ẹme jọ nọ ọ gwọlọ ta k’omẹ. Dai roro epanọ me guegue te nọ ọ ta k’omẹ nọ ọ gwọlọ lele omẹ wezẹ! Mẹ se kẹe rekọ oma o tẹ j’omẹ ọkọkora gaga. Me te kere se uviuwou mẹ kpahe oware nọ o via na, emerae jọ e ruọ emu no me te no isukulu na, dede nọ o were rae he. Mẹ tẹ ruẹ uwou evaọ iwhre na je wuhrẹ oware ofa evaọ isukulu.
“Nọ me zihe ziọ St. Marc, Ichọche Kathọlik i te n’omẹ oma kpobi no. Ghele na, mẹ gwọlọ gọ Ọghẹnẹ, rekọ mẹ riẹ onọ me re ru hu. Me kpohọ ichọche Adventist, ichọche Ebenezer, gbe ichọche Mormon. Mẹ jọ gedegede evaọ abọ-ẹzi.
“Mẹ tẹ kareghẹhọ nnọ okenọ mẹ jọ isukulu-egagọ na evaọ Belgium, mẹ jẹ hai se Ebaibol nọ Crampon ọ fa. Mẹ jọ eva riẹ duku nnọ Ọghẹnẹ o wo odẹ. Fikiere, mẹ tẹ jẹ rọ odẹ Ọghẹnẹ lẹ sei gaga re o fiobọhọ k’omẹ ruẹ egagọ uzẹme na.
“U kri hi, imava Isẹri Jihova a tẹ kwa ziọ oria mẹ. A jọ ahwo odhedhẹ, avọ adhẹẹ, gbe ọghọ. Edhere uzuazọ rai o si omẹ urru. Ẹdẹjọ, omọvo Isẹri ivẹ na jọ o te zizie omẹ re me kpohọ Ekareghẹhọ ẹgbukpe ọ uwhu Kristi. Ewuhrẹ na ọ were omẹ gaga mẹ tẹ rọwo re Isẹri na a wuhrẹ Ebaibol kugbe omẹ ẹsikpobi. Oware wọhọ emerae ezeza, u te mu omẹ ẹro inọ mẹ ruẹ edhere ọgbagba nọ mẹ rẹ rọ gọ Ọghẹnẹ no. Mẹ tẹ rọ uzuazọ mẹ mudhe kẹ Jihova jẹ họ-ame evaọ November 20, 1988.”
Uwhremu na, Wilner ọ tẹ ruọ iruo odibọgba oke-kpobi na. Nẹnẹ na, ọ rrọ ọkpako ukoko. Tei te aye riẹ, avọ emọ ivẹ rai, a be rọ evawere gọ kugbe evaọ ukoko na.
[Uwoho nọ o rrọ ẹwẹ-obe avọ 9]
Ẹkwoma ese Ebaibol na, Wilner o duku inọ odẹ Ọghẹnẹ họ Jihova