Epanọ Ọmọ O Ro Fiobọhọ Kẹ Ọsẹ Riẹ
JAMES, ọnọ o no England ze, nọ ọ vrẹ ikpe 30 no omojọ, o wo ẹyao ẹvori ọgaga gbe ẹyao iwewe. Ghele na, o lele oni gbe oniọvo-ọmọtẹ ọkpako riẹ kpohọ iwuhrẹ Isẹri Jihova ikpe buobu no. Dede na, ọsẹ riẹ o ti dhesẹ emamọ isiuru kpahe erọwọ rai hi. Owọwọ jọ nọ a kuọ ewuhrẹ nọ a jo ru odhesẹvia epanọ a re ro zizie erivẹ ziọ Ekareghẹhọ uwhu Kristi họ no, James o te siawọ kpobọ ubrukpẹ riẹ. Avọ awa, oni riẹ o te lele iei, ọ tẹ rue riẹ nọ ọ be kiẹ uvitha Uwou-Eroro gbe Awake! nọ i kri no na. Ọ tẹ salọ ọvo jọ nọ a kporo uzizie Ekareghẹhọ fihọ uke riẹ, ọ tẹ họrọ bru ọsẹ riẹ. Ọ tẹ kake riobọhọ uwoho na jẹ riobọhọ ọsẹ riẹ, ọ tẹ ta nọ “Whẹ!” Ọsẹ gbe oni riẹ a te ri ohwohwo avọ igbunu nọ a ruẹ nọ James o bi zizie ọsẹ riẹ kpohọ Ekareghẹhọ na. Ọsẹ riẹ ọ tẹ ta nọ ọ te daoma re ọ jariẹ.
Evaọ owọwọ Ekareghẹhọ na, James ọ tẹ nya kpobọ owa iwu ọsẹ riẹ, ọ tẹ salọ etrọza jọ, ọ tẹ rehọ iẹe bru ọsẹ riẹ, ọ tẹ rehọ abọ dhesẹ kẹe nọ o fi ei họ. Ọsẹ riẹ ọ tẹ kuyo nnọ o ti kpohọ ekareghẹhọ na ha. Fikiere, James avọ oni riẹ ọvo a te kpohọ obọ Ọgwa Uvie na.
Rekọ nọ oke jọ o te vrẹ no, o tẹ jọ enwenọ ọgbahọ re oni James o ru ei re a gbe kpohọ iwuhrẹ ukoko na, ọ gwọlọ nọ ukpoye ọ rẹ jọ uwou kugbe ọsẹ riẹ. Kẹsena evaọ ohiohiẹ Ẹdoka jọ, James ọ tẹ jẹ wariẹ se nọ o re lele oni riẹ kpohọ ewuhrẹ hẹ. Avọ igbunu kẹ oni riẹ, ọsẹ James ọ tẹ ta kẹe nọ, “James, otẹrọnọ me kpohọ ewuhrẹ nẹnẹ na, kọ whọ te nya re?” Ovao James o tẹ sasa. Ọ tẹ nwane r’abọ kpahe ọsẹ riẹ, ọ tẹ ta nọ “E!,” aimasa na a tẹ gbẹ nya kpobọ Ọgwa Uvie na.
No umuo ẹdẹ ọyena vrẹ, ọsẹ James o te muọ iwuhrẹ Ẹdoka kpobi họ ẹnya jẹ ta via nnọ re ọ sai wo ẹnyaharo, o re kpohọ iwuhrẹ efa re. (Ahwo Hibru 10:24, 25) Enẹ o ru, nọ emerae ivẹ e vrẹ no, o te muọ Ebaibol họ ewuhrẹ ẹsikpobi. O wo ẹnyaharo kpata kpata, je ru iwnene nọ i fo evaọ uzuazọ riẹ, u kri hi o te muọ usiuwoma ota Uvie na họ ẹnya. Nọ o wuhrẹ Ebaibol na vrẹ ukpe ovo no, ọ tẹ rehọ uzuazọ riẹ mudhe kẹ Jihova jẹ rehọ ame-ọhọ dhesẹ iẹe via. Enẹna ọ be gọ evaọ ukoko riẹ wọhọ odibo oruiruo. Uviuwou na kpobi o be gọ Jihova avọ okugbe enẹna.